1. Hi mhaka muni siku la Xitsundzuxu li li siku la lisima hintamu ka lembe? (Luka 22:19, 20)

 KA VANHU va Yehovha, siku leli va khumbukaka lifu la Yesu hi lona i la lisima hintamu swinene, hikusa Yesu a vule hi ku kongoma leswaku va fanele va li tlangela. (Lerha Luka 22:19, 20.) Phela hi ni swivangelo swa swinyingi leswi hi yendlaka hi swi lava hintamu ku va kona ka Xitsundzuxu. A hi voneni swin’wani swa kona.

2. I mpsini swi hi yendlaka hi swi navela hintamu ku va kona ka Xitsundzuxu?

² A Xitsundzuxu xi hi pfuna ku khumbuka lisima la lifu la Yesu Kreste. Xi tlhela xi hi pfuna ku vona leswi hi nga swi yendlaka kuva hi khensa Yehovha na Yesu hileswi va nga hi yendlela swona. (2 Ko. 5:14, 15) Ka siku la Xitsundzuxu, ‘ha tiyisana’ ni vamakwerhu va hina. (Rom. 1:12) Funtshi hi siku leli, vanhu lava va nga tshika ku chumayela kumbe ku ta mintlhanganwini va tolovela ku va kona. Naswona loko va khomiwa hi ndlela yayinene, va kombiwa lirhandzu hi siku leli, swi va yendla va lava ku tlhelela ka Yehovha. Vanyingi lava hi djondzaka na vona Bibele va ya ka Xitsundzuxu, funtshi leswi va swi twaka ni leswi va swi vonaka hi siku leli swi va yendla va lava ku va valandzeli va Kreste. Hinkwaswu leswi hi swona swi yendlaka swaku a siku la Xitsundzuxu li va la lisima hintamu swinene ka hina.

3. Xitsundzuxu xi hi tlhanganisa ku yini ni vamakwerhu amisaveni hinkwayu? (Vona mufoto.)

³ Xin’wani xi hi yendlaka hi swi lava hintamu ku va kona ka Xitsundzuxu hi swaku xi hi tlhanganisa ni vamakwerhu va hina amisaveni hinkwayu. Phela hinkwerhu hi yendla swo swa swin’we ka Xitsundzuxu: Hi yingisela dixkursu leli hi kombaka lisima la lifu la Yesu, hi yimbelela tinsimu, hi hundzisa pawu ni vhinyu naswona hinkwerhu hi li ‘Amem’ ka 4 wa swikhongelo leswi yendliwaka ka ntlhanganu lowu. Naswona, ndzeni ka 24 wa mawora, mabandla hinkwawu ma ta va se na wona ma yendle leswi  fanaka. Indjhe wa mu pimisa Yehovha na Yesu, leswi va tsakisaka xiswona, loko va vona vanhu va vona lani misaveni na va va dzunisa hi ndlela leyi?

4. Hi ta hlamula swivutiso swini ka nhlokomhaka leyi?

⁴ Ka nhlokomhaka leyi hi ta hlamula swivutiso leswi: I mpsini leswi hi nga swi yendlaka swaku hi tilulamiselela siku la Xitsundzuxu? Hi nga yendla yini swaku hi pfuna van’wani ku va na vona va pfuneka ka siku leli? Hi nga va pfunisa ku yini lava nga tshika ku hlangamela kumbe ku chumayela?

U NGA YENDLA YINI SWAKU U TILULAMISELELA XITSUNDZUXU?

5. a) Hi ku ya hi Tipisalema 49:7, 8 hi mhaka muni hi fanele hi pimisa hi lisima la lifu la Yesu? b) U djondze yini ka vhidiyo leli nge Hayini Yesu A File?

⁵ Xin’we xa swilo leswi hi nga swi yendlaka swaku hi tilulamiselela Xitsundzuxu i ku va hi pimisa hi lisima la lifu la Yesu. Phela hina hi hoxe a hi nga ta swi kota ku tiponisa ka xidjoho ni lifu. (Lerha Tipisalema 49:7, 8; u tlhela u sixtira vhidiyo leli nge Hayini Yesu A File?) a Kambe Yehovha a hi nyike N’wana wa yena lweyi a mu rhandzaka hintamu swaku a hi fela. Phela swi lave Yehovha na Yesu va tikarhata swaku va hi yendlela nchumu lowu. (Rom. 6:23) Nkama lowu hi yaka hi pimisa hi leswi Yehovha na Yesu va nga hi yendlela swona, hi ta ya hi li nyika lisima lifu la Yesu. Ka maparagrafu lawa ma landzelaka hi ta vona swaku Yehovha na Yesu va tikarhate ku fikela kwini swaku va hi ponisa ka xidjoho ni lifu. Kambe ku sungula, a hi voneni swaku kasi nkutsulu i yini.

6. I yini nkutsulu?

⁶ A nkutsulu i nchumu lowu wu hakeliwaka swaku ku tlhela ku kumiwa nchumu lowu nga luziwa. Adamu a yendliwe na a hetisekile. Kambe a nkama a nga djoha, a yendle swaku yena ni vanhu hinkwavu va luza ntshembo wa ku hanya wutomi la ku kala li nga heli. Se leswaku ku tlhela ku kumiwa leswi Adamu a nga swi luza, swi lave Yesu Kreste a nyikela hi wutomi la yena. Funtshi ku hambana na Adamu, ka wutomi la yena hinkwalu Yesu Kreste “a nga djohanga naswona a nga kanganyisanga munhu.” (1 Pe. 2:22) Phela a nkama Yesu Kreste a nga fa a nyikela hi wutomi la yena, a swo fana ni loko a hakela a wutomi la ku hetiseka leli Adamu a nga li luza. — 1 Ko. 15:45; 1 Tm. 2:6.

7. Hi swini swikarhatu leswi Yesu a nga kumana na swona lani misaveni?

⁷ Nkama Yesu na a li lani misaveni, a mu yingisile Papayi wa yena hambiloko a ringiwa. Nkama na a li mutsongo, Yesu a a hetisekile, kambe hambileswo, a a fanele a yingisa vapsali va yena lava a va nga hetisekanga. (Luk. 2:51) Se nkama na a li jovhem, swi lave a tama a yingisa vapsali va yena a tlhela a tama a tshembeka ka Yehovha hambiloko vanhu van’wani va mu xengetela ku kala a nga swi yendli leswo. Se nkama na a li mukulu, swi lave Yesu a tama a tshembeka ka Yehovha loko Sathana a mu ringa. (Mat. 4:1-11) Phela Sathana a a tinyimisele ku yendla Yesu a djoha, swaku a nga swi koti ku hi fela.

8. Hi yini mindzingo yin’wani leyi Yesu a nga yi tiyisela?

⁸ Nkama lowu a a yendla ntirho wa yena wa ku chumayela, Yesu Kreste a kumane ni swikarhatu swin’wani. Hi xikombiso valala va yena a va mu hlupha va tlhela va mu chavisela swaku va ta mu dlaya. (Luk. 4:28, 29; 13:31) Vadjondzisiwa va yena minkama yin’wani a va tshamela ku phazama. (Mar. 9:33, 34) Siku leli a nga thethisiwa hi lona, a bukuteliwile a tlhela a poyiliwa hi vanhu, funtshi a game a dlayiwa ka mhandzi ya nxaniso. A ve ni lifu la ku vava hintamu swinene. (Heb. 12:1-3) Funtshi Yehovha a nga yendlanga nchumu swaku a mu vhikela ka swikarhatu  leswi a nga kumana na swona ka masiku ya yena ya wugamu. b — Mat. 27:46.

9. U titwisa ku yini hi lifu la Yesu Kreste? (1 Pedru 1:8)

⁹ Impela, Yesu a hlupheke hintamu swinene swaku a hi fela. Se ku pimisa hi leswi Yesu a nga hluphekisa xiswona swaku a hi fela swi hi yendla hi mu rhandza hintamu swinene. — Lerha 1 Pedru 1:8.

10. Indjhe swi mu vevukelile Yehovha ku va a nyikela N’wana wa yena swaku a hi fela?

¹⁰ Se Yehovha ke? U vona swaku swi mu vevukelile ku va a nyikela n’wana wa yena swaku a hi fela? Ihim, a swi mu vevukelanga. Phela Yehovha na Yesu va ni wunghanu lalikulu hintamu la ku a ku na papayi ni n’wana lani misaveni va nga ni wunghanu lalikulu ku tlula leli va nga na lona. (Swiv. 8:30) Se pimisa hi ku va Yehovha a vone N’wana wa yena na a li lani misaveni a kumana ni swikarhatu, a poyiliwa, a hlekiwa, a biwa a tlhela a dlayiwa. Phela leswo swi mu vave hintamu Yehovha.

11. Nyikela xikombiso lexi kombaka swaku Yehovha a vaviseke swinene nkama Yesu a nga dlayiwa.

¹¹ Phela mupsali lweyi a nga tshama a feliwa hi n’wana wa swi twisisa swaku swi vava ku fikela kwini ku feliwa hi n’wana. Hina ha swi tiva swaku Yehovha a ta pfuxa maxaka ya hina ni vanghanu va hina lava nga fa, kambe loko va fa swi hi hlomula timbilu. Se Yehovha ke? Na yena swi mu vave hintamu swinene nkama a nga vona N’wana wa yena a hluphiwa a tlhela a dlayiwa. c — Mat. 3:17.

12. I mpsini leswi u nga swi yendlaka na siku la Xitsundzuxu li nga se fika?

¹² Se u swi vonisa ku yini ku va ku sukela swoswi anze hi siku la Xitsundzuxu, ka djondzo ya wena wexe ya Bibele kumbe ka Wugandzeli la Ndjangu mi djondza hi nkutsulu? U nga ha kuma minchumu yinyingi ka Nkongomiso Wa Ku Yendla Pexkiza Wa Timboni ta Yehovha kumbe ka mabuku ni mavhidiyo ya nhlengeletanu. d Xin’wani u nga ha xi yendlaka i ku va u djondza tindzimana leti vulavulaka hi leswi nga yendleka ka vhiki leli Yesu a nga fa hi lona. U nga ha ti kuma tindzimana leti ka Xibukwana Xa Mintlhanganu. Kasi hi siku la kona la Xitsundzuxu, u swi vonisa ku yini ku va u nga khohlwi ku sixtira vhidiyo la tsalwa la siku leli fambisiwaka hi makwerhu wa Ntlawa Lowu Rhangelaka? Phela loko u yendla hinkwaswu leswi swaku u tilulamiselela siku la Xitsundzuxu, u ta swi kota ku pfuna  vanhu van’wani leswaku na vona va pfuneka ka siku leli. — Ezr. 7:10.

PFUNA VAN’WANI SWAKU VA PFUNEKA KA XITSUNDZUXU

13. Hi wini nchumu wa ku sungula lowu hi nga wu yendlaka swaku hi pfuna van’wani ku va va pfuneka ka Xitsundzuxu?

¹³ Hi nga yendla yini swaku hi pfuna van’wani swaku na vona va pfuneka ka Xitsundzuxu? Xa ku sungula lexi hi nga xi yendlaka i ku va rhamba. Naswona handle ka ku rhamba lava hi va kumaka ka ntirho wa ku chumayela ntsena, ku ni van’wani lava hi nga va rhambaka. Hi nga ha rhamba maxaka ya hina, lava hi tirhaka na vona, lava hi djondzaka na vona xikola kumbe van’wani. Naswona loko hi nga li na swona swirhambu swa ku yenela, hi nga ha va posela xirhambu hi ku tirhisa telefoni. Phela loko hi yendla leswo, swi nga yendleka ku tala ka vona va ta ka Xitsundzuxu. — Ekl. 11:6.

14. Ku rhamba munhu lweyi hi mu tivaka swi nga mu khumbisa ku yini? Nyikela xikombiso.

¹⁴ Phela ku mu nyika xirhambu munhu lweyi u mu tivaka swi nga mu yendla a lava ku va kona ka siku la Xitsundzuxu. Hi xikombiso, makwerhu mun’wani a hlamalile loko nuna wa yena lweyi a kalaka a nga li Mboni a mu byela swaku ‘lembe leli ni ta famba na wena ka Xitsundzuxu’. Hi mhaka muni a hlamalile? Hikusa se a ku hundza malembe ya manyingi na a mu rhamba kambe a nga yi ka Xitsundzuxu. Se i ntxini lexi nga mu yendla a lava ku ya? Hikusa a nyikiwe xirhambu hi doda lin’wani leli a a li tiva. Se leswo swi mu yendle a ya ka Xitsundzuxu hi lembe leliyani ni ka malembe man’wani lawa ma nga landzela.

15. I mpsini leswi hi faneleke hi swi khumbuka loko hi rhamba vanhu swaku va ta ka Xitsundzuxu?

¹⁵ Khumbuka swaku lava hi va rhambaka swaku va ya ka Xitsundzuxu, swi nga yendleka ku ni leswi va lavaka ku swi tiva hi ntlhanganu lowu, ngopfungopfu loko va nga se tshama va ya ka mintlhanganu ya hina. Hi xikombiso va nga ha lava ku tiva leswi: ‘Ku yendleka yini ka ntlhanganu lowu? Ma hlwela ku huma? Ni fanele ni yambalisa ku yini? I male muni ku nghena? Ku yendliwa minhlengo?’ Hi mhaka leyo, i swa lisima ku va hi tilulamisela, hi pimisa hi swivutiso leswi  lava hi va rhambaka va nga ha hi yendlaka swona swaku hi kota ku va hlamula. (Kol. 4:6) Hi nga ha tirhisa vhidiyo leli nge Khumbuka Lifu la Yesu kumbe hi tirhisa vhidiyo leli nge Xana Kumaheka Yini Salão do Reino? leswaku hi pfuna munhu swaku a tiva leswi yendliwaka ka mintlhanganu ya hina. Naswona a djondzo 28 la buku leli nge Tikhorisi Hi Wutomi La Ku Kala Li Nga Heli, li ni tipontu leti nga hi pfunaka swaku hi kota ku pfuna vanhu lava. Na hina loko hi rhamba munhu swaku a ya ka Xitsundzuxu, hi nga ha mu vutisa swaku: ‘U ni xivutiso?’ hi gama hi mu hlamula.

16. Hi swini swivutiso leswi lava taka ka Xitsundzuxu va nga ha swi yendlaka?

¹⁶ Loko Xitsundzuxu xi gamile, vanhu lava va ngo sungula ku ta, va nga ha va ni swivutiso swin’wani. Hi xikombiso va nga ha vutisa swaku: ‘Hi mhaka muni van’wani va dlile pawu va tlhela va phuza vhinyu kambe van’wani va nga swi yendlanga leswo?’ kumbe ‘hi mhaka muni ku nga zanga ku va ni munhu lweyi a nga dla pawu kumbe a phuza vhinyu? Kasi n’wina mi khumbuka lifu la Yesu kangani hi lembe? Indjhe mintlhanganu ya n’wina hinkwayu yi tshamise swoleswi?’ Swivutiso leswi swa hlamuliwa ka dixkursu leli vekiwaka hi siku la Xitsundzuxu, kambe swi nga yendleka va ha navela ku tiva swin’wani. Se ku ni nhlokomhaka leyi nga vekiwa site leyi nge “Hikwalaho Ka Yini Timbhoni Ta Yehovha Ti Nga Endli Xilalelo Xa Hosi Ku Fana Ni Tikereke Tin’wana?” (hi Xitsonga) leyi hi nga yi tirhisaka leswaku hi va pfuna ku kuma tinhlamulu ta swivutiso swa vona. A pontu hi leswaku na siku la Xitsundzuxu li nga se fika, hi siku la Xitsundzuxu, ni loko Xitsundzuxu se xi gamile, hi lava ku yendla hinkwaswu leswi hi nga swi kotaka swaku hi pfuna vanhu va timbilu tatinene leswaku va navela ku djondza ntiyiso. — Min. 13:48.

PFUNA LAVA NGA HOLA

17. Hi ku ya hi Ezekiyele 34:12, 16, madoda ma nga va pfunisa ku yini lava nga hola?

¹⁷ Hi nkama wa Xitsundzuxu, madoda ma nga yendla yini swaku ma pfuna lava se va nga hola? Va kombi swaku wa va rhandza. (Lerha Ezekiyele 34:12, 16.) Naswona na Xitsundzuxu  xi nge se fika, va ligareli kumbe u va pfuxela. Tinyikeli swaku u va pfuna loko va lava ku pfuniwa. Va rhambi swaku va ta ka Xitsundzuxu, funtshi loko va ta va yamukeli hi mandla mambirhi. Naswona loko Xitsundzuxu se xi hundzile, tama u bulisana na vona vamakwerhu lava u tlhela u va pfuna swaku va tlhelela ka Yehovha. — 1 Pe. 2:25.

18. Hi ku ya hi Varoma 12:10, hinkwerhu bandleni hi nga va pfunisa ku yini lava nga hola?

¹⁸ Se hinkwerhu ka hina lani bandleni hi nga yendla yini hi siku la Xitsundzuxu swaku hi pfuna lava se i nga khale na va nga ti mintlhanganwini kumbe na va nga chumayeli? Hi nga va yamukela hi lirhandzu, hi va hlonipha hi tlhela hi va khoma hi ndlela yayinene. (Lerha Varoma 12:10.) I swa lisima ku va hi khumbuka swaku swi nga yendleka va pimise kambirhi swaku va ta ka ntlhanganu lowu, swi nga yendleka a va chava swaku loko va ya a va nga ta yamukeliwa. e Se hi nga va hambeni swivutiso kumbe ku va byela minchumu leyi nga ta va yendla va dana kumbe ku va tlhava. (1 Tes. 5:11) Hi fanele hi khumbuka swaku vamakwerhu lava va ha mu rhandza Yehovha ku fana ni leswi na hina hi mu rhandzaka Yehovha. Hinkwerhu hi fanele hi tsaka hi ku va hi li xikan’we leswaku hi dzunisa Yehovha. — Ps. 119:176; Min. 20:35.

19. Hi pfuneka hi yini hi ku khumbuka lifu la Yesu?

¹⁹ Hi mu khensa hintamu Yesu hileswi a nga hi byela swaku hi fanele hi khumbuka lifu la yena lembe ni lembe. Phela ku yendla leswo swi pfuna hina swi tlhela swi pfuna van’wani. (Esa. 48:17, 18) Hi xikombiso, hi tama hi rhandza Yehovha na Yesu. Hi va komba swaku hi swi khensa hintamu leswi va nga hi yendlela swona. Hi kulisa wunghanu la hina ni vamakwerhu, naswona hi pfuna van’wani swaku na vona va kuma minkateko leyi tisiwaka hi mhaka ya lifu la Yesu. Hi mhaka leyo a hi yendleni hinkwaswu leswi hi nga swi kotaka swaku hi lunghekela siku leli la lisima hintamu swinene la lembe.