1. Xana mahanyela ya misava manga kukhumbisa kuyini kutitsongohata ka hina?

HAYINI swihi karhatela kuhanya hikuya hi leswi hiswi djondzaka Bibeleni? Xin’wana xa swivangelo i kukala kutitsongohata. Ka masiku ya “makumu” lawa hi hanyaka ka wona namuntlha, kutala ka vanhu lavahi rhendzeleke ava titsongohati. Matshan’wini ya leswo, ‘vatirhandza, varhandza ngopfu male, vatidzunisa, vati kukumuxa naswona ava tikoti kumbe kutikhoma.’ (2 Timotiya 3:1-3) Hina malandza ya Yehovha haswi tiva leswaku mahanyela lawa ma bihile. Hambileswo, hingahava navela lava hanyaka hi ndlela leyi hi mhaka ya leswi va tikombaka va titlonya hi wutomi naswona swilo swiva fambela kahle. (Tipisalema 37:1; 73:3) Hingaha sungula kutivutisa: “Xana swa pfuna hi kakunene kuveka swilaveko swa van’wana amahlweni ka swa mina? Xana mpelampela vanhu vatani hlonipha loko ni titsongohata?” (Luka 9:48) Loko hi sungula kutekelela mahanyela ya misava, wuxaka leli hinga na lona ni vamakwerhu linga honheka naswona van’wana avangata kholwa leswaku hi Vakreste va ntiyiso. Kambe, loko hi djondza hi tlhela hi tekelela malandza ya Yehovha lama titsongohateke, hita va ni mavuyelo lamanene.

2. Hita vuyeliwa hi yini loko hi djondza hi malandza yotshembeka ya Yehovha ya khale?

² I yini leswi pfuneke malandza ya Yehovha yotshembeka ya  khale leswaku mava vanghanu va yena? I yini lexingama yendla ma yamukeleka ka Xikwembu? Xana matimba ya kuhambeta ma yendla leswinene mama kume kwini? Loko hi djondza ni kuyankanyisisa hi swikombiso swa wona, lipfumelo la hina lita ya mahlweni li tiya.

3, 4. a) I yini leswi Yehovha ahi nyikaka swona leswaku hi tiyisa lipfumelo la hina? b) Matshan’wini ya kuva ni wutivi ntsena, hi fanele hi yendla yini leswaku hi tiyisa lipfumelo la hina?

³ Yehovha ahi nyika swilo leswi hiswi lavaka leswaku hi tiyisa lipfumelo la hina. Hi xikombiso, ahi nyika switsundzuxo leswinene a tlhela ahi djondzisa hi kutirhisa Bibele, mabuku ya nhlengeletano, jw.org, JW Broadcasting, minhlangano ni tinhlengeletano. Swilo leswi swihi pfuna kuva ni wutivi. Kambe hilaha Yesu a kombiseke ha kona, wutivi lili loxe ali yenelanga. Kulaveka swin’wana. A te: “Swakudja swa mina i kuyendla kurhandza ka lweyi anirhumeke, ni kuheta ntirho wa yena.” — Yohane 4:34.

⁴ Ka Yesu kuyendla kurhandza ka Xikwembu aku fana ni swakudla. Kudla swakudla leswinene swi nyika lihanyo lelinene. Hi ndlela leyi fanaka, kuyendla kurhandza ka Xikwembu kutiyisa lipfumelo la hina kutlhela kuhi yendla hi titwa kahle. Hi xikombiso, xana u tshame u ya minhlanganwini kumbe a kuchumayeleni na u karhalile, kambe u vuya na u tsakile naswona u pepile moyeni?

5. Xana wutlharhi lihi vuyelisa kuyini?

⁵ Hita va hi tlharihile loko hi yendla kurhandza ka Yehovha. (Tipisalema 107:43) Phela lava yendlaka leswo, va vuyeliwa hintamu swinene. Loko li vulavula hi wutlharhi, Bibele li li: “Aku na lexi uxi navelaka lexingafanisiwaka na lona. . . . I nsinya wa wutomi ka lavakhomelelaka ka lona, naswona lavakhomaka switiya ka lona vatavuliwa lavatsakeke.” (Swivuriso 3:13-18) Yesu a te: ‘Loko mitiva swilo leswi, mitlhela miswiyendla, mitava mikatekile.’ (Yohane 13:17) Vadjondzisiwa va yena avata va lava tsakeke loko va yendla leswi Yesu ava byeleke swona. Vona vaswi yendlile leswo va tlhela va tekelela xikombiso xa yena.

6. Hayini hi fanele hi hambeta hi hanya hi leswi hiswi dyondzaka abibeleni?

⁶ Ni namuntla hi fanele hi hambeta hi hanya hikuya hi leswi hiswi djondzaka Bibeleni. Yanakanya hi mulungisi wokarhi wa mimovha lweyi anga ni switirho ni ntokoto. Hambileswi anga ni malembe yotala na a yendla ntirho lowu, a fanele a hambeta a tirhisa wutivi leli se anga na lona leswaku a va mulungisi wa mimovha lweyi a humelelaka. Hilaha kufanaka, loko hi sungule kudjondza ntiyiso hi tsake swinene hikuva hi tirhise leswi hiswi lerheke Bibeleni. Kambe leswaku hi hambeta hi tsaka hi fanele hi yendla leswi Yehovha ahi djondzisaka swona siku ni siku.

7. Hi fanele hi yendla leswaku hi djondza ka swikombiso swa le Bibeleni?

⁷ Ka djondzo leyi, hita vona ndlela leyi malandza yotshembeka ya Yehovha ya khale ma titsongohateke ha yona ka swiyimo leswi hina namuntlha swingahahi tikelaka kutisongohata ka swona. Kambe leswaku hi vuyeliwa, aswi yenelanga kutiva rungula leli. Hi fanele hi yanakanya hi lona hi tlhela hili tirhisa awuton’wini la hina.

8, 9. Rungula linga ka Mintirho 14:8-15 lihi djondzisa yini hi kutitsongohata ka Pawulo? (Vona xifaniso akusunguleni ka djondzo.)

⁸ Yehovha a lava leswaku vanhu hinkwavo ‘vaponisiwa, vafika laha vakotaka kutiva leswinga ntiyiso.’ (1 Timotiya 2:4) Xana uva langutisa kuyini vanhu hinkwavo lavangawu tiviki ntiyiso? Pawulo a achumayela Vayuda, lava se  ava ni wutivi lokarhi hi Yehovha. Kambe hi hala tlhelo, a achumayela ni lava gandzelaka swikwembu swa mavunhwa. Siku lin’wana loko ali karhi a chumayela aListra, a kumane ni xiyimo lexi ringeke kutitsongohata ka yena.

⁹ Ka liyendzo la yena la kusungula la wurhumiwa, Pawulo a fambe na Barnaba aListra. Valikawoniya va khome Pawulo na Barnaba onge hiloko va li swikwembu naswona vava chule mavito ya swikwembu swa vona swa mavunhwa Zewusi na Hermesi. Xana Pawulo na Barnaba va pfumelile kuvitaniwa hi ndlela leyo? Tani hileswi va xanisiweke ka madoropa mambirhi lawa avaha li kuma yendzela, xana va tsakile hileswi Valikawoniya avava khoma hi ndlela leyi hambaneke? Xana va pimise leswaku ndlela leyi ava khomiwa ha yona ayita pfuna vanhu vanyingi leswaku va twa mahungu yotsakisa? Nikatsongo! Va kwate swinene va tlhela va rila va ku: ‘Hikolaho ka yini miyendla leswo xana? Kuve na hina hi vanhu lavafanaka na n’wina hi ntumbuluku?’ — Mintirho 14:8-15.

10. Hayini Pawulo na Barnaba vanga titwanga va li va lisima kutlhula Valikawoniya?

¹⁰ Loko Pawulo na Barnaba va vule leswaku ava li vanhu kufana na vona, ava kombisa leswaku na vona avanga hetisekanga. Kambe aswinga vule swona leswaku ndlela leyi ava gandzela Xikwembu ha yona ayi fana ni ya Valikawoniya. Pawulo na Barnaba ava li varhumiwa va Xikwembu xa ntiyiso. (Mintirho 13:2) Ava totiwe hi moya wokwetsima naswona ava ni ntshembo wotsakisa swinene. Hambileswo, avanga pimisi leswaku va ni lisima kutlula van’wana. Avaswi tiva leswaku loko Valikawoniya avo yamukela mahungu yotsakisa, na vona avatava ni ntshembo woya hanya atilweni.

11. Hingaxi tekelelisa kuyini xikombiso xa Pawulo loko hi chumayela?

¹¹ Xana uyi xiyile ndlela leyi hinga kombisaka ha yona leswaku ha titsongohata kufana na Pawulo? Ahi fanelanga hi yanakanya leswaku lunghelo leli hinga na lona lochumayela kumbe leswi Yehovha ahi pfunaka kuswi fikelela swihi yendla hi va ni lisima kutlula van’wana. Ungaha tivutisa: Xana ni titwisa kuyini hi vanhu va teritoriyu la mina? Xana ni rhandza vanhu va tinxaka tokarhi ntsena? Amisaveni hinkwayo, Timboni ta Yehovha ti zama kukuma vanhu lava va lavaka kuyingisa mahungu yotsakisa. Tin’wana ta tona ti djondza lirimi la nyuwani kumbe mikhuva ya vanhu lava va tekeliwaka hansi. Kambe hambi ti yendla leswo, ati titwi ti ni lisima kutlula vanhu lava tiva va chumayelaka. Matsan’wini ya leswo, titi karhatela kutwisisa swiyimo swa vanhu leswaku ti pfuna votala hilaha tinga kotaka ha kona leswaku va yamukela rungula la Mfumo.

12. Epafrasi aswi kombise kuyini leswaku a akhatala hi van’wana?

¹² Ndlela yin’wana leyi hinga kombisaka ha yona leswaku ha titsongohata i kukhongelela vamakwerhu va hina, “lavanyikiweke kupfumela  . . . loku ringanaka ni kupfumela ka hina”. (2 Petro 1:1) Epafrasi aaswi yendla leswo. Bibele li vulavula hi yena makhambi manharhu ntsena. Vona leswi Pawulo aswi vuleke hi yena loko a tsalela Vakolosa, na a li djele aRoma: “Wamitsundzuka masiku hinkwawo mikhongelweni ya yena”. (Vakolosa 4:12) Epafrasi aava tiva kahle vamakwerhu naswona a akhatala hi vona swi huma mbilwini. Kambe, xana yena a anga li na swona swikarhato swa yena winyi? A ali na swona. Hi mhaka leyo, Pawulo amu vitane ‘mubohiwa swin’we na mina.’ (Filemoni 23) Hambileswo, Epafrasi a akhatala hi swilaveko swa van’wana naswona a alwela kuva pfuna. A akhongela  vamakwerhu. Na hina hinga yendla tano, hi vula ni mavito ya vamakwerhu ka swikhongelo swa hina. Xana awungexi tekeleli xikombiso lexi? Phela swikhongelo swa muxaka lowu swi ni ntamu wa wukulu swinene. — 2 Vakorinto 1:11; Yakobo 5:16.

13. Ungaxi tekelelisa kuyini xikombiso xa Epafrasi loko u khongela?

¹³ Xana ku ni munhu lweyi ungamu vulaka hi vito loko u khongela? Angaha va munghanu wa le bandleni, xaka kumbe mun’wana lweyi u tivaka leswaku a langutana ni swikarhato swokarhi. Ungaha khongelela vamakwerhu lava mavito ya vona ma tsaliweke ka site la jw.org/ts ka xiyenge lexinga ni nhlokomhaka leyinge “Timbhoni Ta Yehovha Leti Khomiweke Hikwalaho Ka Ripfumelo Ra Tona.” (Lava ka MAHUNGU > TIMHAKA TA NAWU.) Ungaha khongelela lava feliweke hi maxaka, lava poneke ka timhangu ta ntumbuluku ta swoswi nyana kumbe tinyimpi, lava langutanaka ni ndzingo wokarhi, lava faneleke va yendla swiboho swa kutika kumbe lavanga ni swikarhato swa timale. I Vanyingi vamakwerhu lava lavaka kukhongeleliwa. Loko hiva khongelela, hi kombisa leswaku ha khatala hi swilaveko swa van’wana, hayi swa hina ntsena. (Vafilipiya 2:4) Yehovha waswi yingisa swikhongelo leswo!

14. Hayini Yehovha a li xikombiso lexikulu xa kuyingisela?

¹⁴ Ndlela yin’wana leyi hinga kombisaka kutisongohata ha yona i kuva vayingiseli lavanene. Yakobo 1:19 yi li: ‘Hantlisa kutwa kumbe kuyingisela’. Yehovha i xikombiso lexikulu amhakeni ya kuyingisela. (Genesa 18:32; Yoxuwa 10:14) Hi xikombiso, vona bulu leli a veke na lona na Moxe leli kumekaka ka Eksoda 32:11-14. (Lerha.) Hambileswi aswinga bohi kutwa mavonelo ya yena, Yehovha amu yingiselile loko ati phofula. Xana awuta nyikela yingiso ka munhu lweyi a tshameke aku hoxela? Xana awuta landza mavonelo ya yena ka mhaka yokarhi? Kuhambana ni vanhu votala, hi kulehisa mbilu, Yehovha a yingisela swikhongelo swa hinkwavo lava khongelaka ka yena hi lipfumelo.

15. Xana hingamu tekelelisa kuyini Yehovha?

 ¹⁵ Se tivutise: ‘Leswi hambi Yehovha anga munhu wa kutitsongohata hintamu la kakuva a yingisela vanhu hilaha a yingiseleke ha kona Abrahama, Rahele, Moxe, Yoxuwa, Manowa, Eliya na Hezekiya, no va mani mina leswaku ninga titsongohati? Xana ninga kombisa leswaku nava xixima vamakwerhu hinkwavo hi kuyingisela mavonelo ya vona ni kuma tirhisa loko swi koteka? Xana a kona munhu bandleni kumbe akaya lweyi ninga nyikelaka yingiso ka yena? Ninga yendla yini akuva ni kombisa leswaku na nyikela yingiso ka yena?’ — Genesa 30:6; Vaavanyisi 13:9; 1 Tihosi 17:22; 2 Tikronika 30:20.

16. Davhida a yangulise kuyini loko Ximeyi amu khoma hi ndlela ya kubiha?

¹⁶ Kutitsongohata kungahi pfuna leswaku hi tikhoma loko hi yendleliwa swilo swobiha. (Vaefesa 4:2) Ahi voneni xikombiso xin’we ka buku ya 2 Samuwele 16:5-13 (lerha). Ximeyi, xaka la hosi Sawulo, a rhuke Davhida ni malandza ya yena. Davhida a ali na lona wuswikoti la kudlaya Ximeyi kambe anga yendlanga tano. Hi kulehisa mbilu, a tiyiselele swirhuko swa yena. I yini leximu pfuneke leswaku a tikhoma? Ahi voneni nhlamulo ka Pisalema 3.

17. I yini lexi pfuneke Davhida kutikhoma naswona ungamu tekelelisa kuyini?

¹⁷ Davhida a tsale Pisalema ya wunharhu hi nkama lowu n’wana wa yena Absalomu a alava tindlela ta kumu dlaya. A ali ka xiyimo lexo loko Ximeyi a sungula kumu pfuka. Hambiswilitano, Davhida aswi kotile kutikhoma. I yini ximu pfuneke? Vona marito ya yena ka Pisalema 3:4: “Nitavitana Yehovha hi rito lotlakuka, kutani yena atanihlamula na ali ntshaveni ya yena ya kukwetsima.” Loko hi khomiwa hi ndlela yobiha, hi fanele hi khongela kufana na Davhida. Loko hi yendla leswo, Yehovha atahi nyika moya wa yena wokwetsima leswaku hi tiyisela. Xana unga lwela kuhlakulela kutikhoma ni kurivalela loko u khomiwa hi ndlela ya kubiha? Wa kholwa leswaku Yehovha wa twa kuvava loku uku twaka ni leswaku ataku pfuna a tlhela aku katekisa?

18. Hita vuyeliwa hi yini loko hi landza nkongomiso wa Yehovha?

¹⁸ Hita va hi tlharihile naswona hita katekisiwa loko hi hanya hikuya hi leswi hiswi djondzaka Bibeleni. Ka Swivuriso 4:7, Bibele li li: “Wutlharhi hi lona linga la lisima ngopfu, hikolaho lilave, naswona ka hinkwaswu leswi uswikumaka, kuma kutwisisa.” Hambileswi swi lavaka wutivi leswaku hi tlhariha, hi fanele hi khumbuka leswaku kuva ni wutivi ni kutwisisa aswi yenelanga. Hi kombisa leswaku hi tlharihile loko hi seketela swiboho swa hina ka wutivi leli hinga na lona. Phela hambi tinsokoti ti kombisa wutlharhi hi kuhlengeleta swakudla wuxika lingase fika. (Swivuriso 30:24, 25) Kreste, lweyi anga ‘wutlharhi la Xikwembu’, a yendla hinkwaswo leswi tsakisaka B’ava wa yena. (1 Vakorinto 1:24; Yohane 8:29) Na hina, loko hi kombisa wutlharhi hi kuyendla leswi tsakisaka Yehovha hi tlhela hi titsongohata, hita katekisiwa hi yena. (Lerha Matewu 7:21-23.) Hikolaho, ahi hambeteni hi yendla hinkwaswo leswi hingaswi kotaka leswaku hi pfunisa bandla kuhambeta li tirhela Yehovha hi kutitsongohata. I ntiyiso leswaku swi teka nkama naswona swi lava kulehisa mbilu leswaku hi kota kuhanya hikuya hi leswi hiswi djondzaka. Kambe loko hinga karhali, hita kombisa leswaku ha titsongohata. Loko hi yendla leswo, hita tsaka namuntlha ni hilaha kunga heliki.