A Wu Swi Tiva?
Hi Mhaka Muni Xikarhi Ka Masonchwa Ya Davhida A Ku Ni Vanhu Va Ku Ta Hi Ka Matiko Man’wani?
A XIKARHI ka masonchwa ya Davhida a ku ni vanhu vambenyani lava a va ta hi ka matiko man’wani, van’wani va vona a ku li Zeleki wa Muamoni, Itima wa Mumowabu, na Uriya wa Muheti. a (1 Tik. 11:39, 41, 46) Ka masonchwa ya Davhida a ku tlhela ku va ni “Vapeleti ni Vakereti ni Vagati.” (2 Sa. 15:18) A Vakereti ni Vapeleti swi tikomba a va ta hi ka Vafilista. (Eze. 25:16) Kasi a Vagati a va ta hi ka doropa la Filista wa Gati. — Yox. 13:2, 3; 1 Sa. 6:17, 18.
Hi mhaka muni Davhida a pfumelele vavanuna lava leswaku va va masonchwa ya yena? Yena a a tshemba swaku vavanuna lava a va tshembekile ka yena, nakambe xa lisima hintamu a va tshembekile ka Yehovha. Hi xikombiso, a disiyonariyu limbenyani leli tlhamuselaka timhaka ta Bibele li vula leswi hi Vapeleti ni Vakereti, li li: “Va ye mahlweni va va na Davhida ka swiyimu swa ku karhata leswi a nga kumana na swona nkama na a fuma hi wona.” Va swi kombisise ku yini swaku a va tshembeka? Nkama lowu Vayisrayele va nga tshika ku nyima na Davhida hi mhaka ku xengeteliwa hi Xeba, a Vapeleti ni Vakereti va tame va ya mahlweni va pfuna Davhida swaku a lwa na Xeba lweyi a a djikele Davhida. (2 Sa. 20:1, 2, 7) Khambi lin’wani, a n’wana wa Davhida Adoniya a lave ku tekela a wuhosi Solomoni, kambe a Vapeleti ni Vakereti va kombise ku tshembeka ka Davhida hi ku seketela Solomoni kuva a va hosi hikusa Yehovha se a a mu langile. — 1 Tih. 1:24-27, 38, 39.
Mun’wani lweyi a a nga li Muyisrayele a nga tshembeka ka Davhida ku ve Itayi lweyi wa Gati. Itayi ni 600 wa vavanuna lava a va li na yena va seketele Davhida nkama lowu n’wana wa yena Absalomu a nga mu djikela, a tlhela a xengetela Vayisrayele swaku na vona va mu djikela. A ku sunguleni Davhida a byele Itayi swaku tanihi leswi a kalaka a nga li Muyisrayele a swi nga bohi swaku a famba na yena, kambe Itayi a mu byele leswi Davhida: “Na funga aphambheni ka Yehovha Xikwembu lexi hanyaka ni ka wena hosi ya mina, swaku hambiloko swo lava ni fa kumbe ni hanya, lani wena hosi ya mina u nga ta va kona, na mina ni ta va kolanu!” — 2 Sa. 15:6, 18-21.
Itayi a tshembekile ka Davhida lweyi a nga langiwa hi Yehovha swaku a va hosi
Hambi leswi Vakereti, Vapeleti ni Vagati a va nga li Vayisrayele, vona a va pfumela swaku Yehovha i Xikwembu xa ntiyiso. Funtshi hi yena a nga veka Davhida swaku a va hosi ka tiko la Israyele. Ha tshemba swaku Davhida a tsake hintamu hileswi a nga seketeliwa hi vavanuna lava va ku tshembeka!
a Hi ku ya hi nawu lowu Yehovha a nga wu nyikela lowu nga tsaliwa ka buku la Deteronoma 23:3-6, Vaamoni ni Vamowabu a va nga fanelanga va yamukeliwa ka nhlengeletanu ya Vayisrayele. Swi nga yendleka a nawu lowo a wu vulavula ntsena hi ku va tinxaka leti ti nga pfumeleliwi kuva ti nyikiwa a mfanelo ya ku va Vayisrayele hi ku ya hi nawu; kambe nawu lowu a wu ngo tsimbisa swaku vanhu va tinxaka leti va tipatsa ni vanhu va Xikwembu. Vona nhlokomhaka leyi nge Vaamoni ka Estudo Perspicaz, volume 1 paj. 111.
