Mupostolo Pawulo a mu tsalele leswi Timotiya lweyi na yena a a li doda: “Ni ku byela leswi phambheni ka Xikwembu, ka Kreste Yesu ni le ka tintsumi leti nga langiwa: Yingisa minawu leyi hi ku swi kambisisa kahle swilo hinkwaswu, u nga vi na xikheto loko u yendla xiboho.” — 1 Tm. 5:21.

A hi sunguleni hi ku kambisisa leswi tintsumi leti ti kalaka ti nga li swona. Tintsumi leti a hi lava va 144.000, hikusa nkama lowu Pawulo a nga tsalela Timotiya, vapostolo ni Vakreste van’wani lava nga totiwa a va nga se sungula ku pfuxiwa swaku va ya hanya tilweni. Se leswo swi hi pfuna ku twisisa swaku a “tintsumi leti nga langiwa” a hi vatotiwa. — 1 Ko. 15:50-54; 1 Tes. 4:13-17; 1 Yo. 3:2.

Naswona “tintsumi leti nga langiwa” a hi tintsumi leti nga djikela Yehovha hi nkama wa Ndhambi ya Nowa, hikusa tintsumi toleto ti nyime na Sathana ti gama ti va madimoni naswona i valala va Yesu. (Gen. 6:2; Luk. 8:30, 31; 2 Pe. 2:4) Ka nkama lowu taka, tintsumi toleto ti ta pfaleliwa ka xikhele xa ku yenta ku ringana 1.000 wa malembe, ti gama ti helisiwa xikan’we na Sathana. — Yud. 6; Nhl. 20:1-3, 10.

Se leswo swi hi pfuna ku twisisa swaku a “tintsumi leti nga langiwa” leti Pawulo a nga vulavula hi tona i tintsumi leti ti tirhisanaka na Yehovha na Yesu amatilweni.

Yehovha a ni tintsumi ta tinyingi ta ku tshembeka. (Heb. 12:22, 23) Funtshi swi tikomba ingi tintsumi leti a ti yendli ntirho wolowu wa wun’we, kambe ti yendla mintirho ya ku hambanahambana. (Nhl. 14: 17, 18) Hi xikombiso, Bibele li vulavula hi ntsumi leyi Yehovha a nga yi rhuma swaku yi ya dlaya 185.000 wa masonchwa ya Vaasiriya. (2 Tih. 19:35) Naswona swi nga yendleka ku ni tintsumi leti nga nyikiwa ntirho wa ku “humesa hinkwavu lava yendlaka van’wani va djoha ni lava tlulaka nawu”. (Mat. 13:39-41) Naswona ku ni tin’wani leti nga ni ntirho wa ku ‘hi vonelela ka tindlela ta hina hinkwatu.’ (Ps. 91:11; Mat. 18:10; fananisa ni Matewu 4:11; Luk. 22:43) Funtshi swi nga yendleka ku ni tin’wanyani leti nga nyikiwa ntirho wa ku hlengeleta lava va nga ta fuma na Yesu atilweni. — Mat. 24:31.

Swi tikomba ingaku “tintsumi leti nga langiwa” leti ku vulavuliwaka hi tona ka 1 Timotiya 5:21, ku li tintsumi leti nga nyikiwa ntirho wa leswaku ti hlayisa bandla. Ka ndzimana leyi, Yehovha a a byela madoda leswaku ma fanele ma li hlayisa kahle bandla naswona vamakwerhu va fanele va ma hlonipha. Pawulo a byele madoda leswaku ma fanele ma yendla mintirho ya wona na ‘ma nga na xikheto’ ni leswaku a ma fanelanga ma yendla swiboho hi magugu. Swin’wani leswi yendlaka leswaku madoda ma yingisa leswi Pawulo a nga swi vula, hileswi ma tirhaka “phambheni ka Xikwembu, ka Kreste Yesu ni le ka tintsumi leti nga langiwa.” Swi tikomba ingaku mintirho yin’wani leyi yendliwaka hi tintsumi leti i ku rhangela ntirho wa ku chumayela, ku vonelela ni ku vhikela vamakwerhu abandleni ti tlhela ti byela Yehovha leswi ti nga swi vona. — Mat. 18:10; Nhl. 14:6.