1. Hi pfunekisa ku yini hi ku va kona ka Xitsundzuxu?

 HA TIYISEKA swaku ka wena nkutsulu i prezenti la lisima! (2 Ko. 9:15) Hi mhaka leswi Yesu a nga hi fela, hi ni wunghanu la ku tiya na Yehovha hi tlhela hi nyimela ku kuma wutomi la ku kala li nga heli ka nkama lowu taka. Impela ha li khensa prezenti leli, leli Yehovha a nga hi nyika hileswi a hi rhandzaka. (Rom. 5:8) Leswaku hi tama hi khumbuka prezenti leli hi tlhela hi kombisa ku khensa, Yesu a hi rhume swaku lembe ni lembe hi va kona ka Xitsundzuxu xa lifu la yena. — Luk. 22:19, 20.

2. Hi ta vona yini ka nhlokomhaka leyi?

² Hinkwerhu hi le ku tilulamiseleni leswaku hi va kona ka Xitsundzuxu. Lembe leli a Xitsundzuxu xi ta yendliwa hi Sábado wa diya 12 ka Abril wa 2025. Se swi kahle kuva na ka ha chota mavhikinyana leswaku ku yendliwa Xitsundzuxu hi tinyika nkama wa ku pimisa hi leswi Yehovha na Yesu va nga hi yendlela swona. Ka nhlokomhaka leyi hi ta vona swaku a nkutsulu wu hi djondzisa yini hi leswi Yehovha na Yesu va nga tshamisa xiswona, kasi ka nhlokomhaka leyi landzelaka hi ta vona swaku hi pfunekisa ku yini hi nkutsulu ni leswaku hi nga swi kombisisa ku yini swaku ha wu khensa.

NKUTSULU WU HI DJONDZISA YINI HI YEHOVHA?

3. Swi kotekisa ku yini kuva munhu mun’we a ponisa vanhu hinkwavu? (Vona mufoto.)

³ Nkutsulu wu hi djondzisa swaku Yehovha a lulamile. (Det. 32:4) Hi vula leswo hikusa leswi Adamu a kalaka a nga yingisanga, a yendle leswaku hinkwerhu hi va ni xidjoho lexi xi hi yisaka ku feni. (Rom. 5:12) Kambe Yehovha a hi chunsile ka xidjoho ni lifu hi ku rhumela Yesu leswaku a ta hi fela. Kambe swi kotekisa ku yini kuva munhu mun’we a ponisa vanhu hinkwavu? Leswi Pawulo a nga swi vula swa hi pfuna ku kuma nhlamulu ya xivutiso lexo, yena a te: “Leswi va ku tala va nga yendliwa vadjohi hi mhaka ya leswi munhu mun’we a kalaka a nga yingisanga ni  vanhu va ku tala va ta yendliwa va ku lulama hi mhaka ya ku yingisa ka munhu mun’we.” (Rom. 5:19; 1 Tm. 2:6) Leswo swi lava ku vula leswaku leswi Adamu a kalaka a nga yingisanga, a yendle leswaku hinkwerhu hi va ni xidjoho hi tlhela hi fa. Kambe leswi Yesu a nga yingisa a hi ponisile ka xidjoho ni lifu.

4. Hi mhaka muni Yehovha a nga tekelanga ku nyika wutomi la ku kala li nga heli vana va Adamu lava a va ta yingisa?

⁴ Ku nga va leswaku a swo boha leswaku Yesu a ta, a ta hi fela? A swi nga ta yampsa loko Yehovha a a yo tekela ku nyika wutomi la ku kala li nga heli vana hinkwavu va Adamu lava a va ta yingisa? Leswi hina vanhu hi kalaka hi nga hetisekanga hi pimisa hi ndlela leyo hikusa minkama yin’wani a hi swi twisisi hi ku helela swiboho leswi Yehovha a swi yendlaka. Kambe loko Yehovha a a yo yendla leswi hina hi swi pimisaka kuva a hi ponisa ka xidjoho ni lifu, a swi nga ta va swi kombisa wululami la yena hi ku helela, funtshi leswi Yehovha a nga Xikwembu lexi nga lulama a a nga ta tshuka a yendla ingi hi loko o kala a nga xi vonanga xidjoho lexi nga yendliwa hi Adamu na Evha.

5. I ntxini xi hi yendlaka hi tshemba swaku minkama hinkwayu Yehovha a ta yendla leswi nga swinene?

⁵ A swi ta va ndjhani loko Yehovha a yo pfumelela vana va Adamu na Evha va ku kala va nga hetisekanga swaku va kuma wutomi la ku kala li nga heli, na swi nga zanga swi boha kuva a nyikela hi N’wana wa yena swaku a ta hi fela? A swi nga ta va swinene hikusa a swi ta lwisana ni wululami la Yehovha, funtshi a swi ta yendla vanhu va nga tiyiseki swaku ni switshembiso leswin’wani swa Yehovha swi ta hetiseka. Kambe hi ku va a nyikelile hi N’wana wa yena swaku a hi fela, swi hi tiyisekisa swaku ni swin’wani leswi a nga hi tshembisa swona a ta swi hetisisa, ni swaku minkama hinkwayu a ta yendla leswi nga swinene.

6. Nkutsulu wu li kombisisa ku yini lirhandzu la Yehovha? (1 Yohani 4:9, 10)

⁶ Nkutsulu a wu hi djondzisi ntsena hi wululami la Yehovha, wu tlhela wu hi djondzisa swaku Yehovha wa hi rhandza hintamu. (Yoh. 3:16; lerha 1 Yohani 4:9, 10.) Nkutsulu wu yendla leswaku swi koteka kuva hi kuma wutomi la ku kala li nga heli wu tlhela wu hi pfuna swaku hi lumba ndjangu wa Yehovha. Phela nkama Adamu a nga djohela Yehovha, a tshike ku lumba ndjangu wa Yehovha. Se hi mhaka leyo, na hina loko hi psaliwa a hi lumbi ndjangu wa Yehovha. Kambe leswi nkutsulu wu yendlaka leswaku Yehovha a hi rivalela swidjoho swa hina, loko hi yingisa hi ta lumba ndjangu wa yena. Hambi hi swoswi swa koteka kuva hi va ni wunghanu la ku tiya na Yehovha ni vamakwerhu va hina hi mhaka ya nkutsulu. Impela nkutsulu wu hi komba leswaku Yehovha wa hi rhandza hintamu. — Rom. 5:10, 11.

7. Leswi Yesu a nga dlayisiwa xiswona swi hi pfunisa ku yini ku twisisa swaku Yehovha a hi rhandza hintamu?

 ⁷ Xin’wani lexi nga hi pfunaka ku twisisa swaku Yehovha wa hi rhandza hintamu, i ku pimisa hi ndlela leyi a nga titwa hi yona nkama lowu a nga vona N’wana wa yena Yesu na a dlayiwa. Khumbuka swaku Sathana a vule leswaku a ku na munhu lweyi a nga tamaka a tshembeka ka Xikwembu loko a kumana ni swikarhatu swaswikulu. Kambe Yehovha a pfumelele swaku Yesu a fa hi ndlela ya ku vava leswaku a kombisa swaku Sathana a wo hemba loko a vula leswiyani. (Yob. 2:1-5; 1 Pe. 2:21) Yehovha a mu vonile N’wana wa yena nkama lowu na a dlayiwa hi ndlela ya ku vava swinene, a swi vonile nkama lowu va nga mu rhuketela, va mu ba va tlhela va mu gongondzela ka mhandzi ya nxaniso. Phela leswo swi mu vavile hintamu Yehovha. (Mat. 27:28-31, 39) Hi xikombiso, vanhu lavayani va nga dlaya Yesu, nkama lowu a va mu hlupha va vule leswi: “Xikwembu a xi mu ponise swoswi loko xi mu rhandza”. (Mat. 27:42, 43) Phela leswi Yehovha a nga Xikwembu xa matimba hinkwawu, loko a wo swi lava ina a mu ponisile Yesu a nga pfumeleli swaku a hluphiwa hi ndlela liyani, kambe a swi pfumelelile leswaku Yesu a hluphiwa hikusa wa hi rhandza, naswona a yendle leswo leswaku a hi kutsula ka xidjoho ni lifu ni leswaku hi kuma ntshembo wa ku kuma wutomi la ku kala li nga heli.

8. Ku nga va swaku Yehovha a vavisekile nkama a nga vona N’wana wa yena na a hluphiwa? Tlhamusela. (Vona mufoto.)

⁸ Leswi Yehovha a nga Xikwembu xa matimba hinkwawu, vanhu va nga ha pimisa swaku yena a nga vaviseki. Kambe ku pimisa leswo a swi twali hikusa Bibele li vula swaku a hi yendle hi xifaniso xa yena. Leswi nge, loko hina hi vaviseka, Yehovha na yena wa vaviseka funtshi Bibele li vula swaku loko vanhu va yendla swilo swa ku biha va mu ‘twisa ku vava’ Yehovha. (Ps. 78:40, 41) Hi xikombiso, pimisa hi leswi Abrahamu a nga titwisa xiswona nkama lowu Yehovha a nga mu kombela swaku a yendla gandzelo hi n’wana wa yena. (Gen. 22:9-12; Heb. 11:17-19) Hambileswi Abrahamu a a to tlhava Izaki kan’we ntsena a tekela ku fa, swi mu vavile hintamu ku pimisa hi swaku a swi ta lava a dlaya n’wana wa yena. Se u pimisa swaku Yehovha a titwise ku yini nkama lowu a nga vona N’wana wa yena na a hluphiwa a tlhela a fa lifu la ku vava hi kutsongokutsongo? I ntiyiso swaku swi mu vave ku tlula mpimu! — Vona vhidiyo leli nge Tekelela Lipfumelo La Vona — Abrahamu, Xiyenge 2 ka site la jw.org.

9. U djondza yini hi lirhandzu la Yehovha ka Varoma 8:32, 38, 39?

⁹ Nkutsulu wu swi kombisa kahle swaku Yehovha wa hi rhandza ku tlula munhu mun’wani ni mun’wani, a hi rhandza ku tlula hambi hi maxaka ya hina ni vanghanu va hina vavakulu. (Lerha Varoma 8:32, 38, 39.) Yehovha a hi rhandza hintamu ku tlula leswi hina hi tirhandzisaka xiswona. Indjhe wa swi lava ku hanya  wutomi la ku kala li nga heli? Tiyiseka leswaku Yehovha a swi lava hintamu leswo ku tlula leswi wena u swi lavisaka xiswona. Wa swi lava ku rivaleliwa swidjoho swa wena? Tiyiseka leswaku Yehovha a swi lava hintamu ku ku rivalela ku tlula leswi wena u swi lavisaka xiswona. Nkutsulu i xikombiso xaxikulu xa leswaku Yehovha wa hi rhandza swinene. Leswi Yehovha a hi kombelaka swona i kuva hi kombisa swaku ha wu khensa nkutsulu, hi kombisa lipfumelo hi tlhela hi mu yingisa. Naswona ka misava ya nyuwani hi ta ya hi li twisisa kahle lirhandzu leli Yehovha a nga na lona hi hina. — Ekl. 3:11.

NKUTSULU WU HI DJONDZISA YINI HI YESU KRESTE?

10. a) I mpsini leswi swi nga yendla Yesu a twa ku vava hintamu nkama na a li kusuhi ni ku fa? b) I mpsini leswi Yesu a nga swi yendla swaku a basisa vito la Yehovha? (Vona kwadru leli nge “ Ku Tshembeka Ka Yesu Ku Kombise Swaku Sathana I Muhembi.”)

¹⁰ Yesu a ni mhaka ni leswi vanhu va swi pimisaka hi Papayi wa yena. (Yoh. 14:31) Phela Yesu Kreste a twe ku vava swinene nkama va nga mu lumbeta swaku yena a a rhuketela Xikwembu, hi leswo swi nga yendla a vula leswi ka xikhongelo xa yena: “Papayi, loko swi koteka, kopo leyi a yi fambeli kule na mina.” (Mat. 26:39) Hi ku va Yesu a tshame na a tshembekile anze siku leli a nga fa hi lona, swi yendle swaku a vito la Yehovha li basisiwa ka mavunhwa lawa Sathana a mu lumbetaka hi wona.

11. Yesu a swi kombisise ku yini leswaku a va rhandza hintamu vanhu? (Yohani 13:1)

¹¹ Nkutsulu wu hi komba leswaku Yesu a va rhandza hintamu vanhu, ngopfungopfu vadjondzisiwa va yena. (Swiv. 8:31; lerha Yohani 13:1.) Hi xikombiso, Yesu a a swi tiva swaku ntirho wa yena lani misaveni a wu tale hi swikarhatu leswi patsaka ku dlayiwa hi ndlela ya mona. Kambe Yesu a pfumelile ku wu yendla ntirho wolowo. Naswona ka Yesu ku yendla mintirho leyi hinkwayu a ku nga li ntsena ku hetisisa  leswi a a rhumiwe swona, kambe a tikarhatele ku wu yendla kahle hileswi a a rhandza vanhu. Yesu a yendle hinkwaswu leswi a nga swi kota leswaku a chumayela, a djondzisa vanhu ni ku va pfuna hi leswi a va swi lava. Hambi hi ka siku la yena la wugamu lani misaveni, Yesu a kombisile swaku a a ni mhaka ni vapostolo va yena hi ku va hlambhisa minenge a tlhela a va tiyisa hi ku va byela leswi a va fanele va sala va hanyisa xiswona. (Yoh. 13:12-15) Hambi hi nkama lowu a a gongondzeliwile amhandzini, Yesu a swi kombisile leswaku a a ni mhaka ni van’wani hi ku kombela mupostolo Yohani swaku a sala a hlayisa mamani wa yena ni ku tlhela a xi nyika ntshembo xigevenga lexi a xi gongondzeliwile tlhelweni ka yena. (Luk. 23:42, 43; Yoh. 19:26, 27) Swilo hinkwaswu leswi swi kombisa swaku impela Yesu wa va rhandza vanhu.

12. I mpsini leswi Yesu Kreste a tamaka a swi yendla namuntlha swaku hi pfuneka?

¹² Hambileswi Yesu Kreste a nga fa “kan’we ntsena”, a pfuxiwile naswona swoswi a tama a tirha leswaku hina hi pfuneka. (Rom. 6:10) I mpsini leswi a swi yendlaka? A yendla hinkwaswu leswi a nga swi kotaka swaku hi kuma minkateko leyi ngo koteka ntsena hileswi a nga hi fela. Hi xikombiso, swoswi i Hosi, Muprista Wamukulu a tlhela a va nhloko ya bandla. (1 Ko. 15:25; Efe. 5:23; Heb. 2:17) Yena a le ku hlengeleteleni ka vanhu lava nga ta fuma na yena ni ka xitshungu xaxikulu, naswona ntirho lowu wu ta hela loko nhlomulu wawukulu wu li kusuhi ni ku hela. a (Mat. 25:32; Mar. 13:27) A kongomisa mutirhi wa ku tshembeka ni wa ku tlhariha leswaku a tama a hi hlayisa ni ku hi nyika hinkwaswu hi swi lavaka swaku hi tama hi tirhela Yehovha hi ku tshembeka. (Mat. 24:45) Naswona ka nkama lowu taka ka Mfumu wa yena wa 1.000 wa Malembe a ta tama a hi tirhela hi mbilu hinkwayu. Hikakunene Yehovha a nyikele N’wana wa yena hi mhaka ya hina!

TAMA U DJONDZA SWILO SWA NYUWANI

13. Hi nga yendla yini swaku hi tama hi djondza hi lirhandzu leli Yehovha na Yesu va nga hi komba lona?

¹³ Swi kahle kuva u pimisa hi leswi Yehovha na Yesu va nga hi yendlela swona leswaku u li twisisa ku yampsa lirhandzu leli va nga na lona. Swi ngo yini lembe leli u tinyika nkama wa ku lerha mabuku ya Bibele lama vulavulaka hi wutomi ni ntirho wa Yesu loko siku la Xitsundzuxu li li kusuhi ni ku fika ni loko se li hundzile? Nkama lowu u lerhaka, u nga lweli ku lerha swilo swa swinyingi, kambe u nga ha lerha swilo swaswitsongo u gama u pimisa hi leswaku leswi u nga swi lerha swi nga ku pfunisa ku yini swaku  u ya u mu rhandza Yehovha na Yesu u tlhela u bula ni van’wani hi leswi u nga swi djondza.

14. Ku hamba mapexkiza swi nga ku pfunisa ku yini ku tama u djondza hi nkutsulu ni swilo swin’wani? (Tipisalema 119:97; vona mufoto.)

¹⁴ Loko se u ni malembe ya manyingi na wu li ntiyisweni, u nga ha tivutisa kumbe ku ni swin’wani leswi u nga ha swi djondzaka hi wululami la Xikwembu, lirhandzu la xona ni nkutsulu. Kambe ntiyiso wa mhaka hi leswaku ku ni swilo swin’wani swa swinyingi u nga ha swi djondzaka hi timhaka leti ni tin’wani. Kambe u nga yendla yini swaku u djondza swilo swoleswo swa nyuwani? U fanele u ma kambela kahle mabuku ya nhlengeletanu. Loko u kuma swilo leswi u kalaka u nga swi twisisi kahle, yendla mapexkiza naswona loko siku li ya li famba pimisa hi leswi u nga swi djondza, u pimisa hi swaku swilo swoleswo swi ku djondzisa yini hi Yehovha, N’wana wa yena ni lirhandzu leli va nga na lona hi wena. — Lerha Tipisalema 119:97 ni ntlhamuselo wa le hansi.

15. Hi mhaka muni hi nga fanelanga hi godola ku tama hi lwela ku djondza swilo swa nyuwani?

¹⁵ U nga godoli loko nkama lowu u djondzaka kumbe u hambaka pexkiza u nga kumi swilo swa nyuwani, tekelela xikombiso xa lava lavetelaka woru. Vona va tirha hi matimba siku ni siku va famba va lavetela woru, kambe a hi swaku siku ni siku vo li kuma woru la kona; hambileswo a va godoli hikusa va swi tiva leswaku hambiloko vo kuma woru lalitsongo i la lisima swinene ka vona. Se swi li yini hi hina? Ha swi tiva swaku mintiyiso ya Bibele i ya lisima hintamu ku tlula woru! (Ps. 119:127; Swiv. 8:10) Hi mhaka leyo, tama u lerha Bibele siku ni siku hambiloko minkama yin’wani u nga kumi swilo swa nyuwani. — Ps. 1:2.

16. U nga va tekelelisa ku yini Yehovha na Yesu?

¹⁶ Nkama lowu u djondzaka, zama ku vona swaku u nga swi tirhisisa ku yini ka wutomi la wena leswi u swi djondzaka. Hi xikombiso, u nga tekelela wululami la Yehovha hi ku kala u nga na xikheto kambe u rhandza vanhu hinkwavu. Se u nga tekelela ndlela leyi Yesu a mu rhandzaka hi yona Yehovha ni vanhu van’wani hi ku yendla leswi Yehovha a swi lavaka u tlhela u tinyimisela ku pfuna vanhu van’wani hambiloko minkama yin’wani swi lava u titsona swin’wani ka wutomi la wena. U nga tlhela u tekelela Yesu hi ku londzola nkama wun’wani ni wun’wani leswaku u chumayela vanhu leswaku na vona va ta pfuneka hi nkutsulu.

17. Hi ta bula hi yini ka nhlokomhaka leyi landzelaka?

¹⁷ Loko hi ya hi djondza hi nkutsulu hi tlhela hi kombisa swaku ha swi khensa leswi Yehovha na Yesu va nga hi yendlela swona, hi ta ya hi va rhandza funtshi na vona va ta ya va hi rhandza hintamu. (Yoh. 14:21; Yak. 4:8) Se a hi tameni hi djondza hi nkutsulu. Hi nga yendla leswo hi ku tirhisa hinkwaswu leswi Yehovha a nga hi nyika swona leswaku hi tama hi djondza hi mhaka leyo. Ka nhlokomhaka leyi landzelaka hi ta vona swaku hi nga pfunekisa ku yini hi nkutsulu ni leswaku hi nga yendla yini kuva hi mu komba Yehovha swaku ha mu khensa hi lirhandzu leli a nga hi komba lona.