NDZIMA 17
Pawulo “A Va Pfuna Ku Twisisa Matsalwa”
Leswi nga hi pfunaka swaku hi va vadjondzisi vavanene; xikombiso xaxinene xa vanhu va Bereya
Yi susiwe ka Mintirho 17:1-15
1, 2. I vamani lava a va yendza ku sukela aFilipiya ku ya aTesalonika naswona swi nga yendlaka a va pimisa hi yini?
A KU NI xitaratu lexi a ku hundza vanhu va vanyingi, lexi nga yendliwa hi Varoma lava a va swi kotaka kahle ku yaka naswona xitaratu lexi a xi hundza hi ka tintshava leti nga ni maribye. Minkama yin’wani a ku twakala guwa la timbongolo, guwa la maroda ya tinyolo leti fambaka ka maribye naswona a ku tlhela ku twakala guwa la vanhu va ku hambanahambana lava a va yendza hi xitaratu xolexo. A ku hundza masonchwa, vaxavisi ni vanhu lava a va hamba swilo swa ku hambanahambana. Vamakwerhu vanharhu lava a va li vanghanu ku nga Pawulo, Silasi na Timotiya na vona a va famba hi xitaratu xolexo na va li ka liyendzo leli a li ta teka kolomuyani ka 130 wa makilometru, ku sukela aFilipiya ku ya aTesalonika. Phela liyendzo la vona a li nga vevuki, ngopfungopfu ka Pawulo na Silasi hikusa a va ha twa ku vava hi mhaka ya swilondza leswi a va li na swona hi mhaka ya leswi va nga biwa aFilipiya. — Min. 16:22, 23.
2 I mpsini swi pfunaka vavanuna lava vavanharhu swaku va nga pimisi hi liyendzo la ku leha leli a va ta li yendla? Mabulu ya ku tsakisa ma pfuna. Phela va ha tsake hintamu hileswi nga yendleka aFilipiya, hikusa muvoneleli wa djele ni ndjangu wa yena va ve vadjondzisiwa. Leswi nga yendleka swi va pfunile leswaku va tinyimisela ku tama va chumayela rito la Xikwembu, kambe loko va ya va fika ka doropa la Tesalonika swi nga yendleka a va tivutisa swaku Vayuda a va ta va vonisa ku yini. Ku nga va swaku a va ta va hlupha va tlhela va va ba ku fana ni leswi nga yendleka aFilipiya?
3. Xikombiso xa Pawulo xa ku hlula ku chava ku chumayela mahungu ya ku tsakisa, xi nga hi pfunisa ku yini hina namuntlha?
3 Hi ku famba ka nkama, Pawulo a vule leswi a a titwisa xiswona nkama a nga tsalela vamakwerhu va le Tesalonika a ku: “Hikusa hambileswi hi nga rhanga hi ku hlupheka ni ku rhuketeliwa aFilipiya, ku nga mhaka leyi mi yi tivaka, Xikwembu xa hina xi hi tiyise nhlana swaku hi kota ku mi chumayela mahungu ya ku tsakisa ya Xikwembu, hambiloko hi kanetiwa swinene.” (1 Tes. 2:2) Marito lawa ma kombisa swaku Pawulo a a chavanyana ku nghena ka doropa la Tesalonika, ngopfungopfu hi mhaka ya leswi swi nga mu humelela aFilipiya. Indjhe na wena u tshama u titwisa xileswo? Minkama yin’wani swa ku karhatela ku chumayela mahungu ya ku tsakisa? Pawulo a a tshemba leswaku Yehovha a a ta mu pfuna leswaku a nga chavi kambe a tiya. Se ku djondza hi xikombiso xa Pawulo, swi nga ku pfuna na wena swaku u yendla swa ku fana. — 1 Ko. 4:16.
Pawulo . . . “A Va Pfuna Ku Twisisa Matsalwa” (Mintirho 17:1-3)
4. Hi mhaka muni swi nga yendlekaka Pawulo a hete nkama wa ku tlula mavhiki manharhu aTesalonika?
4 Bibele li vula swaku a nkama na a li Tesalonika, Pawulo a chumayelile ka sinagoga ku ringana Tisavata tinharhu. Indjhe leswo swi lava ku vula swaku Pawulo a yo tshama aTesalonika mavhiki manharhu ntsena? A swi vuli swona. A hi swi tivi swaku nkama Pawulo a nga fika ka doropa lelo a hete masiku mangaki na a nga se ya ka sinagoga. Handle ka leswo, makarta lawa Pawulo a nga ma tsala ma kombisa swaku nkama na a li Tesalonika ni vamakwerhu lava a nga yendza na vona swi lave swaku va tirha leswaku va kuma swa ku tihanyisa hi swona. (1 Tes. 2:9; 2 Tes. 3:7, 8) Nakambe, ka nkama lowu Pawulo a nga wu heta na a li Tesalonika, a pfuniwe kambirhi hi vamakwerhu va Filipiya hi ku mu nyika swakudla ni swin’wani. (Filp. 4:16) Se swi tikomba a nkama lowu Pawulo a nga wu heta na a li Tesalonika a ku vanga mavhiki manharhu ntsena.
5. Pawulo a va pfunise ku yini vanhu leswaku va twisisa Matsalwa?
5 Nkama Pawulo a nga hlula ku chava ku chumayela, a vulavule ni vanhu lava a va tlhanganile ka sinagoga. Hilani a a talisa ku yendla hi kona Pawulo a “a va pfuna ku twisisa Matsalwa ni ku lerha tindzimana ta Matsalwa, a tlhela a tlhamusela swaku a swi laveka kuva Kreste a hluphiwa a tlhela a pfuxiwa ka lava nga fa, a ku: ‘Yesu lweyi ni mi byelaka hi yena, hi yena Kreste.’” (Min. 17:2, 3) Phela a a nga lavi ku yendla swaku lava a va mu yingisela va tsakisiwa hi leswi a a swi vula ntsena kambe a a lava ku va pfuna swaku va twisisa Matsalwa. Pawulo a a swi tiva swaku lava a va tlhanganile ka sinagoga a va ma tiva va tlhela va ma hlonipha Matsalwa kambe a va nga ma twisisi hi ku helela. Hi mhaka leyo, Pawulo a a tirhisa Matsalwa swaku a va tlhamusela a tlhela a va kholwisa swaku Yesu lweyi wa Munazareta a ku li yena Mesiya kumbe Kreste.
6. Yesu a a ma tirhisisa ku yini Matsalwa naswona a swi va pfunisa ku yini vanhu?
6 Pawulo a landzele xikombiso xa Yesu hikusa na yena a a tirhisa Matsalwa loko a djondzisa vanhu. Hi xikombiso, nkama Yesu na a chumayela a a byela vadjondzisiwa va yena leswaku hi ku ya hi Matsalwa, N’wana wa munhu a a fanele a hluphiwa, a fa a gama a pfuxiwa. (Mat. 16:21) Nkama Yesu a nga pfuxiwa a humelele ka vadjondzisiwa va yena, phela leswo a swi ta va swi yenelile kuva a kombisa swaku leswi a a swi vula a ku li ntiyiso. Kambe Yesu a nga yendlanga leswo ntsena, Yesu a yendle leswi ka vadjondzisiwa va yena: “Kutani a va tlhamusela swilo hinkwaswu leswi Matsalwa ma swi vulaka hi yena. A va tlhamusele ku sukela ka leswi nga tsaliwa hi Moxe ku fikela ka Vaprofeta hinkwavu.” Se ku game ku yendleka yini? Vadjondzisiwa va te: “A ti nga pfurhi timbilu ndzeni ka hina na a vulavula na hina ndleleni, na a hi tlhamusela Matsalwa hi ndlela ya ku twisiseka?” — Luk. 24:13, 27, 32.
7. Hi mhaka muni swi li swa lisima ku djondzisa leswi nga ka Bibele?
7 Rito la Xikwembu li ni matimba. (Heb. 4:12) Ku fana na Pawulo ni vapostolo van’wani na Yesu, hina Vakreste namuntlha hi djondzisa leswi nga ka Rito la Xikwembu. Nakambe hi tlhela hi pfuna vanhu ku twisisa leswi nga ka Rito la Xikwembu hi ku va tlhamusela leswi li swi vulaka ni ku tlhela hi va lerhela leswi Bibele li swi vulaka. Phela leswi hi swi djondzisaka a hi swa hina. Se loko hi tirhisa a Bibele nkama ni nkama, hi pfuna vanhu kuva va vona swaku leswi hi swi djondzisaka a hi swa hina kambe hi djondzisa leswi nga ka Rito la Xikwembu. Nakambe hi yendla kahle loko minkama hinkwayu hi khumbuka leswaku leswi hi swi chumayelaka swi ta hi ka Rito la Xikwembu naswona Rito la Xikwembu la tshembeka. Ku tiva leswo a swi ku tiyisi leswaku ku fana na mupostolo Pawulo u chumayela mahungu ya ku tsakisa na u nga chavi nchumu?
“Van’wani . . . Va Va Vapfumeli” (Mintirho 17:4-9)
8-10. a) Vanhu va Tesalonika va ma yamukelise ku yini mahungu ya ku tsakisa? b) Hi mhaka muni Vayuda van’wani va sungule ku kweleta Pawulo? c) Vayuda lava a va nyenya Pawulo va yendle yini?
8 Pawulo a a swi tiva swaku Yesu a a vula ntiyiso loko a ku: “Xikarawa a xi mu tluli n’winyi wa xona. Loko va ni xanisile, na n’wina va ta mi xanisa; loko va ni yingisile, na n’wina va ta mi yingisa.” (Yoh. 15:20) Phela leswo hi leswi nga yendlekela Pawulo aTesalonika. Van’wani a va lava ku “yingisa” kambe van’wani a va nga lavi ku twa nchumu hi leswi a a swi chumayela. Luka a tsale leswi mayelana ni lava va nga yamukela mahungu ya ku tsakisa: “Van’wani ka vona [Vayuda] va va vapfumeli [Vakreste] kutani va nyima na Pawulo na Silasi. Naswona Vagriki va vanyingi lava a va gandzela Xikwembu ni vavasati va ku hlonipheka na vona va ve vapfumeli.” (Min. 17:4) A hi kanakani swaku vadjondzisiwa lava va nyuwani va tsake hintamu hi kuva va pfuniwe swaku va ma twisisa kahle Matsalwa.
9 Hambileswi vanhu van’wani va nga teka marito ya Pawulo na ma li ya lisima swinene, vanhu van’wani ma va kwatisile swinene. Phela Vayuda van’wani lava a va li Tesalonika va sungule ku va ni wukwele hileswi “Vagriki va vanyingi” va nga yamukela mahungu ya ku tsakisa lawa Pawulo a a ma chumayela. Phela leswi a va lava ku yendla swaku Vagriki lavayani va nghena ka wukhongeli la Xiyuda, va va djondzise Matsalwa ya Xiheberu naswona a va teka vanhu volavo na va li va vona. Kambe swoswi a swi fana ni loko Pawulo a va yivela vanhu va vona na va swi vona ka sinagoga. Phela Vayuda lavayani a va kwatile swinene.
A va lavetela “Pawulo na Silasi swaku va humesiwa handle ka xitshungu.” — Mintirho 17:5
10 Luka a hi byela leswi nga gama swi yendleka, a li: “Vayuda va tala hi wukwele, se va hlengeleta ntlawa wa vavanuna va timbilu ta ku biha lava a va tirha ku rhendzelekela mabazara, kutani va hlengeleta xitshungu va gama va sungula ku pfuxa ximusi doropeni. Va dumele munti wa Yaso na va lava Pawulo na Silasi swaku va humesiwa handle ka xitshungu. Loko va nga va kumi, va kokakoka Yaso ni vapfumeli van’wani va va yisa ka tihosi ta doropa va fika va ku: ‘Vanhu lava nga pfuxa mpfilumpfilu misaveni va fikile ni kola, se Yaso a va yamukelile kaya ka yena. Vavanuna lava hinkwavu va lwisana ni minawu ya Khezari, va hlaya swaku ku ni hosi yin’wani leyi va nge i Yesu.’” (Min. 17:5-7) Se mhaka leyi a yi ta mu khumbisa ku yini Pawulo ni vamakwerhu lava a a li na vona?
11. I mpsini leswi Pawulo ni vadjondzisiwa va nga lumbetiwa hi swona, naswona lava a va nyenya Pawulo swi nga yendleka a va pimisa hi nawu wihi? (Vona ntlhamuselo.)
11 Vanhu lava nga tereka va ni nghozi, va fana ni mati ya ndhambhi, va kukula hinkwaswu leswi va swi kumaka ndleleni. Leswo hi leswi Vayuda va nga swi yendla nkama lowu a va lava ku helisa Pawulo na Silasi. Phela nkama lowu Vayuda va nga pfuxa ximusi, va zame ku kholwisa tihosi swaku vadjondzisiwa a va yendle swilo swa ku biha hintamu. Ku sungula va lumbete Pawulo ni vadjondzisiwa hi ku vula swaku va “pfuxa mpfilumpfilu misaveni,” hambileswi Pawulo ni vadjondzisiwa a va nga zanga va pfuxa mpfilumpfilu aTesalonika. Leswi va nga gama va va lumbeta hi swona a swi tikomba swi bihile hintamu ku tlula swa ku sungula, Vayuda va vule swaku vamisiyonariyu lava a va vula swaku ku ni Hosi yin’wani ku nga Yesu Kreste. Phela leswo a swi tlula nawu wa hosi. a
12. I mpsini leswi kombisaka swaku leswi Vakreste a va lumbetiwa hi swona aTesalonika a swi veka wutomi la vona nghozini?
12 Khumbuka swaku varhangeli va wukhongeli a va lumbete Yesu hi swilo swa ku fana ni swoleswo. Vona va byele Pilatu va ku: “Hi kume wanuna lweyi na a hlohlotela vanhu swaku va terekela mfumu, . . . a tlhela a vula swaku hi yena Kreste naswona i hosi.” (Luk. 23:2) Swi nga yendleka Pilatu a nyikele Yesu swaku a dlayiwa hi ku chava swaku hosi a yi ta pimisa swaku yena a pfumelela vanhu swaku va djikela wuhosi. Hi ku fanana, leswi Pawulo ni Vakreste lavan’wani va nga lumbetiwa hi swona aTesalonika, swi nga yendleka a swi ta va swi yendle swaku va dlayiwa. Buku lin’wani li li: “Swa twala kuva hi vula swaku Vakreste lava a va li nghozini hi mhaka ya leswi va nga lumbetiwa swona ‘kuva munhu a lumbetiwa ntsena swaku a djikela wuhosi, minkama ya ku tala a swi yendla swaku a dlayiwa.’” Se ku nga va swaku leswo a swi ta yendleka ka vadjondzisiwa lava?
13, 14. a) I mpsini swi nga yendla swaku vanhu lava a va nyenya Pawulo a tsandzeka ku nyimisa ntirho wa ku chumayela aTesalonika? b) Pawulo a ma yingisise ku yini marito ya Yesu ya ku tlhariha ku fana ni tinyoka naswona hi nga mu tekelelisa ku yini?
13 Vanhu lava a va nyenya Pawulo a va swi kotanga ku nyimisa ntirho wa ku chumayela aTesalonika. Hi mhaka muni? Xin’wani hi leswaku a va swi kotanga ku kuma Pawulo na Silasi. Naswona swi tikomba ingaku tihosi ta doropa a ti swi nyikanga lisima leswi a va lumbetiwa hi swona. Nkama ti nga kombela leswaku ku humesiwa “male ya ku hakela nandzu” ti game ti chunsa Yaso ni vamakwerhu lavan’wani. (Min. 17:8, 9) Pawulo a landze marito ya Yesu lawa ma nge: “Tlharihani ku fana ni tinyoka mi tlhela mi va va ku rhula ku fana ni matuva” hi ku baleka leswaku a ya tama a chumayela ka ndhawu yin’wani. (Mat. 10:16) Swa tikomba swaku hambileswi Pawulo a nga hlula ku chava ku chumayela mahungu ya ku tsakisa, a nga zanga a veka wutomi la yena nghozini hi maxivomu. Se Vakreste va nga xi tekelelisa ku yini xikombiso xa yena?
14 Ninamuntlha, vafundhisi va tolovela ku yendla swaku vanhu va djikela Timboni ta Yehovha. Hi xikombiso, va yendla swaku tihosi ti hlupha Timboni ta Yehovha hi ku ti lumbeta swaku ti djikela mfumu ti tlhela ti kanganyisa vanhu. Ku fana ni lava a va hlupha Vakreste va minkama ya Vapostolo, lava va hi nyenyaka va hi hlupha hileswi va nga ni wukwele. Hambi swo yini, Vakreste va ntiyiso va yendla hinkwaswu swaku va nga tipeti ka swikarhatu. Hi yendla hinkwaswu leswi hi nga swi kotaka swaku hi fambela kule ni vanhu lava nga kwata ni lava kalaka va nga lavi ku twa nchumu hi leswi hi swi vulaka. Loko hi yendla leswo hi tama hi chumayela hi ku rhula, naswona loko swi koteka hi nga ha tlhela hi tlhelela ka vona loko swilo swi yampsa.
“A Va Rhandza Ku Djondza” (Mintirho 17:10-15)
15. Vanhu va Bereya va ma yamukelise ku yini mahungu ya ku tsakisa?
15 Leswaku va vhikela Pawulo na Silasi, vamakwerhu va va rhumele aBereya kolomuyani ka 65 wa makilometru loko u suka Tesalonika. Nkama va nga fika Bereya, Pawulo a ye ka sinagoga a fika a vulavula ni vanhu lava a va tlhanganile kona. Phela swi tsakise ndjhani ku kuma vanhu lava a va ma yamukela mahungu ya ku tsakisa! Luka a tsale swaku Vayuda va Bereya “a va rhandza ku djondza ku tlula va le Tesalonika hikusa va yamukele rito hi mbilu hinkwayu; A va kambisisa kahle Matsalwa siku ni siku, ku vona swaku leswi va nga swi twa a ku li ntiyiso.” (Min. 17:10, 11) Indjhe marito lawo a ma kombisa swaku vamakwerhu va Tesalonika lava na vona va nga yamukela ntiyiso a va nga li va lisima? Ihim, a swi nga vuli swona. Hi ku famba ka nkama Pawulo a va tsalele a ku: “Hi khensa Xikwembu nkama hinkwawu, hikusa nkama mi nga yamukela rito la Xikwembu leli mi nga li twa ka hina, a mi li yamukelanga ingaku i rito la vanhu kambe mi li yamukele na li li rito la Xikwembu leli tirhaka ni le ka n’wina vapfumeli.” (1 Tes. 2:13) Kambe hi mhaka muni ku vuliwa swaku Vayuda va Bereya a va rhandza ku djondza?
16. Hi mhaka muni ku vuliwa swaku vanhu va Bereya “a va rhandza ku djondza”?
16 Phela vanhu va Bereya a vo sungula ku twa mahungu ya ku tsakisa, kambe a va zanga va ma kanakana kumbe va ma kaneta. Hi nkama wolowu wa wun’we a va kombisanga swaku a va kholwa ka xin’wani ni xin’wani lexi a va xi twa. Ku sungula va yingisele kahle leswi Pawulo a a va byela swona, va gama va kambisisa Matsalwa lawa Pawulo a a va tlhamusela. Va tlhele va djondza Rito la Xikwembu hi ku hiseka, ku nga li hi Tisavata ntsena, kambe siku ni siku. Naswona va yendle leswo hi mbilu hinkwayu, na va zama ku vona swaku leswi a va djondzisiwa swona a swi yelana ni leswi Matsalwa a ma vula swona. Hi wugamu va kombise swaku a va tiveka hansi hi ku txintxa wutomi la vona, hikusa “ku tala ka vona va ve vapfumeli”. (Min. 17:12) A swi hi hlamalisi leswi Luka a nga vula swaku vanhu va le Bereya “a va rhandza ku djondza”.
17. Hi mhaka muni vanhu va Bereya va li xikombiso xaxinene naswona hi nga va tekelelisa ku yini hambiloko se hi ni malembe ya manyingi na hi tirhela Yehovha?
17 Vanhu va Bereya a va nga swi tivi swaku leswi va nga ma yamukelisa swona mahungu ya ku tsakisa a swi ta tsaliwa ka Rito la Xikwembu tanihi xikombiso xa vanhu lava rhandzaka ku djondza ni lava nga ni wunghanu lalinene la Yehovha. Phela vona va yendle leswi Pawulo a a nyimele swaku va swi yendla ni leswi Yehovha a a lava swaku va swi yendla. Na hina hi pfuna vanhu swaku va li kambisisa kahle Bibele swaku va va ni lipfumelo la ku tiya ka leswi nga tsaliwa ka Rito la Xikwembu. Kambe ku nga va swaku loko se hi li Vakreste a swa ha bohi swaku hi rhandza ku djondza? Ihim, ku hambana ni leswo, swi ya swi va swa lisima hintamu kuva hi rhandza ku djondza hi Yehovha ni ku hanya hi leswi hi swi djondzaka. Loko hi yendla leswo hi ta pfumelela Yehovha swaku a hi kongomisa a tlhela a hi djondzisa ku yendla ku rhandza ka yena. (Esa. 64:8) Hi ndlela leyo hi ta tama hi tsakisa Papayi wa hina wa tilweni ni ku wu yendla kahle ntirho wa hina.
18, 19. a) Hi mhaka muni Pawulo a sukile Bereya naswona a hi vekelise ku yini xikombiso xaxinene xa ku tiyisela? b) I vamani lava Pawulo se a a ta va chumayela naswona kwini?
18 Pawulo a nga tshamanga nkama wa wunyingi aBereya. Bibele li li: “Loko Vayuda va le Tesalonika va twa swaku Pawulo a chumayela rito la Xikwembu aBereya, va tile va ta hlohlotela xitshungu ni ku xi dunga nhloko. Se vamakwerhu bandleni va kahlula va humesa Pawulo va mu yisa lwandle, kambe Silasi na Timotiya va sala Bereya. Kutani lava a va heleketa Pawulo va fambe na yena anze a fika Atena, kambe va tlhelile nkama Pawulo a nga va leleta swaku va ya byela Silasi na Timotiya swaku va mu landza hi xihantla.” (Min. 17:13-15) Vanhu lava a va lwisana ni mahungu ya ku tsakisa a va godolanga, ka vona a swi nga yenelanga leswi va nga hlongola Pawulo aTesalonika, va tlhele va mu landza aBereya, va ya zama ku yendla swaku a tshika ku chumayela kambe a va swi kotanga. Pawulo a a swi tiva swaku a a ni ndhawu yayikulu ya ku chumayela ka yona, hi mhaka leyo a yo vhela a suka a ya ka ndhawu yin’wani. Na hina a hi tinyimiseleni ku yendla swaku maplanu hinkwawu ya lava va zamaka ku nyimisa ntirho wa ku chumayela ma nga tirhi.
19 Leswi Pawulo a nga chumayela mahungu ya ku tsakisa ka Vayuda va Tesalonika ni va Bereya, a djondze lisima la ku chumayela na a nga chavi nchumu, a tlhela a pfuna vanhu van’wani swaku va twisisa Matsalwa. Na hina hi djondza swa ku fana. Kambe swoswi Pawulo a a fanele a chumayela vanhu van’wani, ku nga vanhu Vamatiko va Atena. I mpsini leswi a swi ta mu yendlekela kohala? Hi ta djondza hi leswo ka nhlokomhaka leyi landzelaka.
a Hi ku ya hi mukambisisi mun’wani ku ve ni nkama lowu a ku ni nawu wa Khezari lowu a wu vula leswaku “munhu a nga fanelanga a vula swaku ku ta va ni hosi kumbe mfumu wa nyuwani, ngopfungopfu loko hosi kumbe mfumu wolowo wu yavanyisa kumbe wu lwisana ni hosi leyi a yi fuma.” Swi nga yendleka lava a va nyenya Pawulo va txintxe marito ya yena leswaku ma lwisana ni nawu wolowo. Vona kwadru leli nge: “ Tihosi Ta Roma Leti Nga Tsaliwa Ka Buku La Mintirho,” ka pajina 155.
