1, 2. Hi mhaka muni u rhandza Yehovha Xikwembu?

KUNGA VA leswaku waxi rhandza Xikwembu? Swingaha yendleka uxi rhandza swinene lakakuva u tinyiketele ka xona. Kumbexana i Munghanu wa wena lwenkulu kutlula hinkwavu. Kambe na ungesemu rhandza, Yehovha a rhange aku rhandza. Ka Bibele hi lerha leswi: “Hina hamurhandza, hikuva hi yena arhangeke ahirhandza kusungula.” — 1 Yohane 4:19.

² Pimisa hi swilo hinkwaswu leswi Yehovha angahi yendlela swona leswaku a kombisa lirhandzu la yena ka hina. Ahi nyike misava yosaseka leswaku hi tshama ka yona ni swilo hinkwaswu leswi hiswi lavaka leswaku hi tikhorisa hi wutomi. (Matewu 5:43-48; Nhlavutelo 4:11) A lava leswaku hi va ni wunghanu la kahle na yena, naswona a yendle swi koteka leswaku hi djondza hi yena. Hi yingisa Yehovha loko hi lerha Bibele. Naswona loko hi khongela, Yehovha wahi yingisa. (Tipisalema 65:2) Wahi kongomisa ni kuhi tiyisa hi moya wa yena wokwetsima lowunga ni matimba. (Luka 11:13) Ahi rhumele N’wana wa yena wa lisima amisaveni leswaku ahi tshunxa ka xidjoho ni lifu. — Lerha Yohane 3:16; Varhoma 5:8.

3. Hi fanele hi yendla yini leswaku hi hlayisa wunghanu la hina na Yehovha?

 ³ Pimisa hi munghanu wa wena lweyi umu rhandzaka, lweyi se u hanyeke na yena ka minkama yotsakisa ni yokarhata. Swi lava mi tikarhata leswaku mi hlayisa wunghanu lofana ni lelo. Swi tanu hi wunghanu la hina na Yehovha, Munghanu wa hina lwenkulu kutlula hinkwavu. Wunghanu la hina na yena linga tshama hilaha kunga heliki. Hi mhaka leyo Bibele li li: ‘Tshamani lirhandzwini la Xikwembu.’ (Yudha 21) Se hingaswi yendlisa kuyini leswo? Bibele la hlamula: ‘Hikuva leswi i lirhandzu la Xikwembu, xileswo ahihlayiseni Milawu ya xona, hikuva Milawu ya xona ayitiki.’ — 1 Yohane 5:3.

4, 5. a) Swi vula yini ‘kurhandza Xikwembu’? b) Lirhandzu la wena hi Yehovha li sungulise kuyini kukula?

⁴ Li vula yini Bibele loko li ku ‘lirhandzu la Xikwembu’? Laha a kuvulavuliwi hi lirhandzu la Xikwembu hi hina kambe i lirhandzu la hina hi xona. Waha khumbuka nkama lowu unga sungula kurhandza Yehovha?

⁵ Khumbuka leswi unga titwisa xiswona loko u sungula kudjondza leswaku Yehovha a lava u hanya hilaha kunga heliki amisaveni leyimpsha. U djondze hinkwaswu leswi angahi yendlela swona kuva leswo swi koteka naswona waswi twisisa leswaku Yehovha ahi nyike xihiwa xa lisima loko a rhumela N’wana wa yena laha misaveni. (Matewu 20:28; Yohane 8:29; Varhoma 5:12, 18) Loko u twisise leswaku Yehovha a kurhandza ngopfu, mbilu ya wena yi khumbekile naswona na wena u sungule kumu rhandza. — Lerha 1 Yohane 4:9, 10.

6. Swi katsa yini kurhandza munhu? Lirhandzu la wena hi Xikwembu liku susumetele kuyendla yini?

 ⁶ Kambe lirhandzu la wena hi Yehovha aku li masungulu ntsena. Hi xikombiso, loko hi rhandza munhu, aswi yenelanga kuvula hi ku: “Naku rhandza.” Lirhandzu lihi susumetela kuyendla swokarhi leswingatamu tsakisa. Hilaha kufanaka, lirhandzu la wena hi Yehovha liku susumetele kuhanya hi ndlela leyimu tsakisaka. Loko lirhandzu la wena li ya li kula, swingaha yendleka u tinyiketele ka yena u tlhela u tsakamisiwa. Hi kuyendla leswo, u tshembise kutirhela Yehovha wutomi la wena hinkwalu. (Lerha Varhoma 14:7, 8.) Ungaxi hetisisa kuyini xitshembiso lexo?

7. Hita yendla yini loko hi rhandza Yehovha? Hi swihi swileriso swin’wana swa Yehovha?

⁷ Hi mhaka ya leswi hi rhandzaka Yehovha, hi ‘hlayisa minawu ya yena’. Hiswi yendlisa kuyini? Hi kumu yingisa. Ka Bibele hi djondza ndlela leyi Yehovha a lavaka leswaku hi hanya hi yona. Hi xikombiso, ahi byela leswaku swi bihile kudakwa, kuyiva, kuhemba, kufamba masangu ni munhu lweyi u kalaka unga chadanga na yena, kugandzela munhu kumbe nchumu xokarhi handle ka Xikwembu. — 1 Vakorinto 5:11; 6:18; 10:14; Vaefesa 4:28; Vakolosa 3:9.

8, 9. Hingaswi tivisa kuyini leswi Yehovha a lavaka leswaku hiswi yendla loko kunga li na nawu wa kukongoma? Veka xikombiso.

⁸ Kambe leswaku hi tsakisa Yehovha, ahi fanelanga hi yingisa swileriso swa yena ntsena. Angahi nyikanga swinawanawana leswi khumbaka swiyimu hinkwaswu swa wutomi. Kutani ahi minkama hinkwayu hingata kuma nawu ka Bibele lowuhi byelaka leswi hi faneleke hiswi yendla ka swiyimo hinkwaswu. Hingaswi yendlisa kuyini swiboho leswinene? (Vaefesa 5:17) Ka Bibele hi  kuma matshinya ya minawu lamanga ntiyiso wa xisekelo lowuhi djondzisaka ndlela leyi Yehovha ati twaka hi yona. Naswona loko hi ya hi djondza Bibele, hi ya hi tiva Yehovha tani hi Munhu. Hi djondza ndlela leyi a pimisaka hi yona, hi tiva leswi aswi rhandzaka ni leswi aswi nyenyaka. — Lerha Tipisalema 97:10; Swivuriso 6:16-19; vona Nhlamuselo 1.

⁹ Hi xikombiso, hingaswi yendlisa kuyini swiboho swa leswi hi faneleke hiswi hlalela ka televhizori kumbe kuswi vona ka Interneti? Yehovha angahi byeli hi kukongoma leswi hi faneleke hiswi yendla. Kambe matshinya ya minawu lawa ahi nyikaka wona matahi pfuna kuyendla swiboho leswinene. Kutala ka swihungatiso swa masiku lawa, swi tale hi swilo leswi fambisanaka ni kufamba masangu ni madzolonga. Ka Bibele, Yehovha ahi byela leswaku “wamunyenya mani na mani lweyi arhandzaka tihanyi” ni leswaku ‘Xikwembu xitayavanyisa tinghwavana.’ (Tipisalema 11:5; Vaheveru 13:4) Matshinya lawa mangahi pfunisa kuyini leswaku hi yendla swiboho leswinene? Loko hiswi tiva leswaku Yehovha a nyenya nchumu xokarhi kumbe axi vona xi bihile, hi fanele hi fambela kule na xona.

10, 11. Hi mhaka muni hi yingisa Yehovha?

¹⁰ Hi mhaka muni hi yingisa Yehovha? Ahi leswi hi chavaka kukhatisiwa kumbe kuchava kukumana ni swikarhatu hi kuyendla swiboho swobiha. (Vagalatiya 6:7) Kambe hi yingisa Yehovha hi leswi himu rhandzaka. Kufana ni vana lava lavaka kutsakisa papayi wa vona, na hina hi lava kutsakisa B’ava wa hina wa le tilweni. Aku na nchumu xa kuyampsa kutlula kutiva leswaku hi tsakisa Yehovha! — Tipisalema 5:12; Swivuriso 12:2; vona Nhlamuselo 2.

¹¹ Ahi lavi kuyingisa Yehovha hi loko swihi vevukela  ntsena kumbe loko kunga na ndlela yin’wana. Nakambe ahi langi minawu kumbe minkongomiso leyi hingatayi yingisa kumbe hingayi yingisi. (Deteronoma 12:32) Kambe, himu yingisa hilaha kuheleleke, kufana ni mupisalema lweyi anga ku: “Swilerhiso swa wena niswirhandza swinene, kunene, naswirhandza.” (Tipisalema 119:47; Varhoma 6:17) Hi lava kufana na Nowa, lweyi anga kombisa lirhandzu la yena hi kuyendla hinkwaswu leswi Yehovha angamu rhuma. Bibele li vula leswaku Nowa “ayo vhela a yendla tanu.” (Genesa 6:22) Waswi lava kuva Yehovha a vula leswi fanaka hi wena?

12. Hingamu tsakisisa kuyini Yehovha?

¹² A titwisa kuyini Yehovha loko himu yingisa? Hi ‘tsakisa mbilu’ ya yena. (Swivuriso 11:20; 27:11) Pimisa hi leswo! Hi tsakisa Muvumbi wa wuyaku hinkwalu loko himu yingisa. Kambe angahi sindzisi. Kuhambana ni leswo, ahi nyike ntshunxeko wa kutilangela. Leswi swi vula leswaku hinga langa kuyendla leswinene kumbe swobiha. Yehovha a lava leswaku lirhandzu la hina hi yena lihi susumetela kuyendla swiboho leswinene leswingatahi yendla hi hanya wutomi lelinene hilaha hinga kotaka hi kona. — Deteronoma 30:15, 16, 19, 20; vona Nhlamuselo 3.

13, 14. Hiswi tivisa kuyini leswaku minawu ya Xikwembu ayitiki? Hlamusela.

¹³ Kuvuliwa yini loko hi pimisa leswaku swa tika kuyingisa minawu ya Yehovha naswona yihi tekela ntshunxeko? Bibele li li: “Milawu ya xona ayitiki.” (1 Yohane 5:3) Rito la Xigriki lelinge “kutika” li vula “kukarhata.” Ka matsalwa man’wana, rito leli li tirhiseliwa kuhlamusela minawu leyi swi tikaka kuyi landzela kumbe vanhu lava zamaka kulawula ni kuhlupha van’wana. (Matewu 23:4; Mintirho  20:29, 30) Buku lin’wana la Nova Tradução Inglesa li hlamusela hi ndlela leyi: “Minawu ya yena ayihi tikeli.” Minawu ya Yehovha “ayitiki,” kunga leswi, aswihi tikeli kuyi yingisa. Minkama hinkwayu wahi yanakanyela ka leswi a lavaka leswaku hiswi yendla.

¹⁴ Hi xikombiso, ahi nge u pfuna munghanu wa wena lweyi a rhurhelaka ka munti wun’wana. A longelele minchumu ya yena hinkwayu ka makaxa. Yin’wana ya vevuka yi tlhela yi khomeka, kasi yin’wana yi tika swinene naswona yi lava vanhu vambirhi leswaku vayi tlakula. Kunga va leswaku munghanu wa wena aataku kombela kutlakulela makaxa hinkwawu ya kutika? Nikatsongo! Hi mhaka muni? Hikusa angaswi lavi kuva u vavisiwa. Kufana ni munghanu lweyo, Yehovha angahi kombeli kuva hi yendla swilo leswihi tikelaka kuswi yendla. (Deteronoma 30:11-14) Yehovha waswi twisisa leswi hinga xiswona. “Hikuva yena ayi tiva kahle ndlela leyi hi vumbiweke ha yona, wa khumbuka leswaku hi wuthulu.” — Tipisalema 103:14.

15. Hi mhaka muni hi tiyiseka leswaku minawu ya Yehovha yi yendleliwe kuhi pfuna?

¹⁵ Moxe a byele tiko la Israyele leswaku minawu ya Yehovha ayitava pfuna kuva swiva fambela kahle “hi nkama woleha” naswona kuyingisa ka vona akutava pfuna leswaku va ‘tama va hanya’. (Deteronoma 5:28-33; 6:24) Swaha fana ni namuntlha. Hinkwaswu leswi Yehovha ahi byelaka swona swihi pfuna kuva ni wutomi lelinene. (Lerha Esaya 48:17.) B’ava wa hina Yehovha, minkama hinkwayu waswi tiva leswinga swinene ka hina. (Varhoma 11:33) Bibele li li: ‘Xikwembu i lirhandzu.’ (1 Yohane 4:8) Leswo swi vula leswaku hinkwaswu leswi Yehovha aswi vulaka ni kuswi yendla a susumeteliwa hi lirhandzu.

16. I yini lexingahi pfunaka leswaku hi yingisa Yehovha hambileswi swinga vevukiki?

 ¹⁶ Ahi minkama hinkwayu swihi vevukelaka kuyingisa Xikwembu, hikusa hi hanya ka misava yobiha leyi fumiwaka hi Diyavulosi, lweyi a zamaka kuxengetela vanhu leswaku va yendla leswobiha. (1 Yohane 5:19) Nakambe hi lwisana ni mimpimiso ni mintlhaveko ya hina leyinga hetisekangiki, leyihi susumetelaka kunga yingisi Xikwembu. (Varhoma 7:21-25) Kambe lirhandzu la hina hi Yehovha lahi tiyisa leswaku hi yendla leswinga swinene. Phela wayi vona minzamu ya hina naswona wahi pfuna hi kuhi nyika moya wokwetsima. (1 Samuwele 15:22, 23; Mintirho 5:32) Moya wokwetsima wuhi pfuna kuhlakulela wumunhu leli yendlaka leswaku swihi wolovela kumu yingisa. — Vagalatiya 5:22, 23.

17, 18. a) Hita djondza yini ka buku leli? b) Hita bula hi yini ka ndzima leyi landzelaka?

¹⁷ Ka buku leli, hita djondza leswi hi faneleke hi hanyisa xiswona leswaku hi tsakisa Yehovha. Hita djondza ndlela yotirhisa matshinya ya minawu ya Yehovha ka wutomi la hina ni tindlela tova ni mahanyelo ya kahle. Khumbuka leswaku Yehovha angahi sindzisi leswaku himu yingisa. Loko hi langa kumu yingisa, hita hanya wutomi la kahle naswona hita va ni wumundzuku leli tsakisaka. Xa lisima kutlula hinkwaswu, hi kuyingisa ka hina hi komba Xikwembu ndlela leyi hixi rhandzaka ha yona. — Vona Nhlamuselo 4.

¹⁸ Leswaku ahi pfuna kutiva leswinene ni leswobiha, Yehovha ahi nyike lipfalu. Loko hili djondzisa, litahi pfuna “kuhlayisa swileriso swa xona”. Kasi i yini lipfalu naswona hinga li djondzisisa kuyini? Ahi voneni.