1. I mpsini leswi vanhu va vanyingi namuntlha va nga ni mhaka na swona?

 SWI nga yendleka se u swi vonile swaku vanhu va ku tala namuntlha a va na mhaka ni munhu kambe vo va ni mhaka na vona vinyi. Hi xikombiso, va peta swilo ka ma redes sociais leswaku va tikombekisa ka van’wani va tlhela va va bombisela hi leswi va nga na swona kumbe leswi se va nga swi yendla; kambe a va mu dzunisi Yehovha Xikwembu. Ka nhlokomhaka leyi hi ta djondza swaku swi vula yini ku dzunisa Yehovha ni swaku i mpsini swi faneleke swi hi yendla hi mu dzunisa. Hi ta tlhela hi vona leswaku hi nga yendla yini swaku hi dzunisa Yehovha ni swaku Yehovha a ta li dzunisisa ku yini vito la yena ka nkama lowu taka.

SWI VULA YINI KU DZUNISA YEHOVHA?

2. I mpsini leswi Yehovha a nga swi yendla ka Ntshava ya Sinayi leswi kombisaka swaku swa mu fanela ku dzunisiwa? (Vona mufoto.)

² Bibele li kombisa leswaku Yehovha i Xikwembu lexi nga tlakuka lexi faneliwaka hi ku dzunisiwa. Nkama Yehovha a wa ha ku humesa Vayisrayele ka wukarawa aGibita, a yendle swilo swa ku hlamalisa leswi nga va komba swaku swa mu fanela ku dzunisiwa. Pimisa hi leswi nga yendleka: Vayisrayele a va ye ka Ntshava ya Sinayi leswaku va ya twa leswi Yehovha a a lava ku va byela swona, se rhefu la ku mphuma li mbhonya ndhawu leyi a va li ka yona, misava yi sungula ku tsekatseka naswona swi nga yendleka ni Ntshava yi sungule ku bulukela; se va twa ku dzindza ka tilo, loko va txuvuka a va vona ku hatima atilweni naswona a va twa guwa la ku chayiwa ka limhondzo. (Eks. 19:16-18; 24:17; Ps. 68:8) Swi va hlamalisile Vayisrayele ku vona swilo leswi Yehovha a nga swi yendla leswi kombisaka swaku swa mu fanela ku dzunisiwa.

3. Hi nga yendla yini swaku hi dzunisa Yehovha?

³ Indjhe hina vanhu hi nga swi kota ku dzunisa Yehovha? Ina. Hi nga swi yendlisa ku yini swoleswo? Hi nga dzunisa Yehovha hi ku byela van’wani hi matimba ya yena ni wumunhu la yena la ku  hlamalisa. Hi nga tlhela hi dzunisa Yehovha loko hi mu khensa hi minchumu hinkwayu leyi a hi yendlelaka yona. (Esa. 26:12) Hosi Davhida i xikombiso xaxinene xa ku dzunisa Yehovha. Ka xikhongelo lexi a nga xi yendla phambheni ka tiko la Israyele, Davhida a mu byele leswi Yehovha: “Wena Yehovha, u mukulu, u ni matimba, u sasekile, u munene u tlhela u hlonipheka, hikusa hinkwaswu leswi nga matilweni ni misaveni i swa wena.” Loko Davhida a gamile ku khongela, ‘vanhu hinkwavu va dzunise Yehovha’. — 1 Tik. 29:11, 20.

4. Yesu a mu dzunisise ku yini Yehovha?

⁴ Nkama na a li lani misaveni, Yesu a mu dzunisile Yehovha. A yendle leswo hi ku va minkama hinkwayu a vula leswaku matimba lawa a a li na wona ya ku yendla masingita a ma ta hi ka Yehovha. (Mar. 5:18-20) Yesu a tlhele a mu dzunisa Yehovha hi leswi a a swi vula hi Papayi wa yena wa le matilweni ni leswi a a va yendlela swona vanhu van’wani. Siku lin’wani nkama na a li ku djondziseni ka sinagoga, Yesu a vone wansati mun’wani lweyi a a ni dimoni leli a li mu hlupha ku ringana 18 wa malembe. Dimoni leli a li yendla swaku a nga swi koti ku wololoka a nyima, kambe minkama hinkwayu a a tshama na a korhamile. Impela xiyimu xa wansati lweyi a xi vavisa swinene. Yesu a mu twele wusiwana a mu tshinelela a gama a mu byela a ku: “Wansati, hanya ka mavabyi ya wena.” Se nkama wansati lwiyani a nga wololoka a vona swaku a a hanyisiwile a ‘sungule ku dzunisa Xikwembu’. (Luk. 13:10-13) Impela wansati lweyi a a ni swivangelo swa ku twala swa ku mu dzunisa Yehovha. Na hina hi ni swivangelo swa ku twala swa ku dzunisa Yehovha.

I MPSINI SWI HI YENDLAKA HI DZUNISA YEHOVHA?

5. I mpsini swi hi yendlaka hi hlonipha Yehovha?

⁵ Hi dzunisa Yehovha hikusa ha mu hlonipha. Ku ni swilo swa swinyingi swi hi yendlaka hi hlonipha Yehovha. Xin’wani xa swilo swoleswo hileswaku Yehovha i Xikwembu xa matimba hinkwawu, leswi nge a ni ntamu wa ku yendla xin’wani ni xin’wani lexi a xi lavaka funtshi a nga karhali. (Ps. 96:4-7) Kasi xin’wani hi swaku yena a tlharihile naswona wutlharhi la yena la tikomba ka swilo hinkwaswu leswi a nga swi yendla. Yehovha wa hi hlayisa, a hi nyika wutomi funtshi a hi nyika hinkwaswu leswi hi swi lavaka leswaku hi tama hi hanya. (Nhl. 4:11) Xin’wanyani hi leswaku wa tshembeka. (Nhl. 15:4) Kasi xin’wani hi leswaku hinkwaswu leswi Yehovha a swi yendlaka swi famba kahle funtshi minkama hinkwayu a hetisisa leswi a swi tshembisaka. (Yox. 23:14) Phela swilo hinkwaswu leswi hi swona swi nga za swi yendla Yeremiya a vula leswi hi Yehovha: “Xikarhi ka vanhu hinkwavu va ku tlhariha va matiko ni le ka mimfumu ya vona, a nga kona lweyi a fanaka na wena nikatsongo.” (Yer. 10:6, 7) Impela ku ni swilo swa swinyingi leswi hi yendlaka hi hlonipha Papayi wa hina wa le tilweni. Hambileswo, hina a yo mu hlonipha ntsena Yehovha, kambe ha mu rhandza.

6. I mpsini leswi swi hi yendlaka hi mu rhandza Yehovha?

⁶ Hina hi dzunisa Yehovha hikusa hi mu rhandza hintamu. Phela wumunhu la Yehovha li hi yendla hi mu rhandza swinene. Yena i Xikwembu xa timpsalu ni ntwelawusiwana. (Ps. 103:13; Esa. 49:15) Loko vanhu va yena va hlupheka, na yena a twa ku vava hi mhaka ya swoleswo. (Zak. 2:8) Wa hi pfuna swaku hi va vanghanu va yena vavakulu. (Ps. 25:14; Min. 17:27) Funtshi a tiveka hansi; “wa korhama a txuvuka atilweni ni misaveni, a pfuxa lweyi a kalaka a nga na nchumu ka wuthulu.” (Ps. 113:6, 7) Phela swivangelo hinkwaswu leswi, swi hi yendla hi dzunisa Yehovha. — Ps. 86:12.

7. Hi wini nkateko lowu hi nga na wona?

⁷ Hina hi dzunisa Yehovha hi mhaka leswi hi lavaka swaku vanhu van’wani va mu tiva. Vanhu  va vanyingi a va wu tivi ntiyiso hi Yehovha hi mhaka leswi Sathana a va hembelaka a tlhela a va yendla va pimisa leswaku Yehovha a yendla swilo swa ku biha. (2 Ko. 4:4) Sathana a zama ku yendla swaku vanhu va pimisa swaku Yehovha a nga na mhaka ni vanhu, a tlhela a yendla swaku vanhu va pimisa swaku swilo swa swinyingi swi yendlaka hi hlupheka swi yendliwa hi Yehovha. Kambe hina ha wu tiva ntiyiso, naswona hi ni nkateko wa ku bula ni vanhu hi ntiyiso wolowo lowu nga ta yendla leswaku vanhu van’wani na vona va mu dzunisa Yehovha. (Esa. 43:10) Buku la Tipisalema 96 li vulavula hintamu hi ku dzunisa Yehovha. Ka maparagrafu lawa ma taka hi ta bula hi Pisalema leyi. Nkama lowu hi bulaka hi buku leli, pimisa hi leswi u nga swi yendlaka leswaku u tama u dzunisa Yehovha, Xikwembu lexi faneliwaka hi ku dzunisiwa.

HI NGA MU DZUNISISA KU YINI YEHOVHA?

8. Hi nga mu dzunisisa ku yini Yehovha? (Tipisalema 96:1-3)

⁸ Lerha Tipisalema 96:1-3. Hi nga dzunisa Yehovha hi ku vulavula ni van’wani hi yena. Tindzimana leti ti hi byela swaku hi fanele hi ‘yimbelelela Yehovha lisimu’, hi ‘dzunisa vito la yena’, hi ‘vula mahungu ya ku tsakisa ya ku ponisa ka yena’ hi tlhela hi ‘twalisa wukulu la yena xikarhi ka matiko’. Phela tindlela hinkwatu leti hi tona leti hi nga dzunisaka Yehovha hi tona. Ni vanhu va Yehovha va khale, a va swi rhandza ku vulavula hi swilo swaswinene leswi Yehovha a a va yendlela swona. (Dan. 3:16-18; Min. 4:29) Se hina ke, hi nga swi yendlisa ku yini leswo?

9-10. U djondza yini ka xikombiso xa makwerhu Angelena? (Vona mufoto.)

⁹ A hi voneni xikombiso xa wansati mun’wani lweyi a tshamaka Estados Unidos lweyi a vitaniwaka Angelena. a Yena a tiye nhlana a nyimelela vito la Yehovha lani a a tirha kona. Angelena a rhambiwile ka ntlhanganu lani vatirhi va nyuwani a va ta nyikiwa nkama wa ku vulavula hi wutomi la vona. Phela Angelena a a tilunghiselelile swaku a vulavula hi ku tsaka loku a a li na kona hi ku va Mboni ya Yehovha. Kambe na ku nga se fika nkama wa yena wa ku vulavula, kolega wa yena lweyi a nga vula swaku a kulisiwile hi Timboni, a sungule ku khuluma swa ku biha hi Yehovha ni leswi Timboni ta Yehovha ti kholwaka ka swona. Angelena a vula leswi: “Ni sungule ku chava, kambe a ni nge te mu pfumelela a vulavula swa ku biha hi Yehovha. A ni lava ku va byela ntiyiso hi Yehovha.”

 ¹⁰ Nkama wanuna lwiyani a nga gama ku vulavula, Angelena a yendle xikhongelo hi ndzeni ka mbilu a gama a ku: “Na mina ni ni xitoriya xa ku fananyana ni xa wena hikusa ni kulisiwe hi Timboni ta Yehovha, naswona ni swoswi na ha li Mboni ya Yehovha.” Hambileswi xiyimu lexiyani a xi karhata, Angelena a tame a vulavula a tlhela a komba vakolega va yena mafoto ya ku saseka lawa a nga ma susa na a ni vanghanu va yena na va tirhela Yehovha. (1 Pe. 3:15) Nkama Angelena a nga gama ku vulavula, wanuna lwiyani se a a rhulile naswona a vulavule hi swilo swa ku tsakisa leswi a wa ha swi khumbuka leswi swi nga yendleka nkama lowu a a ya mintlhanganwini. Angelena a li: “Swa mu fanela Yehovha kuva a dzunisiwa, naswona i nkateko wawukulu ku mu dzunisa Yehovha.” Na hina hi nga mu dzunisa Yehovha loko vanhu van’wani va vulavula ku biha hi yena.

11. Ku sukela khale vanhu va Yehovha va swi tirhisisa ku yini leswi nga ka Tipisalema 96:8?

¹¹ Lerha Tipisalema 96:8. Hi nga dzunisa Yehovha hi ku mu nyika swilo swa lisima leswi hi nga na swona. Phela mhaka ya ku nyika Yehovha swilo leswi hi nga na swona a yi sunguli swoswi, hambi hi vanhu va Yehovha va khale a va swi yendla leswo. (Swiv. 3:9) Hi xikombiso, Vayisrayele va nyikele hi leswi a va li na swona leswaku ku yakiwa tempele yi tlhela yi lunghisiwa. (2 Tih. 12:4, 5; 1 Tik. 29:3-9) Vadjondzisiwa van’wani va Yesu a va tirhisa swilo swa vona swaku va pfuna Yesu ni vapostolo va yena hi ku va nyika leswi a va swi lava. (Luk. 8:1-3) Kasi ka nkama wa vapostolo, Bibele li vula leswaku loko vamakwerhu va twa leswaku ku ni vamakwerhu van’wani lava a va lava ku pfuniwa, a va yendla minyikelo swaku va va pfuna hi leswi a swi laveka. (Min. 11:27-29) Se na hina namuntlha, hi nga dzunisa Yehovha hi ku nyikela hi leswi hi nga na swona.

12. Minyikelo ya hina yi mu dzunisisa ku yini Yehovha? (Vona mufoto.)

¹² A hi voneni xikombiso xin’we xa ndlela leyi minyikelo ya hina yi mu dzunisaka hi yona Yehovha. Relatoriyu lin’wani la 2020 li kombisa leswi swi nga yendleka aZimbabwe nkama a ku ni djandza. Vanhu va vanyingi hintamu a va li nghozini ya ku fa hi mhaka ya ndlala, ku patsa ni makwerhu wa hina wa xisati lweyi a vitaniwaka Prisca. Hambileswi xiyimu a xi karhata, Prisca a tame a chumayela vhiki ni vhiki hi Quarta ni Sexta-feira hambi hi leswi a a li nkama wa ku rima. Vavhizinyu va yena va sungule ku mu poyilela hileswi a a ya ka ntirho wa ku chumayela ku hambana ni ku ya masin’wini, va vula leswi: “Loko u nga rimi u ta fa hi ndlala.” Prisca a a  tiyiseka swaku Yehovha minkama hinkwayu a nga mu pfuna. Se a va hlamule leswi: “Yehovha a nge va tshiki vanhu va yena.” Na ku nga hundzanga nkama wa wunyingi Prisca a yamukele swakudla leswi swi taka hi ka nhlengeletanu. Leswo swi kotekile hi mhaka ya minyikelo leyi hi yi nyikelaka. Vavhizinyu va yena va hlamalile hi leswo va gama va vula leswi: “Xikwembu a xi ku tshikanga. Hi tsakela ku djondza swa ku tala hi Xikwembu xa wena.” Phela 7 wa vavhizinyu va Prisca va sungule ku ya mintlhanganwini.

13. Hi nga yendla yini swaku mahanyelo ya hina ma mu dzunisa Yehovha? (Tipisalema 96:9)

¹³ Lerha Tipisalema 96:9. Hi nga dzunisa Yehovha hi mahanyelo ya hina. Ka Israyele wa khale muprista lweyi a a tirha atempeleni a a fanele a hlamba a basa. (Eks. 40:30-32) Ninamuntlha swa ha li swa lisima leswaku hi basa muzimbheni, kambe i swa lisima hintamu ku basa ka mahanyelo ya hina. (Ps. 24:3, 4; 1 Pe. 1:15, 16) Hi nga yendla leswo hi ku yendla hinkwaswu hi nga swi kotaka leswaku hi hlivila “wumunhu la khale”, ku nga swilo hinkwaswu leswi a hi swi yendla leswi Yehovha a kalaka a nga swi tsakeli hi tlhela hi yambala “wumunhu la nyuwani”, ku nga ku pimisa ni ku yendla swilo ku fana na Yehovha. (Kol. 3:9, 10) Ku ni vanhu va vanyingi lava a ku sunguleni a va yendla swilo swa ku biha hintamu kambe hi ku pfuniwa hi Yehovha va nga gama va swi kota ku txintxa mahanyelo ya vona.

14. U djondza yini ka xikombiso xa Jack? (Vona mufoto.)

¹⁴ Pimisa hi leswi swi nga yendlekela Jack, wanuna mun’wani lweyi vanhu a va mu vitana swaku i dimoni hileswi a a li bandidu funtshi a a chaviwa hintamu amugangeni. Phela hi mhaka ya swilo swa ku biha leswi a nga swi yendletela, Jack a yisiwe djele naswona nkama mhaka ya yena yi nga thethiwa ku vuliwe swaku a a fanele a dlayiwa. Na a ha nyimela siku leli a a ta dlayiwa hi lona, a pfumele ku djondza Bibele ni makwerhu mun’wani lweyi a a djondza Bibele ni vanhu lava a va li djele. Phela hambileswi Jack a a ni mahanyelo ya ku biha swinene a swi kotile ku txintxa wutomi la yena a tlhela a faneleka ku tsakamisiwa. Vanhu va ku tala va hlamalile hi ku vona swaku Jack a a txintxile mahanyelo ya yena. Hi xikombiso, hi siku leli a nga dlayiwa hi lona maphoyisa ma mu vhalelisile na ma rila, funtshi phoyisa lin’wanyani li vule leswaku nkama Jack na wa ha ku fika djele a ku li yena wa ku biha hintamu ku tlula hinkwavu ka djele leliyani, kambe swoswi a ku li yena wamunene ku  tlula hinkwavu. Se ka vhiki leli nga landzela na Jack se a dlayiwile, vamakwerhu va tlhelile ka djele leliyani swaku va ya fambisa ntlhanganu, naswona ka ntlhanganu wolowo a ku ni wanuna lweyi a a yile amintlhanganwini hi khambi la ku sungula. Wanuna lwiyani a vule leswaku leswi nga mu yendla a za a ya mintlhanganwini hi leswi a nga vona swaku Jack lweyi a a ni mahanyelo ya ku biha a txintxe mahanyelo ya yena, se na yena a a lava ku tiva swaku i mpsini leswi a nga swi yendlaka swaku a gandzela Yehovha. A xiperiyensiya lexi xi swi kombisa kahle swaku mahanyelo ya hina ma nga yendla leswaku Yehovha a dzunisiwa! — 1 Pe. 2:12.

YEHOVHA A TA YENDLA YINI SWAKU VITO LA YENA LI DZUNISIWA KU NGA LI KHALE?

15. I mpsini leswi Yehovha a nga ta swi yendla swaku a dzunisa vito la yena hi ku helela ku nga li khale? (Tipisalema 96:10-13)

¹⁵ Lerha Tipisalema 96:10-13. Tindzimana ta wugamu ta buku la Tipisalema 96, ti vulavula hi Yehovha na a li Muyavanyisi ni Hosi ya ku lulama. Se Yehovha a ta yendla yini swaku vito la yena li dzunisiwa ku nga li khale? A ta yendla leswo hi ku yavanyisa hi ku lulama. Ku nga li khale a ta helisa Babilona Wamukulu hi leswi a vulavulaka mavunhwa hi vito la yena. (Nhl. 17:5, 16; 19:1, 2) Loko Babilona Wamukulu a ta va se a helisiwile, swi nga yendleka vanhu van’wani va tipatsa na hina va sungula ku tirhela Yehovha. Hi wugamu, ka nyimpi ya Armajedoni Yehovha a ta helisa misava leyi ya Sathana, a helisa vanhu hinkwavu lava va nga mu djikela ni lava va nga vulavula ku biha hi vito la yena, a tlhela a ponisa hinkwavu lava mu rhandzaka va tlhela va mu yingisa ni lava yendlaka hinkwaswu leswi va nga swi kotaka swaku va mu dzunisa. (Mar. 8:38; 2 Tes. 1:6-10; Nhl. 20:7-10) Loko Mfumu Wa Yesu wa 1.000 wa Malembe wu ta va wu helile, ku ta gama ku landzela ku ringiwa ka wugamu naswona loko ku ringiwa koloko ku hela, Yehovha a ta va se a li basisile hi ku helela vito la yena. Hi nkama wolowo “misava hinkwayu yi ta tala hi ku tiva ku phatima ka Yehovha ku fana ni mati lama mbhonyaka lwandle.” — Hab. 2:14.

16. U tinyimisele ku yendla yini? (Vona mufoto.)

¹⁶ Swi ta tsakisa hintamu ku hanya ka misava ya nyuwani lani vanhu hinkwavu va nga ta mu dzunisa Yehovha, Xikwembu lexi faneliwaka hi ku dzunisiwa. Kambe na nkama wolowo wu nga se fika, hi fanele hi yendla hinkwaswu leswi hi nga swi kotaka kuva siku ni siku hi lavetela tindlela ta ku mu dzunisa Yehovha. Leswaku hi twisisa lisima la ku dzunisa vito la Yehovha, Ntlawa Lowu Rhangelaka wu lange Tipisalema 96:8 leswaku yi va ndzimana ya lembe la 2025. Ndzimana leyi yi li: “Dzunisani Yehovha hi mhaka ya vito la yena la ku phatima”.