1-2. Hi swini swikarhatu leswi vanhu va Yehovha va nga ha kumanaka na swona?

 WUTOMI la hina li nga ha txintxa swa kola na kola loko swilo swa ku biha swi yendleka. Hi xikombiso, makwerhu mun’wani wa ku tshembeka lweyi a vitaniwaka Luis a a tsumbule swaku a a ni kankru la ku karhata funtshi dotori a mu byele leswaku a yo saleliwa hi tiwheti tatitsongo swaku a fa. Monika ni nuna wa yena a va tirhela Yehovha, kambe siku lin’wani Monika a tsumbule leswaku nuna wa yena lweyi a a li doda se a a ni malembe ya manyingi na a hanya hi xidjoho a xihundleni. Olivia, ku nga makwerhu lweyi kalaka a nga chadanga, a boheke ku suka kaya ka yena hikusa a ku ni xidzedze xa matimba lexi a xi ta. Nkama a nga tlhela kaya a kume swaku xidzedze a xi hohlote munti wa yena. Hi nkamanyana, wutomi la vamakwerhu lava li txintxile swa kola na kola. Ku nga va swaku na wena u tshama u humeleliwa hi swikarhatu leswi swi nga yendla leswaku wutomi la wena li txintxa swa kola na kola?

² Hambileswi hi tirhelaka Yehovha hi kumana ni swikarhatu leswi vanhu van’wani va kumanaka na swona. Handle ka leswo, vanhu lava va hi nyenyaka va nga hi poyila va tlhela va hi hlupha. Phela Yehovha a nga ta hi vhikela ka swilo leswo hinkwaswu, kambe a tshembisa ku hi pfuna. (Esa. 41:10) Phela hi ku pfuniwa hi yena hi nga tama hi tsaka, hi yendla swiboho swaswinene hi tlhela hi tshembeka ka yena hambiloko hi kumana ni swikarhatu. Hi mhaka leyo, ka nhlokomhaka leyi hi ta vona 4 wa swilo leswi Yehovha a swi yendlaka swaku a hi pfuna loko hi kumana ni swikarhatu naswona hi ta vona swaku hi nga yendla yini swaku hi pfuneka hi swilo leswi Yehovha a hi yendlelaka swona loko hi kumana ni swikarhatu.

YEHOVHA A TA KU VONELELA

3. Loko hi kumana ni swikarhatu i mpsini leswi nga hi karhatelaka ku swi yendla?

³ Xikarhatu. Loko hi kumana ni swikarhatu swaswikulu ka wutomi la hina, nhloko ya hina yi nga ha hisa, yi tlhanya, hi nga xi tivi  xa ku xi yendla, swi hi karhatela ku pimisa kahle ni ku yendla swiboho swaswinene. Leswo swi yendleka hikusa loko minchumu ya ku biha yi hi yendlekela hi twa ku vava hintamu. Hi xikombiso vamakwerhu lava hi nga vulavula hi vona, na vona swi va yendlekelile leswo. Makwerhu Olivia a li: “A nkama xidzedze xi nga hahlula yindlo ya mina ni twe ku vava hintamu swinene ni xa ku xi yendla ni nga xi tivi.” Makwerhu Monika lweyi a nga tsumbula swaku nuna wa yena a a tshamela ku yendla xidjoho a li: “Phela ni tshoveke mbilu nkama ni nga tiva leswo. A swi fana ni loko ni tlhaviwa hi xikhwa xi ni vavisa hintamu, ni swaku ni ta ku yini a ni nga swi tivi. A ni nga swi nyimelanga swaku swilo leswi swi nga ni yendlekela.” Na hina ku fana ni vamakwerhu lava swi nga yendleka hi tshuka hi titwisa xileswo, kambe lexi tsakisaka hi leswaku Yehovha a ta hi pfuna.

4. Hi ku ya hi Vafilipiya 4:6, 7, i mpsini leswi Yehovha a hi tshembisaka ku hi yendlela swona?

⁴ Leswi Yehovha a swi yendlaka swaku a hi pfuna. Yehovha a hi tshembisa swaku a ta hi nyika “ku rhula.” (Lerha Vafilipiya 4:6, 7.) Ku rhula koloko ku yendla swaku hi tshama hi pepile, timbilu ta hina ni mimpimiso ya hina swi tshama swi rhulile hileswi hi nga ni wunghanu lalikulu na Yehovha. Phela ku rhula koloko ku tlula “ku twisisa hinkwaku.” Leswo swi vula swaku ku rhula loku i kukulu hintamu swinene naswona mimpimiso ya hina yi nge ku twisisi. Indjhe u tshama u titwa u rhulile hintamu ndzhaku ka loko u khongelile ka Yehovha hi mbilu hinkwayu? Loko u tshame u titwa hi ndlela leyo u ku twile “ku rhula” loku Yehovha a hi nyikaka kona.

5. Ku rhula loku Yehovha a hi nyikaka kona ku yi vonelelisa ku yini mimpimiso ya hina ni mbilu ya hina?

⁵ A marito lawa ma nga ka Vafilipiya 4:7 ma tlhela ma kombisa swaku a ku rhula ka Xikwembu ku ta ‘vonelela timbilu ta hina ni mimpimiso ya hina.’ A rito leli nge ku “vonelela” leli li nga tirhisiwa lani, a li kombetela ka masonchwa lawa a ma vonelela doropa swaku li nga dumeliwi. Vanhu lava a va tshama ka doropa a va yetlela na va rhulile va nga karhateki hi nchumu hikusa a va swi tiva swaku ka tinyanghwa ta doropa ku ni masonchwa lawa ma li vonelelaka. Hi ku fana, na hina loko hi kumana ni swiyimu swa ku karhata a ku rhula ka Xikwembu ku ta vonelela timbilu ta hina ni mimpimiso ya hina, ku yendla leswaku hi pepa hi nga karhateki hintamu. (Ps. 4:8) Funtshi hambiloko xiyimu lexi hi kumanaka na xona xo kala xi nga txintxi ku fana ni leswi swi nga yendlekela Ana aminkameni ya khale, hi ta pepa hi ndzeni ka mbilu hi nga karhateki hintamu. (1 Sa. 1:16-18) Funtshi leswo hi swona swi nga ta hi pfuna swaku hi pimisa kahle hi tlhela hi yendla swiboho swaswinene.

6. Hi nga yendla yini swaku hi va ni ku rhula loku Yehovha a hi nyikaka kona? (Vona mufoto.)

⁶ Leswi hina hi faneleke hi swi yendla. Loko u kumana ni swikarhatu vitana Yehovha swaku a ku pfuna. U nga swi yendlisa ku yini leswo? Hi ku va u khongela ka Yehovha anze a ku nyika ku rhula. (Luk. 11:9; 1 Tes. 5:17) Luis, lweyi hi nga bula hi  yena ku sunguleni a vula leswi nga pfuna yena ni nsati wa yena Ana nkama va nga tiva swaku a ku chota tiwheti tatitsongo hintamu swaku Luis a fa. Yena a li: “Hi nkama wolowo, a swi hi karhatela hintamu ku yendla swiboho swa ku ni ta dahisiwa ku yini ni swin’wani. Kambe leswi a hi khongela, Yehovha a hi nyike ku rhula.” Luis ni nsati wa yena va vula swaku a va khongela ka Yehovha nkama ni nkama hi mbilu hinkwayu va mu kombela swaku a va nyika ku rhula va tlhela va kota ku yendla swiboho swaswinene. Phela va mu vonile Yehovha loko a va pfuna. Loko na wena u kumana ni swikarhatu tama u khongela ka Yehovha, u ta swi vona swaku Yehovha a ta ku pfuna hi ku ku nyika ku rhula loku nga ta vhikela mbilu ni mimpimiso ya wena. — Rom. 12:12.

YEHOVHA A TA KU YENDLA U TIYA U NGA TSEKATSEKI

7. Hi nga titwisa ku yini loko hi kumana ni swikarhatu?

⁷ Xikarhatu. Loko u kumana ni xikarhatu xa ku tika hintamu u nga ha karhateka u tlhela u yendla minchumu ya ku a wu nga ta yi yendla loko a wu titwa kahle kumbe u pimisa kahle. Ku fana ni boti leli kumanaka ni xidzedze a xikarhi ka lwandle naswona li biwaka hi magandlati li ya hala ni hala, na hina minkama yin’wani hi nga ha karhateka hintamu ni xa ku xi yendla hi nga xi tivi. Hi leswo Ana a nga titwisa xiswona nkama a nga feliwa hi nuna wa yena Luis. Yena a hlaye leswi: “A ni titwa na ni li noxe. A ni vaviseka hileswi nuna wa mina a nga fa.” Xin’wani lexi nga yendla Ana a karhateka hintamu hi leswaku a a fanele a yendla swiboho leswi a a swi tiva swaku loko a ko va Luis a a ta swi yendla kahle. Minkama yin’wani, Ana a a titwa ku fana ni boti leli biwaka hi magandlati li ya hala hi hala. Indjhe na wena u tshuka u titwisa xileswo? I mpsini leswi Yehovha a nga swi yendlaka swaku a hi pfuna leswaku hi nga titwisi xileswo?

8. Hi ku ya hi buku la Esaya 33:6, i mpsini leswi Yehovha a hi tiyisekisaka swona?

⁸ Leswi Yehovha a swi yendlaka swaku a hi pfuna. Yehovha a hi tiyisekisa swaku a ta va na hina, a hi tiyisa leswaku hi nga tsekatseki. (Lerha Esaya 33:6.) Loko boti li kumana ni xidzedze amatini, li nga ha sungula ku biwa hi magandlati li ya hala ni hala. Kambe leswaku li nga mbombomeli ku vekiwa swilo a hansi ka boti leswi swi li yendlaka swaku hambiloko li biwa hi magandlati li nga mbombomeli. Leswo swi tlhela swi yendla swaku vanhu lava va nga ndzeni ka lona va yendza na va vhikelekile va tlhela va nga swi twi hintamu swaku boti li biwa hi magandlati. Hambileswo, leswaku swilo leswi vekiwaka ka boti swi li pfuna leswaku li nga mbombomeli, a boti li fanele li tama li famba. Hi lani ku fanaka, Yehovha a ta hi pfuna swaku hi tama hi tiya hi nga tsekatseki loko hi tama hi mu tirhela hi ku tshembeka hambiloko hi kumana ni swikarhatu.

9. Swilo swa ku hamba hi swona pexkiza swi nga hi pfunisa ku yini swaku hi tiya hi nga tsekatseki? (Vona mufoto.)

⁹ Leswi hina hi faneleke hi swi yendla. Loko u kumana ni swikarhatu swaswikulu leswi fanaka ni xidzedze xaxikulu lexi baka lwandle, tama u khongela, u ya mintlhanganwini u tlhela u ya nsin’wini.  Naswona khumbuka swaku Yehovha wa swi twisisa swaku loko u karhatekile a wu nga ta swi kota ku yendla swilo leswi, ku fana ni leswi a wu ta swi yendlisa xiswona loko a wu li kahle. (Vona ni Luka 21:1-4.) Tinyiki nkama wa ku va ni djondzo ya wena wexe ya Bibele u tlhela u gayela hi leswi u swi djondzaka, hikusa Yehovha a nga tirhisa swona swaku a ku pfuna. Se hi kwini lani u nga kumaka swilo leswi nga ta ku pfuna? U nga ha swi kuma ka aplikativhu la JW Library^®, ka Nkongomiso Wa Ku Yendla Pexkiza Wa Timboni Ta Yehovha kumbe ka Índice das Publicações da Torre de Vigia. Ka tindhawu leti, u nga pexkizara minchumu leyi nga ta ku pfuna swaku u nga karhateki hintamu loko u kumana ni swikarhatu. Hi xikombiso, Monika lweyi se hi nga vulavula hi yena, a hambe mapexkiza nkama a nga vona leswaku leswi a a kumana na swona a swi mu yendla a karhateka. Monika a kambele tinhlokomhaka leti vulavulaka hi ku kwata, ku tshembeka ni leti vulavulaka hi leswi hi nga swi yendlaka loko munhu a nga tshembeki ka hina. Monika a vula leswi: “A ku sunguleni a nkama a ni hamba mapexkiza a ni karhatekile hintamu. Kambe loko ni tama ni djondza a ni gama ni rhula. A ni swi vona swaku Yehovha wa ni twisisa funtshi a ni mu vona loko a ni pfuna.” Leswi Yehovha a nga swi yendlela Monika na wena a nga ku yendlela, a ku pfuna swaku u tiya u nga tsekatseki hambiloko u kumana ni swikarhatu. — Ps. 119:143, 144.

YEHOVHA A TA KU PFUNA

10. Hi nga titwisa ku yini loko se hi humeleliwe hi swikarhatu swaswikulu hintamu?

¹⁰ Xikarhatu. Loko hi humeleliwe hi xikarhatu xaxikulu, minkama yin’wani hi nga ha hela ntamu, hi godola, ni ku navela ku yendla nchumu hi nga swi lavi. Phela hi nga fana ni munhu lweyi a a tsutsuma hintamu kambe swoswi a khwitaka hileswi a nga tivavisa. Na hina swi nga hi karhatela ku yendla swilo leswi a hi swi yendla khale kumbe hi nga swi naveli ku yendla minchumu leyi khale a hi yi rhandza hintamu. Ku fana na muprofeta Eliya hi nga ha titwa hansi, hi hela ntamu, lexi hi xi lavaka ku li ku yetlela ntsena. (1 Tih. 19:5-7) Kambe i mpsini leswi Yehovha a swi yendlaka swaku a hi pfuna loko hi titwisa xileswo?

11. Hi ku ya hi Tipisalema 94:18 hi yini ndlela yin’wani leyi Yehovha a yi tirhisaka swaku a hi pfuna?

¹¹ Leswi Yehovha a swi yendlaka swaku a hi pfuna. Yehovha a tshembisa leswaku a ta hi pfuna. (Lerha Tipisalema 94:18.) Ku fana ni leswi mutsutsumi lweyi a nga tivavisa a lavaka munhu mun’wani swaku a mu pfuna na hina hi lava ku pfuniwa leswaku hi tama hi tirhela Yehovha. Se i mani lweyi a nga ta hi pfuna? Yehovha hi yexe wa hlamula. Yena a hlaya leswi: “Mina, Yehovha Xikwembu xa wena, ni khoma voko la wena la xinene, Lweyi a ku byelaka a ku: ‘U nga chavi. Ni ta ku pfuna.’” (Esa. 41:13) Davhida a mu vonile Yehovha  loko a mu seketela ka swikarhatu swa ku hambanahambana leswi a nga kumana na swona loko valala va yena va lwa na yena. Yena a vule leswi hi Yehovha: “Voko la wena la xinene la ni seketela.” (Ps. 18:35) Se na hina, Yehovha a ta hi seketela minkama hinkwayu. Kambe a ta hi seketelisa ku yini?

12. I vamani lava Yehovha a nga va tirhisaka swaku va hi pfuna loko hi hele ntamu?

¹² Yehovha a tlhela a hi tiyisa hi ku tirhisa vanhu van’wani swaku va hi pfuna. Hi xikombiso, nkama Davhida a a karhateke hintamu munghanu wa yena Yonatani a mu yendzelile swaku a ya mu tiyisa a tlhela a mu pfuna. (1 Sa. 23:16, 17) Naswona Yehovha a tirhise Elixa swaku a pfuna Eliya. (1 Tih. 19:16, 21; 2 Tih. 2:2) Namuntlha, Yehovha a nga ha tirhisa maxaka ya hina, vanghanu va hina kumbe madoda swaku ma hi pfuna. Kambe hambileswo, loko hi karhatekile hintamu minkama yin’wani hi nga lava ku tshama hi li hoxe. Ku titwisa xileswo a swi bihanga. Swoswi, a hi voneni leswi hi nga swi yendlaka swaku hi pfuneka ka leswi Yehovha a hi yendlelaka swona swaku a hi tiyisa loko hi kumana ni swikarhatu.

13. I mpsini leswi hi faneleke hi swi yendla swaku Yehovha a hi pfuna? (Vona mufoto.)

¹³ Leswi hina hi faneleke hi swi yendla. U nga tihambanisi ni vanhu van’wani. Phela loko hi tihambanisa ni vanhu van’wani, hi ta tshamela ku pimisa hi hina ntsena ni swikarhatu leswi hi kumanaka na swona, hi tlhela hi nga yendli swiboho swaswinene. (Swiv. 18:1) I ntiyiso swaku minkama yin’wani hi nga ha lava ku tshama hoxe, ngopfungopfu loko ku humelele nchumu lexi nga hi vavisa hintamu. Kambe a hi fanelanga hi tolovela ku tshama na hi li hoxe, hi fambela kule ni vanhu van’wani. Hi mhaka Yehovha a nga ha tirhisa maxaka ya hina, madoda kumbe van’wani leswaku va hi pfuna. Se loko hi fambela kule ni vanhu lava, swi ta hi karhatela ku vona Yehovha loko a hi pfuna. Hi mhaka leyo hambiloko swi karhata hintamu u nga fambeli kule ni vanhu van’wani. Va voni na va li ndlela leyi Yehovha a yi tirhisaka swaku a ku pfuna. — Swiv. 17:17; Esa. 32:1, 2.

YEHOVHA A TA KU TIYISA

14. Hi swini swilo swa ku chavisa leswi swi nga hi humelelaka?

¹⁴ Xikarhatu. Minkama yin’wani hi nga ha kumana ni swiyimu leswi nga hi yendlaka hi chava hintamu. Bibele li vulavula hi vanhu va ku tshembeka lava a va tirhela Yehovha lava va nga vula swaku minkama yin’wani a va kumana ni swiyimu leswi a swi va yendla va chava hintamu hi mhaka ya valala va vona kumbe hi mhaka ya swikarhatu swin’wani. (Ps. 18:4; 55:1, 5) Hi ku fana, na hina minkama yin’wani hi nga ha kumana ni swiyimu swa ku karhata hileswi hi tirhelaka Yehovha swa  ku fana ni ku hluphiwa ni ku nyenyiwa hi lava hi djondzaka na vona xikola, hi lava hi tirhaka na vona, hi mindjangu ya hina kumbe hi mimfumu. Naswona swi nga yendleka hi chava ku fa hi mhaka ya mavabyi ya ku karhata lawa hi kumanaka na wona. Phela loko leswo swi hi yendlekela hi nga ha hela ntamu ni xa ku xi yendla hi nga xi tivi, ku fana ni n’wana loko a kumana ni swiyimu swa ku chavisa. Kambe i mpsini leswi Yehovha a swi yendlaka swaku a hi pfuna loko swilo leswo swi hi yendlekela?

15. Ka Tipisalema 94:19, i mpsini leswi Yehovha a hi tiyisekisaka hi swona?

¹⁵ Leswi Yehovha a swi yendlaka swaku a hi pfuna. Yehovha wa hi tiyisa a tlhela a hi thova. (Lerha Tipisalema 94:19.) Hi xikombiso, a hi nge ku ni xin’wanani lexi nga yetlela, se niwusiku ku sungula ku ba tilu. Xi chava ni wurhongo xi nga ha li kumi. Kambe papayi wa xona a xi khoma a xi veka ka mandla ya yena, a xi baba, se hi kutsongokutsongo xi sungula ku yetlela. Phela hi leswo Yehovha a swi yendlaka ka hina. Loko hi kumana ni swikarhatu swaswikulu leswi hi tsonaka wurhongo, yena wa hi khoma, a hi pfuna leswaku ku karhateka loku hi nga na kona hi kutsongokutsongo ku hundza. A swi yendlisa ku yini leswo? A hi swi voneni.

16. Hi nga yendla yini swaku Yehovha a hi tiyisa? (Vona mufoto.)

¹⁶ Leswi hina hi faneleke hi swi yendla. Heta nkama wa wunyingi na Yehovha hi ku khongela u tlhela u lerha Bibele. (Ps. 77:1, 12-14) Phela loko u yendla leswo, nchumu wa ku sungula lowu u nga ta wu yendla loko u kumana ni swikarhatu, ku ta va ku tsutsuma u ya ka Yehovha u mu kombela swaku a ku pfuna. Byela Yehovha swikarhatu leswi u kumanaka na swona u tlhela u mu byela leswi u titwisaka xiswona. Pfumelela Yehovha a bula na wena a tlhela a ku tiyisa hi ku tirhisa Bibele. (Ps. 119:28) Phela swi nga yendleka nkama lowu u lerhaka Bibele u kuma swilo leswi swi nga ta ku pfuna hi ku kongoma loko u kumana ni swiyimu leswi ku yendlaka u chava. Hi xikombiso, u nga tiyisiwa loko u lerha buku la Yobo, Tipisalema, Swivuriso ni ku lerha marito ya Yesu lawa ma nga ka Matewu ndzima 6. Phela loko u tinyika nkama wa ku khongela u bula ni Papayi wa wena Yehovha u tlhela u lerha Bibele, u ta swi vona swaku Yehovha a na wena loko u kumana ni swikarhatu.

17. Hi fanele hi tiyiseka hi yini?

¹⁷ Se a hi tiyisekeni swaku Yehovha a ta va na hina loko hi kumana ni swikarhatu. A nge tshuki a hi tshika. (Ps. 23:4; 94:14) Yena a tshembisa leswaku a ta hi vonelela, a ta hi pfuna funtshi a ta hi tiyisa. Loko yi vulavula hi Yehovha, Esaya 26:3 yi li: “U ta vhikela lava ku tshembaka hi mbilu hinkwayu; u ta va nyika ku rhula nkama ni nkama, hikusa va tshemba wena.” Se tshemba Yehovha minkama hinkwayu funtshi tirhisa hinkwaswu leswi Yehovha a nga swi lulamisela swaku a ku pfuna. Loko u yendla leswo, hambiloko u kumana ni swikarhatu swa ku tika hintamu, minkama hinkwayu u ta va ni ntamu wa ku swi tiyiselela.