1, 2. Hinga yendla yini leswaku hi tama hi rhandza Xikwembu?

HINKWERHU hi lava kutiya ni kuva ni lihanyu lelinene. Kutani hi zama kudla swakudla leswi nyikaka lihanyu, kutiwolola ni kuhlayisa miri wa hina. Leswo swi nyikana ntirho, kambe leswi swihi pfunaka, ahi godoli. Kambe ku ni swiyimu swin’wana leswi hi faneleke hi tiya ni kuva ni lihanyu la kahle ka swona.

² Se hamu tiva Yehovha naswona lawa i masungulu ya kahle. Kambe hi fanele hi yendla leswaku wuxaka la hina na yena li tama li tiya. Loko Yuda a khutaze Vakreste leswaku va ‘tshama lirhandzwini la Xikwembu’, a tlhele a hlamusela ndlela leyi ava fanele vaswi yendla ha yona. A te: “Tiyakeni kupfumeleni ka n’wina lokokwetsima ngopfu”. (Yudha 20, 21) Se, hingali tiyisisa kuyini lipfumelo la hina?

3-5. a) Sathana a lava u titwisa kuyini hi tindlela ta Yehovha? b) U titwisa kuyini hi minawu ni matshinya ya minawu ya Yehovha?

³ I swa lisima kuva wena hi wexe u tiyiseka leswaku tindlela ta Yehovha ti kahle swinene. Sathana a lava kuva u pimisa leswaku tindlela ta Yehovha ta tika swinene kuhanya hi tona ni leswaku uta tsaka swinene loko u tiyendlela swiboho hi wexe swa leswinga swinene ni leswobiha.  Kusukela le jaradi la Edeni, Sathana a zama kuyendla vanhu va kholwa ka leswo. (Genesa 3:1-6) Ni namuntlha, waha ya mahlweni a yendla tanu.

⁴ I ntiyiso leswi Sathana aswi vulaka? Hakunene ta karhata tindlela ta Yehovha? Nikatsongo! Ti yanakanyi nawu famba ka jaradi losaseka swinene. U vona tinsimbi ta tikulu letinga rhendzela ndhawu yokarhi. Kumbexana ungaha pimisa leswi: ‘Hi mhaka muni va veke tinsimbi leti?’ Kambe, u gama u twa nghonyama yi bonga hi tlhelo lin’wana. Se swoswi waxi twisisa xivangelo xa kuva kuvekiwe tinsimbi ka ndhawu yoleyo! Loko atinga vekiwanga, awuta va nyama ya ngonyama! Matshinya ya minawu ya Yehovha ma fana ni tinsimbi toleto naswona Diyavulosi a fana ni ngonyama. Rito la Xikwembu lihi ba ndleve loko li ku: ‘Tikhomeni mihiteka. Nala wa n’wina anga Sathana, warhendzelekarhendzeleka kufana ni nghonyama leyibongaka, yilava lweyi yingamudjaka.’ — 1 Petro 5:8.

⁵ Yehovha a lava leswaku hi va ni wutomi la kahle swinene. Anga lavi leswaku hi kanganyisiwa hi Sathana. Kutani ahi nyike minawu ni matshinya ya minawu leswaku mahi sirhelela ni kuhi yendla hi tsaka. (Vaefesa 6:11) Yakobo a tsale leswi: ‘Kambe lweyi akambisisaka nawu lowuhetisekeke wa kutshunxeka, atiyisela ka wona . . . atakateka ka leswi aswiyendlaka.’ — Yakobo 1:25.

6. I yini leswihi tiyisekisaka leswaku tindlela ta Yehovha ti kahle swinene?

⁶ Loko hi landzela kongomiso wa Yehovha, wutomi la hina liya li yampsa naswona wuxaka la hina na yena liya li kula swinene. Hi xikombiso, ha vuyeliwa loko hi pfumela xirhambu xa kukhongela ka yena nkama wun’wana ni wun’wana. (Matewu 6:5-8; 1 Vatesalonika 5:17) Ha tsaka loko hi yingisa kongomiso wa yena wa kuva  hi hlangana xikan’we kuva himu gandzela ni kuva hi tiyisana. Naswona ha tsaka swinene hi kuhisekela ntirhu wochumayela ni kudjondzisa vanhu Bibele. (Matewu 28:19, 20; Vagalatiya 6:2; Vaheveru 10:24, 25) Loko hi pimisa hi ndlela leyi leswo swihi pfuneke ha yona kutama hi tiyisa lipfumelo la hina, hi ya hi tiyiseka leswaku tindlela ta Yehovha ti kahle swinene.

7, 8. I yini lexingahi pfunaka kunga karhateki hi leswi kumbexana swingaha yendlekaka ka nkama lowu taka?

⁷ Kumbe hingaha karhateka hi leswaku ka nkama lowu taka hita kumana ni swilo leswingata ringa lipfumelo la hina naswona switahi tikela swinene. Loko u tshame u titwa hi ndlela leyo, khumbuka marito ya Yehovha: “Mina Yehovha, ni Xikwembu xa wena, lweyi aku djondzisaka leswaku aku pfuna, lweyi aku fambisaka andleleni leyi u faneleke u famba hi yona. Loko ntsena awo yingisa swileriso swa mina! Kunene kurhula ka wena akuta fana ni  nambu ni kululama ka wena akuta fana ni magandlati ya lwandle.” — Esaya 48:17, 18.

⁸ Loko hi yingisa Yehovha, kurhula ka hina kuta fana ni nambu lowu kalaka wunga womi naswona wululami la hina lita fana ni magandlati ya lwandle. Hambi koyendleka yini na yini ha wutomi la hina, hingaswi kota kutshembeka. Bibele li tshembisa leswi: “Cukumetela ndzhwalu wa wena ka Yehovha, kutani yena ataku seketela. Ange tshuki a pfumela leswaku lowo lulama a tsekatseka.” — Tipisalema 55:22.

9, 10. Swi vula yini kuva Mukreste lweyi a wupfeke?

⁹ Loko u ya u tiyisa wuxaka la wena na Yehovha, ‘utakongoma kuhetisekeni [“kuwupfeni,” NM]’. (Vaheveru 6:1) Swi vula yini kuva munhu lweyi a wupfeke?

¹⁰ Ahinge vi Vakreste lava wupfeke ntsena loko hi ya hi kula. Leswaku hi wupfa, Yehovha a fanele ava Munghanu wa hina lwenkulu hi tlhela hi zama kuyendla swilo hi ndlela ya yena. (Yohane 4:23) Pawulo a te: ‘Lavahanyaka hi kuyingisa miri, va ni miyanakanyu leyifumiwaka hi swa miri lowu; kambe lavahanyaka hi kuyingisa moya, va ni miyanakanyu leyifumiwaka hi swa moya.’ (Varhoma 8:5) Munhu la wupfeke anga dzikisi wutomi la yena ka ntsaku kumbe ka tshomba. Kambe a rhangisa kutirhela Yehovha naswona a yendla swiboho swa kahle ka wutomi la yena. (Swivuriso 27:11; lerha Yakobo 1:2, 3.) Anga pfumeli kuxengeteliwa kuyendla leswobiha. Munhu la wupfeke waswi tiva leswinga swinene naswona a tiyimesela kuyendla tanu.

11, 12. a) Pawulo a vule yini hi “matimba ya miyanakanyo”? b) Kuva Mukreste la wupfeke swinga fanisiwa ni kuva mutsutsumi hi ndlela yihi?

¹¹ Swi lava minzamu kuva lava wupfeke. Mupostola  Pawulo a tsale a ku: “Swakudla swa kutiya i swa vanhu lavawupfeke, lava hi kutirhisa matimba ya miyanakanyo ya vona leyi leteliweke, vakotaka kuhambanisa leswinene ka leswobiha.” (Vaheveru 5:14) Rito lelinge “leteliweke” lihi yendla hi pimisa hi ndlela leyi mutsutsumi a djondzisiwaka ha yona.

¹² Loko hi vona mutsutsumi ka mpalisanu, haswi tiva leswaku swi teke nkama ni minzamu leswaku a kota kuyendla leswi aswi yendlaka. Phela anga psaliwanga na a li mutsutsumi. Hi xikombiso, loko n’wana a psaliwa, angaswi koti kutirhisa minenge ya yena ni mavoko. Kambe hi kufamba ka nkama, a djondza kukhoma minchumu ni kufamba. Kutani hi kufamba ka nkama loko se a djondzisiwa, anga va mutsutsumi. Hilaha kufanaka, swi lava nkama ni kutikarhata leswaku hi va Vakreste lava wupfeke.

13. I yini lexingahi pfunaka kupimisa hi ndlela leyi Yehovha a pimisaka ha yona?

¹³ Ka buku leli, hi djondze ndlela yopimisa kufana na Yehovha ni kuvona swilo hilaha aswi vonaka ha kona. Hi djondze kurhandza tindlela ta Yehovha ni kutlhela hi titsakela. Loko hi yendla swiboho, hi fanele hi tivutisa: ‘Hi yihi minawu kumbe matshinya ya minawu lama fambisanaka ni xiyimo lexi? Ningama tirhisisa kuyini? Kasi Yehovha a lava ni yendla yini?’ — Lerha Swivuriso 3:5, 6; Yakobo 1:5.

14. Hi fanele hi yendla yini loko hi lava kutiyisa lipfumelo la hina?

¹⁴ Hinga tshuki hi nyima kutiyisa lipfumelo la hina ka Yehovha. Tani hi leswi kudla swakudla leswi nyikaka lihanyu swi tiyisaka miri, kudjondza hi Yehovha swihi pfuna kutiyisa lipfumelo la hina. Nkama hinga sungula kudjondza Bibele, hi djondze ntiyisu wa xisekelo hi Yehovha ni tindlela ta yena. Kambe loko nkama wuya wu famba, hi fanele hi twisisa swilo leswi yenteke. Pawulo a  vule leswi hi mhaka leyi: “Swakudla swa kutiya i swa vanhu lavawupfeke”. Loko hi tirhisa leswi hiswi djondzaka, hita kuma wutlhari. Bibele li li: “Wutlhari hi lona linga la lisima ngopfu.” — Swivuriso 4:5-7; 1 Petro 2:2.

15. Hi mhaka muni swi li swa lisima kuva ni lirhandzu la ntiyisu hi Yehovha ni vamakwerhu?

¹⁵ Munhu anga va a tiyile ni kuva ni lihanyu lelinene, kambe leswaku a tshamisa xileswo, a fanele a tama a tihlayisa. Hilaha kufanaka, munhu lweyi a wupfeke waswi tiva leswaku a fanele a tirha hintamu leswaku wuxaka la yena na Yehovha li tama li tiya. Pawulo ahi tsundzuxa leswi: “Yanani mahlweni mitikamba, kuvona loko mahali kupfumeleni.” (2 Vakorinto 13:5) Hi fanele hi va ni lipfumelo leli tiyeke. Kambe aswi yenelanga kuva ni lipfumelo leli tiyeke ntsena. Lirhandzu la hina hi Yehovha ni vamakwerhu li fanele li kula. Pawulo a te: ‘Ni loko nili . . . ni vutivi hinkwalu, ni loko nili ni kupfumela hinkwaku, nikondza nikunula [ni tsuvula] tintshava, kambe ningali na lirhandzu, ani nchumu.’ — 1 Vakorinto 13:1-3.

16. I yini leswi Sathana a tsakelaka kuva hi pimisa swona?

¹⁶ Sathana a lava hi pimisa leswaku ahingeswi koti kutsakisa Yehovha. A lava kuhi heta ntamu ni kuhi yendla hi pimisa leswaku aku na ndlela ya kululamisa timhaka ta hina. Angaswi lavi kuva hi tshemba vamakwerhu naswona angaswi lavi leswaku hi tsaka. (Vaefesa 2:2) Waswi tiva leswaku loko hi pimisa hi ndlela leyo, hita hahlula wuxaka la hina ni Xikwembu hi tlhela hi tivangela swivati. Kambe Yehovha ahi nyike nchumu lexingatahi pfuna kuva hi lwisana ni mimpimiso yoleyo, kunga ntshembo.

17. Hi mhaka muni ntshembo wu li wa lisima?

¹⁷ Ka 1 Vatesalonika 5:8, Bibele li fananisa ntshembo  wa hina ni xilembe lexi sirhelelaka nhloko ya sonchwa anyimpini. Bibele li vula leswaku xilembe xolexo i “kulangutela ka kuponisiwa”. Kutshemba switshembiso swa Yehovha swinga sirhelela miyanakanyu ya hina swi tlhela swihi pfuna kuva hi lwisana ni mimpimiso yobiha.

18, 19. Ntshembo lowu Yesu a ali na wona wumu pfunise kuyini kuva a tiyisela?

¹⁸ Ntshembo lowu Yesu a ali na wona, wumu yendle a tiya. Ka siku la yena la wugamu laha misaveni, a kumane ni swikarhato swotala. Munghanu wa yena amu xavisile. Mun’wana a kanetile loko vamu vutisa leswaku aamu tiva Yesu. Kasi van’wanyana vamu balekile a sala yexe. Vanhu va tiku la yena vamu djikelile, va tlhela va vula leswaku a afanele a hluphiwa anze a fa. I yini lexi pfuneke Yesu kutiyisela ka swiyimu leswo? Bibele la hlamula: “Hikolaho ka ntsaku lowu awuvekiwe mahlweni ka yena, atiyisele mhandzi ya nxanisu na anganatingana, kutani atshama avokweni la xinene axiluvelweni xa Xikwembu.” — Vaheveru 12:2.

 ¹⁹ Yesu aaswi tiva leswaku loko a tshembeka, aata yisa kudzuneka ka B’ava wa yena a tlhela a komba leswaku Sathana i muhembi. Ntshembo wolowo wu tise ntsaku lowukulu swinene ka yena. Naswona aaswi tiva leswaku ndzhaku ka nkama nyana aata tlhelela ka B’ava wa yena atilweni. Ntshembo lowo wumu pfune kutiyisela. Kufana na Yesu, hi fanele hi dzikisa miyanakanyu ya hina ka ntshembo lowu hinga na wona. Wutahi pfuna kutiyisela hambi koba lexi dumaka.

20. I yini lexingaku pfunaka kulwisana ni mimpimiso yobiha?

²⁰ Yehovha waswi vona leswaku u ni lipfumelo naswona wa tiyisela. (Esaya 30:18; lerha Malakiya 3:10.) Ahi tshembisa leswaku ‘atahi nyika leswi mbilu ya hina yiswi kombelaka.’ (Tipisalema 37:4) Se, dzikisa miyanakanyu ya wena ka ntshembo lowu unga na wona. Sathana a lava leswaku u luzekeliwa hi ntshembo u tlhela u pimisa leswaku switshembiso swa Yehovha swingata  za swi hetiseka. Lwisana ni mimpimiso yoleyo! Loko u tsumbula leswaku ntshembo wa wena wu ya wu tsana, kombela Yehova leswaku aku pfuna. Khumbuka marito lamanga ka Vafilipiya 4:6, 7 lamange: ‘Mingavileli ha nchumu; kambe timhakeni hinkwatu, khongelani, mitivisa Xikwembu leswi miswipfumalaka, mikombela na mili karhi mikhensa; kutani kurhula ka Xikwembu lokutlulaka kutwisisa hinkwaku, kutahlayisa timbilu ta n’wina ni miyanakanyu ya n’wina ka Yesu Kriste.’

21, 22. a) Hi wahi makungu ya Yehovha hi misava leyi? b) Se u tiyimisele kuyendla yini?

²¹ Ti nyinki nkama wa kuyanakanyisisa hi wumundzuku lohlamalisa leli Yehovha ahi tshembisaka lona. Kungali khale, vanhu hinkwavu lava hanyaka laha misaveni vata gandzela Yehovha. (Nhlavutelo 7:9, 14) Pimisa hi ndlela leyi wutomi lingata va ha yona amisaveni leyimpsha! Lita nandziha swinene! Sathana, madimona ya yena ni wubihi hinkwalu swita helisiwa. Awungata vabya naswona awungata fa. Nakambe siku ni siku uta pfuka na u ni ntamu naswona u tsake swinene hi kuhanya. Vanhu hinkwavu vata tirha xikan’we leswaku va yendla misava leyi hi va paradeyisi. Hinkwavu vata va ni swakudla swa kahle naswona vata va ni ndhawu leyinene yotshama ka yona. Akungahata va ni tihanyi naswona vanhu hinkwavu vata kombisana timpsalu. Hi kufamba ka nkama, vanhu hinkwavu laha misaveni vata tikhorisa hi ‘ntshunxeko wokwetsima lowunga ka vana va Xikwembu.’ — Varhoma 8:21.

²² Yehovha a lava kuva munghanu wa wena lwenkulu. Se, yendla minzamu hinkwayu kuva umu yingisa ni kuya mahlweni u va munghanu wa yena. Kutani onge hinkwerhu ka hina hinga ya mahlweni hi rhandza Xikwembu hilaha kunga heliki! — Yudha 21.