Hi byeli leswi u nga kulisa xiswona.

Ni psaliwe hi 1979 aEstados Unidos naswona vapsali va mina va divhorsiyarile na ni ni malembe manharhu. Ku sukela na na ha li mutsongo, mamani a ni djondzise tidjondzo ta Xiyuda naswona a ni yise ka swikola swa Xiyuda. Loko ni ni 7 wa malembe hi fambe hi ya tshama aIsrayele ku ringana lembe lin’we naswona a ni ya xikola lexi a xi vitaniwa kibbutz, lani vanhu va kona a va tshama xikan’we va tlhela va tirha xikan’we se mina na Mamani hi game hi rhurha hi ya México.

A ku nga na sinagoga kumbe kereke ya Xiyuda ka ndhawu leyi a hi tshama kona. Hambileswo ni tame ni hanya hi ku landza mahanyelo ya Xiyuda. A ni tlhavika mavhela hi siku la Sábado ni lerha a Torah ni tlhela ni khongela hi ku tirhisa buku la swikhongelo leli vitaniwaka siddur. A xikola a ni byela vakolega va mina swaku a wukhongeli la mina hi lona la ku sungula li va kona, a ni nge se tshama ni lerha Textamentu ya Nyuwani leli vulavulaka hintamu hi ntirho lowu Yesu Kreste a nga wu yendla lani misaveni ni leswi a nga swi djondzisa. Funtshi mamani wa mina a ni byele swaku a ni nga fanelanga ni swi yendla leswo hikusa a swi ta ni hambukisa ka wukhongeli la mina.

I mpsini swi nga ku yendla u lerha Textamentu ya Nyuwani?

Nkama na ni ni 17 wa malembe ni tlhele ni rhurha ni ya Estados Unidos leswaku ni ya hetisa ku djondza. Kolanu ni tive munhu lweyi a nga ni byela swaku a a li Mukreste naswona a ni nga ta tsaka ka wutomi la mina loko ni nga mu tivi Yesu.

Ni te, “Vanhu lava pfumelaka ka Yesu va lahlekile.”

Se yena a ku, “U tshama u lerha Textamentu ya Nyuwani?”

Se mina ni ku: “Ihim.”

A gama a ku: “U vona swaku swa twala ku nyikela mavonelo hi nchumu xa ku kala u nga xi tivi?”

Leswo swi ni khumbe hintamu hikusa a ni pimisa swaku a swi twali ku nyikela mavonelo hi nchumu u kalaka u nga xi tivi. Hi mhaka leyo ni swi vone swi yampsa ni teka Bibele la yena la Textamentu ya Nyuwani ni muka na lona naswona ni sungule ku li lerha.

Leswi u nga swi lerha swi ku pfunise ku yini?

Swi ni hlamalise hintamu ku vona swaku lava va nga tsala Textamentu ya Nyuwani a va li Vayuda. Loko ni ya ni lerha ni tsumbule swaku Yesu a a li Muyuda wamunene lweyi a a tiveka hansi naswona a a lava ku pfuna van’wani ku nga li ku va kanganyisa, funtshi ni tlhele ni ya bibliyoteka ni ya teka mabuku lawa a ma vulavula hi yena kambe a li kona ni la lin’we ka wona li nga ni yendla ni kholwa swaku Yesu a a li Mesiya. Man’wani a ma vula swaku Yesu a a li Xikwembu kambe ka mina leswo a swi nga twali hikusa loko a li Xikwembu, se a a khongela ka mani? A a khongela ka yena n’winyi? Xin’wani hi leswaku Yesu a file kambe Bibele loko li vulavula hi Xikwembu li li: “[Wena] a wu fi”. a

Leswi u nga swi lerha swi ku khumbise ku yini?

A ni tinyimisele ku kuma ntiyiso naswona a ni swi tiva swaku a ntiyiso a wu nge vuli minchumu ya ku hambana hi nchumu wolowu wa wun’we. Ni khongele ka Xikwembu hi mbilu hinkwayu na ni rila naswona ku ve ka ku sungula ni khongela na ni nga tirhisi a buku la swikhongelo leli vitaniwaka siddur. Nkama ni nga gama ku yendla xikhongelo, ni beliwe xipfalu, a ku li Timboni ta Yehovha timbirhi, va ni nyike buku la ku djondza hi lona. Buku lelo ni mabulu lawa hi nga tama hi va na wona swi ni kholwisile swaku leswi va pfumelaka ka swona swi ta hi ka Bibele. Hi xikombiso, Timboni ta Yehovha a ti kholwi swaku Yesu, Xikwembu ni moya wa ku kwetsima i munhu mun’we kambe ti kholwa swaku Yesu i “N’wana wa Xikwembu,” b naswona hi yena “wa ku sungula ka leswi Xikwembu xi nga swi yendla”. c

Ni tlhele ni ya México lani ni nga ya tama ni djondza ni Timboni ta Yehovha hi wuprofeta leli vulavulaka hi Mesiya. Ni hlamalisiwe hintamu hi ku tala ka wuprofeta leli. Hambileswo a ku ni leswi a swa ha ni kanakanisa, a ni tivutisa ni ku: ‘A ko va Yesu ntsena lweyi a a ta hetisisa wuprofeta leli?’ A ni tlhela ni tivutisa ni ku: ‘Indjhe Yesu a nga yo tiyendla Mesiya hi ku zama ku hetisisa wuprofeta hinkwalu leli vulavulaka hi Mesiya?’

I mpsini swi nga ku kholwisa?

Timboni ta Yehovha ti ni pfune ku vona swaku a ku nga na munhu mun’wani lweyi a a ta hetisisa wuprofeta leli loko a ku nga li Mesiya. Hi xikombiso, na ka ha chota 700 wa malembe, muprofeta Mikiya se a a vulile swaku Mesiya a a ta psaliwa aBetlehema, aYudiya. d A ku na munhu lweyi a tilangelaka lomu a nga ta psaliwa kona. Esaya a tsale swaku Mesiya a a ta dlayiwa ku fana ni swigevenga kambe a a ta lahliwa ni vanhu va ku ganya. e Wuprofeta hinkwalu leli li hetisekile ka Yesu.

Wuprofeta lin’wani li vulavula hi lixaka leli Yesu a nga psaliwa ka lona. Bibele li vula swaku Mesiya a a ta huma ka lixaka la Hosi Davhida. f Leswi vayuda a va vekisa mabuku ya tinxaka leti vanhu va humaka ka tona, loko Yesu a a nga humi ka lixaka la Davhida, vanhu lava a va mu nyenya a va ta va va tirhise mabuku wolawo swaku va byeletela vanhu mhaka leyo kambe a va nga ta swi yendla leswo hikusa a ku na lweyi a a kanakana swaku Yesu i wa lixaka la Davida. g

Hi lembe la 70 E.C., loko se ku hundze 37 wa malembe na Yesu a file, masonchwa ya Roma ma helise doropa la Yerusalema, se mabuku wolawo ma lahlekile kumbe ma hisiwa. Hi mhaka leyo, leswaku mhaka ya lixaka la Mesiya yi tiyisiwa a a fanele a humelela na ku nge se fika lembe la 70 E.C.

Leswo swi li txintxise ku yini wutomi la wena?

Ka buku la Deteronoma 18:18, 19, ku tsaliwe swaku Xikwembu a xi ta yendla swaku ku va ni muprofeta lweyi a fanaka na Moxe aIsrayele naswona Xikwembu xi te: “Munhu lweyi a nga ta kala a nga yingisi marito ya mina lawa muprofeta a nga ta ma vula hi ku tirhisa vito la mina a ta tihlamulela ka mina.” Ku djondza Bibele hinkwalu swi ni pfune ku tiyiseka swaku Yesu wa Nazareta a ku li yena muprofeta lweyi.