1. Vagandzeli va Yehovha vaswi kombisa kuyini leswaku va rhandzana?

VAGANDZELI va Yehovha amisaveni hinkwayo va vumba ndjangu wun’we. I vamakwerhu lava rhandzanaka. (1 Yohane 4:16, 21) Minkama yin’wana vati karhata ngopfu leswaku va pfuna vamakwavu. Kambe va kombisa lirhandzu la vona hi kuva yendlela swilo swotala leswitsongo. Hi xikombiso, vangaha vula marito lamanene ka vamakwavu ni kuva khoma hi ndlela ya lirhandzu. Loko hi yanakanyela van’wana, hi tekelela Tatana wa hina wa le tilweni. — Vaefesa 5:1.

2. Yesu a tekelele lirhandzu la Tatana wa yena hi ndlela yini?

² Yesu a atekelela Tatana wa yena hi ndlela leyi hetisekeke. Nkama hinkwawo a akhoma van’wana hi lirhandzu. A te: “Tanani ka mina, n’wina hinkwenu lavakarhaleke, ni lavatikeliwaka, nitamiwisisa.” (Matewu 11:28, 29) Loko hi tekelela Yehovha hi “kuyanakanyela wa xiyimo xa le hansi”, Yehovha ata tsaka. Na hina hita tsaka. (Tipisalema 41:1) Ka djondzo leyi, hita vona leswaku hingaswi  kombisa kuyini leswaku ha yanakanyela swirho swa ndjangu wa hina, vamakwerhu ni lava hiva kumaka antirhweni wochumayela.

3. Xana wanuna anga swi kombisa kuyini leswaku wamu yanakanyela nsati wa yena? (Vona xifaniso akusunguleni ka djondzo.)

³ Vavanuna va fanele va va xikombiso lexinene xa kukhatalela mindjangu ya vona. (Vaefesa 5:25; 6:4) Bibele li li vavanuna va fanele va yanakanyela vasati va vona ni ku va twisisa. (1 Petro 3:7) Wanuna lweyi a twisisaka awa swi tiva leswaku hambi leswi a hambaneke ni nsati wa yena hi tindlela totala, anga yampsi kumu tlula. (Genesa 2:18) Wa khatala hi ndlela leyi nsati ati twaka ha yona naswona wamu hlonipha. Wansati mun’wana wa le Canadá a vule leswi hi nuna wa yena: “Yena anga tsongohati ndlela leyi ni titwaka ha yona kumbe kuvula a ku, ‘awu fanelanga u titwa hi ndlela leyo.’ Awani yingisa. Loko ani pfuna kululamisa mavonelo ya mina a mhakeni yokarhi, aswi yendla hi lirhandzu.”

4. Wanuna angaswi kombisa kuyini leswaku a yanakanyela mintlhaveko ya nsati wa yena hi ndlela leyi ava khomaka ha yona vasati van’wana?

⁴ Wanuna lweyi a yanakanyelaka mintlhaveko ya nsati wa yena anga tlangi hi kugangisana ni vasati van’wana kumbe kukombisa kuva tsakela, kungahava hi xiviri, ka interneti kumbe ka tindhawu ta kuyendla xinghana a interneti. (Yobo 31:1) Anga tirhisi tindhawu ta kuyendla xinghana ka interneti leswaku a tlanga hi kugangisana, naswona anga hlaleli ma site ya interneti lawa manga faneliki. Awa tshembeka ka nsati wa yena hikusa awamu rhandza naswona a rhandza Yehovha ni kunyenya swobiha. — Lerha Tipisalema 19:14; 97:10.

5. Wansati angaswi kombisa kuyini leswaku wamu yanakanyela nuna wa yena?

⁵ Loko wanuna a tekelela xikombiso xa lirhandzu xa nhloko ya yena, Yesu Kreste, swingatamu karhatela nsati wa yena kumu komba “xichavo” xoyenta. (Vaefesa 5:22-25, 33) Loko nsati amu hlonipha ata ringeta kutwisisa mintlhaveko ya yena ni kumu khoma hi lirhandzu loko a khomekile hi timhaka ta bandla kumbe loko a langutana ni swikarhato. Wanuna mun’wana wa Grã-Bretanha a li: “Hi kuvona matshamela ya mina ntsena, nsati wa mina waswi twisisa leswaku ku ni leswini karhataka. Kutani ata tirhisa tshinya leli kumekaka ka Swivuriso 20:5, hambiloko swi boha kuva a rhindzela nkama lowu ningata titwa ni chunsekile kumu bulela mhaka ya kona loko ku li leswaku ningamu byela.”

6. Hingava kukhutazisa kuyini vana leswaku va yanakanyela van’wana ni kuva komba lirhandzu, naswona vata vuyeliwa hi yini?

⁶ Loko vapsali va yanakanyelana, va vekela vana xikombiso lexinene. Hambileswo, va fanele va djondzisa vana va vona kuyanakanyela ni kukombisa lirhandzu ka van’wana. Hi xikombiso, vapsali vanga djondzisa vana va vona leswaku vanga tsutsumi ndzeni ka Salão do Reino. Loko va li minkhubyeni, vangava djondzisa leswaku va nyimela lava kuleke leswaku  va rhanga vati phamela swakudla. Swi tiyile leswaku mun’wana ni mun’wana abandleni angava pfuna vapsali. Hikolaho, loko n’wana a yendla minchumu leyinene, yofana ni kupfula xipfalo, hi fanele himu bumabumela. Leswo switamu yendla a titwa kahle ni kuva a djondza leswaku “kunyika switisa ntsaku lowukulu swinene kutlula kuyamukela.” — Mintirho 20:35, NM.

7. Yesu amu yanakanyelisi kuyini wanuna wofa tindleve, naswona leswo swihi djondzisa yini?

⁷ Siku lin’wana, loko Yesu a li Decapolisi, vanhu “vamutisele munhu wa kufa tindleve, wa manghanghamela”. (Marka 7:31-35) Yesu angamu dahanga mahlweni ka vanhu van’wana. Hayini? Leswi wanuna lweyo a afe tindleve, swinga yendleka a angatatitwa kahle xikarhi ka vanhu votala. Yesu aayi twisisa mintlhaveko yakwe, hi mhaka leyo “amususile xitshungwini” amu yisa ka ndhawu leyi kunga liki na vanhu leswaku amu dahela kona. Hina hingeswi koti kuyendla mahlori. Hambileswo, hi fanele hi pimisa hi swilaveko swa vamakwerhu ni hi ndlela leyi va titwaka ha yona. Leswo switahi susumetela kuva komba lirhandzu. Mupostola Pawulo a tsale leswi: “Ahilaveni tindlela topfuxana [kumbe kukhutazana], hikombana rirhandzu ni mintirho leyinene”. (Vaheveru 10:24) Yesu a atwisisa ndlela leyi wanuna lweyi a feke tindleve a atitwa ha yona. Leswo swimu susumetele kumu khoma hi lirhandzu. Xana lexi ahi xikombiso lexinene lexi hingaxi tekeleleka?

8, 9. Hingaswi kombisa kuyini leswaku ha khatala hi lava gugeke ni lavanga ni swikarhato swin’wana? (Nyikela xikombiso)

⁸ Yanakanyela lava gugeke ni lavanga ni swikarhato swokarhi. Bandla la Wukreste li tiviwa swinene hi kukombana lirhandzu, kungali hi wutshila. (Yohane 13:34, 35) Lirhandzu lihi susumetela kuyendla hinkwaswo leswi hingaswi kotaka akuva hi pfuna vamakwerhu lava gugeke kumbe lavanga ni swikarhato swokarhi leswaku va ya minhlanganwini ni le ntirhweni wochumayela. Hava pfuna hambiloko swihi karhatela kumbe loko vanga koti kuyendla swotala. (Matewu 13:23) Michael, lweyi a fambaka hi xitshamu xa lava limaleke, a tlangela ngopfu ndjangu wa yena ni vamakwerhu va le bandleni hileswi vamu pfunaka. A li: “Hinkwavo vani pfuna leswaku ni kota kuva kona minhlanganwini ni le ntirhweni wochumayela. niswi rhandza swinene kuchumayela ka tindhawu leti taleke hi vanhu.”

⁹ Ka ma Betel ya manyingi ku ni vamakwerhu votshembeka lava gugeke kumbe lavanga ni swikarhato swokarhi. Valanguteli lava vava khatalelaka vava komba lirhandzu hi kuva pfuna kutsala mapapela kumbe kufonela vanhu leswaku vava chumayela. Bill, lweyi anga ni 86 wa malembe, a tsalela vanhu va le tindhawini ta le kule. Yena a li: “Hali tlangela lunghelo leli la kutsala mapapela.” Nancy, lweyi anga kusuhi ni kuhlanganisa 90 wa malembe, a li: “Ani voni kutsala mapapela tani hi kurhumela mayenvelope ntsena. Kambe niku vona tani hi ntirho wochumayela.  Vanhu va fanele va tiva ntiyiso!” Etel, lweyi a psaliweke hi 1921, a li: “Ni ni swivavu. Masiku man’wana swani karhatela hambi kuyambala.” Hambileswo, awa swi tsakela kuchumayela hi kutirhisa telefoni naswona a yendla mayendzo yovuyela. Barbara, lweyi anga ni 85 wa malembe, a hlamusela leswi: “Swani karhatela ku ya ntirhweni wochumayela hikusa ani hanyi kahle. Kambe kuchumayela hi telefoni swini yendla ni kota kuvulavula ni van’wana. Khanimambu Yehovha!” Hi nkama lowunga ringaniki lembe, ntlawa wokarhi wa vamakwerhu lava rhandzekaka, lava gugeke va hete 1.228 wa mawora ka ntirho wochumayela, vatsale 6.265 wa mapapela, va yendle mayendzo ya kuvuyela lama tlulaka 2.000 hi kutirhisa telefoni naswona va nyikele 6.315 wa mabuku! Ha tiyiseka leswaku kutikarhata ka vona kumu tsakise swinene Yehovha! — Swivuriso 27:11.

10. Hingaswi kombisa kuyini leswaku hava yanaknyela vamkwerhu?

¹⁰ Yanakanyela van’wana aminhlanganwini ya wukreste. Loko hi yanakanyela, hita pfuna vamakwerhu leswaku va vuyeliwa hilaha swi kotekaka ha kona ka minhlanganu. Hi ndlela yihi? Hi kuhantla hi fika leswaku hi nga djikisi miyanakanyo ya vona. Minkama yin’wana hingaha kumana ni swilo swa xitshuketa leswingahi yendlaka hi xwela. Kambe loko hi tolovela kuxwela, hi fanele hi pimisa hi ndlela leyi leswo swiva khumbisaka xiswona vamakwerhu ni hi leswi hingaswi yendlaka leswaku hi kombisa leswaku hava yanakanyela vamakwerhu. Nakambe hi fanele hi tsundzuka leswaku i Yehovha ni N’wana wa yena lavahi rhambaka leswaku hi va kona minhlanganwini. (Matewu 18:20) Hikolaho, hi fanele hi fika hi nkama lowunene akuva hi komba leswaku hava hlonipha vamakwerhu!

11. Hayini vamakwerhu lava yaveliweke xiyenge ka nhlanganu va fanele va landza nkokongomiso lowunga ka 1 Vakorinto 14:40?

¹¹ Loko hi yanakanyela vamakwerhu, hita landza nkongomiso wa Bibele lowunge: “Hinkwasvu asviyendliwe khwatsi ni hi nawu wakona.”  (1 Vakorinto 14:40) Vamakwerhu lava yaveliweke xiyenge ka nhlangano vatava va landza nkongomiso lewu loko vanga tlulisi nkama lowu va yaveliweke wona. Hi ndlela leyi, vatava va yanakanyela xivulavuli lexi landzelaka ni bandla hinkwalo. Yanakanya hi ndlela leyi van’wana vanga khumbiwaka ha yona loko minhlangano yi tlulisa nkama. Vamakwerhu van’wana va tshama kule swinene. Van’wanyana swi lava va khwela xibomba kumbe xitimela. Van’wana, vatekani va vona a hi vakreste, kutani va sindziseka kufika kaya hi nkama wokarhi.

12. Hayini hi fanele hi hlonipha ni kurhandza madoda? (Vona kwadru lelinge “ Yanakanyela Lava Rhangelaka.”)

¹² Madoda ma tirha ngopfu abandleni ni le ntirhweni wochumayela. Hi mhaka leyo, hi fanele hima hlonipha ni kuma rhandza. (Lerha 1 Vatesalonika 5:12, 13.) Xana ungaswi kombisa kuyini leswaku wawu tlangela ntirho hinkwawo lowu maku yendlelaka wona? Hi kuma yingisa ni kuma seketela. Phela madoda ‘mahitekela kumbe kukhatalela mimoya ya hina, kufana ni vanhu lavangatavutisiwa henhla ka vona.’ — Vaheveru 13:7, 17.

13. Hinga djondza yini ka ndlela leyi Yesu a akhoma vanhu ha yona?

¹³ Ka xiprofeto xin’wana malunghana na Yesu, Esaya a te: “Akuna lihlanga leli khinyekeke leli angatali pfotlosa; naswona rivoni la ngoti leli ketimelaka ange li timi.” (Esaya 42:3) Lirhandzu leli Yesu a ali na lona hi vanhu limu yendle ava ni ntwelawusiwana. Yena aaswi tiva leswaku lava heleke matimba ava titwa onge i lihlanga leli khinyekeke. Hi mhaka leyo aava khoma hi lirhandzu ni kuva lehisela mbilu. Hambi swivanana a swiswi rhandza kuva na Yesu. (Marka 10:14) Hina hinge swi koti kutwisisa kumbe kudjondzisa vanhu kufana na Yesu! Kambe hinga kombisa leswaku hava yanakanyela lavanga ka teritoriyu la hina hi ndlela leyi hi vulavulaka na vona ha yona, hi nkama lowu hiva yendzelaka ha wona ni nkama lowu hiwu hetaka loko hi bula na vona.

14. Hayini hi fanele hi yanakanya hi leswi hi vulavulisaka xiswona ni vanhu?

¹⁴ Xana hi fanele hi vulavulisa kuyini ni vanhu? Magidigidi ya vanhu namuntlha va “vavisiwile ni ku tsalangana” hi varhangeli va mabindzu, politika, ni va wukhongeli va misava leyi, lavanga ni wukanganyisi ni tihanyi. (Matewu 9:36) Hikolaho, votala ava tshembi munhu naswona ava na ntshembo wa nchumu. Hi mhaka yoleyo, hi fanele hi tirhisa marito ni mavulavulelo lama kombaka leswaku ha khatala hi vona! Vanhu votala vaswi lava kuyingisa rungula la hina kungali ntsena hileswi hili tirhisaka kahle Bibele, kambe hileswi hiva khatalelaka ni kuva komba xichavo.

15. Hi tihi tindlela tin’wana toyanakanyela vanhu lavanga ka teritoriyu la hina?

¹⁵ Hinga yanakanyela vanhu va teritoriyu la hina hi tindlela totala. Hi xikombiso, hi fanele hiva yendla swivutiso hi ndlela ya kukombisa xichavo ni kuva khatalela. Phayona lin’wana ali tirha ka teritoriyu leli vanhu votala vanga ni tingana. Hi mhaka leyo, alinga yendli swivutiso leswi aswitava yendla  va karhateka loko vangaswi koti kuhlamula. Aanga vutisi a ku: “Vito la Xikwembu i mani?” kumbe “Mfumu wa Xikwembu i yini?”, kambe a avula swa kufana ni leswi: “Ni djondzile Bibeleni leswaku Xikwembu xi ni vito. Waswi lava niku komba leswaku vito la xona i mani?” Mayendlela lawa ahima tirhisi ka tindhawu hinkwatu, hikusa vanhu ava fani ni mindhavuku ya vona ayi fani. Hambileswo, nkama hinkwawo hi fanele hi khoma vanhu lavanga ka teritoriyu la hina hi lirhandzu ni hi ndlela leyi kombisaka xichavo. Akuva hi yendla leswo hi fanele hiva tiva kahle.

16, 17. Hingawu kombisa kuyini musa loko hi boha a) nkama lowu hingatava yendzela ha wona vanhu? b) nkama lowu hingatawu heta na vona?

¹⁶ Hingava yendzela hi nkama muni vanhu? Loko hi famba hi yindlo ni yindlo, hingata kuma vanhu na vahi langutelile hikusa avahi rhambanga. Kutani i swa lisima kuva yendzela hi nkama lowu vangataswi lava kubula na hina. (Matewu 7:12) Hi xikombiso, xana vanhu va le ka teritoriyu la n’wina va rhandza kuyetlela ngopfu hi mahelovhiki? Ungaha sungula hi kuchumayela xitaratwini, tindhawu leti taleke hi vanhu kumbe u yendla mayendzo yovuyela ka vanhu lava u tivaka swaku va kumeka hi nkama lowo.

¹⁷ Hinga heta nkama muni na hi bula na vona? Vanhu votala va khomeke hintamu swinene. Hikolaho swinga va swinene kukomisa mayendzo ya hina, ngopfungopfu ka khambi losungula. Swa yampsa hi hantla hi heta bulu la hina kutlula kuli lehisa. (1 Vakorinto 9:20-23) Loko vanhu va xiya leswaku haswi twisisa leswaku va khomekile, vangahaswi tsakela kubula na hina ka khambe leli landzelaka. Loko hi kombisa wumunhu leli seketeliwaka hi moya wa Xikwembu, hita va “vatirhikulobze ni Xikwembu.” Yehovha angahi tirhisa leswaku hi pfuna munhu kudjondza ntiyiso! — 1 Vakorinto 3:6, 7, 9.

18. Hi yihi minkateko leyi hingatayi kuma loko hi yanakanyela van’wana?

¹⁸ Hikolaho, ahi yendleni hinkwaswo leswi hingaswi kotaka leswaku hi yanakanyela swirho swa mindjangu ya hina, vamakwerhu ni lava hiva kumaka antirhweni wochumayela. Kutani hita kuma minkateko yotala swoswi ni ka nkama lowu taka. Hilaha Tipisalema 41:1, 2 yi vulaka ha kona: “Watsaka mun’wana ni mun’wana lweyi ayanakanyelaka wa xiyimo xa le hansi; Yehovha atamuponisa ka siku la khombo. Yehovha atamuponisa, amuhlayisa a hanya. Atavuliwa lweyi atsakeke amisaveni.”