1. Davhida a swi kombise ku yini swaku Yehovha a ti veka hansi?

HA TIYISEKA swaku Yehovha wa ti veka hansi. Davhida a te: ‘Uninyika xitlhangu xa wena xakuponisa . . . naswona kutiveka hansi ka wena kuniyendla lwenkulu.’ (2 Sam. 22:36; Pis. 18:35) Swi nga yentxeka a nkama lowu Davhida a nga tsala marito lawa a a khumbuka siku leli Samuwele a nga ya kaya ka yena swaku a mu tota swaku a va hosi ya Israyele leyi a yi ta landzela. Hambileswi Davhida a a li mutsongo, Yehovha a a mu langile swaku a ta va hosi ya Israyele leyi a yi ta txintxa Sawulo. — 1 Sam. 16:1, 10-13.

2. Hi ta djondza hi yini ka nhlokomhaka leyi?

² Davhida a a ti twisa xileswi mutsali wa Tipisalema 113 a a ti twisa xiswona loko a ku: “Wa korhama leswaku a languta tilo ni misava, a pfuxa munhu wa kutiveka hansi alithulwini. A tlakusa xisiwana axi susa ankumeni”. (Pis. 113:6-8) Ka nhlokomhaka leyi hi ta sungula hi ku djondza hi swiyimu leswi Yehovha a nga ti veka hansi ka swona. Hi ta tlhela hi djondza hi ku ti veka hansi ka xikombiso xa hosi Sawulo, muprofeta Daniyele na Yesu.

3. Leswi Yehovha a nga hi yentxela swona, swi kombisa yini?

³ Hi vona ku ti veka hansi ka Yehovha hileswi a va khomisaka xiswona vanhu lava kalanga va nga hetisekanga, vanhu lava va mu tirhelaka. Hambileswi va kalaka va nga hetisekanga, wa pfumela swaku va va vanghanu va yena. (Pis. 25:14) Leswaku swi koteka kuva hi va vanghanu va yena, Yehovha a nyikele hi N’wana wa yena swaku a fela swidjoho swa hina. Hikakunene Yehovha a hi kombe timpsalu ta tikulu.

4. Yehovha a hi nyike yini naswona hi mhaka muni?

 ⁴ Pimisa hi xiyimu xin’wani lani hi vonaka ku ti veka hansi ka Yehovha. Leswi inga yena a nga hi yentxa a a ta va a hi yentxe hi nga swi koti ku ti langela leswi hi swi lavaka. Kambe a nga yentxanga leswo, a hi yentxe hi xifaniso xa yena a tlhela a hi nyika chunseko wa ku yentxa leswi hi swi lavaka. Hambileswi hi nga vatsongo loko hi ringanisiwa na yena, a lava hi mu tirhela hi ku swi rhandza naswona loko hi mu yingisa swi ta pfuna hina. (Det. 10:12; Esa. 48:17, 18) Ha tsaka hintamu hi ku tiva swaku Yehovha wa ti veka hansi.

5. Yehovha a hi djondzisisa ku yini ku ti veka hansi? (Vona xifaniso ka pajina la ku sungula.)

⁵ Yehovha a hi djondzisa ku ti veka hansi hi leswi a hi yentxelaka swona. A ku na munhu wa ku tlhariha ku fana na yena, hambileswo wa pfumela ku pfuniwa hi van’wana. Hi xikombiso, a pfumele swaku Yesu a mu pfuna ku yentxa minchumu hinkwayu. (Swi. 8:27-30; Kol. 1:15, 16) Naswona hambileswi a nga Hosi ya matimba hinkwawu a nyika van’wana mintirho. Hi xikombiso, a veke Yesu swaku a va Hosi ya Mfumu wa yena funtshi a ta tlhela a nyika lava 144.000 a wuhosi swaku va ta fuma na Yesu. (Luk. 12:32) Yehovha a tlhele a djondzisa Yesu swaku a va Hosi ni ku va Muprista Lwenkulu. (Hev. 5:8, 9) A tlhela a djondzisa lava nga ta fuma na Yesu ku yentxa ntirho wa yena kambe a nga tshameli ku va landzelela ka leswi va wu yentxisaka xiswona ntirho wa yena. Ku hambana ni leswo, a tshemba swaku va ta wu yentxa kahle a ntirho wa yena. — Nhla. 5:10.

6-7. Hi nga djondza yini ka Yehovha hi ku nyika van’wana mintirho?

⁶ Loko Yehovha lweyi a kalaka a nga lavi  ku pfuniwa hi munhu a nyika van’wana mintirho, se swi li yini hi hina? Hi xikombiso, u mulumuzana kumbe u doda abandleni? Tekelela xikombiso xa Yehovha hi ku nyika van’wana mintirho u tlhela u nga va landzeleli swaku va wu yentxisa ku yini ntirho. Loko u tekelela Yehovha, a wu nga ta yentxa swilo u li wexe kambe u ta djondzisa van’wana u tlhela u tshemba swaku va ta wu yentxa kahle ntirho. (Esa. 41:10) Hi nga djondza yini swin’wana ka leswi Yehovha a fumisaka xiswona?

⁷ Bibele li hi byela swaku loko tintsumi ti nyikela mavonelo Yehovha wa ti yingisa. (1 Tiho. 22:19-22) Vapsali va nga mu tekelelisa ku yini Yehovha? Loko va nyika mintirho vana, va fanele va va vutisa mavonelo ya vona. Loko mavonelo wolawo ma tirha, ma tirhiseni.

8. Yehovha a va lehiselise ku yini mbilu Abrahamu na Sara?

⁸ Hi tlhela hi vona ku ti veka hansi ka Yehovha loko a lehisa mbilu. Hi xikombiso, Yehovha a lehisa mbilu loko lava va mu tirhelaka va mu vutisa swivutiso. A nkama Abrahamu a nga mu byela leswi a a ti twisa xiswona hi ku helisiwa ka Sodoma na Gomora, Yehovha a mu yingisile. (Gen. 18:22-33) Mun’wana lweyi a nga mu lehisela mbilu hi Sara. Yehovha a nga kwatanga a nkama Sara a nga hleka xitshembiso xa yena xa ku a a ta va ni n’wana hambileswi a a gugile. (Gen. 18:10-14) Ku hambana ni leswo a mu lehisele mbilu.

9. Vapsali ni madoda minga djondza yini ka xikombiso xa Yehovha?

⁹ Vapsali ni madoda mi nga djondza yini ka xikombiso xa Yehovha? U yentxa yini loko n’wana wa wena kumbe makwerhu abandleni a nga pfumeli leswi u swi vulaka? U tekela ku ti nyimelela kumbe u zama ku twisisa mavonelo ya yena? Loko madoda ma tekelela Yehovha, mindjangu ni mabandla ma ta pfuneka hintamu. Ku ta fikela lani, se hi djondze hi xikombiso xa Yehovha xa ku ti veka hansi, swoswi hi ta djondza hi swikombiso swi nga ka Bibele leswi nga ta hi pfuna ku ti veka hansi.

10. I mpsini swin’wana leswi Yehovha a swi tirhisaka swaku a hi djondzisa?

¹⁰ Yehovha, ‘Mudjondzisi Lwenkulu’ a hi nyike swikombiso leswi nga ka Bibele swaku swi hi djondzisa. (Esa. 30:20, 21) Loko hi djondza Bibele hi kuma vanhu lava nga tekelela wumunhu la Yehovha ku patsa ni ku ti veka hansi. Hi tlhela hi djondza hi lava nga tsandzeka ku tekelela wumunhu la Yehovha. — Pis. 37:37; 1 Kor. 10:11.

11. Hi djondza yini ka xikombiso xa ku biha xa Sawulo?

¹¹ Pimisa hi leswi inga humelela Hosi Sawulo. A ku sunguleni a a ti veka hansi, a a swi tiva swaku a nge swi koti ku yentxa swilo hinkwaswu. Hi mhaka leyo, a a swi vona swi nga mu faneli ku va hosi. (1 Sam. 9:21; 10:20-22) Hi ku famba ka nkama a sungule ku ti byela, a yentxe swa ku biha hileswi se a li hosi. Siku lin’wana a nga swi kotanga ku lehisa mbilu loko a nyimela muprofeta Samuwele swaku a ta nyikela gandzelo. Ku hambana ni ku tshemba Yehovha phambheni ka xitshungu, Sawulo a nyikele gandzelo ku nga nchumu lexi a a nga fanelanga a xi yentxa. Leswo swi yentxe leswaku Yehovha a mu tekela wuhosi a tlhela a nga ha li munghanu wa Yehovha. (1 Sam. 13:8-14) I swinene  ku djondza hi xikombiso lexi swaku hi nga yentxi swilo leswi kalaka swi nga hi lumbi.

12. Hi mhaka muni Daniyele a li xikombiso xa kahle?

¹² Ku hambana ni xikombiso xa ku biha xa Sawulo, swoswi a hi voneni xikombiso xa kahle xa muprofeta Daniyele. Daniyele a a ti veka hansi naswona minkama hinkwayu loko a lava ku yentxa nchumu a a vutisa Yehovha. Hi xikombiso, a nkama Yehovha a nga mu tirhisa swaku a tlhamusela leswi nga lorhiwa hi Nebukadnetsara a nga zanga a ti byela. Hi ku ti veka hansi, a dzunise Yehovha. (Dan. 2:26-28) Hi djondza yini? Loko hi veka kahle wukaneli kumbe swi hi fambela kahle ka ntirho wa ku chumayela, hi fanele hi dzunisa Yehovha minkama hinkwayu hikusa ha swi tiva swaku loko a a nga hi pfuni a hi nga ta swi kota ku swi yentxa swilo leswi hinkwaswu. (Filp. 4:13) Loko hi yentxa leswi hi ta va hi tekelela xikombiso xa xinene xa Yesu, hi mhaka muni hi vula leswi?

13. Hi ku ya hi Yohane 5:19, 30, hi djondza yini ka xikombiso xa Yesu?

¹³ Hambileswi Yesu a nga N’wana wa Xikwembu wa ku hetiseka, minkama hinkwayu a a yingisa Yehovha. (Lerha Yohane 5:19, 30.) A nga zanga a pimisa ku tekela Papayi wa yena wuhosi. Vafilipiya 2:6 yi hi byela swaku Yesu “angatiringanisanga ni Xikwembu”. Leswi a a ti veka hansi a a swi twisisa swaku ku ni swin’wana leswi a a nga fanelanga a swi yentxa naswona a a hlonipha wuhosi la Papayi wa yena.

14. Yesu a hlamulise ku yini loko va mu kombela nchumu xa ku a hi yena a a fanele a xi yentxa?

¹⁴ Vona leswi Yesu a nga hlamulisa xiswona loko Yakobo, Yohane ni mamana wa vona va mu kombela nchumu xa ku a hi yena a a fanele a xi yentxa. Yesu a tekele ku va byela swaku i Yehovha ntsena lweyi a a ni nfanelo ya ku langa lweyi a a fanele a tshama a tlhelweni ka yena ka xinene kumbe ka ximantsi ka Mfumu wa yena. (Mat. 20:20-23) Leswi a a ti veka hansi a a swi tiva swaku a a nga fanelanga a yentxa hinkwaswu. A a nga yentxi leswi Yehovha a a nga mu byelanga swaku a swi yentxa. (Yoh. 12:49) Hi nga mu tekelelisa ku yini Yesu?

15-16. Hi nga ma tirhisisa ku yini marito lawa manga ka 1 Vakorinto 4:6?

 ¹⁵ Hi nga tekelela xikombiso xa Yesu xa ku ti veka hansi loko hi tirhisa leswi swi nga ka 1 Vakorinto 4:6 yi li: ‘Ungatluli leswitsaliweke.’ A hi fanelanga hi sindzisa van’wana swaku va pfumela mavonelo ya hina kumbe hi lwela swaku mavonelo ya hina ma li wona ma tirhisiwaka, handle ka leswo hi fanele hi tirhisa leswi hi swi djondzaka ka Bibele ni ka mabuku ya hina. Loko hi yentxa leswo, hi ta va hi kombisa swaku a hi tivi hinkwaswu. Naswona loko hi ti veka hansi hi ta va hi kombisa swaku i Yehovha ntsena lweyi a faneleke a hi byela leswi hi faneleke hi swi yentxa. — Nhla. 15:3, 4.

¹⁶ Handle ka ku dzunisa Yehovha ku ni swin’wana leswi swi hi yentxaka hi ti veka hansi. Swoswi hi ta vona swaku ku ti veka hansi swi nga hi pfunisa ku yini swaku hi tsaka hi tlhela hi hanyisana kahle ni van’wana.

17. Hi mhaka muni vanhu va ku ti veka hansi va tsaka?

¹⁷ Loko hi ti veka hansi hi ta tsaka hintamu. Hi mhaka muni? Hikusa hi ta pfumela swaku a hi koti ku yentxa swilo hinkwaswu funtshi hi ta tsaka loko van’wana va hi pfuna. Hi xikombiso, pimisa hi 10 wa vavanuna lava Yesu a nga va hanyisa ka mavabyi ya vona. Kova mun’we ntsena lweyi a nga tlhela ka Yesu a ya mu khensa hileswi a nga mu hanyisa mavabyi ya ku karhata. Wanuna lweyi wa ku ti veka hansi a khensile hileswi Yesu a nga mu pfuna naswona a dzunise Xikwembu. — Luk. 17:11-19.

18. Hi ku ya hi Varhoma 12:10, ku ti veka hansi swi hi pfunisa ku yini ku hanyisana ni van’wana?

¹⁸ Vanhu va ku ti veka hansi va hanyisana kahle ni vanhu van’wana naswona swa  va vevukela ku va ni vanghanu. Hi mhaka muni? Hikusa va tsaka loko va vona swilo swa swinene leswi yentxiwaka hi vanhu van’wana. Vanhu va ku ti veka hansi va tsaka loko vanhu van’wana va yi yentxa kahle mintirho ya vona naswona va va khensa va tlhela va va hlonipha. — Lerha Varhoma 12:10.

19. Hi mhaka muni hi nga fanelanga hi ti byela?

¹⁹ Vanhu va ku ti byela swa va karhatela ku khensa van’wana hikusa va rhandza swaku ku khensiwa vona, va rhandza ku ti fananisa ni van’wana ni ku phikizana. Vanhu va ku ti byela va pimisa swaku mavonelo ya vona hi wona ya ku yampsa hi mhaka leyo, a va swi lavi kutwa mavonelo ya van’wana. Naswona va ti vona va li va lisima ku tlula van’wana funtshi a va tsaki loko va vona van’wana va yentxa swilo ku va tlula. (Gal. 5:26) Vanhu va ku ti byela a va rhandziwi hi munhu, loko ho tshuka hi tsumbula swaku hi sungula ku ti byela hi fanele hi khongela ka Yehovha hi mu kombela swaku a hi pfuna ku txintxa ‘mimpimiso ya hina’ hikusa Yehovha wa va nyenya vanhu va ku ti byela. — Rhom. 12:2.

20. Hi mhaka muni hi fanele hi ti veka hansi?

²⁰ Ha tsaka hileswi Yehovha a nga xikombiso xa xinene. A ti veka hansi loko a tirhisana ni lava va mu tirhelaka, naswona a lava swaku hi mu tekelela. A lava swaku hi tekelela swikombiso swa swinene swa vanhu lava nga ti veka hansi leswi nga ka Bibele. Hi mhaka leyo, hinkwerhu hi fanele hi dzunisa Yehovha minkama hinkwayu. (Nhla. 4:11) Loko hi yentxa leswo, wunghanu la hina na Yehovha a li nga ta hela hikusa a rhandza vanhu lava va ti vekaka hansi.