A buku leli nge Tindzimana Leti Hi Pfunaka Ku Tirhela Yehovha li ta ku pfuna leswaku u kuma tindzimana ta tinyingi ta Bibele, leti nga ku pfunaka ku hlula swikarhatu swa siku ni siku. A buku leli li ta tlhela li ku pfuna leswaku u kuma tindzimana ta kahle leti u nga ti tirhisaka leswaku u tiyisa van’wani ni ku va pfuna leswaku va yendla swiboho swaswinene leswi nga ta tsakisa Yehovha. Leswaku u kuma tindzimana toleto ta Bibele, langa mhaka ya kona, se ndzeni ka mhaka ya kona u ta kuma swivutiso ni mintlhamuselo ya ku goma ya swikombiso swa le Bibeleni leswi nga ku pfunaka. (Vona kwadru leli nge: “ U Nga Li Tirhisisa Ku Yini Buku Leli.”) Ka buku leli u nga kuma tindzimana ta tinyingi hi xihantla leti u nga ti tirhisaka leswaku u pfuna vanhu van’wani, u va tiyisa u tlhela u va nyika switsundzuxu. U ta tlhela u kuma xuma xa lisima swinene lexi u nga xi tirhisaka leswaku u pfuna vanhu van’wani, xa ku fana ni tindzimana leti u nga ti tirhisaka leswaku u va tiyisa, u va pfuna ku lulamisa swikarhatu ni ku va nyika switsundzuxu.

Ka buku leli a wu nga ta kuma tindzimana hinkwatu leti fambelanaka ni mhaka leyi u yi kambelaka. Kambe lona li ta ku pfuna swaku u sungula mapexkiza ya wena. (Swiv 2:1-6) Leswaku u yi twisisa kahle ndzimana leyi u yi kambelaka, u nga kambela ni manota lawa ma nga ka Bibele la ku djondza hi lona la Wuhundzuluxeli La Misava Ya Nyuwani La Matsalwa Ya Ku Kwetsima, loko li li kona hi lirimi lin’wani leli u li twisisaka; u tlhela u lerha ni tindzimana tin’wani leti fambisanaka ni ndzimana leyi u yi lerhaka. U nga ha tlhela u tirhisa Nkongomiso Wa Ku Yendla Pexkiza Wa Timboni Ta Yehovha ni Índice das Publicações da Torre de Vigia leswaku u yi twisisa ku yampsa ndzimana u tlhela u vona swaku u nga yi tirhisisa ku yini. Tlhela u kambela timhaka leti ta ha ku humesiwaka swoswi, leti tlhamuselaka ndzimana yoleyo.

Hi nyimela swaku Tindzimana Leti Hi Pfunaka Ku Tirhela Yehovha ti ku pfuna leswaku u va ni wutlharhi, wutivi ni ku twisisa loku hi ku kumaka ka Bibele. Buku leli li ta ku pfuna swaku u ya u tiyiseka hintamu leswaku “rito la Xikwembu la hanya naswona li ni ntamu.” — Heb 4:12.