1, 2. a) Ndlela leyi Yehovha a khomaka ha yona vanhu yi hambanise kuyini ni ya lava rhangelaka? b) Hita vulavula hi yini ka djondzo leyi?

LAVANGA henhla ka van’wana va khoma lavanga hansi ka vona hi ntamu kumbe kuva yendla swobiha. (Matewu 20:25; Eklesiasta 8:9) Kambe Yehovha anga tanu! Hambileswi anga yena ntsena amisavani hinkwayo lweyi anga ni Matimba Hinkwawo, wahi yanakanyela hambileswi hinga vanhu lavanga hetisekangiki. Ahi komba timpsalu naswona wa khatala hi ndlela leyi hi titwaka ha yona ni hi leswi hiswi lavaka. Waswi tiva leswaku ku ni swilo leswi hinga kotiki kuswi yendla. Hi mhaka leyo, angahi kombeli leswaku hi yendla nchumu lexi axi tivaka leswaku ahingataxi kota. — Tipisalema 103:13, 14.

² ABibeleni hi djondza hi ndlela leyi Yehovha a kombiseke kuyanakanyela ha yona ka vanhu va yena. Ka djondzo leyi, hita vulavula hi swikombiso swinharhu: Xosungula xita vulavula hi ndlela leyi Yehovha a pfuneke ha yona Samuwele loko aha li mutsongo leswaku a byela Muprista Lwenkulu Eli rungula la wuyavanyisi. Xa wumbirhi xita vulavula hi ndlela leyi Yehovha amu lehiseleke mbilu ha yona Moxe, loko a yanakanya leswaku angataswi kota  kuchunsa tiko la Israyele awukaraweni aGibita. Xa wunharhu xita vulavula hi ndlela leyi Yehovha a kombiseke kuyanakanyela ha yona loko a humesa Vayisrayela aGibita. Ka xikombiso ha xin’we, hita djondza swotala hi Yehovha ni ndlela leyi hingamu tekelelaka ha yona.

3. I yini leswi humeleke siku lin’wana loko Samuwele a li kuyetleneni naswona leswo swi tlakusa xivutiso xihi? (Vona xifaniso akusunguleni ka djondzo.)

³ Samuwele a sungule kutirha ka tabernakela na aha li mutsongo hintamu. (1 Samuwele 3:1) Ka wusiku lin’wana kuhumelele nchumu xa kuhlamalisa ngopfu loko a li karhi a yetlela.  * (Vona nhlamuselo ya le hansi.) (Lerha 1 Samuwele 3:2-10.) A twe rito la munhu limu vitana. Hikolaho ka leswi a apimisa leswaku i Eli, lweyi se a agugile, angamu vitana, a tsutsumele ndlwini ya yena ivi a ku: “Hi mina lweyi, hikusa univitanile.” Kambe Eli amu byele leswi: “Anikuvitananga n’wananga.” Ndzhaku ka kuva leswi swi yendleke makhambi mambirhi, Eli a tsumbule leswaku i Yehovha lweyi a ali karhi a vitana Samuwele. Hi mhaka leyo, a byele Samuwele leswi a afanele aswi yendla loko a tlhela a twa rito limu vitana. Samuwele aswi yendlile leswi a byeliweke swona. Hayini Yehovha anga tekelanga kumu byela Samuwele leswaku hi yena aamu vitana? Ahiswi tivi hikusa Bibele ali hlayi nchumu hi swona. Kambe swinga yendleka Yehovha angati tivisanga hileswi a ayanakanya hi ndlela leyi Samuwele aata titwa ha yona.

4, 5. a) I yini leswi Samuwele aswi yendleke loko Yehovha amu rhuma kunyikela a rungula la wuyavanyisi? b) Rungula leli lihi djondzisa yini hi Yehovha?

⁴ Lerha 1 Samuwele 3:11-18. Nawu lowu Yehovha awu nyikeke Vayisrayele awu khutaza vatsongwana leswaku va hlonipha lava kuleke, ngopfungopfu lavanga ni wulawuli. (Eksoda 22:28; Levhitika 19:32) Hikolaho, aswinga vevuki ka xijahatana xofana na Samuwele leswaku xi yela Eli hi nkama lowuyani wa nimixo ivi hi xivindzi ximu byela rungula la kutika la wuyavanyisi leli taka hi ka Yehovha. Bibele li vula leswaku Samuwele “aachava kubyela Eli xivono.” Hambileswo, Xikwembu xiswi veke livaleni ka Eli leswaku hi xona axi vitana Samuwele. Eli a kombele Samuwele leswaku anga fihli nchumu ka leswi Xikwembu xiswi vuleke. Samuwele amu yingisile ivi “amubyela marito hinkwawo.”

⁵ Aswimu hlamalisanga Eli kutwa leswi Sawuwele amu byeleke swona hikusa a atshame a byeliwa hi “munhu wa Xikwembu” hi mhaka leyi fanaka. (1 Samuwele 2:27-36) Rungula leli lihi djondzisa leswaku Yehovha wa anakanyela naswona a ni wutlhari.

6. Hi djondza yini ka ndlela leyi Xikwembu xi pfuneke Samuwele ha yona?

⁶ Loko u li mumpsha kufana na Samuwele, unga djondza yini ka rungula leli? Xana u ni tingana naswona wa chava kuchumayela lava kulu kumbe kuva lweyi a hambaneke ni van’wana? Loko u titwa hi ndlela leyo, tiva leswaku  Yehovha waku twisisa naswona a lava kuku pfuna. A tiva swikarhato swa wena ni ndlela leyi u titwaka hi yona. Hi mhaka leyo, khongela ka yena, umu byela hi kukongoma ndlela leyi u titwaka ha yona. (Tipisalema 62:8) Anakanyisisa hi swikombiso swa vampsha van’wana lava kuvulavuliwaka hi vona aBibeleni vofana na Samuwele. Vulavula ni vamakwerhu van’wana va ntanga ya wena kumbe lava kuleke lava na vona va kumaneke ni swikarhato leswi fanaka ni swa wena. Vataku byela hi tindlela leti Yehovha ava pfuneke ha tona, minkama yin’wana hi tindlela leti avangati nyimelanga.

7, 8. Yehovha aswi kombise kuyini leswaku a akhatala hi ndlela leyi Moxe a atitwa hi yona?

⁷ Moxe a ali ni 80 wa malembe loko Yehovha amu nyika ntirho wa kutika wa kuchunsa tiko la yena la Israyele awukaraweni aGibita. (Eksoda 3:10) Swinga yendleka Moxe a hlamalile loko a nyikiwa xiyavelo lexi hikusa se a ani 40 wa malembe na a risa mintlhambi aMidiyani. A byele Yehovha a ku: “Nova mani mina leswaku niya ka Faro ni leswaku niyahumesa vana va Israyele aGibita?” Yehovha a tiyise Moxe hi kumu byela leswi: “Nitava na wena”. (Eksoda 3:11, 12) Yehovha a tlhele amu tiyisekisa leswaku madoda ya Israyele ‘amatamuyingisa’. Hambiloko a byeliwa leswo, Moxe a te: “Ahinge avanikholwi vatlhela vangaliyingisi rito la mina?” (Eksoda 3:18; 4:1) Aswo fana ni loko a byela Yehovha a ku: Phela u phazamile! Ani faneleki kuyendla ntirho lowu. Hambiloko ati twa hi ndlela leyi, Yehovha amu lehisele mbilu a tlhela amu nyika matimba ya kuyendla mahlorhi. Phela, Moxe a ve wa kusungula aBibeleni lweyi a nyikiweke matimba ya kuyendla mahlorhi. — Eksoda 4:2-9, 21.

⁸ U pimisa leswaku Moxe se a atiyile ndzhaku ka kutiyisiwa hi ndlela leyi hi Yehovha? Nikatsongo. A byele Yehovha leswaku yena anga koti kuvulavula. Hiloko Yehovha a ku ka yena: “Nitava na wena naswona nitakudjondzisa leswaku ufaneleka kuvulavula.” Xana swoswi se wa tiya? Inhim. A kombela Yehovha leswaku a rhuma mun’wana ka ndhawu ya yena! Hambileswi swimu kwatiseke  Yehovha kutwa leswo, a kombise leswaku a akhatala hi ndlela leyi Moxe a atitwa hi yona hi kurhuma Aroni leswaku a va muvulavuleli wa yena. — Eksoda 4:10-16.

9. Timpsalu ni kulehisa mbilu ka Yehovha swi pfune Moxe leswaku a va murhangeli lwenene hi ndlela yihi?

⁹ Xana rungula leli lihi djondzisa yini hi Yehovha? Tani hileswi Yehovha anga Xikwembu xa Matimba Hinkwawo, ina a chavise Moxe amu yendla leswaku a yingisa. Kambe anga yendlanga leswo. Amu lehisele mbilu naswona amu kombe timpsalu. A tiyisekise nandza lweyi wa kutitsongohota leswaku a atava na yena. Hi lihi vuyelo leli veke kona hi kuva Yehovha a khome Moxe hi ndlela leyi? Moxe a hundzuke murhangeli wa mukulu wa tiko la Israyele. Ndlela leyi Yehovha amu khomeke ha yona yi mu pfune leswaku a va munhu wa kurhula ni lweyi a yanakanyelaka. — Tinhlayo 12:3.

10. Hi vuyeliwa hi yini loko hi ringisela Yehovha hi kuyanakanyela van’wana?

¹⁰ I yini swin’wana leswi hingaswi djondzaka ka rungula leli? Loko u li nuna, mupsali kumbe doda, u ni wutihlamuleli henhla ka van’wana. Hi mhaka leyo, i swa lisima kutekelela Yehovha hi kuva ni timpsalu, u lehisa mbilu u tlhela u yankanyela nsati wa wena, vana ni vamakwerhu abandleni. (Vakolosa 3:19-21; 1 Petro 5:1-3) Loko u tekelela Yehovha Xikwembu na Yesu Kreste, Moxe lwenkulu, van’wana vata chunseka kuta vulavula na wena naswona uta va xikhutazo lexikulu ka vona. (Matewu 11:28, 29) Uta tlhela u va xikombiso lexinene ka vona. — Vaheveru 13:7.

11, 12. Yehovha ava sirhelelise kuyini Vayisrayele loko va huma aGibita?

¹¹ Swinga yendleka lava chunsiweke aGibita hi lembe la 1513 A.E.C. ava tlula timiliyoni tinharhu ta vanhu leti ati vumbiwa hi swivanana, lava kuleke, lava vabyaka kumbe swilima. Hi kutirhisa Moxe, Yehovha awu khatalelile ni kuwu twisisa ntlawa lowu wa wukulu. Hi mhaka leyo, wu titwe wu sirhelelekile loko wu li karhi wu huma Gibita. — Tipisalema 78:52, 53.

¹² Xana Yehovha a yendle yini leswaku wu titwa hi ndlela leyi? A yendle leswaku wu huma Gibita hi ndlela leyi hlelekeke, ongi hiloko ‘wuti lunghiselele nyimpi’. (Eksoda 13:18) Kufamba hi ndlela leyi hlelekeke swi pfune Vayisrayele kuvona leswaku Yehovha a aswivona hinkwaswo leswi aswi humelela. Yehovha a tlhele ava nyika “rhefu ninhlikanhi” ni “kuvoninga ka ndzilo” niwusiku akuva ava tiyisekisa leswaku a ali na vona, ava kongomisa a tlhela ava sirhelela. (Tipisalema 78:14) Phela Vayisrayele avaswi lava kutiyisekisiwa  hi ndlela leyi, ngopfungopfu hi mhaka ya leswi swinga gama swi yendleka.

13, 14. a) Yehovha ava khatalelise kuyini vanhu va yena ka lwandle la kupshuka? b) Xana Yehovha aswi kombekise kuyini leswaku a ni matimba kutlula Vagibita?

¹³ Lerha Eksoda 14:19-22. Ti vone u li xikarhi ka Vayisrayele. Vagibita vaku hlongolisa hi le ndzhaku naswona aphambeni ka wena u vona lwandle la kupshuka. Awu na ka kuya. Kutani u vona Yehovha a sungula kutirha. Rhefu la lilukulu leli ali tshamela kuva phambeni ka wena li rhurhisiwa li ya ndzhaku li vekiwa axikarhi ka wena ni Vagibita, li yendla leswaku vona va va munyameni. Kambe ka nxaxa wa wena ku ni ghezi leli voningaka! Hiloko u vona Moxe a gwimba voko la yena henhla ka lwandle, kutani kusungula kuba moya wa wukulu lowu taka hi le Wuxeni, wu yava lwandle hi le xikarhi ivi wu pfula ndlela. Kutani wena, ndjangu wa wena, swifuyo swa wena hinkwaswo ni Vayisrayelekuloni mi tsemakanya lwandle hi ndlela leyi hlelekeke. Wa hlamala hi kuvona leswaku ndlela leyi ayi na madaka naswona ayi rhetemuki. Yi womile naswona swa vevuka kufamba ka yona. Hi mhaka leyo, hambi lava fambaka ha hombe va fika ka ndhawu leyin’wana ya lwandle va sirhelelekile.

¹⁴ Lerha Eksoda 14:23, 26-30. Nkama lowu kuyendlekaka swilo leswi, Faro, wanuna lweyi ati byelaka ni kuva xiphukuphuku, a sungula kuku hlongolisa, wena ni Vayisrayelekuloni. Hiloko u vona Moxe a tlhela a gwimba voko la yena henhla ka lwandle kutani makhumbi mambirhi ya mati ma pfaleka, ivi ma wela Faro ni masonchwa ya yena mava dlaya hinkwavo. — Eksoda 15:8-10.

15. Rungula leli liku djondzisa yini hi Yehovha?

 ¹⁵ Rungula leli lihi djonzisa leswaku Yehovha i Xikwembu lexi hlelekeke. Kutiva leswo swihi pfuna kutitwa hi sirhelelekile amandleni ya yena. (1 Vakorinto 14:33) Kufana ni murisi lweyi a rhandzaka a tlhela a khatalela tiyimpfu ta yena, Yehovha wava khatalela vanhu va yena hi tindlela ta ku hambanahambana. Ava yendla va titwa va sirhelelike naswona wava sirhelela ka valala va vona. Swahi tiyisa kutiva leswi, ngopfungopfu leswi matshamela lawa ya swilo manga kusuhi ni kuhela. — Swivuriso 1:33.

16. Hi vuyeliwa hi yini hi kukambisisa rungula la kuponisiwa ka Vayisrayele?

¹⁶ Ni namuntlha, Yehovha waha khatala hi vanhu va yena tani hi ntlawa. Wava pfuna leswaku va hlayisa wuxaka leli vanga na lona na yena naswona wava sirhelela ka valala va vona. Atava sirhelela hambi ka hlomulo lowukulu lowu se kusaleke katsongo leswaku wu fika. (Nhlavutelo 7:9, 10) Hambiloko va li vampsha kumbe se va kulile, va ni lihanyo lelinene kumbe vanga li na lona, vanhu va Yehovha avangata chava loko nhlomulo lowukulu wu fika.  *(Vona nhlamuselo ya le hansi.) Vata yendla leswi Yesu ava byeleke swona: “Wololokani mitlakusa tinhloko ta n’wina, milanguta henhla, hikuva kukutsuliwa ka n’wina kule kusuhi.” (Luka 21:28) Hambiloko va hlaseliwa hi Gogo, kunga ntlawa wa matiko lowunga ni ntamu kutlula Faro, vanhu va Xikwembu avangata chava kumbe kurhurhumela hikusa vataswi tiva leswaku Yehovha atava sirhelela. (Ezekiyele 38:2, 14-16) I yini lexingatava yendla vanga chavi? Hi leswi vaswi tivaka leswaku Yehovha anga cinci. Ata tlhela ati kombekisa leswaku i Muponisi lweyi a khatalaka naswona anga ni lirhandzu.— Esaya 26:3, 20.

17. a) Leswaku hi vuyeliwa, hi fanele hi yendla yini loko hi djondza Bibele? b) Hita djondza yini vhiki litaka?

¹⁷ Ka djondzo leyi, hi vone swikombiso swinharhu swa tindlela leti Yehovha a kombisaka kuyanaknyela ha tona. Hi tlhele hi vona tindlela leti ha tona a khatalaka, a kongomisaka ni kutlhela a ponisa vanhu va yena. Loko u yanakanyisisa hi marungula ya kufana ni lawa, lavisisa wuxokoxoko lin’wana leli swinga yendlekaka awungasi tshama u pimisa hi lona. Leswo switaku pfuna leswaku u djondza minchumu ya nyuwani hi Yehovha. Loko u ya u djondza hi yena u tlhela u tiva wumunhu la yena, lirhandzu leli unga na lona hi yena lita kula naswona lipfumelo la wena lita ya li tiya. Ka djondzo leyi landzelaka, hita vona tindlela leti hinga tekelelaka kuyanakanyela ka Yehovha ha tona andjangwini, abandleni ni le ntirhweni wa kuchumayela.