RITO leli nga hundzuluxeliwa li va “nyolo” leli nga tirhisiwa ka Wuhundzuluxeli La Misava Ya Nyuwani, li nga ha vula tinyolo ta ku hambanahambana. (Min. 8:28, 29, 38) Kambe swi tikomba ingaku Muetiyopiya a a famba hi nyolo yayikulu ku nga li tinyolo leti a ti tirhisiwa ka nyimpi kumbe ka mimpalisanu ya ku tsutsuma. Hi mhaka muni hi vula leswo? A hi voneni swivangelo swin’wani.

Muetiyopiya a a ni xitshamu xa ku tlakuka naswona a yendze mpfhuka wa ku leha. Hi swi tivisa ku yini leswo? Hi swi tiva hikusa loko Bibele li vulavula hi yena li li: A a li “wanuna lweyi a a ni xitshamu xa ku tlakuka ka mfumu wa Kandaki, hosi ya xisati ya Vaetiyopiya naswona a a vonelela tshomba la yona hinkwalu.” (Min. 8:27) Lani khale a ku li Etiyopiya namuntlha ku lumba Sudão ni tlhelonyana la Gibita. Swi nga yendleka Muetiyopiya lweyi a yendze hi tinyolo ta ku hambanahambana, naswona swi nga yendleka a a ni swilo leswi a a swi pakelile swaku a yendza na swona. A khale a ku tirhisiwa tinyolo ta ku hambanahambana, naswona leti a ti tirhisiwa swaku ti pakela vanhu a ti ni 4 wa maroda. Buku lin’wani leli tlhamuselaka buku la Mintirho li vula swaku: “A tinyolo leti, a ti yendla swaku vanhu va kota ku pakela swilo swa swinyingi, va yendza va hlayisekile, naswona va kota ku famba mpfhuka wa ku leha.”

Muetiyopiya a wo lerha nkama Filipi a nga mu tshinelela. Bibele li kombisa swaku Filipi a tsutsumile a yela Mutheniwa nkama yena a a lerha buku la muprofeta Esaya hi rito la le henhla. (Min. 8:30) Se ku va Muetiyopiya a swi kotile ku lerha ni ku va Filipi a swi kotile ku tsutsuma a kuma nyolo swi kombisa swaku a nyolo liyani a yi nga li nyolo ya nyimpi kumbe nyolo leyi a yi tirhisiwa ka mpalisanu, kambe a ku li nyolo leyi a yi tirhisiwa loko vanhu va yendza va tlhela va rhwala swilo swa vona. Funtshi nyolo leyi a yi nga yendleliwanga ku famba hi ku tsutsuma.

Muetiyopiya a kombele Filipi swaku a khwela a tshama na yena. (Min. 8:31) Ka tinyolo leti a ti tolovelekile ka nkama lowuyani, lava a va khwela a va tala ku nyima. Kambe ka nyolo leyi a ku ni ndhawu ya ku Muetiyopiya xikan’we na Filipi a va ta tshama ka yona.

Se hi ku ya hi leswi buku la Mintirho ndzima 8 li vulaka swona, ni leswi hi nga bula hi swona, swoswi mabuku ya hina loko ma kombisa mufoto wa nyolo ya Muetiyopiya ma kombisa nyolo yayikulu ku nga li nyolo yayitsongo leyi a yi tirhisiwa ka nyimpi kumbe ka mpalisanu.