NHLOKOMHAKA YA DJONDZO 33
LISIMU 130 Hi Lava Kuva Lava Rivalelaka
Leswi Bandla Li Nga Mu Tekelelisaka Xiswona Yehovha Loko Munhu A Djoha
“Loko munhu a djoha, hi ni mupfuni.” — 1 YO. 2:1.
LESWI HI NGA TA SWI DJONDZA
Hi ta djondza swilo swa lisima hintamu swinene, leswi nga yendleka ka bandla la Korinto nkama lowu Mukreste mun’wani a nga yendla xidjoho xaxikulu.
1. I mpsini leswi Yehovha a hi navelelaka swona?
YEHOVHA wa hi pfumelela kuva hi tilangela xin’wani ni xin’wani lexi hi xi lavaka. Hi mhaka, leyo siku ni siku hi yendla swiboho. Kambe a xiboho xa lisima hintamu lexi munhu a nga xi yendlaka, i xa ku va a tinyiketela ka Yehovha a tsakamisiwa a tlhela a lumba bandla la Wukreste. Yehovha a swi lava hintamu leswaku hina vanhu hi yendla xiboho lexo, hikusa wa hi rhandza funtshi a hi navelela swilo swaswinene. A lava leswaku hi va vanghanu va yena, hi tlhela hi kuma wutomi la ku kala li nga heli. — Det. 30:19, 20; Gal. 6:7, 8.
2. I mpsini leswi Yehovha a lavaka swaku lava nga yendla xidjoho xaxikulu va swi yendla? (1 Yohani 2:1)
2 Yehovha a nga hi sindzisi swaku hi mu tirhela, a lava hi mu tirhela hi mbilu hinkwayu. Se madoda ma fanele ma yendla yini loko Mukreste lweyi a nga tsakamisiwa a yendla xidjoho xaxikulu? Loko Mukreste yelweyo a nga tisoli, a fanele a susiwa bandleni. (1 Ko. 5:13) Kambe hambiloko a susiwile bandleni, Yehovha a swi lava hintamu swaku a tisola, a tlhelela bandleni. Hi leswo swi nga yendla swaku Yehovha a nyikela hi N’wana wa yena Yesu Kreste leswaku a hi fela, a ta kota ku hi rivalela swidjoho swa hina. (Lerha 1 Yohani 2:1.) Phela Yehovha wa hi rhandza funtshi a lava swaku vanhu lava va nga yendla swidjoho swaswikulu va tisola va tlhelela ka yena. — Zak. 1:3; Rom. 2:4; Yak. 4:8.
3. Hi ta djondza hi yini ka nhlokomhaka leyi?
3 Yehovha wa xi nyenya xidjoho, naswona a hi byela leswi a titwisaka xiswona hi vanhu lava va yendlaka swidjoho swaswikulu funtshi a lava leswaku na hina hi pimisa ku fana na yena ka mhaka leyi. Se ka nhlokomhaka leyi hi ta djondza hi 3 wa tipontu ta lisima. 1) Hi ta vona swaku i yini leswi bandla la Korinto li nga swi yendla nkama lowu ku nga va ni makwerhu lweyi a nga yendla xidjoho xaxikulu. 2) Hi ta vona swaku i yini leswi mupostolo Pawulo a nga byela vamakwerhu swaku va swi yendla nkama munhu yelweyo a nga tisola. Kasi ka pontu ya wu 3) hi ta vona swaku Yehovha a titwisa ku yini loko makwerhu a yendle xidjoho xaxikulu.
LESWI BANDLA LI NGA SWI YENDLA NKAMA KU NGA YENDLIWA XIDJOHO XAXIKULU
4. I mpsini leswi nga yendleka ka bandla la Korinto? (1 Vakorinto 5:1, 2)
4 Lerha 1 Vakorinto 5:1, 2. Nkama Pawulo na a li ka liyendzo la yena la wunharhu la wumisiyonariyu, a twe mahungu ya ku biha ni ya ku nyenyentsa ya swilo leswi a swi yendliwa ka bandla la Korinto. A twe swaku wanuna mun’wani a a famba masangu ni nsati wa papayi wa yena. Phela swilo leswo a swi bihile hintamu funtshi hambi vanhu va matiko a va swi vona na swi li swilo swa ku nyenyentsa. Kambe vamakwerhu va le Korinto a va swi vona na swi nga bihanga, funtshi leswi vona a va pimisa swaku Yehovha i Xikwembu xa timpsalu, a va nga voni xilaveko xa leswaku wanuna lwiyani a susiwa bandleni. Kambe leswi Vakreste va bandla la Korinto a va pimisa swona a swi hoxile hikusa Yehovha wa xi nyenya xidjoho. Funtshi swilo swa ku biha leswi a swi yendliwa ka bandla leliyani, a swi yendla leswaku vanhu van’wanyani va ku kala va nga gandzeli Xikwembu na vona va nyenyentseka va tlhela va vulavula ku biha hi Yehovha. Phela loko wanuna lweyi a a nga susiwi bandleni, vamakwerhu van’wani na vona a va ta sungula ku yendla swilo swa ku biha leswi yena a a swi yendla. Se i mpsini leswi Pawulo a nga swi byela madoda ya bandla la Korinto leswaku ma swi yendla ka mhaka leyi?
5. Pawulo a byele bandla la Korinto swaku li yendla yini? (1 Vakorinto 5:13) (Vona mufoto.)
5 Lerha 1 Vakorinto 5:13. Hi ku kongomisiwa hi Yehovha, Pawulo a byele madoda ya bandla la Korinto swaku ma mu susa bandleni wanuna lwiyani a a nga pfumeli ku tisola a txintxa mahanyelo ya yena. Se Vakreste ke, a va fanele va mu vonisa ku yini wanuna lwiyani? Pawulo a va byele swaku a va fanele va “tshika ku titlhanganisa” na yena, funtshi ‘hambi ku dla a va nga fanelanga va dla na yena’. (1 Ko. 5:11) Phela ku dla ni munhu swi nga yendla swaku mi sungula ku va ni mabulu mi tlhela mi va vanghanu vavakulu. Se Pawulo a va byele swaku a va nga fanelanga va tipatsa na yena kumbe va tama va va vanghanu va yena. Phela ku tihambanisa na yena a swi ta yendla swaku bandla hinkwalu li vhikeliwa naswona vamakwerhu va nga tekeleli mahanyelo ya yena ya ku biha. (1 Ko. 5:5-7) Xin’wani, loko va tshika ku titlhanganisa na yena a swi ta pfuna wanuna lwiyani kuva a swi vona swaku a xidjoho lexi a a xi yendlile a xi li xikulu hintamu swinene funtshi a swi ta mu pfuna leswaku a tisola a tlhela a navela ku tlhelela ka Yehovha.
Hi ku kongomisiwa hi Xikwembu, Pawulo a tsale karta a byela Vakreste swaku loko munhu a yendla xidjoho a gama a nga tisoli a fanele a susiwa bandleni (Vona paragrafu 5)
6. I mpsini leswi bandla li nga swi yendla nkama li nga yamukela karta la Pawulo naswona i mpsini leswi wanuna lweyi a nga yendla xidjoho xaxikulu a nga gama a swi yendla?
6 Loko Pawulo se a tsalele bandla la Korinto karta la ku sungula, a a tivutisa swaku a va ta titwisa ku yini hi leswi a nga va byela swona. Kambe lexi tsakisaka hileswaku Tito a game a famba a ya byela Pawulo swaku a vamakwerhu bandleni va swi yamukelile leswi a nga va tsalela swona funtshi va mu susile wanuna lwiyani abandleni. (2 Ko. 7:6, 7) Loko se ku hundze nkamanyana, wanuna lwiyani a a yendle xidjoho xaxikulu, a tisolile a tlhela a txintxa mahanyelo ya yena ya ku biha a yendla swilo swaswinene. (2 Ko. 7:8-11) Se ka xiyimu lexiyani Pawulo a byele bandla la Korinto swaku li yendla yini?
BANDLA A LI FANELE LI YENDLA YINI LOKO LWEYI A NGA YENDLA XIDJOHO A TISOLA?
7. I mpsini leswi wanuna lweyi a nga yendla xidjoho xaxikulu a nga swi yendla nkama a nga susiwa bandleni? (2 Vakorinto 2:5-8)
7 Lerha 2 Vakorinto 2:5-8. Wanuna lwiyani a nga susiwa bandleni a game a tisola ka xidjoho xa yena a tlhela a txintxa mahanyelo ya yena a yendla swilo swaswinene. Hi mhaka leyo, Pawulo a byele bandla la Korinto a ku: “Leswi va ku tala va n’wina se va nga mu laya munhu yelweyo swa xega swoleswo”. Phela munhu a susiwa bandleni leswaku a pfuniwa leswaku a tisola ka xidjoho xa yena. Leswi wanuna lweyi a a tisolile a tlhela a txintxa mahanyelo ya yena a swi nga ha bohi swaku vamakwerhu va tihambanisa na yena, kambe a va fanele va mu yamukela abandleni. — Heb. 12:11.
8. I mpsini leswi Pawulo a nga byela bandla la Korinto swaku li swi yendla?
8 Mupostolo Pawulo a tsalele madoda ya bandla la le Korinto a ku: “Mi fanele mi mu rivalela hi mbilu hinkwayu mi tlhela mi mu tiyisa . . . mi mu komba swaku ma mu rhandza.” Phela Pawulo a a nga lavi swaku vamakwerhu lavayani va mu yamukela ntsena abandleni, kambe a a lava swaku va mu byela hi marito swaku va mu rhandza va tlhela va swi kombisa hi mintirho swaku va mu yamukela funtshi va mu rivalela. Se leswo a swi ta yendla swaku a swi vona swaku vamakwerhu va tsakile hikakunene hileswi a nga tlhelela bandleni.
9. Swi nga yendleka van’wani va nga tsakanga nkama wanuna lwiyani a nga tlheliseliwa bandleni. Hi mhaka muni?
9 Swi nga yendleka van’wani va nga tsakanga nkama wanuna lwiyani a nga tlheliseliwa bandleni. Hi mhaka muni? Swi nga yendleka a va ha kwatile hi mhaka leswi a nga li wonhisa xiswona vito la bandla kumbe hi mhaka leswi van’wani va vona va nga vavisiwa hi ku kongoma hi swilo swa ku biha leswi a a swi yendla. Naswona swi nga yendleka van’wani a va swi vona swi nga lulamanga ku va wanuna lwiyani a nga yendla xidjoho xaxikulu a tlheliseliwa bandleni hikusa hi ku ya hi vona, yena a a yendle xidjoho xaxikulu hintamu swinene, ku ve vona a va wa va pfuka va lwela ku yendla ku rhandza ka Xikwembu. (Vona Luka 15:28-30.) Kambe hambileswi vona a va titwisa xileswo, hi mhaka muni a swi li swa lisima kuva va mu komba makwerhu lwiyani swaku a va mu rhandza ni leswaku va mu yamukela?
10-11. A ku ta yendleka yini loko madoda ya bandla la Korinto a mo kala ma nga mu rivaleli wanuna lwiyani a a tisolile?
10 A a ta titwisa ku yini wanuna lweyi se a a tisolile loko madoda a ma nga mu pfumelelanga swaku a tlhelela bandleni funtshi vamakwerhu lavan’wani va bandla la Korinto a va nga mu yamukelanga hi ndlela yayinene? Leswo a swi ta yendla swaku a ‘kwata hintamu a za a godola’ hikusa a a ta tshuka a pimisa swaku a swi nge he koteki kuva a tlhela a va munghanu wa Yehovha.
11 I mpsini swin’wani leswi a swi ta yendleka loko vamakwerhu a vo yala ku mu rivalela wanuna lwiyani a nga tisola? A va ta luzekeliwa hi wunghanu la vona na Yehovha. Hi mhaka muni? Hikusa a va ta va na va nga mu tekeleli Yehovha lweyi a nga Xikwembu xa lirhandzu ni timpsalu naswona a rivalelaka vanhu van’wani. A va ta va na va tekelela Sathana lweyi a nga ni mona funtshi a kalaka a nga na mhaka ni vanhu van’wani. Phela loko a vo kala va nga mu rivaleli a swi ta fana ni loko va tirhisiwa hi Sathana swaku va pfalela makwerhu lwiyani swaku a va munghanu wa Yehovha. — 2 Ko. 2:10, 11; Efe. 4:27.
12. I yini leswi bandla la Korinto a li fanele li swi yendla kuva li tekelela Yehovha?
12 I yini leswi Vakreste va Korinto a va fanele va swi yendla leswaku va kombisa swaku a va tekeleli Sathana kambe va tekelela Yehovha? A va fanele va rivalela vanhu lava va nga tisola ku fana ni leswi Yehovha a va rivalelaka. Hi xikombiso, Davhida a vule leswi ka Tipisalema 86:5: “Hikusa u lulamile, wena Yehovha, naswona u lunghekele ku rivalela”. Se Mikiya a tsale leswi: “Hi xini Xikwembu lexi fanaka na wena, lexi rivalelaka xihoxo funtshi xi kalaka xi nga konteli minandzu?” (Mik. 7:18) Kasi muprofeta Esaya yena a te: “Lweyi a yendlaka swa ku biha a a tshiki mahanyelo ya yena, ni munhu wa ku biha a a tshiki mimpimiso ya yena; a a tlhelele ka Yehovha, lweyi a nga ta mu twela wusiwana, ka Xikwembu xa hina, hikusa xi ta rivalela hi mbilu hinkwayu.” — Esa. 55:7.
13. Hi mhaka muni madoda a ma nga fanelanga ma hlwela ku tlhelisela wanuna lwiyani a nga tisola bandleni? (Vona kwadru leli nge “ Swi Teke Nkama Muni Swaku Wanuna Lwiyani Wa Le Korinto A Tlheliseliwa Bandleni?”)
13 Vamakwerhu va le Korinto a va ta swi kombisa swaku va mu tekelela Yehovha hi ku mu rivalela wanuna lwiyani va tlhela va mu yamukela hi ku tsaka loko a tlheliseliwa bandleni. Pawulo a vule swaku loko va yendla leswo a va ta kombisa swaku “va yingisa ka swilo hinkwaswu.” (2 Ko. 2:9) I ntiyiso swaku a ko va ni tiwhetinyana ntsena na wanuna lwiyani a susiwile bandleni kambe yena se a a tisolile. Hi mhaka leyo, a swi nga lavi swaku madoda ma teka nkama wa wunyingi leswaku ma tlhela ma mu tlhelisela bandleni.
TEKELELA TIMPSALU NI KU LULAMA KA YEHOVHA
14-15. Hi djondza yini ka leswi mhaka leyi nga humelela ka bandla la Korinto yi nga tenderisiwa xiswona? (2 Pedru 3:9) (Vona mufoto.)
14 Mhaka leyi nga yendleka ka bandla la Korinto yi “tsaleliwe ku djondzisa hina.” (Rom. 15:4) Se hi djondza yini ka yona? Hi djondza leswaku Yehovha a nga swi rhandzi ku vona vanhu va yena na va djoha, funtshi a lava leswaku munhu lweyi a nga djoha a tlhela a nga tisoli, a susiwa bandleni. I ntiyiso swaku Yehovha i Xikwembu lexi nga ni timpsalu, kambe a nga pfumeleli swaku vanhu lava nga djoha va tlhela va nga tisoli, va tama va lumba a bandla naswona a nge txintxi a minawu ya yena ya ku lulama. (Yud. 4) Loko Yehovha a o pfumelela leswaku vanhu lava nga djoha va gama va nga tisoli va nga susiwi bandleni, swilo a swi nga ta famba kahle. — Swiv. 13:20; 1 Ko. 15:33.
15 Loko munhu a yendle xidjoho xaxikulu, a swi vuli swaku Yehovha o kala a nga ha na mhaka na yena kumbe o kala a nga ha mu rhandzi. Yehovha a lava leswaku munhu yelweyo a tisola a tlhela a txintxa mahanyelo ya yena, leswaku a ta kota ku mu rivalela a tlhela a va munghanu wa yena. Phela Yehovha a lava leswaku vanhu hinkwavu va ponisiwa. (Eze. 33:11; lerha 2 Pedru 3:9.) Hi mhaka leyo, nkama wanuna lwiyani wa Korinto a nga tisola a tlhela a txintxa mahanyelo ya yena, Yehovha a tirhise mupostolo Pawulo swaku a byela bandla la Korinto swaku li mu rivalela li tlhela li mu yamukela bandleni.
Bandla li tekelela xikombiso xa Yehovha xa lirhandzu ni timpsalu hi ku va yamukela hi lirhandzu lava nga tlhelela bandleni (Vona maparagrafu 14-15)
16. U titwisa ku yini loko u vona leswi mhaka leyi nga yendleka ka bandla la Korinto yi nga tenderisiwa xiswona?
16 Leswi nga yendleka ka bandla la Korinto ni leswi mhaka liyani yi nga tenderisiwa xiswona, swi hi pfuna ku vona swaku Yehovha i Xikwembu lexi nga lulama, xi nga ni wunene xi tlhela xi tala hi lirhandzu. (Ps. 33:5) Phela ku tiva leswo swa hi tiyisa hinkwerhu hikusa minkama yin’wani ha phazama, se ha swi lava ku rivaleliwa hi Yehovha. Se ha mu khensa Yehovha hileswi a nga nyikela hi N’wana wa yena Yesu leswaku a hi fela kuva a kota ku hi rivalela swidjoho swa hina. Swa hi tiyisa hinkwerhu swi tlhela swi hi tsakisa ku tiva swaku Yehovha wa hi rhandza naswona a hi navelela swaswinene!
17. Hi ta bula hi yini ka tinhlokomhaka leti landzelaka?
17 Se i mpsini leswi yendliwaka swoswi abandleni loko munhu a yendla xidjoho xaxikulu? Madoda ya bandla ma nga mu tekelelisa ku yini Yehovha leswaku ma pfuna munhu lweyi a nga yendla xidjoho xaxikulu swaku a tisola? I mpsini leswi bandla li faneleke li swi yendla loko madoda ma yendla xiboho xa ku susa munhu bandleni kumbe xa ku a tlheliseliwa bandleni? Hi ta bula hi swivutiso leswi ka tinhlokomhaka leti landzelaka.
LISIMU 109 Ahi Rhandzaneni Swinene Swi Sukela Mbilwini
