MINKAMA yin’wani vatsali va Bibele a va phindhaphindha leswi a va swi byela vanhu van’wani. Swoswi hi ta vona swivangelo swinharhu leswi kumbexana a ku li swona leswi a swi va yendla va phindhaphindha leswi a va swi vula:

Nkama lowu ma nga tsaliwa hi wona. Ka nkama wa Vayisrayele a vanhu va vanyingi a va nga li na wona makopiya ya Nawu makaya ka vona. Makhambi ya manyingi a vo yingisela Nawu ntsena loko va li phambheni ka tabernakela. (Det. 31:10-12) Se swi nga yendleka a swi nga va vevukeli ku nyima mawora ya manyingi va li karhi va yingisela leswi a swi lerhiwa. (Neh. 8:2, 3, 7) Hi mhaka leyo leswaku vanhu hinkwavu va swi khumbuka leswi a swi lerhiwa va tlhela va swi tirhisa ka wutomi la vona a swi li swa lisima leswaku phindhaphindhiwa marito ya lisima lawa ma nga lerhiwa. Ku va swi phindhaphindhiwa a swi va pfuna leswaku va khumbuka minawu leyi ka yona a ku vulavuliwa swilo swa swinyingi. — Lev. 18:4-22; Det. 5:1.

Leswi ma nga tsalisiwa xiswona. Phela mabuku man’wani ya Bibele i tinsimu. Xikombiso xa leswo i buku la Tipisalema, Lisimu La Solomoni ni buku la Swirilo. Phela tinsimu tin’wani a ti ni koru leli li nga ni marito lawa a ma phindhaphindhiwa, se leswo a swi ta pfuna lava a va ta yingisela tinsimu toleto swaku va khumbuka marito ya tona. Hi xikombiso, lisimu leli li nga ka buku la Tipisalema 115:9-11 li li: “Tshemba Yehovha, wena Israyele i mupfuni wa wena ni xivhikelo xa wena. Tshemba Yehovha, wena ndjangu wa Aroni i mupfuni wa wena ni xivhikelo xa wena. Tshembani Yehovha, n’wina lava chavaka Yehovha i mupfuni wa n’wina ni xivhikelo xa n’wina.” Phela ku phindhaphindhiwa ka marito ya lisimu leli a swi ta pfuna lava a va yimbelela swaku va vekisa marito ya lona ka mimpimiso ni ka mbilu ya vona.

Hi mhaka muni ma tsaliwile. Minkama yin’wani vatsali va Bibele a swi lava va phindhaphindha marito ya lisima. Hi xikombiso, nkama Yehovha a nga byela Vayisrayele leswaku va nga dli ngati, Yehovha a rhume Moxe leswaku a phindhaphindha swivangelo swa kona. Yehovha a a lava leswaku va swi tiva swaku a ngati yi nyimela wutomi. (Lev. 17:11, 14) Loko ku ndlhule nkama, vapostolo swin’we ni madoda va tlhanganile aYerusalema swaku va tsala swilo leswi Vakreste a va nga fanelanga va swi yendla swaku va nga xi kwatisi Xikwembu. Hi nkama wolowo, swi lave va tlhela va vulavula hi mhaka leyi ya ku fambela kule ni ngati. — Min. 15:20, 29.

I ntiyiso swaku ku ni marito lawa Bibele li ma phindhaphindhaka, kambe leswo a swi lavi ku vula swaku Yehovha a lava hi phindhaphindha marito wolawo. Hi xikombiso, Yesu a vule swaku: “Loko u khongela, u nga phindhaphindhi minchumu ya ku fana.” (Mat. 6:7) Yena a tlhele a hi byela hi timhaka tin’wani leti hi nga ti petaka ka swikhongelo swa hina. (Mat. 6:9-13) Se hambileswi hi kalaka hi nga fanelanga hi phindhaphindha marito wolawo ya man’we ka swikhongelo swa hina, hi nga tirhisa marito ya ku hambanahambana swaku hi vulavula hi timhaka toleti ta tin’we. — Mat. 7:7-11.

Bibele li ni swivangelo swa lona swaku li phindhaphindha marito man’wani, naswona kuva li yendle leswo i ndlela leyi Yehovha Mudjondzisi Wamukulu a yi tirhisaka swaku a hi djondzisa leswi nga swinene ka hina. — Esa. 48:17, 18.