Xikwembu xirhamba vanhu va tinxaka hinkwatu leswaku vatshinela ka xona hi kuyendla xikhongelo. (Tipisalema 65:2) Hambiswilitanu, axiyingisi swikhongelo hinkwaswu. Hi xikombisu, Xikwembu axiswiyingisi swikhongelo swa wanuna lweyi ahluphaka nsati wakwe. (1 Petro 3:7) Hingaswitwisisa sweswo hikuva loko Vaisrayele vayendla swilo swobiha ngopfu, Xikwembu axingaswiyingisi swikhongelo swa vona. Hambiswilitanu, Xikwembu xayingisa swikhongelo swa vanhu lava hundzukaka loko vayendle swihoxo leswikulu. Hambileswi xikhongelo i nga lunghelo lelikulu, hifanele hihambeta hiyendla leswinene leswaku Xikwembu xihiyingisa. — Lerha Esaya 1:15; 55:7.

Sixtira vhidiyu lelinge Xana Xikwembu Xi Yingisa Swikhongelo Hinkwaswu?

Xikhongelo i ndlela yin’wana ya kugandzela Xikwembu. Hikolaho, hifanele hikhongela ntsena ka muvumbi wa hina, Yehovha. (Matewu 4:10; 6:9) Nakambe, tani hileswi hinga hetisekangiki, hifanele hikhongela hi vitu la Yesu hikuva hi yena angatahifela kuva ahakela swidjoho swa hina. (Yohane 14:6) Yehovha angalavi leswaku hiphindhaphinda maritu lamafanaka loko hikhongela kumbe kuyendla swikhongelo leswitsaliweke. Alava leswaku hiphofula leswi hinga na swona mbilwini. — Lerha Matewu 6:7; Vafilipiya 4:6, 7.

Xikwembu xiyingisa hambi kuli swikhongelo leswi hiswiyendlelaka mbilwini. (1 Samuwele 1:12, 13) Xihirhamba leswaku hikhongela nkama wun’wani ni wun’wani, kungahava loko lixa ni loko lipela, loko hikumana ni swikarhatu kumbe loko hilava kudla. — Lerha Tipisalema 55:22; Matewu 15:36.

Kuva munghana wa Xikwembu aswivevukanga hikuva hihanya xikarhi ka vanhu lavanga kholwiki ka Xikwembu ni ka xitshembisu xa xona xotisa kurhula laha misaveni. (2 Timotiya 3:1, 4; 2 Petro 3:3, 13) Hikolaho, hilava kukhutazana ni lavanga ni lipfumelo lelifanaka ni la hina. — Lerha Vaheveru 10:24, 25.

Kutihlanganisa ni vanhu lavarhandzaka Xikwembu switahipfuna kuva vanghana va xona. Aminhlanganwini ya Timboni ta Yehovha hi kona hitiyisiwaka hi lipfumelo la van’wani. — Lerha Varhoma 1:11, 12.

Ungava munghana wa Xikwembu hi kuyanakanyisisa hi leswi se uswidjondzeke aRitweni la xona kunga Bibele, swo tani hi switsundzuxu ni switshembisu swa xona ni hi swilo leswi xiswiyendleke. Kukhongela ni kuyanakanyisisa switakupfuna kuvona lisima la lirhandzu ni wutlharhi la Xikwembu. — Lerha Yoxuwa 1:8; Tipisalema 1:1-3.

Ungava munghana wa Xikwembu ntsena loko uxitshemba ni kuva ni lipfumelo ka xona. Kambe tani hileswi xinsinyani xilavaka kucheleteliwa mati leswaku xihambeta xikula, na lona lipfumelo lilava wutivi leswaku lihambeta likula. Hikolaho, ufanele uyanakanyisisa hi swivangelo leswi kuyendlaka utiyiseka hi leswi ukholwaka ka swona. — Lerha Matewu 4:4; Vaheveru 11:1, 6.

Yehovha wakhatala hi lavamu rhandzaka. Atavasirhelela ka nchumu wun’wani ni wun’wani lowungaha hlaselaka lipfumelo la vona ni ntshembo wa vona wa kukuma wutomi lelingaheliki. (Tipisalema 91:1, 2, 7-10) Wahibasopisa ka mahanyelo ya misava leyi, lamanga vekaka wutomi la hina nghozini ni kuhiyendla hilahlekeliwa hi ntsaku. Hakunene Yehovha ahidjondzisa ndlela leyinene yohanya. — Lerha Tipisalema 73:27, 28; Yakobo 4:4, 8.