1. Hi tihi tindlela leti hinga tirhisanaka ha tona na Yehovha?

LOKO Yehovha a vumba vanhu a alava leswaku va va vatirhikulobye na yena. Hambileswi namuntlha hinga vanhu lavanga hetisekangiki, loko hi tshembeka ka yena, hingaswi kota kutirhisana na yena siku ni siku. Hi xikombiso, hi “vatirhikulobze ni Xikwembu” loko hi chumayela ni loko hi djondzisa vanhu hi ta Mfumu wa xona. (1 Vakorinto 3:5-9) I lunghelo la likulu hintamu kuva Muvumbi wa matimba hinkwawo ahi langile leswaku hi yendla ntirho lowu wa lisima! Kambe ahi tirhisani na Yehovha loko hi chumayela ntsena. Ka djondzo leyi, hita vona tindlela leti hinga tirhisanaka ha tona na Yehovha loko hi pfuna maxaka ya hina ni vamakwerhu va le bandleni, loko hi kombisa malwandla, loko hi seketela mintirho ya ku hambanahambana leyi nhlengeletano yiyi yendlaka amisaveni hinkwayo ni loko hi yengetela ntirho lowu himu yendlelaka wona. — Vakolosa 3:23.

2. Hayini hi nga fanelanga hi fananisa leswi hi swi yendlelaka Yehovha ni leswi va’wana va mu yendlelaka swona?

² Loko djondzo leyi yili karhi yi famba, khumbuka leswaku hina vanhu hi hambanile. Ntanga, lihanyo, wuswikoti ni swiyimo swa hina aswi fani. Hikolaho, unga fananisi ntirho lowu  uwu yendlelaka Yehovha ni lowu van’wana vakotaka kumu yendlela wona. Mupostola Pawulo a te: Mun’wana ni mun’wana aakambisise ntirho wa yena, kuli kona angakotaka kutidzunisa hi sva yena, kungali hi sva mun’wana. — Vagalatiya 6:4.

3. Hayini hinga vulaka leswaku lweyi a khatalelaka ndjangu wa yena a tirhisana na Yehovha?

³ Yehovha a langutele leswaku hi khatalela mindjangu ya hina. Hi xikombiso, hi fanele hi tirha leswaku hi kuma male ya kuxava swakudla, mpahla ni ndhawu leswaku ndjangu wa hina wu tshama kona. Vamamani va vanyingi va boheka kusala kaya leswaku va khatalela swivanana swa vona. Nakambe loko vapsali va hina vanga swi koti kuti khatalela, hingaha boheka kuva khatalela. Ahingeswi baleki swilo leswi. Bibele li li: “Loko munhu angapfuni maxaka ya yena, ngopfungopfu lavanga va njangu wa yena wa ntiyiso, ayalile vupfumeli, kutani abihile kutlula lweyi angapfumeliki.” (1 Timotiya 5:8) Swinga yendleka ungamu yendlele swotala Yehovha hilaha awuswi tsakela ha kona hikolaho ka leswi unga ni wutihlamuleri la ku khatalela ndjangu wa wena. Kambe unga heli ntamu! Yehovha atsaka hintamu loko u khatalela swilaveko swa ndjangu wa wena. — 1 Vakorinto 10:31.

4. a) Xana vapsali vanga swi kombisisa kuyini leswaku va rhangisa Mfumo wa Yehovha? b) I mavuyelo wahi lama kumiwaka hi vapsali lava rhangisaka Mfumo?

⁴ Vapsali lavanga Vakreste vanga tirhisana na Yehovha hi kupfuna vana va vona leswaku vava ni swikongometo swa moya. Vapsali vanyingi lava yendleke leswo va vone vana va vona va nghenela ntirho wa nkama hinkwawo, hambiloko swi boha leswaku va ya tirha kule na vona. Van’wana va nghenele ntirho wa Betele, wa wurhumiwa, wa wuphayona kumbe wa kuchumayela ka tindhawu letinga ni xilaveko xa vachumayeli. I ntiyiso leswaku loko vana va tirhela kule ni le kaya, vapsali avangeswi koti kuheta nkama na vona hilaha va lavaka ha kona. Hambileswo, matshan’wini ya kuveka swilaveko swa vona mahlweni, va khutaza vana leswaku vanga tshiki ntirho wa vona. Hayini? Swava tsakisa kuvona vana va rhangisa ntirho wa Yehovha awuton’wini. (3 Yohane 4) Vaswi teka kuli lunghelo kutirhisana na Yehovha hi ndlela leyi naswona va titwa hi ndlela leyi Ana a atitwa ha yona, lweyi anga vula leswaku ‘alomba’ Yehovha n’wana wa yena. — 1 Samuwele 1:28.

5. Nyikela swikombiso swa tindlela leti ha tona hinga pfunaka vamakwerhu bandleni. (Vona xifaniso akusunguleni ka djondzo.)

⁵ Loko unga na wutihlamuleli la likulu ndjangwini, xana unga pfuna vamakwerhu lava vabyaka, lava gugeke kumbe lavanga ni swilaveko swokarhi? Kumbexana unga pfuna lava vava khatalelaka? Anakanya hi vamakwerhu va le bandleni lava lavaka kupfuniwa. Hi xikombiso, swinga yendleka kuli ni makwerhu bandleni lweyi a khatalelaka mupsali wa yena lweyi a gugeke. Xana awunge heti nkama na yena leswaku makwerhu lweyi a ya khatalela swilaveko swin’wana? Kumbexana unga heleketa makwerhu wokarhi amihlanganwini, abazara, axibelhela kumbe loko a lava kuyendzela munhu wokarhi. Loko u yendla leswo, uta va u tirhisana na Yehovha hi kupfumelela leswaku aku tirhisa kuhlamula xikhongelo xokarhi. — Lerha 1 Vakorinto 10:24.

6. Swi vula yini kukombisa malwandla?

⁶ Vatirhikulobye ni Xikwembu va tiviwa hi malwandla. Abibeleni, a rito la Xikrigi leli hundzuluxeliweke “malwandla” li vula “kukhoma kahle vanhu lava hingava tiviki.” (Vaheveru 13:2) Ka Bibele ku ni swikombiso swinyingi swa tindlela leti hingava khomaka kahle ha tona vanhu lava hingava tiviki. (Genesa 18:1-5) Hinkwerhu hingaswi kota kupfuna van’wana. Hikolaho, hi fanele hi yendla leswo ka mukhandlu wun’wana ni wun’wana lowu hiwu kumaka, kunga khataliseki leswaku hi pfuna vamakwerhu va hina kumbe inhim. — Vagalatiya 6:10.

7. Hita vuyeliwa hi yini loko hi kombisa malwandla ka vamakwerhu lavanga ka ntirho wa nkama hinkwawo?

⁷ Xana unga tirhisana na Yehovha hi kuyamukela vamakwerhu lavanga ka ntirho wa nkama hinkwawo lava lavaka ndhawu ya kutshama ka yona? (Lerha 3 Yohane 5, 8.) Kuyendla leswo swita vuyelisa hina ni lava hiva kombaka malwandla, hikusa ‘hitatiyisana’. (Varhoma 1:11, 12) Vona xikombiso xa Olaf. Loko ahali mumpsha, bandla la yena li yendzeliwe hi Mulanguteli wa Xifundza lweyi aanga chadanga. Makwerhu lweyi a alava ndhawu ya kutshama ka yona kambe akuvanga na munhu bandleni lweyi aswi koteke kumu pfuna. Olaf a kombele vapsali va yena, lava avanga li Timboni, leswaku vamu yamukela kaya. Va pfumelile, kambe va te yena a ataboheka kuyetlela ka xitufada. Olaf aswi yendlile leswo naswona angati solanga. Hi kuva a yamukele Mulanguteli wa Xifundza akaya ka yena, ave ni vhiki la kutsakisa. Siku lin’wana ni li’wana ava bula hi timhaka tinyingi ta kutsakisa loko va fihlula. Xikhutazo lexi axi kumeke ximu yendle a nghenela ntirho wa nkama hinkwawo. Swoswi, Olaf se a ni 40 wa malembe a li karhi a tirha tani hi Murhumiwa ka matiko yotala.

8. Hayini hi fanele hi kombisa malwandla hambiloko kusunguleni van’wana vangahi tlangeli? Nyikela xikombiso.

⁸ Ku ni tindlela tinyingi ta kukombisa malwandla ka vanhu lava hingava tiviki hambiloko kusunguleni vanga kombisi kutlangela. Hi xikombiso, Jésica, wansati wa le Equador, a adjondzisiwa Bibele hi makwerhu wa le Espanha. Siku lin’wana, loko va li karhi va djondza Bibele, Jésica a sungule kurila anga nyimi. Makwerhu wa hina amu vutisile leswaku a arilela yini. Jésica a hlamusele leswaku loko angase rhurhela Espanha a ali xisiwana. Siku lin’wana, a anga na swakudla swa kunyika n’wana wa yena. Owova ni mati ntsena. Loko ali karhi a ringeta kumu yetlelisa, a khongelile a kombela kupfuniwa. Ndzhaku nyana, Timboni timbirhi timu yendzelile ivi timu nyika revhixta. A davule revhixta a tlhela ati byela leswi: “Xana mu pimisa leswaku n’wana wa mina ata dla leswi?” Vamakwerhu va ringete kumu chavelela, kambe Jésica anga lavanga kutwa nchumu. Ka siku lolelo, hi nkama wun’wani, vamakwerhu va ye va ya siya ndzhava lowu awu li ni swakudla ka xipfalu xa kaya ka yena. Kutani swoswi, a rila hi leswi anga khumbuka leswinga  yendleka. A xiya leswaku a atisivelile kuvona nhlamulo ya xikhongelo xa yena. Swoswi Jésica a tiyimisele kutirhela Yehovha. Malwandla ya vamakwerhu lavaya mave ni mavuyelo lamanene. — Eklesiasta 11:1, 6.

9, 10. a) Xana Vayisrayele va khale ava ni mukhandlu wa kuyendla yini? b) Hingava pfunisa kuyini vamakwerhu namuntlha?

⁹ Khale, Vayisrayele ava ni mukhandlu wa kutinyiketela leswaku va seketela mintirho ya ku hambanahambana. (Eksoda 36:2; 1 Tikronika 29:5; Nehemiya 11:2) Ni namuntlha, u ni mukhandlu wa kutirhisa nkama, male, wutivi ni swilo swa wena leswaku u pfuna vamakwerhu. Loko u yendla leswo, uta tsaka naswona Yehovha ataku katekisa.

¹⁰ Bibele li khutaza vavanuna leswaku va tirhisana na Yehovha hi kutirha tani hi madoda kumbe vapfunisi va madoda. (1 Timotiya 3:1, 8, 9; 1 Petro 5:2, 3) Lava lwelaka kufikelela malunghelo lawa va navela kupfuna vamakwerhu ni kuva khutaza leswaku va hambeta va tirhela Yehovha. (Mintirho 6:1-4) Xana madoda maku kombele leswaku uva murindzi, u tirha ka mabuku, u khatalela teritoriyu la bandla, u hlayisa wubasisi la Salão do Reino kumbe kuyendla swin’wana? Vamakwerhu vanyingi lava pfunisaka ka mintirho leyi va vula leswaku va tsaka hintamu hi kuyi yendla.

11. Hi wahi mavuyelo lawa makwerhu Margie ama kumaka hi kuseketela ntirho wa kuyaka?

¹¹ Lava pfunisaka ka ntirho wa kuyaka va yendla vanghanu va vanyingi. Vona xikombiso xa Margie, makwerhu wa xisati lweyi se anga ni 18 wa malembe ka ntirho wa kuyaka ma Salão do Reino. A hlamusela leswaku a heta nkama ni vamakwerhu va xisati lavanga vampsha leswaku ava pfuna. A vula leswaku ntirho wa kuyaka wu pfula mukhandlu wa leswaku vamakwerhu va khutazana. (Varhoma 1:12) Margie a tlhela a hlamusela  leswaku loko a kumana ni swikarhato, vanghanu lava ava yendleka ka ntirho wa kuyaka vamu khutaza. Xana u tshama u tinyiketela leswaku u seketela ka ntirho wa kuyaka? Phela aswi lavi leswaku u tiva kuyendla xokarhi leswaku u tinyiketela.

12. Ungava pfunisa kuyini lava weliwaka hi timhangu ta ntumbuluku?

¹² Ndlela yin’wana ya kutirhisana na Yehovha i kupfuna vamakwerhu lava weliwaka hi timhangu ta ntumbuluku. Hinga yendla leswo hi kunyikela hi male. (Yohane 13:34, 35; Mintirho 11:27-30) Ndzhaku ka mhangu, hingaha pfunisa kubasisa ndhawu ya kona ni kulungisa leswi honiweke. Gabriela, makwerhu wa le Polónia lweyi ndhambi yi honheke yindlu ya yena, a tsake hintamu loko a vona vamakwerhu va le mabandleni ya le kusuhi va ta vatamu pfuna. Loko a khumbuka ndlela leyi a pfuniweke ha yona, a vula leswaku anga karhateki hi swilo leswi aswi luzeke, kambe a tshamela kupimisa hi minkateko leyi ayi kumeke. A vule leswi: “Leswini humeleleke swini djondzise leswaku kuva xirho xa bandla la Wukreste i lunghelo la kuhlawuleka naswona swihi yendla hiva ni ntsako wa ntiyiso.” Vanyingi lava pfuniwaka ndzhaku ka mhangu yokarhi ya ntumbuluku va titwa hi ndlela leyi fanaka. Naswona lava tirhisanaka na Yehovha hi kuya pfuna vamakwerhu lava va tsaka hintamu. — Lerha Mintirho 20:35; 2 Vakorinto 9:6, 7.

13. Xana hinga li tiyisisa kuyini wuxaka la hina na Yehovha loko hi yendla ntirho wa kutirhandzela? Nyikela xikombiso.

¹³ Makwerhu Stefania swin’we ni vachumayeli van’wana va le mugangeni wa yena va tirhisane ni Xikwembu hi kupfuna vamakwerhu lava va balekeke va ya Estados Unidos hileswi tikweni la vona aku ni nyimpi. Va pfune vamakwerhu lava hi kuva nyika ndhawu yotshama ni swilo swa le ndlwini. Yena a li: “Ndlela leyi hiva kombeke ha yona lirhandzu yiva yendle va tsaka va tlhela va tlangela swinene. Leswo swihi kumbile. Vamakwerhu lava va pimisa leswaku hi hina hiva pfuneke, kambe ntiyiso wa mhaka hi vona va hi pfuneke swinene. Lirhandzu leli hinga na lona hi Yehovha li ye mahlweni li kula loko hi vona ndlela vamakwerhu va kombiseke ha yona vun’we, lipfumelo, lirhandzu ni kutshemba Yehovha. Swihi yendle hi tlangela swinene swilo hinkwaswo leswi Yehovha ahi nyikaka swona hi kutirhisa nhlengeletano yakwe.”

14, 15. a) Hi wihi moya lowu Esaya a ali na wona? b) Vakreste vangawu kombisisa kuyini moya wa kufana ni wa Esaya?

¹⁴ Xana waswi navela kutirhisana na Yehovha hi tindlela tin’wana? Xana unga rhurha  uya tirha laha kunga ni xilaveko xa vachumayeli? I ntiyiso leswaku aswi kali swi lava hi rhurha leswaku hi va vanhu lava hananaka. Kambe ku ni vamakwerhu lavaswi kotaka kuyendla tano. Va ni moya lowu fanaka ni wa muprofeta Esaya. Loko Yehovha a vutisile a ku: “Xana nitarhuma mani, i mani lweyi angatahiyela?” Esaya a hlamule a ku: “Hi mina lweyi! Nirhume!” (Esaya 6:8) Xana waswi lava kupfuna nhlengeletano ya Yehovha? Ungaswi kota kuyendla tano? Ungayi pfunisa kuyini?

¹⁵ Yesu a vule leswi hi ntirho wa kuchumayela ni wa kuyendla vadjondzisiwa: “Ntshovelo i wukulu kambe vatirhi avatalanga. Hikolaho, kombelani ka N’winyi wa ntshovelo, lesvaku arhuma vatirhi kutshoveleni ka yena.” (Matewu 9:37, 38) Xana unga tirha tani hi phayona kumbe kuya pfuneta laha kunga ni xilaveko xa vachumayeli? Kumbe ungaha pfuna makwerhu wokarhi kunghenela ntirho lowu kumbe a ya tirha laha kunga ni xilaveko? Maphayona manyingi lama tirhaka laha kunga ni xilaveko ma vula leswaku ntirho wa wona i ndlela leyinene yokombisa lirhandzu ka Yehovha ni munhukulobye. Kambe ku ni tindlela tin’wana leti unga yengetelaka ntirho wa wena ha tona. Loko u yendla tano uta tsaka swinene.

16, 17. Hi tihi tindlela tin’wana ta kuyengetela ntirho lowu uwu yendlelaka Yehovha?

¹⁶ Xana awunge tinyikeli leswaku uya tirha Betele kumbe ka ntirho wa kuyaka? Phela unga tirha swa nkamanyana kumbe masiku yokarhi vhiki lin’wana ni lin’wana. Nhlengeletano ya Yehovha yi ni xilaveko xa vanhu lava hi kutirhandzela va tiyimiseleke kuyendla ntirho wun’wana ni wun’wana, kunga khataliseki leswaku vawu yendla kwihi kumbe va ni wutshila ka wona. Yehovha wava tlangela hinkwavo lava yendlaka minzamu ya kutirha kun’wana ni kun’wana laha kunga ni xilaveko. — Tipisalema 110:3.

¹⁷ Loko uswi tsakela, nhlengeletano ya Yehovha yingaku djondzisa leswaku u tirhisiwa hilaha kuyengeteleke. Ungaha titsalisa ka Xikola xa Vachumayeli va Mfumo. Xikola lexi xi pfuna vamakwerhu va xinuna ni vaxisati lava wupfeke lava se va ngheneleke ntirho wa nkama hinkwawo leswaku va tirhisiwa hi nhlengeletano ya Yehovha. Lava nghenaka ka xikola lexi va fanele va tiyimisela kutirha kun’wana ni kun’wana laha vangata rhumeliwa kona. Xana awunge titsalisi ka xikola lexi leswaku u yengetela ntirho wa wena? — 1 Vakorinto 9:23.

18. Hita vuyeliwa hi yini loko hi va vatirhikulobye ni Xikwembu?

¹⁸ Tani hileswi hinga vanhu va Yehovha, hi lava kukombisa malwandla, wunene ni lirhandzu. Hi lava kuyendlela van’wana swilo leswinene akuva hi kombisa leswaku ha khatala hi vona. Hi lava kuyendla leswo siku ni siku. Loko hi yendla leswo, hita tsaka hi tlhela hiva ni kurhula. (Vagalatiya 5:22, 23) Kunga khataliseki swiyimo swa wena, loko u tekelela wunene la Yehovha ni kuhambeta u va mutirhikulobye na yena, uta kuma ntsako wa ntiyiso! — Swivuriso 3:9, 10.