“Kutani, minga tshukeni mi vilela hi swa mundzuku, hikusa siku la mundzuku litava ni swikarhatu swa lona.” — MATEWU 6:34, NM.

Leswi vulaka swona: Siku ni siku hi kumana ni swikarhatu. Hi mhaka leyo ahi fanelanga hi patsa swikarhatu swa namuntlha ni swikarhatu swa mundzuku. Hinga karhatekeni hi swilo swa mundzuku.

• Xitresi xingaku yendla u vilela. Kutani twisisa swaku aswinge koteki kubalekela xitresi hi kuhelela. Kuvilela hi swilo leswi swi kalaka swinga koteki kuswi balekela switaku yengetela xitresi. Xin’wana u faneleke uxi twisisa hi leswaku swilo leswi hi chavaka swaku swita yendleka aswi talisi kuyendleka.

“A wutlharhi leli taka hi henhla [li ni] . . . kuyanakanyela”. — YAKOBO 3:17, NM.

Leswi vulaka swona: Unga nyimeli swaku swilo hinkwaswu swi fambisa leswi uswi lavisaka xiswona. Unga nyimeli swa kutala ngopfu ka wena kumbe ka van’wana.

• Pfumela leswaku kuni swilo swaku wena ni van’wana amingeswi koti kuswi yendla. Kutani tivekeli swikongometo leswi swi kotekaka kuswi fikelela. Loko u yendla leswo, uta tipumbela xitresi wena ni van’wana naswona switami fambela kahle. Xin’wana lexi lavekaka i kutshama na u tsakile. Phela loko u tsaka hambiloko swilo swinga fambi kahle, xitresi xa pumbeka.

“Munhu wa kutwisisa a rhulile.” — SWIVURISO 17:27.

Leswi vulaka swona: Loko u karhatekile hintamu ungaha yendla swilo swa kukala swingali kahle, kutani zama kutshama na u rhulile.

• Kumisisa lexiku yendlaka u karhateka ngopfu ivi u vona leswi humelelaka loko u ni xitresi. Hi xikombiso, loko u ni xitresi u talisa kupimisa hi yini, u titwisa kuyini, u yendla yini? Ungaha tsala tinhlamulu ta kona ka papela. Loko u tiva leswi u hlamulisaka xiswona loko u ni xitresi, switaku vevukela kulwisana na xona. Lava tindlela ta kuhelisa leswi yendlaka uva ni xitresi. Loko swinga koteki kuswi helisa, zama kuswi pumba hi kucinca mayendlela ya swilo kumbe uwu tirhisa kahle nkama wa wena.

• Zama kuvona swilo hi ndlela yin’wana. Leswi swiku karhataka swingaha yendleka van’wana swingava karhati. Swi ya hileswi uswi vonisaka xiswona swilo. Vona mavonelo lawa manharhu:

  1. Unga tekeli kumu pimisela kubiha munhu. Hi xikombiso, swingaha yendleka munhu aku tlhuvelela ka bixa. Loko wo hantla u tibyela swaku munhu yelweyo wa delela, uta kwata. Kuhambana ni leswo, hi mhaka muni unga tibyeli swaku kuni xivangelo xa kutwala xa kuva aku tlhuvelelile? Phela swinga yendleka xili kona hikakunene!

  2. Zama kuvona leswinga swinene ntsena. Hi xikombiso, a kulerha swa kukarhi loko uli bixeni ka tindhawu ta kufana ni xibedlela kumbe aeroporto swingaku pfuna kupumba xitresi.

  3. Pimisa hi mhaka ya kona. Tivutise, ‘inga va swaku mhaka leyini karhataka namuntlha yahatani karhata mundzuku kumbe vhiki leli taka?’ Tiva kuhambanisa timhaka tatikulu ni ta kukala tingali ta nchumu.

‘Hinkwaswu aswi yendliwe khwatsi ni hi nawu wakona.’ — 1 VAKORINTO 14:40.

Leswi vulaka swona: Zama kuyendla swilo hi nkama wakona.

• Hinkwerhu hi rhandza swaku swilo swa hina swi tshamiseka swi tlhela swi famba kahle. Phela lexinga yendlaka swaku swilo swinga fambi kahle hi tlhela hi xitresareka i kuveketela mintirho yi za yihi talela. Zama kuyendla leswi:

  1. Hamba programa u tlhela uli landza.

  2. Vona swaku i mpsini leswiku yendlaka uva ni mihoni u gama u zama kucinca.

“Swa yampsa kuhumula nyana kutlula kutirha ngopfu ni kuzama kuhlongolisa moya.” — EKLESIASTA 4:6.

Leswi vulaka swona: Lava tirhaka kutlula mpimu ava tikhorisi hi “swilo swa vona swa swinyingi” leswi vaswi tirhelaka. Swinga yendleka va pfumala nkama kumbe ntamu wa kuswi londzovota.

• Tiva kupimela loko swi ta ka ntirho ni male. Phela kuva ni male ya yinyingi aswi vuli swona swaku uta tshama na u tsakile kumbe xitresi xita pumbeka. Kuvula ntiyiso, kuva ni male yayinyingi swingaha kuyendla u karhateka u tlhela u heleliwa hi ntsako. Eklesiasta 5:12 yi li: “Swilo swa kutala swa lweyi wa kuganya swimu tsona wurhongo.” Kutani unga tlangi hi male.

• Tinyiki nkama wa kuhumula. Loko u yendla swilo leswi uswi randzaka xitresi xa pumbeka. Kambe kuhungata hi swilo swa kufana ni kusixtira televhizawu swinga tshuka swingaku pfuni.

• Yi tirhise kahle teknolojiya. Unga tshameli kulerha ma e-mail, mamensaji kumbe ku nghenanghena ka ma redes socias. Loko swinga bohi, unga lerhi ma e-mail ya kuyelana ni ntirho loko unga li ntirhweni.

“Kuchukachukisa mirhi” ka pfuna. — 1 TIMOTIYA 4:8.

Leswi vulaka swona: Kutiwolola swi yendla u titwa kahle.

• Titoloveti kuyendla swilo leswingaku yendlaka u titwa kahle. Kutiwolola swingaku yendla u tshama na u tsakile swi tlhela swiku yendla unga karhateki ngopfu. Dlana swakudla leswinga ni mavhitamina naswona unga heti nkama wa wunyingi na unga dlanga nchumu. Tinyiki nkama wa kuhumula kahle.

• Unga zami kususa xitresi hi kudzaha mbangi, masigari kumbe kunwa byala. Kuvula ntiyiso, swilo leswo switaku yengetela xitresi hikusa hi kufamba ka nkama swingahaku vabyisa kumbe swiku hetela male.

• Loko xitresi xiku peza famba xibedlele. Swingaku danisi kuya xibedlele hi mhaka ya xitresi.

“Tiyiseka hi swilo swa lisima swinene”. — VAFILIPIYA 1:10, NM.

Leswi vulaka swona: Langa kahle leswinga swa lisima.

• Tsala leswi u lavaka kuswi yendla kambe u sungula hi leswinga swa lisima ngopfu. Kuyendla leswo, switaku pfuna kuveka mimpimiso ya wena ka swilo swa lisima ivi u vona leswi kalaka swinga li swa xihantla kutani uswi tshika kumbe u kombela van’wana vaku pfuna.

• Tsala leswi uwu tirhisisaka xiswona nkama wa wena andzeni ka vhiki. U gama u vona swaku unga yendla yini akuva u yampsisa. Loko uswi kota kutirhisa kahle nkama wa wena, awungata karhateka ngopfu.

• Tivekeli nkama wa kuhumula. Phela hambi kuhumula kutsongonyana swingaku pfuna kupumba xitresi u tlhela u kuma ntamu.

“Kuvilela ka mbilu ya munhu hi kona kumu tshovaka, kambe rito lelinene lamu tsakisa.” — SWIVURISO 12:25.

Leswi vulaka swona: Marito lamanene ya van’wana mangaku yendla u titwa kahle.

• Bula ni munhu lweyi angataku twisisa. Munhu yelweyo angahaku pfula matihlo akuva u vona mhaka hi ndlela yin’wana ivi u tiva leswi ungaswi yendlaka. Phela kuphofula swikarhatu swa wena swingaku pepisa moyeni.

• Kombela kupfuniwa. Unga tirhi wexe, pumbela van’wana ntirho kumbe mu tirha xikan’we.

• Loko munhu lweyi u tirhaka na yena aku vangela xitresi, zama kuyampsisa xiyimu. Mu byeli leswi u titwisaka xiswona, kambe u vulavula na yena kahle. (Swivuriso 17:27) Loko leswo swinga cinci nchumu, pumba nkama lowu uwu hetaka na yena.

“Va tsaka lavaswi tivaka leswaku va ni xivileleko xa kukongomisiwa hi Xikwembu”. — MATEWU 5:3, NM.

Leswi vulaka swona: Aswi yenelanga kuva hi kuma swakudla, mpahla ni yindlo. Phela hinkwerhu hi ni xivileleko xa kukongomisiwa hi Xikwembu. Leswaku hi kuma ntsako, hi fanele hi pfumela kuva xihi kongomisa.

• Xikhongelo xingahi pfuna hintamu. Xikwembu xihi rhamba leswaku hi ‘hoxa kuvilela ka hina hinkwaku ka xona, hikusa xahi hlayisa.’ (1 Petro 5:7, NM) Kukhongela ni kupimisa hi swilo swa swinene swingaku yendla uva ni kurhula lokukulu. — Vafilipiya 4:6, 7.

• Lerha swilo leswingataku pfuna kuva ni wuxaka ni Xikwembu. Swileleto leswinga tsaliwa ka revhixta leli swi huma ka Bibele kunga buku lelingaku pfunaka kuva ni wuxaka ni Xikwembu. Phela swileleto leswi hi swona swingahi pfunaka kuva ni “wutlhari ni kukota kupimisa”. (Swivuriso 3:21) Swingo yini u tiyendlela programa la kulerha Bibele? Ungaha sungula hi buku la Swivuriso.