5 Loko a vona vanhu va vanyingi lava a va mu landzela, a tlhantuka a ya nhaveni; loko a tshame hansi, vadjondzisiwa va yena va mu landza. 2 Kutani a sungula ku va djondzisa, a ku:

3 “Va tsaka lava tikarhatelaka ku va vanghanu va Xikwembu, a hikusa Mfumu wa matilo i wa vona.

4 “Va tsaka lava rilaka, hikusa va ta singathiwa.

5 “Va tsaka va ku rhula, hikusa va ta dla tshomba la misava.

6 “Va tsaka lava twaka ndlala ni torha la swa ku lulama, hikusa va ta xurha.

7 “Va tsaka lava nga ni timpsalu, hikusa va ta kombiwa timpsalu.

8 “Va tsaka lava nga ni mbilu ya ku basa, hikusa va ta vona Xikwembu.

9 “Va tsaka lava yentxaka leswaku ku va ni ku rhula, hikusa va ta vitaniwa vana va Xikwembu.

10 “Va tsaka lava hluphiwaka hi mhaka ya swa ku lulama, hikusa Mfumu wa matilo i wa vona.

11 “Tsakani loko vanhu va mi rhuketela, va mi hlupha va tlhela va mi hembela hi swilo hinkwaswu swa ku biha hi mhaka ya mina. 12 Tsakani hintamu hikusa hakelo ya n’wina i yikulu matilweni; phela hambi vaprofeta lava nga hanya na mi nge se va kona, na vona va hluphisiwe xiswoleswo.

13 “N’wina mi munyu wa misava; kambe loko munyu wu heleliwa hi ntamu wa wona, ku dzun’wa ka wona ku nga pfuxetisiwa ku yini ke? A wa ha pfuni nchumu, wu ta txukumetiwa handle wu kandziheteliwa hi vanhu.

14 “N’wina mi ku vonakala ka misava. Doropa leli nga yakiwa ahenhla ka nhava, a li nge tumbetiwi. 15 Loko vanhu va tlhavika swa ku vona hi swona a va swi mbhonyi hi ndzhava, b kambe va swi veka henhla ka meza leswaku swi voningela hinkwavu lava nga lomu ndlwini. 16 Hi ku fanana, ku vonakala ka n’wina a ku voningi ka vanhu, leswaku va ta vona mintirho ya n’wina ya yinene kutani va dzunisa Papayi wa n’wina lweyi a nga matilweni.

17 “Mi nga pimisi swaku ni tele ku ta helisa Nawu kumbe Vaprofeta, kambe ni tele ku ta wu hetisisa, ku nga li ku helisa. 18 Ni mi byela ntiyiso: Hambi matilo ni misava swo hundza, a ku na letra ni lin’we kumbe xindzhatani ka Nawu, hambi xi li xin’we, lexi nga ta nyamalala na swilo leswi hinkwaswu swi nge se hetiseka. 19 Kutani lweyi a tlulaka wun’wana wa minawu leyi vanhu va pimisaka swaku a hi ya lisima, a tlhela a djondzisa van’wana ku yentxa leswo, a nge faneleki ku nghena ka Mfumu wa matilo. Kambe lweyi a nga ta yi yingisa a tlhela a yi djondzisa van’wana, a ta faneleka ku nghena ka Mfumu wa matilo. 20 Hikusa na mi byela: Loko ku lulama ka n’wina ku nga tluli ku lulama ka vatsali ni Vafarisi, a mi nga ta tshuka mi nghena ka Mfumu wa matilo.

  21 “Mi swi twile leswi nga byeliwa lava khale: ‘U nga tshuki u dlaya; kambe lweyi a dlayaka a ta tihlamulela atribunali.’ 22 Kambe mina na mi byela leswaku lweyi a tshamelaka ku kwatela makwavu a ta tihlamulela atribunali, kambe lweyi a rhuketelaka makwavu a mu poyila, a ta tihlamulela ka Tribunali la Likulu; kasi lweyi  a nge: ‘Xiphunta ndziwena’, a ta faneliwa hi Gehena c ya ndzilu.

23 “Hi mhaka leyo, loko u tisa gandzelo d la wena ka altari, kutani u khumbuka kolanu swaku makwenu a ku kwatelile, 24 siya gandzelo e la wena kolanu phambheni ka altari, u rhanga hi ku ya lunghisa mhaka ya kona ni makwenu, se hi kona u nga ta vuya u ta nyikela gandzelo la wena.

25 “Lunghisa timhaka hi ku hantlisa ni lweyi a ku mangalelaka na ma ha li ndleleni ya ku ya tribunali, leswaku a nga ku yisi ka muthethisi, se muthethisi a ku nyikela ka phoyisa, se u petiwa djele. 26 Phela a wu nge humi kolanu na u nge se hakela ni sentavhu f la wena la wugamu.

27 “Mi swi twile swaku ku vuliwe leswi: ‘U nga tshuki u mbuyeta.’ g 28 Kambe mina na mi byela: Mun’wana ni mun’wana lweyi a tshamelaka ku languta wansati a za a mu navela, se a mbuyetile h na yena ambilwini ya yena. 29 Kutani loko tihlo la wena la xinene li ku djohisa, i li xokoli u li txukumeta kule na wena. Hikusa swa yampsa swinene ku va u lahlekeliwa hi tihlo lin’we ku tlula ku va miri wa wena hinkwawu wu hoxiwa Gehena. j 30 Naswona loko voko la wena la xinene li ku djohisa, li tsemi u li txukumeta kule na wena. Hikusa swa yampsa swinene ku va u lahlekeliwa hi voko lin’we ku tlula ku va miri wa wena hinkwawu wu hoxiwa Gehena. k

31 “Naswona ku vuliwe leswi: ‘Lweyi a tshikaka nsati wa yena, a a mu nyiki papila la divhorsiyu.’ l 32 Kambe mina na mi byela: Lweyi a tshikaka nsati wa yena na ku nga li hi mhaka ya nsila ya swa masangu, a a mu hoxa ka ndzingo wa ku mbuyeta, b naswona lweyi a chadaka wansati lweyi a nga tshikiwa hi nuna wa yena, o mbuyeta.

33 “Naswona mi swi twile swaku lava khale va byeliwe leswi: ‘U nga tshuki u hlambanya u gama u nga yentxi; kambe u fanele u hetisisa switshembiso leswi u nga swi hlambanya ka Yehovha.’ 34 Kambe mina na mi byela: Mi nga tshuki mi hlambanya, hambi ku li hi tilo, hikusa i xitshamu xa wuhosi xa Xikwembu; 35 hambi ku li hi misava, hikusa i ndhawu ya ku veka minenge ya xona; hambi ku li hi Jerusalema, hikusa i doropa la Hosi ya yikulu. 36 U nga hlambanyi hi nhloko ya wena, hikusa a wu nge swi koti ku txintxa nsisi ni wun’we wu va wa ku basa kumbe wa ntima. 37 Kambe ‘Ina’ wa n’wina a a ve ina, ‘Ihim’ wa n’wina a va Ihim; hikusa swa ku tlula leswi swi ta hi ka Davulosi. c

38 “Mi swi twile swaku ku vuliwe leswi: ‘Tihlo hi tihlo, tinyo hi tinyo.’ 39 Kambe mina na mi byela: Mi nga lwisani na yena  lweyi a mi yentxelaka swa ku biha; kambe loko munhu a ku yamasa rhama la xinene, mu nyiki ni lelin’wana. 40 Loko munhu a lava ku ku yisa tribunali leswaku a ta ku tekela hembe la wena, mu nyiki ni mudjansi; 41 naswona loko munhu lweyi a nga ni matimba a ku sindzisa ku famba mpfhuka wa 1 kilometru, famba na yena 2 wa makilometru. 42 Nyika lweyi a ku kombelaka, naswona u nga yali loko munhu a lava ku lomba d xanchumu ka wena.

43 “Mi swi twile swaku ku vuliwe leswi: ‘U fanele u rhandza vanhu van’wana, kambe u nyenya lava ku nyenyaka.’ 44 Kambe mina na mi byela: Tamani mi rhandza lava mi nyenyaka ni ku khongelela lava mi hluphaka, 45 leswaku swi ta tikomba swaku mi vana va Papayi wa n’wina lweyi a nga matilweni, lweyi a humesaka dlambu la yena ka vanhu va ku biha ni va vanene naswona a nisaka mpfula ka vanhu va ku lulama ni va ku kala va nga lulamanga. 46 Hikusa loko mi rhandza lava mi rhandzaka, mi pfuneka hi yini ke? Hambi vahakelisi va rhesa a va yentxi leswo ke? 47 Loko mi xoweta vamakwenu ntsena, i ntxini xa lisima mi xi yentxaka? Hambi vanhu vamatiko a va yentxi leswo ke? 48 Hi mhaka leyo, mi fanele mi va va ku hetiseka, ku fana ni leswi Papayi wa n’wina wa le tilweni a nga hetiseka.

6 “Tivoneleni swaku mi nga yentxi swa ku lulama hi ku lava ku voniwa hi vanhu hikusa Papayi wa n’wina wa le matilweni a nga ta mi katekisa. 2 Hi mhaka leyo, loko u nyika nchumu xisiwana, e u nga rhangi hi ku ba mpepo, ku fana ni leswi vakanganyisi va yentxisaka xiswona ka masinagoga ni lomu tindleleni, swaku va ta dzunisiwa hi vanhu. Ni mi byela ntiyiso: Xikwembu a xi nge va katekisi. 3 Kambe wena, loko u nyika xisiwana nchumu, voko la wena la ximatsi li nga swi tivi leswi yentxiwaka hi la xinene, 4 leswaku ku nyika ka wena ku va xihundleni. Kutani Papayi wa wena lweyi a vonaka hinkwaswu a ta ku katekisa.

5 “Naswona loko mi khongela, mi nga fani ni vakanganyisi lava rhandzaka ku khongela na va nyimile ka masinagoga ni lomu tindlela ta tikulu ti tlhanganaka kona leswaku va voniwa hi vanhu. Ni mi byela ntiyiso: Xikwembu a xi nge va katekisi. 6 Kambe loko wena u khongela, nghena ndlwini ka wena u pfala xipfalu, u gama u khongela ka Papayi wa wena lweyi a kalaka a nga voniwi. Kutani Papayi wa wena lweyi a vonaka hinkwaswu a ta ku katekisa. 7 Loko u khongela, u nga phindhaphindhi minchumu ya ku fana, ku fana ni leswi vanhu vamatiko va yentxisaka xiswona, hikusa va pimisa swaku va ta twiwa loko va vula marito ya manyingi. 8 Kutani mi nga fani na vona, hikusa Papayi wa n’wina wa swi tiva leswi mi swi pfumalaka na mi nge se swi kombela.

9 “Kutani mi fanele mi khongelisa xileswi:

“‘Papayi wa hina lweyi a nga matilweni, vito la wena a li kwetsimisiwi. f 10 Mfumu wa wena a wu te. Ku rhandza ka wena a ku yentxeki amisaveni ku fana ni leswi ku yentxekisaka xiswona tilweni. g 11 Hi nyiki pawu h la siku la namuntlha; 12 naswona hi rivaleli swidjoho i swa hina, ku fana na hina hi va rivalelaka lava hi djohelaka. 13 Hi pfuni leswaku hi nga hluliwi hi ndzingo; u hi vhikela ka Davulosi.’ j

14 “Hikusa loko mi rivalela vanhu swidjoho swa vona, na yena Papayi wa n’wina wa le tilweni a ta mi rivalela; 15 kasi loko mi nga va rivaleli, na yena Papayi wa n’wina a nga ta mi rivalela.

 16 “Loko mi jejuwara, k tshikani ku boha swimombo ku fana ni vakanganyisi, hikusa a va hlambi matihlo kuva vanhu va ta swi vona swaku va jejuwara. Ni mi byela ntiyiso: Xikwembu a xi nge va katekisi. 17 Kambe loko mi jejuwara, tolani mafurha ka tinhloko ta n’wina, mi hlamba ni matihlo, 18 kuva vanhu va nga swi voni swaku mi le ku jejuwareni, kambe mi voniwa ntsena hi Papayi wa n’wina lweyi a vonaka swilo hinkwaswu. Kutani Papayi wa n’wina lweyi a mi vonaka hambi a nga voniwi, a ta mi katekisa.

19 “Tshikani ku tihlengeletela tshomba amisaveni, lomu li nga ta dliwa hi swivungwana li tlhela li kurha, ni lomu vayivi va nga tlhanyaka va yiva. 20 Kambe tihlengeleteleni tshomba atilweni, lomu swivungwana ni ku kurha swi kalaka swi nga li kona, ni lomu vayivi va kalaka va nga tlhanyi va yiva. 21 Hikusa lomu tshomba la wena li nga kona ni mbilu ya wena yi ta va kolanu.

22 “Gezi la miri i tihlo. Kutani, loko tihlo la wena li langute nchumu xin’we ntsena, miri wa wena hinkwawu wu ta voninga. 23 Kambe loko tihlo la wena li nga lulamanga, l miri wa wena hinkwawu wu ta va munyama. Se loko ku vonakala loku nga ka wena ku li munyama hikakunene, munyama wa kona wu ta va wukulu swinene!

24 “A ku na munhu lweyi a nga tirhelaka tihosi timbirhi; hikusa a ta nyenya yin’we a rhandza leyin’wana, kumbe a ta namarhela yin’we a yeyisa leyin’wana. A mi nge swi koti ku tirhela Xikwembu ni Male a hi nkama wun’we.

25 “Hi mhaka leyo na mi byela: Tshikani ku vilela hi wutomi la n’wina loko swi ta ka leswi mi nga ta swi dla kumbe leswi mi nga ta swi nwa, kumbe ku vilela hi miri wa n’wina leswaku mi ta yambala yini. A wutomi a li swi tluli swakudla ni miri a wu yi tluli mpahla ke? 26 Langutisani kahle swinyenyana: A swi byali mbewu, a swi tshoveli naswona a swi hlengeleti nchumu tshaleni; kambe Papayi wa n’wina wa le tilweni wa swi wundla. Se n’wina ke? A mi swi tluli hi lisima ke? 27 I mani ka n’wina lweyi hi ku vilela a nga yengetelaka hambi 1 minutu ka wutomi la yena? 28 Hambi mpahla, hi mhaka muni mi vilela hi yona? Djondzani ka leswi swiluva b swa nhova swi kulisaka xiswona; a swi tirhi naswona a swi rhungi mpahla; 29 kambe na mi byela swaku hambi Solomoni lweyi a a ni minchumu ya yinyingi ya ku xonga, a nga zanga a yambala ku fana ni xin’we xa swona. 30 Se leswi Xikwembu xi yambexaka swinsinyana swa nhova hi ndlela leyi, leswi nga kona namuntlha kasi mundzuku swi hoxiwa ka ndzilu, ku nga va leswaku a xi nge mi yambexi ku swi tlula n’wina mi nga ni lipfumelo la litsongo? 31 Kutani mi nga tshuki mi vilela mi ku: ‘Se hi ta dla yini?’ kumbe: ‘Se hi ta nwa yini?’ kumbe: ‘Se hi ta yambala yini?’ 32 Hikusa hinkwaswu leswi, hi leswi vamatiko va waka va pfuka leswaku va swi kuma. Phela Papayi wa n’wina wa le tilweni wa swi tiva swaku ma swi lava swilo leswi hinkwaswu.

33 “Kutani, tamani mi lava Mfumu ni ku lulama ka Xikwembu ku sungula, se swilo leswin’wana hinkwaswu mi ta nyikiwa swona. 34 Mi nga tshuki mi vilela hi swa mundzuku, hikusa siku la mundzuku li ta va ni mivilelo ya lona. Siku lin’wana ni lin’wana li ni swikarhatu swa lona.

7 “Tshikani ku yavanyisa van’wana leswaku mi nga yavanyisiwi; 2 hikusa leswi mi va yavanyisaka xiswona van’wana, na n’wina mi ta yavanyisiwa xiswona; naswona leswi mi va khomisaka xiswona van’wana, na n’wina mi ta khomisiwa xiswoleswo. c 3 Kutani hi mhaka muni u languta xilavi lexi nga ka tihlo la makwenu,  kambe u nga swi koti ku vona xigodo lexi nga ka tihlo la wena? 4 Kumbe u nga mu byelisa ku yini makwenu u ku: ‘Ni tshiki ni susa xilavi lexi nga ka tihlo la wena’, ku ve ku ni xigodo ka tihlo la wena? 5 Mukanganyisi! Rhanga hi ku susa xigodo lexi nga ka tihlo la wena, se hi kona u nga ta kota ku susa xilavi xi nga ka tihlo la makwenu.

6 “Mi nga nyiki timbyana swilo swa ku kwetsima, hambi ku hoxa maperola ya n’wina ka makhumba, hikusa ma ta ma psanyetela ma tlhela ma mi djikela ma mi vavisa.

7 “Tamani mi kombela, mi ta nyikiwa; tamani mi lava, mi ta swi kuma; tamani mi gongondza, mi ta pfuleliwa. 8 Hikusa lweyi a kombelaka a ta nyikiwa, lweyi a lavaka a ta swi kuma naswona lweyi a gongondzaka a ta pfuleliwa. 9 Kunene, i mani xikarhi ka n’wina lweyi loko n’wana wa yena a kombela pawu, a nga mu nyikaka ribye? 10 Kumbe loko a kombela hlampfi, a nga mu nyikaka nyoka ke? 11 Se loko n’wina hambileswi mi nga vadjohi, mi swi kotaka ku nyika vana va n’wina swilo swa swinene, Papayi wa n’wina lweyi a nga matilweni a nge va nyiki hi ku tlulisa lava mu kombelaka ke?

12 “Kutani hinkwaswu leswi mi lavaka swaku van’wana va mi yentxela swona, na n’wina mi fanele mi va yentxela. Hikusa leswi, hi swona leswi djondzisiwaka hi Nawu ni Vaprofeta.

13 “Nghenani hi nyanghwa wa wutsongo, hikusa nyanghwa lowu yisaka ku lovisiweni i wukulu ni ndlela ya kona yi pfulekile, naswona i vanyingi lava nghenaka hi wona; 14 kasi a nyanghwa lowu yisaka wuton’wini wu lalile ni ndlela ya kona yi kamanile, naswona i vatsongo lava yi kumaka.

15 “Tivoneleni ka vaprofeta va mavunhwa lava taka ka n’wina na va yambale xikhumba xa nyempfu, ku ve hi ndzeni i mahlolwa d lama kakatlulaka. 16 Mi ta va tiva hi mintirho e ya vona. A swi nge koteki swaku vanhu va khaya mawuvha kumbe makuwa ka switlhavani, f a hi swona ke? 17 Hi ku fanana, nsinya wa wunene wu psala mafruta ya manene, kambe nsinya wa ku bola wu psala mafruta ya ku bola. 18 Nsinya wa wunene a wu nge psali mafruta ya ku bola, hambi nsinya wa ku bola a wu nge psali mafruta ya manene. 19 Nsinya lowu kalaka wu nga psali mafruta ya manene wa tsemiwa wu hoxiwa ndzilweni. 20 Se a vanhu volavo mi ta va tiva hi mintirho ya vona.

21 “A hi vanhu hinkwavu lava ni vitanaka va ku: ‘Hosi, Hosi’, lava nga ta nghena ka Mfumu wa matilo, kambe ku ta nghena ntsena lava yentxaka ku rhandza ka Papayi wa mina lweyi a nga matilweni. 22 Hi siku lolelo va ku tala va ta ku ka mina: ‘Hosi, Hosi, a hi profetanga hi vito la wena, hi hlongola madimoni hi vito la wena ni ku yentxa masingita ya manyingi hi vito la wena ke?’ 23 Kutani hi nkama wolowo ni ta va byela ni ku: ‘A ni zanga ni mi tiva! Sukani lani ka mina, n’wina vadjohi.’

24 “Hi mhaka leyo, lweyi a twaka leswi ni swi vulaka kutani a swi yentxa a ta fanisiwa ni wanuna wa ku tlhariha, lweyi a nga yaka yindlo ya yena henhla ka ribye. 25 Kutani loko ku na mpfula, ku ta tindhambi ni moya wa wukulu swi ba yindlo yoleyo, yi nga wi, hikusa a yi yakiwe henhla ka ribye. 26 Kambe lweyi a twaka leswi ni swi vulaka a gama a nga swi yentxi, a ta fanisiwa ni wanuna wa xiphunta, lweyi a nga yaka yindlo ya yena ka misava. 27 Se loko ku na mpfula, ku ta tindhambi ni moya wa wukulu swi ba yindlo yoleyo kutani yi wa, naswona ku wa ka yona ku va kukulu hintamu.”

28 Loko Yesu a gama ku vula leswo, vanhu va hlamala madjondziselo ya yena; 29 hikusa a a nga djondzisi ku fana ni vatsali; leswi a a swi djondzisa a swi ta hi ka Xikwembu.