DJONDZO 01

Bibele Li Nga Ku Pfunisa Ku Yini?

CHAYA

Hinkwerhu hi ni swivutiso ka wutomi la hina leswi yelanaka ni ku hlupheka, lifu ni ku lava ku tiva leswi nga ta yentxeka ka nkama lowu taka. Hi tlhela hi karhateka hileswi yentxekaka siku ni siku, ku fana ni swaku hi ta dla yini ni swaku hi nga yentxa yini swaku hi tshama na hi tsakile ka ndjangu wa hina. Vanhu va vanyingi va tsumbule swaku Bibele li ni tinhlamulu ta swivutiso swa lisima a wuton’wini, handle ka leswo li ni minawu leyi nga pfunaka mindjangu swaku yi tshama na yi tsakile. I mani lweyi u vonaka swaku Bibele li nga mu pfuna?

1. Hi swini swivutiso leswi Bibele li swi hlamulaka?

Bibele li hlamula swivutiso swa lisima swa ku fana ni leswi: A wutomi li sungulise ku yini? Hi mhaka muni hi hanya? Hi mhaka muni vanhu va hlupheka? Ku yentxeka yini hi munhu loko a fa? Leswi vanhu va vanyingi va lavaka ku rhula, hi mhaka muni ku tale tinyimpi misaveni? Ku ta yentxeka yini hi misava? A swi bihanga ku tivutisa swivutiso swa ku fana ni leswi. Naswona vanhu va vanyingi va tsumbule swaku a tinhlamulu leti kumekaka ka Bibele ta twala.

2. A Bibele li nga hi pfunisa ku yini swaku hi tshama na hi tsakile siku ni siku?

Phela a minawu ya Bibele ya pfuna hikakunene. Hi xikombiso, yi pfuna mindjangu swaku yi va ni ku tsaka ka ntiyiso. Yi hi byela leswi hi nga swi yentxaka swaku hi hlula xitresi ni ku tsakela ntirho lowu hi wu yentxaka. A buku leli li ta ku pfuna swaku u vona leswi Bibele li swi vulaka hi mhaka leyi ni swin’wana. Hi wugamu swi nga yentxeka u ma kholwa marito lawa ma nge: “Matsalwa hinkwawu kumbe hinkwaswu swi nga ka Bibele swa . . . pfuna.” — 2 Timotiyu 3:16.

A buku leli a hi Bibele. Kambe lona li nga ku pfuna swaku u twisisa Bibele. Hi mhaka leyo, zama ku djondza a tindzimana hinkwatu ti nga ka buku leli, u gama u vona swaku leswi u swi djondzaka swi fanisa ku yini ni leswi Bibele li swi vulaka.

DJONDZA SWIN’WANA

Vona swaku Bibele li va pfunisa ku yini vanhu van’wana, naswona u nga yentxa yini swaku u tsakela ku li lerha, ni swaku hi mhaka muni swi li swa lisima kuva u kuma munhu lweyi a nga ta ku pfuna ku twisisa Bibele.

3. Bibele li nga hi komba ndlela

Bibele li fana ni gezi leli vonaka hintamu, li nga hi pfuna ku yentxa minchumu ya yinene ka wutomi la hina, li tlhela li hi byela leswi nga ta yentxeka ka nkama lowu taka.

Lerhani Tipisalema 119:105, mi gama mi bula hi swivutiso leswi landzelaka:

Mutsali wa buku leli la tipisalema a a li vonisa ku yini Bibele?
Wena u li vonisa ku yini Bibele?

4. Bibele li nga hlamula swivutiso swa hina hinkwaswu

Wansati mun’wana a a ni swivutiso swa swinyingi leswi a swi mu karhata. Bibele li mu hlamulise ku yini? Sixtirani VHIDIYO, mi gama mi bula hi swivutiso leswi landzelaka.

VHIDIYO: U Nga Heleliwi Hi Ntshembo! (1:48)

Hi ku ya hi vhidiyo, hi swini swivutiso leswi wansati lweyi a a li na swona?
A ku djondza Bibele swi mu pfunise ku yini?

Bibele li hi byela swaku loko hi lava tinhlamulu ta swivutiso swa hina hi ta ti kuma. Lerhani Matewu 7:7, mi gama mi bula hi xivutiso lexi landzelaka:

Hi swini swivutiso leswi u navelaka swaku Bibele li ku hlamula swona?

5. U nga swi tsakela ku lerha Bibele

Vanhu va vanyingi va swi rhandza ku djondza Bibele naswona la va pfuna hintamu. Sixtirani VHIDIYO, mi gama mi bula hi swivutiso leswi landzelaka.

VHIDIYO: Ku Lerha Bibele (2:05)

Hi ku ya hi vhidiyo,hi mhaka muni tintombhi leti ni madjaha lawa a va nga swi rhandzi ku lerha?
Hi mhaka muni se va swi rhandza ku lerha Bibele?

Leswi nga ka Bibele swa tiyisana naswona swi hi nyika ntshembo. Lerhani Varoma 15:4, mi gama mi bula hi xivutiso lexi landzelaka:

Wa swi lava ku tiva ntshembo lowu Bibele li vulavulaka hi wona ni swaku wu nga ku pfunisa ku yini?

6. Vanhu van’wana va nga hi pfuna ku twisisa Bibele

Vanhu vanyingi va tsumbule swaku loko va bula ni van’wana hi Bibele va hantla va li twisisa. Lerhani Mintirho 8:26-31, mi gama mi bula hi xivutiso lexi landzelaka:

I yini swi nga hi pfunaka ku twisisa Bibele? — Vonani tindzimana 30 ni 31.

A buku la Mintirho li vulavula hi wanuna lweyi a nga lava ku pfuniwa swaku a twisisa Bibele. Ni namuntlha vanhu va vanyingi va vona swi yampsa ku kombela van’wana swaku va va pfuna ku twisisa Bibele

VAN’WANA VA LI: “Ku djondza Bibele i ku tlanga hi nkama.”

U yi vonisa ku yini mhaka leyi? Naswona hi mhaka muni?

LESWI HI NGA SWI DJONDZA

Bibele li hi nyika minawu leyi yi nga hi pfunaka siku ni siku, li hlamula swivutiso swa lisima leswi hi nga na swona, la hi tiyisa ni ku hi nyika ntshembo.