1. I yini lexi hi yentxaka hi tsaka?

HA TSAKA hileswi hi nga ka nhlengeletanu ya Yehovha. Ha ti khorisa hi ku rhula ni ku tsaka loko hi tirhela Yehovha ni vamakwerhu va hina bandleni. Kambe ku nga va leswaku wena u wa lisima bandleni?

2. Hi xi hi xikombiso lexi Pawulo a nga xi tirhisa ka makarta ya yena?

² Hi nga djondza swa ku tala ka xikombiso lexi Pawulo a nga xi tirhisa makhambi ya manyingi ka makarta ya yena, hi lisima leli hi nga na lona bandleni. Ka makarta wolawo Pawulo a fananise bandla ni miri wa munhu. A tlhele a fananisa mun’wana ni mun’wana bandleni ni swirho swa miri. — Rhom. 12:4-8; 1 Kor. 12:12-27; Efe. 4:16.

3. Hi ta djondza yini ka nhlokomhaka leyi?

³ Ka nhlokomhaka leyi, hi ta bula hi swilo swinharhu leswi hi nga swi djondzaka ka xikombiso xa Pawulo. Xa ku sungula hi ta djondza swaku mun’wana ni mun’wana wa hina i wa lisima * bandleni. Xa wumbirhi hi ta vona swaku hi nga yentxa yini loko hi ti twa na hi nga pfuni nchumu bandleni. Xa wunharhu hi ta djondza swaku hi mhaka muni hi fanele hi tama hi yentxa ntirho lowu Yehovha a nga hi nyika wona bandleni.

4. Hi djondza yini ka Varhoma 12:4, 5?

⁴ Xa ku sungula lexi hi xi djondzaka ka xikombiso xa Pawulo, hi leswaku hinkwerhu bandleni hi va lisima ka Yehovha.  Pawulo a sungula xikombiso xa yena hi vula leswi: ‘Hikusa kukota leswi hinga ni swirho leswinyingi miri wuli wun’we, naswona swingaliki na ntirho wun’we, hi ndlela yoleyo, na hina, hambi hili vanyingi, hi miri wun’we ka Kreste, kutani mani na mani wa hina i xirho ka mun’wana.’ (Rhom. 12:4, 5) Pawulo a a lava ku vula yini hi leswi? A a lava ku vula leswaku hambi leswi hi nga ni mintirho ya ku hambana bandleni, hinkwerhu hi va lisima ka Yehovha.

5. I va mani lava nga “tinyiko” leti Yehovha a nga ti nyika bandla?

⁵ Swi nga yentxeka u pimisa swaku lava nga va lisima bandleni i madoda. (1 Tes. 5:12; Hev. 13:17) Yehovha a hi nyike “tinyiko letinga vanhu” bandleni. (Efe. 4:8) “Tinyiko” toleto i Ntlawa Lowu Rhangelaka ni vapfunisi va vona, vamakerhu va Comissão ya Filiyali, vadjikelezi, vamakwerhu lava djondzisaka swikola swa nhlengeletanu, madoda ya bandla ni vapfunisi va bandla. Vamakwerhu lava hinkwavu, va vekiwe hi Yehovha leswaku va hlayisa bandla. — 1 Pet. 5:2, 3.

6. Hi ku ya hi 1 Vatesalonika 2:6-8, i yini leswi vamakwerhu lava nga vekiwa hi Yehovha va zamaka ku swi yentxa?

⁶ Hi ku pfuniwa hi moya wa ku kwetsima vamakwerhu lava va yentxa mintirho ya yinyingi. Ku fana ni leswi mavoko ni minenge, ni swin’wana ka miri swi tirhisanaka, ni vamakwerhu lava nga vekiwa hi Yehovha va tirhisana leswaku va pfuna bandla. Naswona a va lavi ku voniwa na va li va lisima ku tlula van’wana. Kambe va zama ku tiyisa vamakwerhu. (Lerha 1 Vatesalonika 2:6-8.) Hi mu khensa hintamu Yehovha hi tinyiko leti a nga ti nyika bandla!

7. Hi yi hi minkateko leyi yi kumiwaka hi lava nga ka ntirho wa nkama hinkwawu?

⁷ Van’wana bandleni i va misiyonariyo, vapfuli va ndlela va ku hlawuleka kumbe vapfuli va ndlela va nkama hinkwawu. Phela vamakwerhu va vanyingi amisaveni hinkwayu va tirhisa nkama wa vona hinkwawu leswaku va chumayela mahungu ya ku tsakisa. Va yentxa leswo leswaku va pfuna vanhu va vanyingi swaku va va vadjondzisiwa va Kreste. Hambileswi vamakwerhu lava va tirhaka ka ntirho wa nkama hinkwawu va kalaka va nga ganyanga Yehovha a va katekisa hintamu. (Marka 10:29, 30) Ha va rhandza vamakwerhu lava naswona ha va khensa hi ntirho wa vona lowu pfunaka mabandla!

8. Hi mhaka muni vachumayeli hinkwavu va li va lisima ka Yehovha?

⁸ Vamakwerhu lava rhangelaka ntirho ni lava va tirhaka ka ntirho wa nkama hinkwawu, kova vona ntsena lava nga va lisima bandleni? Ihim! Vachumayeli hinkwavu va mahungu ya ku tsakisa i va lisima ka Xikwembu ni ka bandla. (Rhom. 10:15; 1 Kor. 3:6-9) Phela nchumu wun’wana wa lisima lowu bandla li faneleke li wu yentxa, i ku djondzisa vanhu leswaku va va vadjondzisiwa va Kreste. (Mat. 28:19, 20; 1 Tim. 2:4) Leswi vulaka leswaku kumbe u muchumayeli lweyi a nga tsakamisiwa kumbe lweyi a kalaka a nga tsakamisiwanga, u fanele u lwela ku rhangisa ntirho wa ku chumayela ka wutomi la wena. — Mat. 24:14.

9. Hi mhaka muni vamakwerhu vaxisati va li va lisima?

⁹ Vamakwerhu vaxisati na vona i va lisima abandleni. A ku na mhaka swaku va chadile kumbe a va chadanga, kumbe va feliwe hi vavanuna va vona, kumbe va mamana,  vamakwerhu lava i va lisima ka Yehovha loko va mu tirhela hi ku tshembeka. Bibele li tale hi swikombiso swa vavasati lava nga tshama va tshembekile ka Yehovha. Lava nga pfuna van’wana hi ku kombisa wutlharhi, lipfumelo ni mintirho yin’wana ya yinene. (Luk. 8:2, 3; Mint. 16:14, 15; Rhom. 16:3, 6; Filp. 4:3; Hev. 11:11, 31, 35) Hi mu tlangela hintamu Yehovha hi leswi hi nga ni vamakwerhu lava vaxisati amabandleni!

10. Hi mhaka muni vamakwerhu lava se va nga guga va li va lisima?

¹⁰ Van’wana lava nga va lisima bandleni i va makwerhu lava se va nga guga. Ka mabandla man’wana ku ni vamakwerhu lava se va nga guga, lava se ku nga khale na va tirhela Yehovha ka wutomi la vona. Kasi van’wana va ha ku djondza ntiyiso swoswi. Leswi vamakwerhu lava nga guga va kumana ni swikarhatu swa swinyingi swa ku fana ni mavabyi, swikarhatu leswi swi nga va yentxa va nga li pfuni hintamu bandla kumbe ku heta nkama wa wunyingi na va li ku chumayeleni. Hambi leswo vamakwerhu lava va tirhisa ntamu wa vona hinkwawu ka ntirho wa ku chumayela ni ku djondzisa van’wana mintirho bandleni. Hi nga djondza swa ku tala ka vamakwerhu lava. Hikakunene vamakwerhu lava i va lisima hintamu ka hina ni ka Yehovha. — Swi. 16:31.

11-12. Majovhem ya bandla ma hi tiyisisa ku yini?

¹¹ Pimisa hi majovhem lawa hi nga na wona bandleni. Ma kumana ni swikarhatu swa swinyingi ka misava leyi ya Sathana. (1 Yoh. 5:19) Hambileswo, swa hi tiyisa ku va vona na va hlamula amintlhangawini, va ya nsin’wini va tlhela va chumayela vakolega va vona. Impela majovhem i ya lisima bandleni! — Pis. 8:2.

¹² Phela vamakwerhu van’wana va nga titwa na va nga pfuni nchumu bandleni. Kambe swoswi a hi voneni lexi nga hi pfunaka ku vona swaku mun’wana ni mun’wana wa hina i wa lisima abandleni.

13-14. Hi mhaka muni van’wana va titwa na va nga li va lisima bandleni?

¹³ Vona nchumu wa wumbirhi lowu hi nga wu djondzaka ka xikombiso xa Pawulo. Vamakwerhu va vanyingi swa va karhatela ku pfumela swaku i va lisima bandleni. Kambe Pawulo a te: ‘Loko nenge wuku: “Leswi ningaliki voko, ani wa miri”, xana hakunene awungevi wa miri, hambi loko wuvulavulisa leswi ke? Ihim! Ni loko ndleve yiku: “Leswi ningaliki tihlo, ani wa miri”, xana hakunene ayingevi ya miri, hambi loko yivulavulisa leswi ke? Ihim!’ (1 Kor. 12:15, 16) Hi djondza yini ka marito lawa?

¹⁴ Loko u ti fananisa ni van’wana bandleni swi nga yentxeka u sungula ku pimisa swaku a wu wa lisima. Hikusa van’wana va djondzisa kahle, va swi kota ku lunghisa swilo naswona van’wana va swi kota ku tiyisa vamakwerhu. U nga ha pimisa swaku a wu nge swi koti ku fana na vona. Loko u titwisa xileswo swikombisa swaku u ti veka hansi. (Filp. 2:3) Kambe ti voneli! Loko u tshamela ku fananisa leswi u swi yentxaka ni leswi van’wana va kotaka ku swi yentxa, u nga tshuka u ti vona u nga li wa nchumu bandleni. Kambe i yini lexi nga ku pfunaka swaku u nga titwisi xileswo?

15. Hi ku ya hi 1 Vakorinto 12:4-11, i yini leswi hi faneleke hi swi tiva hi tinyiko leti hi nga na tona?

¹⁵ Pimisa hi leswi: Ka nkama wa vapostolo, Yehovha a tirhise moya wa yena wa ku kwetsima leswaku a nyika Vakreste tinyiko, kambe a ti nga fani. (Lerha 1 Vakorinto 12:4-11.) Phela Yehovha a va nyike tinyiko ta ku hambana kambe Vakreste hinkwavu a va li va lisima. Ni namuntlha, a hi yentxi mintirho ya ku fana bandleni, kambe hinkwerhu hi va lisima ka Yehovha.

16. Hi wa ni marito ya Pawulo lawa hi faneleke hi ma tirhisa?

¹⁶ Handle ka ku ti fananisa ni vamakwerhu van’wana, hi fanele hi khumbuka marito ya Pawulo lama nge: ‘Mun’wana ni mun’wana a akambisise ntirho wa yena, kuli kona angakotaka kutidzunisa hi swa yena’,  kambe a nga yentxi leswo hi ku ti fananisa ni mun’wana. — Gal. 6:4.

17. Marito ya Pawulo ma nga hi pfunisa ku yini?

¹⁷ Loko hi tirhisa marito ya Pawulo loko ku kambisisa ntirho wa hina, hi nga ha tsumbula swaku ku ni swilo hi kotaka ku swi yentxa swaku van’wana a va swi koti. Hi xikombiso doda li nga tshandzeka ku veka kahle wukaneli kambe loko li li sin’wini li djondzisa kahle. Kumbe swi nga ha yentxeka a nga li organizadu ku fana ni madoda man’wana kambe vamakwerhu va mu rhandza naswona va chunseka ku vulavula na yena hi mhaka ya leswi a nga ni wumunhu la kahle. Kumbe a nga ha va a tiviwa hi ku va a yamukela kahle vapfhumba. (Hev. 13:2, 16) Loko hi swi kota ku vona tinyiko leti hi nga na tona hi ta titwa na hi li va lisima bandleni. Naswona a hi nga ta tshamela ku ti fananisa ni vamakwerhu van’wanyana lava yi yentxaka kahle mintirho ya vona.

18. Hi nga swi kotisa ku yini ku djondzisa kahle?

¹⁸ A swi na mhaka swaku hi yentxa yini bandleni, hinkwerhu hi nga swi kota ku tirhisa tinyiko ta hina swaku hi pfuna bandla. Yehovha a hi pfuna hi ku tirhisa bandla. Hi xikombiso a tirhisa mintlhanganu ya xikarhi ka vhiki swaku a hi djondzisa leswi hi faneleke hi chumayelisa xiswona. Indje wena wa swi tirhisa leswi u swi djondzaka ka mintlhanganu leyi?

19. U nga yentxa yini kuva u kota ku ya ka Xikola xa Vachumayeli va Mfumu?

¹⁹ Xin’wana lexi Yehovha a nga hi nyika i Xikola xa Vachumayeli va Mfumu. Xikola lexi xi yentxeliwe vamakwerhu lava nga ka ntirho wa nkama hinkwawu, va nga ni malembe ya ku sukela ka 23 ku ya ka 65. Handle ka ku ti byela swaku a wu nge tshuki u yile ka xikola lexi, zama ku yentxa lixta la swilo leswi swi nga ha ku yentxaka u nga yi ka xikola lexi, u tlhela u tsala swilo leswi ku yentxaka u lava ku ya ka xikola lexi. Leswi, swi ta ku pfuna ku yentxa leswi lavekaka leswaku u kota ku ya ka xikola lexi. Loko u yentxa leswi, Yehovha a ta ku pfuna kuva u kota ku ya ka xikola lexi.

20. Hi djondza yini ka Varhoma 12:6-8?

²⁰ Nchumu wa wunharhu lowu hi nga wu djondzaka ka xikombiso xa Pawulo wu le ka Varhoma 12:6-8. (Lerha.) Ka tindzimana leti Pawulo a tlhela a vula swaku hinkwavu bandleni va ni tinyiko ta ku hambana. Kambe hi fanele hi tirhisa tinyiko toleto leswaku hi kulisa hi tlhela hi tiyisa bandla.

21-22. Hi djondza yini ka xikombiso xa makwerhu Roberto na Felice?

²¹ Vona leswi nga humelela makwerhu lweyi hi nga ta mu vitana Roberto. Makwerhu lweyi a a tirhela ka tiko lin’wana. Kambe va game va mu rhumela ku ya tirha aBetele la tiko la yena. Hambileswi makwerhu Roberto a a swi tiva swaku a nga wonhanga nchumu, a vule leswi: “Ni hete tiwheti ta tinyingi na ni nga tsakanga hikusa a ni pimisa swaku ntirho wa mina a ni nga wu yentxanga kahle, leswo swi ni yentxe ni lava ku tshika ku tirha Betele.” Kambe i yini xi nga pfuna makwerhu Roberto swaku a tlhela a tsaka? Doda lin’wana li khumbukise makwerhu Roberto swaku Yehovha a hi djondzisa ka ntirho wa hina wa khale leswaku hi ta kota ku wu yentxa kahle ntirho lowu hi nga na wona swoswi. Makwerhu  Roberto a vone swi yampsa ku ti nyimisela ku pimisa hi ntirho lowu a a wu yentxa handle ka ku tshamela ku pimisa hi ntirho wa yena wa khale.

²² Makwerhu Felice Episcopo a kumane ni xikarhatu xa ku fana. Makwerhu lweyi ni nsati wa yena va ye ka xikola xa Jiliyadi hi 1956, va gama va va vadjikelezi le Bolivia. Kambe hi 1964 va ve ni n’wana. Makwerhu Felice a te: “Swi hi karhatelile ku tshika ntirho lowu a hi wu rhandza naswona ni hete lembe na ni ti sola. Kambe Yehovha a ni pfunile swaku ni txintxa mapimiselo ya mina ni tlhela ni va papayi wa munene.” Wena ke, u tshame u titwa kufana ni vamakwerhu lava? U tshama u godola hi mhaka leswi u kalaka u nga ha swi koti ku yentxa ntirho lowu a wu wu yentxa khale? Loko kule leswo, lexi xi nga ku yentxaka u tsaka, i ku txintxa mapimiselo ya wena u tlhela u ti nyimisela ku tirhela Yehovha ni vamakwerhu. Tirhisa nyiko ya wena swaku u pfuna van’wana u tlhela u tiyisa bandla.

23. Hi fanele hi pimisa hi yini naswona hi ta djondza hi yini ka nhlokomhaka leyi landzelaka?

²³ Hinkwerhu hi va lisima ka Yehovha. Naswona a lava swaku hi tama hi va ndjangu wa yena. Loko hi pimisa hi leswi hi nga swi yentxaka swaku pfuna vamakwerhu hi tlhela hi tirha hintamu, hi ta swi vona swaku hi va lisima bandleni. Kambe hi fanele hi va vonisa ku yini vamakwerhu bandleni? Hi nga swi kombisa ku yini swaku ha va rhandza? Nhlokomhaka leyi landzelaka yi ta hlamula swivutiso leswi.