1. Loko u pimisa hi Yehovha i mpsini swi taka ka mimpimiso ya wena?

 U KE u tinyika nkama wa ku pimisa hi leswi Yehovha a nga tshamisa xiswona? Nkama u vulavulaka na yena hi xikhongelo, u pimisa swaku Yehovha a tshamise ku yini? Phela hambileswi swi kalaka swi nga koteki swaku hi mu vona Yehovha, Bibele li mu tlhamusela hi tindlela ta ku hambanahambana. Bibele li fanisa Yehovha ni “dlambu ni xivhikelo” ni “ndzilu lowu helisaka.” (Ps. 84:11; Heb. 12:29) Funtshi li tlhela li mu fanisa ni ribye leli vitaniwaka safira ni ku phatima ka kwangulatilo. (Eze. 1:26-28) Se ku pimisa hi leswi hinkwaswu swi nga hi yendla hi tivona hi li vatsongo hintamu ka Yehovha swi tlhela swi hi hlamalisa.

2. I mpsini leswi nga ha yendlaka swi hi karhatela ku va vanghanu va Yehovha?

² Leswi hi kalaka hi nga swi koti ku mu vona Yehovha, swi nga hi karhatela ku kholwa swaku yena a hi rhandza hintamu. Phela vanhu van’wani va pimisa swaku Yehovha a nge tshuki a va rhandza hi mhaka ya swilo swa ku biha leswi swi nga va humelela ka wutomi la vona. Swi nga yendleka vanhu lava va titwisaka xileswo va nga zanga va va ni papayi lweyi a nga va hlayisa a tlhela a va wundla hi lirhandzu. Kambe Yehovha wa swi twisisa leswi hi titwisaka xiswona ni swaku minkama yin’wani swi nga hi karhatela ku va vanghanu va yena. Se leswaku a hi pfuna leswaku hi nga titwisi xileswo a tirhisa Bibele swaku a hi byela swaku a ni wumunhu la ku xonga hintamu.

3. Hi mhaka muni hi fanele hi djondza hi lirhandzu la Yehovha?

³ Rito leli li mu tlhamuselaka kahle Yehovha i lirhandzu. (1 Yo. 4:8) A lirhandzu li kombisa leswi Yehovha a nga xiswona. Phela hinkwaswu leswi Yehovha a swi yendlaka, a swi yendla hi lirhandzu. Phela a lirhandzu la Yehovha i likulu hintamu lakakuva a li komba ni vanhu lava kalaka va nga mu rhandzi. (Mat. 5:44, 45) Ka nhlokomhaka leyi, hi ta djondza hi Yehovha ni lirhandzu la yena. A nkama  hi yaka hi djondza swa swinyingi hi Yehovha, hi ta ya hi mu rhandza hintamu.

YEHOVHA A HI RHANDZA HINTAMU

4. U titwisa ku yini hileswi Yehovha a ku rhandzaka? (Vona mufoto.)

⁴ “Yehovha a ni ntwelawusiwana wawukulu.” (Yak. 5:11) Bibele li fanisa Yehovha ni mamani lweyi a mu rhandzaka hintamu n’wana wa yena. (Esa. 66:12, 13) Pimisa hi mamani lweyi a mu hlayisaka hi lirhandzu n’wana wa yena. Loko a vona n’wana wa yena na a rila kumbe na a vavisekile, wa mu baba, a mu barasara a tlhela a vulavula na yena hi rito la le hansi swaku a titwa kahle. Funtshi a yendla leswi a nga swi kotaka swaku a nyika n’wana wa yena leswi a swi lavaka. Phela na hina, loko hi vavisekile hi nga tiyiseka leswaku Yehovha a ta va na hina, hikusa yena a hi rhandza hintamu. Hi xikombiso, buku la Tipisalema 94:19 li li: “Loko ni karhateka swinene, u ni tiyisile u tlhela u ni yendla ni tsaka.”

5. U pfunekisa ku yini hileswi Yehovha a ku rhandzaka?

⁵ Yehovha wa tshembeka. (Ps. 103:8) Yehovha a nge hi tsukuli hambiloko hi tshuka hi phazama hi yendla swilo swa ku biha. Hi xikombiso, Vayisrayele va mu kwatise hintamu Yehovha kambe Yehovha a tame a va komba lirhandzu la ku kala li nga heli vanhu lava va nga tisola hi ku va byela leswi: “U wa lisima hintamu ka mina, wa hlonipheka funtshi na ku rhandza.” (Esa. 43:4, 5) Lirhandzu la Yehovha a li se txintxa. Minkama hinkwayu hi nga tiyiseka hi leswo. Hambiloko hi yendla swihoxo swaswikulu, Yehovha a nga hi tsukuli. Loko hi tisola hi tlhelela ka yena hi ta li kuma lirhandzu la yena la ku kufumela. A hi tshembisa swaku a ta hi “rivalela hi mbilu hinkwayu.” (Esa. 55:7) Bibele li vula swaku loko Yehovha a hi rivalela leswo swa hi “pepisa.” — Min. 3:19.

6. Buku la Zakariya 2:8 li hi djondzisa yini hi Yehovha?

⁶ Lerha Zakariya 2:8. Leswi Yehovha a hi rhandzaka hintamu, wa swi vona loko ku ni swilo leswi swi hi hluphaka naswona minkama hinkwayu a tshama a lunghile swaku a hi pfuna. Loko hi vaviseka na yena wa vaviseka. Hi mhaka leyo, hi nga khongela ka Yehovha na hi tiyiseka swaku wa hi twa, hi ku: “Ni vhikeli ku fana ni tihlo la wena.” (Ps. 17:8) Phela a tihlo li ni wumpsaka hintamu. Hambileswo i la lisima hintamu ka muzimbha wa hina. Hi mhaka leyo, loko Yehovha a hi fanisa ni tihlo la yena, swo fana ni loko a vula leswi: ‘Lweyi a mi hluphaka, n’wina vanhu va mina, a khumba nchumu wa mina wa lisima lowu ni nga na wona.’

7. Hi mhaka muni hi fanele hi tiyiseka swaku Yehovha wa hi rhandza?

⁷ Yehovha a lava swaku u tiyiseka swaku wa ku rhandza. Kambe Yehovha wa swi tiva swaku  a swilo leswi swi nga hi yendlekela khale swi nga hi yendla hi kanakana swaku wa hi rhandza hikakunene. Swiyimu leswi hi kumanaka na swona swoswi swi nga hi yendla hi nga tshembi swaku Yehovha wa hi rhandza hikakunene. Se i yini lexi nga hi tiyisekisaka swaku Yehovha wa hi rhandza? I ku djondza hi ndlela leyi Yehovha a mu rhandzaka hi yona Yesu, vatotiwa na hina hinkwerhu.

YEHOVHA A LI KOMBISISA KU YINI A LIRHANDZU LA YENA?

8. I ntxini lexi a xi tiyisekisa Yesu swaku Papayi wa yena wa mu rhandza?

⁸ Yehovha na Yesu se va hete malembe ya manyingi hintamu na va hanya xikan’we naswona va rhandzana hintamu swinene. Phela a wunghanu leli va nga na lona hi lona la khale hintamu swinene. Funtshi Yehovha a swi kombise hi ku helela leswi a mu rhandzisaka xiswona N’wana wa yena ka buku la Matewu 17:5. Phela ka ndzimana leyi, loko Yehovha a a swi lavile a a ta vula leswi: ‘Lweyi hi lweyi ni mu yamukelaka.’ Kambe ku hambana ni leswo, Yehovha a a lava swaku hinkwerhu hi swi tiva swaku a mu rhandza hintamu N’wana wa yena. Hi mhaka leyo, Yehovha a te: “Lweyi i N’wananga, lweyi ni mu rhandzaka.” Phela Yehovha a a tsaka hintamu hi Yesu, ngopfungopfu hileswi a a ta nyikela hi wutomi la yena. (Efe. 1:7) Naswona Yesu a a nga kanakani swaku Yehovha Papayi wa yena wa mu rhandza. Funtshi a vule hi ku phindhaphindha na a tiyiseka leswaku Papayi wa yena wa mu rhandza. — Yoh. 3:35; 10:17; 17:24.

9. Hi ku ya hi Varoma 5:5 hi wani marito lawa ma kombisaka swaku Yehovha wa va rhandza vatotiwa? Tlhamusela!

⁹ Yehovha a tlhela a kombisa swaku wa va rhandza vatotiwa. (Lerha Varoma 5:5.) Ndzimana leyi yi tirhisa marito lama nge ku ‘hi nyika moya wa ku kwetsima.’ Buku lin’wani loko li tlhamusela marito lawa li li “o hi chululela a moya wa ku kwetsima ku fana ni nambu.” Marito lawa ma li kombisa kahle lirhandzu lalikulu leli Yehovha a li kombaka vatotiwa! Vatotiwa va swi tiva kahle swaku Yehovha wa va rhandza. (Yud. 1) Loko a kombisa ndlela leyi vatotiwa va titwaka hi yona, mupostolo Yohani a tsale leswi: “Hi nga vonani leswi Papayi a nga hi rhandzisa xiswona, hi za hi vitaniwa vana va Xikwembu!” (1 Yo. 3:1) Indjhe a lirhandzu la Yehovha lo gamela ka vatotiwa? Nada! Yehovha a swi kombisile swaku wa hi rhandza hinkwerhu.

10. Hi wini nchumu wawukulu lowu Yehovha a nga ku yendlela wona wu kombisaka swaku wa ku rhandza?

¹⁰ Hi wini nchumu wa wukulu hintamu lowu kombisaka swaku Yehovha wa hi rhandza? I nkutsulu! Phela a ku na nchumu xa lisima lexi hi nga tshama hi nyikiwa xona ku tlula nkutsulu. (Yoh. 3:16; Rom. 5:8) Yehovha a hi nyike N’wana wa yena lweyi a mu rhandzaka hintamu swaku a ta hi fela leswaku hi rivaleliwa swidjoho swa hina hi tlhela hi va vanghanu va yena. (1 Yo. 4:10) Phela nkama lowu hi yaka hi pimisa hi leswi Yehovha na Yesu va nga hi yendlela swona hi ta ya hi swi twisisa swaku Yehovha a mu rhandza hintamu mun’wani ni mun’wani ka hina. (Gal. 2:20) Yehovha a nga hi nyikanga nkutsulu hileswi a nga lulama ntsena, kambe a yendle leswo hi mhaka ya leswi a hi rhandzaka. Phela a hi rhandza hintamu lakakuva a hi nyike nchumu wa lisima hintamu swinene lowu a nga na wona, ku nga N’wana wa yena Yesu. Yehovha a pfumelele N’wana wa yena swaku a ta misaveni a ta hlupheka a tlhela a hi fela.

11. Hi djondza yini ka buku la Yeremiya 31:3?

¹¹ Hi lani se hi nga swi vona hi kona, Yehovha a ngo hi rhandza ntsena kambe a tlhela a hi byela leswaku wa hi rhandza. (Lerha Yeremiya 31:3.) Yehovha a yendle swaku hi mu tiva hi mhaka ya leswi a hi rhandzaka. (Vona ni Deteronoma 7:7, 8.) A ku na nchumu hambi munhu lweyi a nga swi kotaka ku hi hambanisa ni lirhandzu leli. (Rom. 8:38, 39) Se u titwisa ku yini hileswi Yehovha a ku rhandzaka? Lerha Tipisalema 23, nkama lowu u lerhaka vona leswi Davhida a nga titwisa xiswona hi lirhandzu la Yehovha u gama u vona swaku wena u titwisa ku yini hi lona.

 U TITWISA KU YINI HILESWI YEHOVHA A KU RHANDZAKA?

12. Buku la Tipisalema ndzima 23 li vulavula hi yini?

¹² Lerha Tipisalema 23:1-6. Tipisalema ndzima 23, i lisimu leli Davhida a nga li yendla kuva a kombisa leswaku wa tiyiseka swaku Yehovha wa mu rhandza naswona wa mu hlayisa. Ka ndzima leyi, Davhida a kombisa a wunghanu lalikulu leli a nga na lona ni Murisi wa yena Yehovha. Phela Davhida a a titwa a vhikelekile hileswi a a pfumelela Yehovha swaku a mu kongomisa naswona a a mu tshemba hintamu Yehovha. Davhida a a swi tiva swaku minkama hinkwayu Yehovha a ta mu komba lirhandzu la yena. Kambe i mpsini leswi a swi tiyisekisa Davhida hi swilo leswo?

13. I yini lexi a xi tiyisekisa Davhida swaku Yehovha a ta mu hlayisa?

¹³ “A ni nge pfumali nchumu.” Davhida a a swi vona swaku Yehovha wa mu hlayisa hi leswi a a mu nyika leswi a a swi lava. Davhida a tikhorisile hi wunghanu la ku kufumela na Yehovha naswona a a swi tiva swaku Yehovha wa mu yamukela. Se leswo a swi mu yendla a tiyiseka swaku ku nga na mhaka swilo leswi a swi ta yendleka ka nkama lowu taka, Yehovha a a ta tama a mu hlayisa a tlhela a mu nyika leswi a swi lavaka. Leswi Davhida a a tshemba lirhandzu la Yehovha ku tlula ku karhateka hi swikarhatu leswi a a kumana na swona, a tame a tsaka a tlhela a titwa na a nga pfumali nchumu. — Ps. 16:11.

14. Yehovha a nga hi hlayisisa ku yini?

¹⁴ Yehovha wa hi hlayisa hi lirhandzu ngopfungopfu loko hi humeleliwa hi swilo swa ku biha ka wutomi la hina. Makwerhu Claire, a lweyi a nga tirha Betele ku tlula 20 wa malembe a tsemeke nhlana hikusa a a nga swi tivi swaku a a ta yendla yini leswaku a pfuna ndjangu wa yena lowu a wu kumana ni swikarhatu swa ku landzelelana. Hi  xikombiso, papayi wa yena a biwe hi mavabyi ya ku karhata hintamu, mun’we wa vamakwenu va yena va xisati a susiwe bandleni naswona ndjangu wa yena wu luzekeliwe hi negosiyu ni yindlo ya wona. Se Yehovha a yendle yini swaku a pfuna ndjangu lowu? Makwerhu Claire a li: “Siku ni siku Yehovha a a nyika ndjangu wa mina leswi a wu swi lava. Nkama ni nkama, Yehovha a a hi nyika swilo leswi a hi nga swi pimisi swaku hi nga tshuka hi va na swona!” Makwerhu Claire a tlhela a vula leswi: “Ni tolovela ku pimisa hi leswi Yehovha a nga swi yendla swaku a hi pfuna naswona ni nge tshuki ni swi rivala. Leswo swi ni pfuna ku tama ni tirhela Yehovha na ni tsakile loko ni kumana ni swikarhatu ka wutomi la mina.”

15. I yini lexi a xi yendla swaku Davhida a va ni matimba? (Vona mufoto.)

¹⁵ “A ni nyika matimba.”  Minkama yin’wani Davhida a a karhateka hi mhaka ya swikarhatu leswi a a kumana na swona. (Ps. 18:4-6) Hambileswo, Davhida a a tama a va ni matimba hileswi Yehovha a a mu rhandza a tlhela a mu hlayisa. Yehovha a a humulisa munghanu wa yena Davhida lweyi a a karhatekile ka tindhawu leti nga ni “byanyi la linyingi” funtshi a a mu yisa ka tindhawu ta ku humula ka tona “leti regariwaka kahle.” Hi mhaka leyo, Davhida a a tiyisiwa a tlhela a tama a tirhela Yehovha na a tsakile. — Ps. 18:28-32.

16. Lirhandzu la Yehovha li ku pfunise ku yini?

¹⁶ Na hina namuntlha, hambiloko hi kumana ni swikarhatu ka wutomi la hina, swona ‘a swi hi helisi hi mhaka ya lirhandzu la Yehovha.’ (Swir. 3:22; Kol. 1:11) Hi xikombiso, vona leswi nga yendlekela makwerhu Rachel. Makwerhu lweyi a tsemeke nhlana nkama nuna wa yena a nga mu tshika a tlhela a tshika na Yehovha hi nkama wa mavabyi ya korona. Se Yehovha a mu yendlele yini makwerhu lweyi? Yena a li: “Yehovha a ni tiyisekisile swaku wa ni rhandza. A ni nyike vanghanu lava va nga heta nkama na mina, va dla na mina, va ni posela mamensajem lawa ma nga ni tiyisa, va hleka na mina va tlhela va ni khumbukisa swaku Yehovha wa ni hlayisa. Phela minkama hinkwayu na mu khensa Yehovha hi leswi a nga ni nyika ndjangu lowu wu ni rhandzaka hintamu.”

17. Hi mhaka muni Davhida a a nga “chavi nchumu”?

¹⁷ “A ni chavi nchumu xa ku biha, hikusa wena u na mina.” Wutomi la Davhida a li li nghozini funtshi a a ni valala va matimba swinene. Hambileswo, lirhandzu la Yehovha li mu yendle a titwa a vhikelekile. Phela Davhida a a titwa a li kusuhi na Yehovha ka xiyimu xin’wani ni xin’wani naswona leswo swi mu tiyisile. Hi mhaka leyo, a yimbelelile a ku: “[Yehovha] a ni ponisile ka ku chava ka mina hinkwaku.” (Ps. 34:4) Hambileswi minkama yin’wani Davhida a a chava hintamu, a a tiyiseka swaku a ta ku hlula ku chava ka yena hikusa a a swi tiva swaku Yehovha a mu rhandza hintamu.

18. Ku tiyiseka swaku Yehovha wa ku rhandza swi ku tiyisisa ku yini loko u chava?

¹⁸ Ku tiva swaku Yehovha wa hi rhandza swi nga  hi tiyisisa ku yini loko hi kumana ni swikarhatu? Makwerhu Susi lweyi a nga mupfuli wa ndlela a vule leswi yena ni nuna wa yena va nga titwisa xiswona nkama djaha la vona li nga tisunga. Vona va te: “Loko u humeleliwa hi swilo swa ku biha ka wutomi la wena swi nga ku yendla u vaviseka hintamu. Kambe lirhandzu la Yehovha li hi yendle hi titwa kahle hi tlhela hi swi vona swaku wa hi vhikela.” Kasi makwerhu Rachel lweyi se hi nga bula hi yena a te: “Siku lin’wani niwusiku, ni twe ku vava hintamu swinene ambilwini naswona a ni karhatekile ni tlhela ni chava hintamu. Hi mhaka leyo, ni sungule ku khongela ka Yehovha ni mu kombela swaku a ni pfuna. Hi nkama wolowo Yehovha a ni rhulise mbilu, ku fana ni leswi mamani a swi yendlelaka n’wana wa yena. Naswona ni kote ku kuma wurhongo ni yetlela. Phela ni nge tshuki ni swi khohlwile leswo.” Kasi Makwerhu Tasos lweyi a nga doda, a tshame djele 4 wa malembe hi mhaka ya leswi a a yala ku ya nyimpini. Se yena ke, a swi vonise ku yini swaku Yehovha wa mu rhandza? Yena a li: “Yehovha a a ni hlayisa a ni nyika hinkwaswu leswi ni swi lavaka. Leswo swi ni yendle ni tiyiseka swaku minkama hinkwayu ni nga mu tshemba. Naswona hi ku tirhisa moya wa yena wa ku kwetsima, Yehovha a yendle leswaku ni tama ni tsaka hambileswi ku va djele a swi ni yendla ni vaviseka. Leswo swi ni pfune ku vona swaku loko ni tama ni mu tshemba Yehovha ni ta tama ni swi vona swaku wa ni rhandza. Hi mhaka leyo, ni sungule ku va mupfuli wa ndlela wa nkama hinkwawu na ni li djele.”

TSHINELA KA XIKWEMBU XA LIRHANDZU

19. a) Ku tiva swaku Yehovha wa hi rhandza swi fanele swi hi yendla hi khongelisa ku yini ka yena? b) I ntxini lexi ku khumbaka hintamu ka leswi Yehovha a ku kombisisaka xiswona lirhandzu? (Vona kwadru leli nge: “ Tindzimana Leti Hi Pfunaka Ku Vona Swaku Yehovha Wa Hi Rhandza.”)

¹⁹ Hinkwaswu leswi se hi nga swi djondza swi swi kombise kahle swaku Yehovha “Xikwembu xa lirhandzu,” a na hina! (2 Ko. 13:11) Yena a rhandza mun’wani ni mun’wani wa hina. Hi nga tiyiseka swaku ‘wa hi rhandza.’ (Ps. 32:10) Nkama lowu hi yaka hi pimisa hi leswi Yehovha a swi yendlaka swaku a hi komba swaku wa hi rhandza hi ta ya hi swi vona swaku impela minkama hinkwayu Yehovha wa hi hlayisa naswona wunghanu la hina na yena li ta ya li tiya. Hi nga tshinela ka yena hi xikhongelo na hi nga chavi, hi mu byela hinkwaswu leswi swi hi karhataka, hi tlhela hi mu byela swaku hi swi lava hintamu swaku a hi komba a lirhandzu la yena na hi tiyiseka swaku yena wa hi twisisa funtshi a swi lava hintamu ku hi pfuna. — Ps. 145:18, 19.

20. Lirhandzu la Yehovha li swi kotisa ku yini ku hi tshineta ka yena?

²⁰ Ku fana ni leswi hi swi lavaka hintamu ku worha ndzilu hi siku la xirhami swaku hi ku kufumela, ni lirhandzu la Yehovha li tshamise xileswo. Hi swi lava hintamu ku kufumetiwa hi lona. Naswona lirhandzu la Yehovha i likulu hintamu swinene. Hi mhaka leyo, pfumelela Yehovha a ku kufumeta hi lirhandzu la yena ka wutomi la wena. Naswona onge hinkwerhu hi nga vula leswi: “Na mu rhandza Yehovha.” — Ps. 116:1.