U ti lerhe kahle tinhlokomhaka ta Murindzi wa lembe leli? Loko u ti lerhe kahle, zama ku hlamula swivutiso leswi landzelaka:

Hi nga djondza yini ka leswi Yehovha a va vonisaka xiswona vavasati?

Yehovha a nga va tekeli hansi vavasati, kambe a va vona na va li va lisima ku fana ni vavanuna. Wa va yingisa, funtshi wa swi rhandza ku tiva leswi va titwisaka xiswona ni leswi swi va karhataka. A tshemba leswaku va nga swi kota ku hetisisa ntirho wun’wani ni wun’wani lowu va nyikiwaka wona. — Murindzi 01/24 mapaj. 15-16.

Hi nga yi tirhisisa ku yini ndzimana ya Vaefeza 5:7 leyi nge: “Mi nga tolovelani ni vanhu va ku tshamisa xileswo”?

Ka ndzimana leyi mupostolo Pawulo a a hi basopisa swaku hi fambela kule ni vanhu lava nga hi xengetelaka swaku hi tshika ku yingisa Yehovha. Hi nga yendla leswo hi ku kala hi nga titlhanganisi ni vanhu volavo kumbe ku bula na vona hi ku tirhisa ma redes sociais. — Murindzi 03/24 mapaj. 22-23.

Hi swini switoriya swa mavunhwa leswi hi faneleke hi fambela kule na swona?

A hi lavi ku lerha mamensajem lawa vanghanu va hina kumbe vamakwerhu va hi poselaka wona loko va nga ma kambelanga. A hi lavi ku vona ma e-mail lawa hi poseliwaka hi vanhu lava hi kalaka hi nga va tivi ni lava nga djikela nhlengeletanu, lava tiyendlaka ingi va lava ku djondza ntiyiso. — Murindzi 04/24 paj. 12.

I mpsini leswi hi swi tivaka ni leswi hi kalaka hi nga swi tivi hi ndlela leyi Yehovha a nga ta yavanyisa Hosi Solomoni, vanhu lava va nga fa aSodoma ni Gomora ni ka Ndhambi ya Nowa?

A hi swi tivi kumbe Yehovha a va helise swa wugamu ni leswaku a nga kona ni mun’we a nga ta pfuxiwa ka vanhu lava. Kambe leswi hi swi tivaka hi leswaku Yehovha a tiva swilo hinkwaswu naswona a ni timpsalu tatikulu. — Murindzi 05/24 mapaj. 3-4.

Ku tiva swaku Xikwembu i “Ribye” swi hi yendla hi tiyiseka hi yini? (Det. 32:4)

Yehovha i ndhawu ya hina ya ku tumbela ka yona, wa tshembeka, naswona minkama hinkwayu wa swi hetisisa leswi a swi tshembisaka. Yehovha a nga txintxi wumunhu la yena ni swikongomelo swa yena. — Murindzi 06/24 mapaj. 26-28.

I mpsini swi nga hi pfunaka ku tolovelana ni bandla la nyuwani?

I ku tshemba swaku Yehovha a ta hi pfuna ku fana ni leswi a nga pfuna vanhu va yena va khale. Xin’wani i ku kala hi nga fanisi bandla la khale ni leli hi nga ka lona swoswi ni ku tlhela hi tshama na hi khomekile hi ku yendla mintirho ka bandla la hina la nyuwani ni ku zama ku va ni vanghanu va nyuwani. — Murindzi 07/24 mapaj. 26-28.

Hi djondza yini ka swifaniso swinharhu leswi kumekaka ka Matewu 25?

A xifaniso xa tinyempfu ni timbuti xi hi djondzisa swaku i swa lisima kuva hi tshembeka. Kasi xa tintombhi ta ku tlhariha ni ta swiphunta xi hi djondzisa swaku swi kahle kuva hi tshama na hi pfule matihlo hi tlhela hi tshama na hi lunghile. Se a lexi xa titalenta xi hi djondzisa swaku i swa lisima kuva hi tirha hi ku hiseka hi tlhela hi yendla leswi hi nga swi kotaka. — Murindzi 09/24 mapaj. 20-24.

A vharanda la tempele ya Solomoni a li lehe ku fikela kwini?

Matsalwa man’wani ya khale ya ku tsaliwa hi voko, ka buku la 2 Tikronika 3:4 ma vula swaku a vharanda la tempele ya Solomoni a li lehe 53 wa mametru. Kasi matsalwa man’wani ya ku tshembeka ma vula swaku a li lehe 9 wa mametru, funtshi leswo swi tikomba ku li ntiyiso hikusa swa fambisana ni ku yanama ka makhumbi ya tempele. — Murindzi 10/24 paj. 31.

Swi vula yini ku va mupfunisi wa bandla a va nuna wa “nsati mun’we”? (1 Tm. 3:12)

Swi vula leswaku a fanele a chada ntsena ni wansati mun’we naswona a nga fanelanga a yendla wuntunga la swa masangu. A nga fanelanga a rhandza kumbe ku navela wansati mun’wani. — Murindzi 11/24 paj. 19.

Hi mhaka muni hi nga vulaka swaku leswi nga ka Yohani 6:53 a swi fambelani ni Xilalelo xa Hosi?

Hi vula leswo hikusa ka Yohani 6:53 Yesu a byele Vayuda swaku va fanele va dla nyama ya yena va tlhela va phuza ngati ya yena. Naswona marito lawa a ma vule hi lembe la 32 E.C., aGalileya a ma byela Vayuda lava a va nga na lipfumelo ka yena. Kuve a Xilalelo xa Hosi xi yendliwe hi lembe leli nga landzela aYerusalema naswona leswi a nga swi vula ka Xilalelo xa Hosi a a swi byela vapostolo va yena lava a va ta fuma na yena atilweni. — Murindzi 12/24 mapaj. 10-11.