1. Hi mhaka muni Yehovha a yentxe swilo?

KU VE NI nkama lowu Yehovha a a li yexe, hambi leswo a a tshama na a tsakile naswona a a helelile hi tindlela hinkwatu. Phela Yehovha a a nga lavi ku tsaka yexe hi mhaka leyo hi lirhandzu a sungule ku yentxa swilo. — Pis. 36:9; 1 Yoh. 4:19.

2. Yesu ni tintsumi va ti twise ku yini hi swilo leswi Yehovha a nga swi yentxa?

² Yehovha a rhange hi ku yentxa Yesu lweyi a nga gama a tirha na yena swaku va yentxa ‘swilo hinkwaswu’ kupatsa ni tintsumi. (Kol. 1:16) Phela Yesu swi mu tsakise hintamu kutirha ni Papayi wa yena. (Swi. 8:30) Tintsumi ti ti twise ku yini loko Yehovha na Yesu va yentxa matilo ni misava? Loko se ku yentxiwe misava, tintsumi ti ‘sungule kukulungela hi swidzunisu’ naswona ti tame ti ba mavoko hi ku tsaka loko tivona Yehovha a yentxa swilo swin’wana ku patsa ni vanhu. (Yobo 38:7; Swi. 8:31) Hinkwaswu leswi swi kombisa lirhandzu ni wutlharhi la Yehovha. — Pis. 104:24; Rhom. 1:20.

3. Hi ku ya hi 1 Vakorinto 15:21, 22, lifu la Yesu li hi pfunisa ku yini?

³ Yehovha a a lava swaku vanhu va tsaka va tlhela va va ni wutomi la ku kala li nga heli ka misava ya ku xonga leyi a nga yi yentxa. Kambe Adamu na Evha va djohele Yehovha Papayi wa vona wa lirhandzu, se xidjoho ni lifu swi nghena ka vanhu hinkwavu misaveni. (Rhom. 5:12) Se Yehovha a yentxe yini? Hi ku hantlisa a yentxe malulamiselo ya ku vanhu va ponisiwa. (Gen. 3:15) Yehovha a nyikele hi N’wana wa yena Yesu leswaku a hi fela swaku hi chunsiwa ka xidjoho ni lifu. Se hinkwavu lava langaka ku tirhela Yehovha va ta kuma wutomi  la ku kala li nga heli. — Yoh. 3:16; Rhom. 6:23; lerha 1 Vakorinto 15:21, 22.

4. Hi ta bula hi yini ka djondzo leyi?

⁴ Xitshembiso xa Yehovha xa ku pfuxa lava nga fa xi nga hi yentxa hi ti vutisa swivutiso swa swinyingi. Hi xikombiso: Ku pfuxiwa ka vafi ku ta yentxekisa ku yini? Indje hi ta tlhela hi va tiva lava nga ta pfuxiwa? Swi ta tsakisa ku fikela kwini loko vafi va pfuxiwa? Naswona ku pimisa hi ntshembo lowu swi nga hi pfunisa ku yini ku djondza hi lirhandzu, wutlharhi ni ku lehisa mbilu ka Yehovha? A hi voneni nhlamulu ya swivutiso leswi.

5. Hi mhaka muni hi nga fanelanga hi nyimela swaku vanhu hinkwavu va pfuxiwa hi nkama wun’we?

⁵ Loko Yehovha a ta pfuxa vafi hi ku tirhisa Yesu, ha tiyiseka swaku a a nga ta pfuxa hinkwavu hi nkama wun’we. Hi mhaka muni? Hi mhaka loko vanhu hinkwavu lava nga fa vo pfuxiwa hi nkama wun’we a ku ta va ni mpfilumpfilu, kuve ha swi tiva swaku Yehovha a hi Xikwembu xa mpfilumpfilu. Naswona Yehovha wa swi tiva swaku, leswaku ku va ni ku rhula, swilo hinkwaswu swi fanele swi tshamiseka. (1 Kor. 14:33) Yehovha a kombise wutlharhi ni ku lehisa mbilu loko a tirhisana na Yesu a ku lunghiseleleni ka misava hi kutsongokutsongo na a nge se yentxa vanhu. Na yena Yesu a ta yentxa swa ku fana ka Mfumu wa yena wa 1.000 wa malembe loko a tirhisana ni lava nga ta pona ka Armajedoni swaku va lunghiselela misava swaku va yamukela lava nga ta pfuxiwa.

6. Hi ku ya hi Mintirho 24:15, i vamani lava nga ta pfuxiwa?

⁶ Xa lisima hintamu i swaku lava ngata pona ka nyimpi ya Armajedoni va fanele va djondzisa lava nga ta pfuxiwa hi Mfumu wa Xikwembu ni minawu ya Yehovha. Hikusa ku tala ka lava nga ta pfuxiwa hi  “lava vakukala vanga lulamanga.” (Lerha Mintirho 24:15.) Vanhu volavo va fanele va txintxa mahanyelo ya vona leswaku va ta pfuniwa hi lifu la Yesu ni ku tlhela va kuma wutomi la ku kala li nga heli. Pimisa hi ntirho lowu nga ta va kona wa ku djondzisa vanhu va vanyingi lava nga ta pfuxiwa, va ku kala va nga mu tivi Yehovha. Se leswo swi vula swaku mun’wana ni mun’wana lweyi a nga ta pfuxiwa hi ta mu djondzisa Bibele ku fana ni leswi hi va djondzisisaka xiswona vanhu namuntlha? Lava nga ta pfuxiwa va ta djondzisiwa amabandleni swaku va kota ku djondzisa van’wana? Leswo hi ta swi vona kohala. Lexi hi xi tivaka hi leswaku loko Mfumu wa Yesu wa 1.000 wa malembe u hela “misava yita tala hi wutivi la Yehovha.” (Esa. 11:9) Hikakunene, a nkama lowu Yesu a nga ta fuma misava hi ta va ni ntirho wa ku tsakisa.

7. Hi mhaka muni vanhu va Yehovha va fanele va ti veka hansi loko va djondzisa lava nga ta pfuxiwa?

⁷ Ka Mfumu wa Kreste wa 1.000 wa malembe vanhu va Yehovha va ta tama va txintxa mahanyelo ya vona leswaku va mu tsakisa, leswi vulaka swaku vanhu va Yehovha va ta tsaka hi ku pfuna hinkwavu lava nga ta pfuxiwa leswaku va txintxa mahanyelo ya vona, se va hanya hi minawu ya Yehovha. (1 Pet. 3:8) Loko vanhu va Yehovha va ti veka hansi va tlhela va ti nyimisela ku hanya hi minawu ya Yehovha, lava nga ta pfuxiwa na vona va ta ti nyimisela ku va tekelela. — Filp. 2:12.

8. Hi mhaka muni hi kholwa swaku loko vafi va ta pfuxiwa va ta ma tiva maxaka ya vona ni vanghanu?

⁸ Ku ni swivangelo swa ku tala leswihi kholwisaka swaku hi ta ma tiva maxaka ya hina lawa ma nga ta pfuxiwa ku feni. Hi xikombiso, a nkama lowu Yehovha a nga pfuxa vanhu lani misaveni a va tlhelisele kara, mavulavulelo ni mimpimiso leyi a va li na yona na va nga se fa. Na hina hi nga nyimela swa ku fana. Khumbuka swaku Yesu a fanise ku fa ni ku yetlela. (Mat. 9:18, 24; Yoh. 11:11-13) Loko munhu a pfuka wurhongweni a tama a tshamisa xileswi a a li xiswona na a nga se yetlela. Pimisa hi xikombiso xa Lazaro, a hete 4 wa masiku na a file naswona miri wa yena se a wu sungule ku bola. Kambe nkama Yesu a nga mu pfuxa vamakwenu va yena va tekele ku mu tiva naswona Lazaro a va khumbukile. — Yoh. 11:38-44; 12:1, 2.

9. Kasi vanhu va ta pfuxiwa na va nga na miri ni mimpimiso ya ku hetiseka hi mhaka muni?

⁹ Yehovha a tshembise swaku a paradesi anga kona lweyi a nga ta ku: “Na vabya.” (Esa. 33:24; Rhom. 6:7) Lava nga ta pfuxiwa va ta va ni wutomi la linene, hambi leswo a va nga ta tekela ku hetiseka hikusa loko swo yentxekisa xileswo maxaka ni vanghanu va vona a va nga ta va tiva. Phela vanhu va ta hetiseka hi kutsongokutsongo ka Mfumu wa Kreste wa 1.000 wa malembe. Kambe loko se ku hundze 1.000 wa malembe Yesu a ta tlhelisela Mfumu ka Papayi wa yena, na se swilo hinkwaswu swi helelile swi tshamisekile ni vanhu na va hetisekile. — 1 Kor. 15:24-28; Nhla. 20:1-3.

10. U titwisa ku yini hi ku pfuka ka vafi?

¹⁰ Ti vone na u yamukela murhandziwa wa wena lweyi a nga fa. Ku nga va swaku leswi swi ta ku yentxa u xiririka mihloti hi ku tsaka? U ta yimbelela tinsimu hi ku tsaka u dzunisa Yehovha? Lexi hi xi tivaka hi leswaku u taya u mu rhandza hintamu Yehovha ni  N’wana wa yena hi leswi va nga yentxa swi koteka swaku hi tlhela hi vona varhandziwa va hina lava nga fa.

11. Hi ku ya hi marito ya Yesu lawa ma nga ka Yohane 5:28, 29, ku ta yentxeka yini hi lava nga ta yingisa Xikwembu?

¹¹ Pimisa hi ku tsaka loku lava nga ta pfuxiwa va nga ta va na kona loko va tshika mahanyelo ya vona ya khale se va hanya hi ku rhandza ka Xikwembu. Vanhu lava va ta va ni wutomi la ku kala li nga heli, kambe lava nga ta yala ku txintxa mahanyelo ya vona va ma twananisa ni ku rhandza ka Yehovha a va nge li kumi wutomi la ku kala li nga heli. — Esa. 65:20; lerha Yohane 5:28, 29.

12. Yehovha a ta va katekisisa ku yini lava nga ta hanya misaveni?

¹² Ka Mfumu wa Xikwembu, vanhu va Yehovha va ta vona ku hetiseka ka marito lawa ma nga ka Swivuriso 10:22, lama nge: “Kukatekisiwa hi Yehovha swi pfuna hintamu naswona yena anga yengeteli kuvaviseka ka swona.” Hi ku pfuniwa hi moya wa ku kwetsima wa Yehovha, vanhu va Xikwembu va ta va vanghanu va yena, va ta mu tekelela kahle Yesu naswona va ta va ni wutomi la ku hetiseka. (Yoh. 13:15-17; Efe. 4:23, 24) Siku ni siku va ta tama va va ni wutomi la linene. Hikakunene wutomi leli li ta tsakisa! (Yobo 33:25) Kambe ku pimisa hi ku pfuxiwa ka vafi swi nga ku pfunisa ku yini swoswi?

13. Hi ku ya hi Tipisalema 139: 1-4, ku pfuka ka vafi ku ta swi kombisa ku yini swaku Yehovha a hi tiva kahle?

¹³ Hi lani hi nga djondza hi kona a ku sunguleni, lava nga ta pfuxiwa, va ta pfuxiwa na va tshamise xileswi a va li xiswona na va nga se fa. Leswo swi vula yini? Swi vula swaku Yehovha wa hi rhandza naswona a yi tiva kahle mimpimiso ya hina, leswi hi ti twisaka xiswona, mavulavulelo ni leswi hi swi yentxaka. Hi mhaka leyo, loko a ta pfuxa lava nga fa, a swi nga ta mu karhatela ku khumbuka leswi a va tshamise xiswona na va nga se fa. Hosi Davhida a a swi tiva swaku Yehovha a mu tiva kahle mun’wana ni mun’wana wa hina. (Lerha Tipisalema 139:1-4.) Ku tiva swaku Yehovha a hi tiva kahle swi hi khumbisa ku yini?

14. Swi hi khumbisa ku yini ku tiva swaku Yehovha a hi tiva kahle?

¹⁴ Ku tiva swaku Yehovha a hi tiva kahle swi hi yentxa hi nga karhateki. Hi mhaka muni? Khumbuka swaku Yehovha a ni mhaka na hina naswona mun’wana ni mun’wana i wa lisima hintamu ka yena. A ni mhaka hi leswi swi hi humelelaka wuton’wini. Hikakunene ku tiva leswo swa hi tiyisa. U nga tshuki u ti twa na u li wexe, minkama hinkwayu Yehovha a na wena naswona a lava ku ku pfuna. — 2 Tikro. 16:9.

15. Ku pfuxiwa ka vafi ku swi kombisa ku yini swaku Yehovha a tlharihile?

¹⁵ Minkama yin’wana munhu a nga ha sindziseka ku yentxa swilo swa ku biha hi ku chava ku dlayiwa. Leswo hi leswi misava ya Sathana yi swi yentxaka, kambe hina a hi chavi ku fa hikusa ha swi tiva swaku hambiloko va hi dlaya Yehovha a ta hi pfuxa. (Nhla. 2:10) Ha swi tiva swaku a xi kona lexi nga hi tshikisaka ku tirhela Yehovha. (Rhom. 8:35-39) Hikakunene ntshembo wa ku pfuxiwa ka vafi wu hi komba swaku Yehovha a ni wutlharhi. Hikusa wu hi yentxa hi tama hi tshembeka ka Yehovha na hi nga chavi nchumu, hambi loko va hi chavisela kumbe va lava ku hi dlaya hileswi hi tirhelaka Yehovha.

16. I yini leswi u faneleke u ti vutisa swona, naswona tinhlamulu ta kona ti nga ku pfunisa ku yini ku tiva swaku u ta mu tshemba Yehovha loko u kumana ni mindzingo?

 ¹⁶ Loko lava nyenyaka Yehovha va vula swaku va ta ku dlaya indje u ta tshemba swaku Yehovha a ta ku pfuxa? Loko ku li leswo, u nga swi tivisa ku yini swaku u ta mu tshemba Yehovha hi nkama wolowo? Ti vutisi leswi: ‘Swiboho swa switsongo leswi ni swi yentxaka siku ni siku swa swi kombisa swaku na mu tshemba Yehovha?’ (Luk. 16:10) Xin’wana u nga ha ti vutisaka xona hi lexi: ‘Mahanyelo ya mina ma swi kombisa swaku na xi tshemba xitshembiso xa Yehovha xa ku a ta ni hlayisa loko ni rhangisa Mfumu?’ (Mat. 6:31-33) Loko nhlamulu ya wena ku li ina, tiyiseka swaku u ta mu tshemba Yehovha naswona u ta swi kota ku hlula midzingo leyi u nga ha kumanaka na yona. — Swi. 3:5, 6.

17. a) Ku pfuxiwa ka vafi ku swi kombisa ku yini swaku Yehovha a lehisa mbilu? b) Hi nga swi kombisa ku yini swaku ha mu khensa Yehovha hi leswi a hi lehiselaka mbilu?

¹⁷ Yehovha a veke siku ni nkama lowu a nga ta helisa hi wona misava ya Sathana. (Mat. 24:36) Kambe Yehovha a tama a lehisa mbilu na nkama wa ku helisa misava leyi wu nga se fika. Hambileswi a swi lavaka hintamu ku pfuxa lava nga fa, a nga heli mbilu. (Yobo 14:14, 15) A nyimela nkama lowu a nga wu veka swaku a ta va pfuxa. (Yoh. 5:28) Hikakunene hi ni swivangelo leswi twalaka swaku hi khensa ku lehisa mbilu ka Yehovha. Hi xikombiso ku lehisa mbilu ka Yehovha ku yentxa swaku vanhu va vanyingi ku patsa na hina hi va ni nkama ‘wa ku txintxa.’ (2 Pet. 3:9) Yehovha a lava swaku vanhu hinkwavu va va ni wutomi la ku kala li nga heli. Se hi nga swi kombisa ku yini swaku ha ku khensa ku lehisa mbilu ka Yehovha? Hi ku lavetela lava hikakunene va nga ti nyimisela ku kuma ‘wutomi lelinga heliki’ hi tlhela hi va pfuna swaku va rhandza Yehovha ni ku mu tirhela. (Mint. 13:48) Phela loko hi yentxa leswo, na vona va ta ti khorisa hi ku lehisa mbilu ka Yehovha.

18. Hi mhaka muni hi fanele hi lehisela mbilu van’wana?

¹⁸ Yehovha a ta tama a hi lehisela mbilu ka Mfumu wa Kreste wa 1.000 wa malembe anze hi hetiseka. Kambe loko nkama lowo wu nga se fika Yehovha a ta tama a hi rivalela swidjoho swa hina. Ku fana na Yehovha hi fanele hi ti karhatela ku vona swa swinene  ka vanhu van’wana hi tlhela hi va lehisela mbilu. Hi xikombiso, nuna wa makwerhu mun’wana a a vilela hintamu a za a nyima ni ku ya mintlhanganwini. Makwerhu lweyi waxisati a li: “A swi ni karhatela hintamu, hikusa wutomi la hina li txintxile hi ku hantlisa naswona hinkwaswu leswi a hi pimise ku swi yentxa tanihi ndjangu a swi nga ha ta koteka.” Hi lirhandzu makwerhu lweyi waxisati a tame a lehisela nuna wa yena mbilu. Makwerhu lweyi a tshembe Yehovha naswona a nga zanga a godola. Ku fana na Yehovha makwerhu lweyi a a ti karhatela ku vona swa swinene ka nuna wa yena. A tlhela a vula leswi: “Nuna wa mina i munhu wa kahle naswona a yentxa hinkwaswu leswi a swi kotaka leswaku a hlula ku vilela loko hi kutsongokutsongo.” Xikombiso xa makwerhu lweyi xi hi djondzisa swaku i swa lisima ku lehisa mbilu loko xaka la hina kumbe makwerhu bandleni a zama ku hlula swikarhatu leswi a kumanaka na swona.

19. Hi fanele hi ti nyimisela ku yentxa yini?

¹⁹ Yesu ni tintsumi va tsakile loko misava yi yentxiwa. Kambe pimisa hi leswi va nga ta tsakisa xiswona loko va vona misava yi tale hi vanhu lava nga hetiseka va tlhela va rhandza ku tirhela Yehovha. Pimisa hi leswi lava nga ta fuma na Yesu amatilweni va nga ta tsakisa xiswona loko va vona vanhu va pfuniwa hi ntirho wa vona lowu va nga wu yentxa na va ha li lani misaveni. (Nhla. 4:4, 9-11; 5:9, 10) Pimisa hi nkama lowu mihloti ya ku vaviseka yi nga ta siviwa hi mihloti ya ku tsaka, loko mavabyi, ku vaviseka ni lifu swi helisiwa swa wugamu. (Nhla. 21:4) Loko leswo swi nga se yentxeka, ti nyimisele ku tekelela lirhandzu, wutlharhi ni ku lehisa mbilu ka Yehovha. Loko u yentxa leswi u ta tshama na u tsakile hambiloko wo kumana ni swikarhatu swa swikulu. (Yak. 1:2-4) Hikakunene hamu khensa Yehovha hi leswi a hi tshembisaka swaku lava nga fa “vatapfuka kufeni.” — Mint. 24:15.