1. Van’wanyani va titwisa ku yini hi ntirho wa ku chumayela mahungu ya ku tsakisa? (Vona mufoto.)

 LESWI hi nga vanhu va Yehovha, hi chumayela mahungu ya ku tsakisa hikusa hi rhandza Papayi wa hina Yehovha naswona hi lava ku pfuna vanhu leswaku va mu tiva. Phela vachumayeli va vanyingi va tsaka swinene hi ku yendla ntirho lowu, kambe van’wanyani swa va karhatela kuva va tsaka ka ntirho lowu. Hi mhaka muni? Swi nga yendleka van’wanyani va ni tingana, van’wanyani va tivona ingi a hi vadjondzisi vavanene; kasi van’wanyani swa va karhatela ku ya kaya ka munhu na a nga va rhambanga, van’wanyani va chava swaku swi nga yendleka munhu lweyi va mu chumayelaka a sungula ku va kwatela; van’wani swa va karhatela ku kuma ntsaku loko va chumayela hikusa va byeliwe swaku va fanele va tivonela swaku va nga kwatisi van’wani nkama lowu va bulaka na vona. Phela hambileswi vamakwerhu lava va mu rhandzaka hintamu Yehovha, swa va karhatela ku chumayela mahungu ya ku tsakisa ka vanhu lava kalaka va nga va tivi. Hambileswo, va swi tiva swaku ntirho lowu i wa lisima hintamu swinene naswona minkama hinkwayu va yendla hinkwaswu va nga swi kotaka leswaku va wu yendla. Phela leswo swi mu tsakisa hintamu Yehovha!

2. Loko swi ku swa ku karhatela ku tsaka nkama lowu u yendlaka ntirho wa ku chumayela, hi mhaka muni u nga fanelanga u godola?

² Indjhe na wena minkama yin’wani swa ku karhatela ku tsaka nkama lowu u yendlaka ntirho wa ku chumayela? Loko ku li swaku swa ku karhatela, u nga godoli. A ku va u titwisa xileswo swi nga ha kombisa swaku u tiveka hansi, naswona a wu lavi ku tikombekisa ka van’wani funtshi a wu lavi ku holovisa munhu. Phela a nga kona lweyi a swi tsakelaka ku va van’wani va mu khoma hi ndlela ya ku biha, ngopfungopfu loko a tikarhatela ku pfuna vanhu volavo. Funtshi Papayi wa wena Yehovha wa swi twisisa leswi u titwisaka xiswona naswona a tinyimisele ku ku pfuna. (Esa. 41:13) Se  ka nhlokomhaka leyi hi ta bula hi 5 wa swilo leswi hi nga swi yendlaka leswaku hi kota ku hlula a ku chava hi tlhela hi kota ku tsaka nkama lowu hi yendlelaka Yehovha ntirho lowu wa ku chumayela.

PFUMELELA RITO LA XIKWEMBU LI KU TIYISA

3. I mpsini leswi nga pfuna muprofeta Yeremiya leswaku a chumayela van’wani?

³ Hambi ka minkama leyi nga hundza a Rito la Xikwembu li tiyise vanhu va Yehovha leswaku va swi kota ku yendla ntirho lowu a wu tikomba wu karhata. Hi xikombiso, pimisa hi muprofeta Yeremiya. Nkama Yehovha a nga mu nyika ntirho wa leswaku a ya chumayela mahungu ya ku tsakisa, Yeremiya a karhatekile a tlhela a chava. A ze a vula leswi: “A ni swi koti ku vulavula hikusa na ha li mufana.” (Yer. 1:6) Se i mpsini leswi nga pfuna Yeremiya leswaku a tiya nhlana a nga chavi ku chumayela? Yeremiya a tiyisiwile hi leswi Yehovha a nga swi vula. Yena a te: “Ambilwini ya mina rito la yena a li fana ni ndzilu lowu pfurhaka lowu nga pfaleliwa ka marhambu ya mina, a ni karhalile ku tshama hi lona.” (Yer. 20:8, 9) Hambileswi Yeremiya a a fanele a chumayela vanhu lava a va wome tinhloko, a swi kotile ku yendla ntirho wa yena hileswi a nga tiyisiwa hi marito ya Yehovha.

4. I mpsini leswi nga ta yendleka loko hi djondza Rito la Xikwembu hi tlhela hi pimisa hi leswi hi swi djondzaka? (Vakolosa 1:9, 10)

⁴ Rito la Xikwembu ku nga Bibele hi lona leli tiyisaka Vakreste leswaku va yendla ntirho wa ku chumayela. Nkama mupostolo Pawulo a nga tsalela karta bandla la le Kolosa, a vule swaku loko vamakwerhu lavayani va djondza hi ku rhandza ka Yehovha, a swi ta va pfuna leswaku va “kota ku famba hi ndlela leyi fanelaka ka Yehovha” va tlhela ‘va yendla swaswinene.’ (Lerha Vakolosa 1:9, 10.) Phela swilo swoleswo swaswinene swi patsa ku chumayela mahungu ya ku tsakisa. Se, loko hi djondza Bibele hi tlhela hi pimisa hi leswi hi swi djondzaka, lipfumelo la hina li ta tiya naswona hi ta ya hi swi twisisa kahle swaku hi mhaka muni swi li swa lisima ku chumayela mahungu ya ku tsakisa.

5. I yini leswi u nga swi yendlaka swaku u pfuneka hi leswi u swi djondzaka ka Bibele?

⁵ Leswaku u pfuneka hi leswi u swi djondzaka ka Bibele, u nga tsutsumi loko u djondza kambe tinyiki nkama wa ku pimisa hi leswi u swi djondzaka. Loko ku ni ndzimana leyi swi ku karhatelaka ku yi twisisa, u nga godoli ku hamba mapexkiza; zama ku yi twisisa. Tirhisa a Índice das Publicações da Torre de Vigia kumbe Nkongomiso Wa Ku Yendla Pexkiza Wa Timboni Ta Yehovha swaku u kuma ntlhamuselo ya ndzimana yoleyo. Phela loko u tinyika nkama wa ku yenela wa ku djondza Bibele na u nga tsutsumi, u ta ya u tshemba swaku leswi nga ka Bibele hikakunene i ntiyiso. (1 Tes. 5:21) Loko u tiyiseka swaku  leswi nga ka Bibele i ntiyiso, u ta ya u swi lava hintamu ku chumayela van’wani hi leswi u swi tivaka.

TILUNGHISELELI KAHLE

6. Hi mhaka muni hi fanele hi tilunghiselela kahle loko hi lava ku ya nsin’wini?

⁶ Loko wena u tilunghiselela kahle a wu nga ta chava hintamu loko u vulavula ni vanhu vambenyani. Yesu Kreste a pfune vadjondzisiwa va yena swaku va tilunghiselela kahle na va nge se famba ansin’wini. (Luk. 10:1-11) Vadjondzisiwa va Yesu va tirhise hinkwaswu leswi a nga va djondzisa swona, funtshi va titwe na va tsakile hi mhaka hinkwaswu leswi va nga swi yendla. — Luk. 10:17.

7. Hi nga tilunghiselelisa ku yini swaku hi ya ka ntirho wa ku chumayela? (Vona mufoto.)

⁷ Hi nga tilunghiselelisa ku yini swaku hi ya ka ntirho wa ku chumayela? Hi fanele hi pimisa hi leswi hi nga ta swi vula; nakambe loko hi bula ni munhu hi fanele hi vulavula hi ndlela ya ntumbuluku. Hi fanele hi pimisa hi tindlela timbirhi kumbe tinharhu leti vanhu va teritoriyu la hina va tolovelaka ku tsema mabulu hi tona, hi tlhela hi pimisa hi swaku hi nga va hlamulisa ku yini. Se loko hi bula ni munhu hi nga ha tlhantlheka, hi hlekanyana kumbe hi zama ku yendla xinghanu na yena na hi nga karhateki hi nchumu.

8. Hi mhaka muni mupostolo Pawulo a fanise Vakreste ni swibya swa vumba?

⁸ Mupostolo Pawulo a va byele leswi Vakreste va nkama lowu nga hundza: “Hi ni tshomba leli ka swibya swa vumba.” (2 Ko. 4:7) Kasi a tshomba li nyimela yini? Lona li nyimela ntirho wa ku chumayela mahungu ya ku tsakisa. (2 Ko. 4:1) Se a swibya swa vumba ke, swi nyimela yini? Swi nyimela vanhu va Yehovha lava va chumayelaka mahungu ya ku tsakisa. A minkameni ya mupostolo Pawulo, vaxavisi a va tirhisa swibya swa vumba swaku va peta swilo swa lisima swinene swa ku fana ni swakudla, vhinyu ni male. Hilani ku fanaka, Yehovha a hi tamelise swilo swa lisima swinene, ku nga mahungu ya ku tsakisa lawa hi faneleke hi ma fikisa ka vanhu. Se hi nga tiyiseka swaku Yehovha a ta hi nyika ntamu lowu hi wu lavaka swaku hi chumayela mahungu ya ku tsakisa ka van’wani.

KHONGELA KA YEHOVHA U KOMBELA SWAKU A KU PFUNA KUVA U NGA CHAVI

9. Hi nga swi kotisa ku yini ku hlula ku chava? (Vona mufoto.)

⁹ Minkama yin’wani loko hi ya nsin’wini hi nga ha chava ku kanetiwa hi vanhu kumbe ku va vanhu va nga hi yingisi. Se loko leswo swi yendleka  i yini leswi nga hi pfunaka swaku hi hlula ku chava? Xin’wani lexi nga hi pfunaka i ku pimisa hi xikhongelo lexi vapostolo va nga xi yendla nkama lowu va nga byeliwa swaku va fanele va nyima ku chumayela. Phela vona a va pfumelelanga ku chava ku va sivela ku tama va chumayela mahungu ya ku tsakisa; kambe va khongelile va kombela Yehovha swaku a va pfuna kuva ‘va tama va khuluma hi rito la yena na va nga chavi nchumu.’ Funtshi Yehovha a xi hlamulile xikhongelo xa vona hi nkama lowuyani. (Min. 4:18, 29, 31) Phela na hina minkama yin’wani hi nga ha va chava vanhu, se loko leswo swi yendleka hi fanele hi khongela ka Yehovha swaku a hi pfuna. Hi fanele hi kombela Yehovha leswaku a hi pfuna swaku hi nga pfumeleli ku chava ku hi sivela ku komba vanhu swaku ha va rhandza hi ku va chumayela mahungu ya ku tsakisa.

10. I mpsini leswi Yehovha a swi yendlaka leswaku hi kota ku hetisisa ntirho wa hina wa ku chumayela? (Esaya 43:10-12)

¹⁰ Yehovha a hi rhamba leswaku hi va Timboni ta yena naswona a hi tshembisa leswaku a ta hi nyika ntamu. (Lerha Esaya 43:10-12.) Vona 4 wa minchumu leyi kombisaka leswo. Wa ku sungula, Yesu Kreste a na hina ka ntirho wa ku chumayela. (Mat. 28:18-20) Wa wumbirhi, Yehovha a veke tintsumi leswaku ti hi pfuna. (Nhl. 14:6) Wa wunharhu, Yehovha a hi nyika moya wa ku kwetsima leswaku wu hi pfuna ku khumbuka leswi hi nga swi djondza. (Yoh. 14:25, 26) Wa wu 4, Yehovha a hi nyike vamakwerhu leswaku va ta va na hina. Se hi ku pfuniwa hi Yehovha ni vamakwerhu hi nga vula swaku hi ni swilo hinkwaswu leswaku hi kota ku hetisisa ntirho wa hina wa ku chumayela.

TITWANANISI NI XIYIMU U TLHELA U TSHEMBA SWAKU SWI TA FAMBA KAHLE

11. U nga yendla yini swaku u kuma vanhu nkama lowu u chumayelaka? (Vona mufoto.)

¹¹ Swa ku godolisa loko u nga kumi vanhu amakaya ya vona? Loko leswo swi tshuka swi ku yendlekela, u swi vonisa ku yini ku va u tivutisa leswi: ‘Va kwini vanhu va teritoriyu la mina?’ (Min. 16:13) ‘Xana va ye mintirhweni kumbe va ye ku xaveni ka minchumu?’ Loko swi li hi ndlela yoleyo, xana a wu swi voni swi yampsa swaku u chumayela lomu tindleleni? Makwerhu mun’wani lweyi a vitaniwaka Joshua a vula leswi: “Ni pfulekeliwe hi nkama wa ku chumayela loko ni ya a bazara kumbe lomu ku vekiwaka kona mimovha.” Yena ni nsati wa yena Bridget va tolovela ku kuma vanhu makaya loko va va  yela nimadlambu kumbe hi Domingo ninhlikanhi. — Efe. 5:15, 16.

12. Hi nga swi kotisa ku yini ku tsumbula leswi munhu a kholwaka ka swona ni leswi mu karhataka?

¹² Loko munhu lweyi u bulaka na yena a tikomba a nga tsakeli, zama ku tsumbula leswi a kholwaka ka swona ni swilo leswi mu karhataka. Joshua na Bridget va tolovela ku tirhisa swivutiso leswi kumekaka ka swiphephani leswaku va sungula mabulu. Hi xikombiso, nkama lowu va tirhisaka xiphephani lexi nga ni nhlokomhaka leyi nge I Yini Bibele? va tolovela ku mu vutisa leswi munhu: “Vanhu va vanyingi va vula swaku Bibele i Rito la Xikwembu, kambe van’wanyani a va swi kholwi leswo. Se wena ke, u swi vonisa ku yini?” Phela xivutiso xa ku fana ni lexo xi yendla munhu a tsakela ku bula.

13. A ku tsaka ka hina ku dependera hi ku va vanhu va yamukela mahungu ya ku tsakisa? Tlhamusela. (Swivuriso 27:11)

¹³ A ku tsaka ka hina a ku dependeri hi loko vanhu va tsakela rungula la hina. Hi mhaka muni? Hikusa hi yendla leswi Yehovha na Yesu Kreste va lavaka swaku hi swi yendla. (Min. 10:42) Hambiloko hi tshuka hi kuma vanhu lava kalaka va nga tsakeli kumbe lava yalaka, hina hi lava ku tsaka hikusa hi yendla leswi Papayi wa hina Yehovha a swi lavaka. — Lerha Swivuriso 27:11.

14. Hi mhaka muni hinkwerhu hi tsaka loko muchumayeli mun’wani a kuma munhu lweyi a tsakelaka nsin’wini?

¹⁴ Phela hinkwerhu hi nga tsaka loko vamakwerhu van’wani va kuma vanhu lava tsakelaka ansin’wini. Murindzi mun’wani a fanise ntirho lowu hi wu yendlaka wa ku chumayela ni ku lavetela xin’wanani lexi nga lahleka. A ntlawa lowu lavetelaka xin’wanani xolexo wu yendla hinkwaswu wu nga swi kotaka swaku wu xi kuma, hi ku xi lavetela ka tindhawu hinkwatu. Se loko xin’wanani lexo xi kumiwa, a hi lweyi a nga xi kuma ntsena a tsakaka, kambe ntlawa hinkwawu wa tsaka hi mhaka ya leswo. Swi hi ku fana ni ntirho lowu hi wu yendlaka wa ku yendla vadjondzisiwa. Phela hi wu yendla hi ntlawa! Hinkwerhu abandleni hi yendla hinkwaswu leswi hi nga swi kotaka swaku hi chumayela ka teritoriyu la hina hinkwalu, funtshi hinkwerhu ha tsaka loko lweyi a nga chumayeliwa a sungula ku ya mintlhanganwini.

PIMISA HI LIRHANDZU LELI U NGA NA LONA HI YEHOVHA NI VANHU VAN’WANI

15. Matewu 22:37-39 yi nga hi pfunisa ku yini ka ntirho wa hina wa ku chumayela? (Vona mufoto wa pajina la ku sungula.)

¹⁵ Lexi nga hi pfunaka leswaku hi rhandza ntirho wa hina wa ku chumayela i lirhandzu leli hi nga na lona hi Yehovha ni vanhu vambenyani. (Lerha Matewu 22:37-39.) Pimisa hi leswi  Yehovha a tsakisaka xiswona loko a hi vona na hi yendla ntirho lowu ni loko a vona vanhu van’wanyani na va djondza Bibele. Khumbuka leswaku lava va yingisaka rungula la hina naswona va zamaka kuva va hanya hi lona, va ta kuma wutomi la ku kala li nga heli. — Yoh. 6:40; 1 Tm. 4:16.

16. Hi nga swi kotisa ku yini ku tsaka ka ntirho wa ku chumayela loko swi ku a swi koteki swaku hi huma kaya? Nyikela swikombiso.

¹⁶ Ku nga va swaku wena u ka xiyimu lexi ku sivelaka ku huma kaya? Loko u li ka xiyimu xolexo, u nga swi kota ku yendla leswi u nga swi kotaka leswaku u komba Yehovha swaku wa mu rhandza u tlhela u komba van’wani swaku wa va rhandza. Hi nkama wa korona, Samuel na Dania a va nga humi kaya. Kambe ka xiyimu lexo, minkama hinkwayu vona a va chumayela hi ku tirhisa telefoni, va tsala makarta va tlhela va fambisa swidjondzo swa Bibele hi ku tirhisa Zoom. Samuel a chumayele vanhu lava a a kumana na vona axibelhela loko a ya tendera mavabyi ya yena ya cancro. Yena a vula leswi: “Phela loko u kumana ni swikarhatu, u karhateka hintamu lakaku u hela ni ntamu, naswona a swi vevuki ku tiyisela kambe swi nga koteka leswaku u tsaka ka ntirho wa Yehovha.” Phela hi nkama wolowo Dania na yena a a djiyelile hi mavabyi ku ringana tiwheti tinharhu. Hi ku famba ka nkama swi lave a hamba a famba hi ku tirhisa xitulu xa maroda ku ringana 6 wa tiwheti. Yena a vula leswi: “Ni zame ku yendla hinkwaswu leswi a ni swi kota ka xiyimu lexi a ni li ka xona. A ni chumayela enfermeira ni vanhu van’wanyani lava a va hi tisela minchumu kaya. Ni tlhele ni chumayela wansati mun’wani hi telefoni lweyi a a tirha xibelhela.” Hambileswi Samuel na Dania a va nga ha swi koti ku yendla leswi a va swi yendla khale hi mhaka ya xiyimu xa ku karhata lexi a va li ka xona, va tsakile naswona swi va fambele kahle ka ntirho lowu va nga wu yendla.

17. Hi nga yendla yini swaku hi pfuneka hi leswi hi nga swi djondza ka nhlokomhaka leyi?

¹⁷ A 5 wa swilo leswi hi nga swi djondza ka nhlokomhaka leyi, swi nga tirha kahle loko ho swi tirhisa hi nkama wun’we, hikusa nchumu xin’wani ni xin’wani lexi hi nga xi djondza hi nga xi fananisa ni minchumu leyi nandzikisaka swakudla, hikusa loko minchumu hinkwayu leyi yi tlhanganisiwa yi nga ha nandzikisa swakudla. Se loko hi tirhisa swilo leswi hinkwaswu hi ta swi kota ku hlula ku chava nakambe hi ta tsaka ka ntirho wa hina wa ku chumayela.