1. Hi nga yendla yini leswaku Yehovha a tsaka?

 A WU ta titwisa ku yini loko a wo nyika munhu lweyi u mu rhandzaka prezenti la ku saseka la nchumu lexi a xi lavaka hintamu, kambe munhu yelweyo a nga li tirhisi prezenti la wena, a li veka ni ku li vona a nga li voni? I ntiyiso swaku leswo a swi nga ta ku tsakisa. Se a wu ta titwisa ku yini loko munhu lweyi u nga mu nyika prezenti a wo ku khensa a tlhela a li tirhisa? Leswo a swi ta ku tsakisa hintamu. Na yena Yehovha a titwa hi ndlela ya ku fana hi prezenti leli a nga hi nyika lona. Yehovha a hi nyike prezenti la lisima ku nga nkutsulu naswona wa tsaka loko hi li khensa prezenti leli a nga hi nyika lona ni ku khensa lirhandzu leli a nga hi komba hi ku hi nyika prezenti lolelo. — Yoh. 3:16; Rom. 5:7, 8.

2. Hi ta bula hi yini ka nhlokomhaka leyi?

² Hambileswi hi swi tivaka leswaku nkutsulu i prezenti la lisima hintamu, hi ku famba ka nkama hi nga ha sungula ku kala hi nga li nyiki lisima. Ku yendla leswo swi nga fana ni ku teka prezenti leli munhu lweyi a ku rhandzaka a nga ku nyika lona u ya li rumara, u nga li tirhisi. Kambe leswo a hi swona hi lavaka ku swi yendla hi prezenti la lisima leli Yehovha a nga hi nyika lona ku nga nkutsulu. Se i mpsini hi nga swi yendlaka leswaku hi tama hi li nyika lisima prezenti leli? I ku va hi tshamela ku pimisa hi leswi Yehovha na Yesu va nga hi yendlela swona. Se leswaku hi yendla leswo, ka nhlokomhaka leyi hi ta vulavula hi minkateko leyi hi yi kumaka swoswi ni minkateko leyi hi nga ta yi kuma ka nkama lowu taka hi mhaka ya nkutsulu. Hi ta tlhela hi vona swaku hi nga yendla yini kuva hi komba Yehovha swaku ha mu tlangela hi lirhandzu la yena, ngopfungopfu ka mavhiki lawa ya Xitsundzuxu.

MINKATEKO LEYI HI YI KUMAKA SWOSWI HI MHAKA NKUTSULU

3. Hi wini nkateko lowu hi wu kumaka hi mhaka ya nkutsulu?

³ Na ka ha li swoswi ku ni minkateko ya yinyingi leyi hi yi kumaka hi mhaka ya nkutsulu. Hi xikombiso, Yehovha wa hi rivalela swidjoho  swa hina. Phela Yehovha a ngo sindziseka ku hi rivalela, kambe a swi yendla hileswi a ngo swi lava hi mbilu ya yena hinkwayu. Leswaku mupisalema a khensa Yehovha hileswi a hi rivalelaka a te: “U lulamile, wena Yehovha, naswona u lunghekele ku rivalela”. — Ps. 86:5; 103:3, 10-13.

4. Nkutsulu wu yendleliwe vamani? (Luka 5:32; 1 Timotiya 1:15)

⁴ Vanhu van’wani va pimisa swaku a swi va faneli ku rivaleliwa hi Yehovha. Ku vula ntiyiso a nga kona munhu ni mun’we lweyi swi ngo mu fanela ku rivaleliwa hi Yehovha. Hambi hi mupostolo Pawulo ka khambi lin’wani a vule swaku ‘a swi mu faneli ku vitaniwa mupostolo’ kambe a game a ku: “Hi mhaka ya timpsalu tatikulu ta Xikwembu, ni leswi ni nga swona.” (1 Ko. 15:9, 10) Leswo swi kombisa leswaku loko hi tisola ka swidjoho swa hina, Yehovha a ta hi rivalela. Kambe a nga ta hi rivalela hileswi swi ngo hi fanela, a ta hi rivalela hikusa wa hi rhandza. Loko u titwa nandzu u tlhela u pimisa swaku Yehovha a nge ku rivaleli, khumbuka leswaku Yehovha a ze a nyikela hi N’wana wa yena leswaku a rivalela vadjohi lava va tisolaka ku nga li vanhu va ku lulama. — Lerha Luka 5:32; 1 Timotiya 1:15.

5. Indjhe a kona lweyi swi ngo mu fanela ku rivaleliwa hi Yehovha? Tlhamusela.

⁵ Yehovha wa tsaka hintamu naswona wa hi tlangela loko a hi vona hi tama hi mu tirhela hi ku tshembeka. Kambe ku va hi ni malembe ya manyingi na hi tirhela Yehovha hi ku tshembeka a swi lavi ku vula swona swaku se swa hi fanela kuva hi rivaleliwa. (Heb. 6:10) Ku va Yehovha a nyikele hi N’wana wa yena Yesu leswaku a va nkutsulu a hi muholo lowu o ngo hi nyika wona hi mhaka swilo swa swinyingi leswi hi mu yendlelaka swona, kambe i prezenti leli a hi nyikaka lona hi mhaka leswi a hi rhandzaka. Se a swi ta va swi hoxile loko a ho pimisa swaku hi mhaka swilo swa swinyingi leswi hi mu yendlelaka swona Yehovha, swo hi fanela kuva a hi rivalela. Ku pimisa hi ndlela leyo a swi ta fana ni loko ho vula swaku a swi nga bohi kuva Yesu Kreste a hi fela. — Vona Vagalatiya 2:21.

6. Hi mhaka muni Pawulo a tirhele Yehovha hi ku hiseka?

⁶ Pawulo a a swi tiva swaku a swi nga mu faneli ku kombiwa timpsalu hi Yehovha, hambileswo a mu tirhele hi ku hiseka. Se hi mhaka muni a yendle leswo? A swi yendlile hileswi a a lava ku khensa Yehovha hi mhaka timpsalu tatikulu leti a nga mu komba tona. (Efe. 3:7) Se ku fana na Pawulo, na hina hi tirhela Yehovha hi ku hiseka ku nga li hileswi hi lavaka ku kombiwa timpsalu kambe hileswi hi lavaka ku komba Yehovha swaku ha mu khensa hi hinkwaswu leswi a hi yendlelaka swona.

7. Hi wini nkateko wun’wani hi wu kumaka hi mhaka ya nkutsulu? (Varoma 5:1; Yakobe 2:23)

⁷ Nkateko wun’wani hi wu kumaka hi mhaka ya nkutsulu i ku va ni wunghanu la ku tiya na Yehovha. a Hilani hi nga swi vona hi kona ka nhlokomhaka leyi nga hundza hi psaliwa na hi nga li vanghanu va Xikwembu, kambe nkutsulu wu hi pfulela ndlela leswaku hi va ni “ku rhula ni Xikwembu” hi tlhela hi va vanghanu va xona. — Lerha Varoma 5:1; Yakobe 2:23.

8. Hi mhaka muni hi fanele hi mu khensa Yehovha hi nkateko wa ku khongela?

⁸ Nkateko wun’wani lowu hi wu kumaka hi mhaka ya leswi hi nga vanghanu va Yehovha, i wa ku bula ni Papayi wa hina hi xikhongelo. Phela Yehovha a ngo yingisa swikhongelo leswi yendliwaka loko hi li mintlhanganwini ntsena, kambe a yingisela xikhongelo xin’wani ni xin’wani lexi mun’wani ni mun’wani wa hina a xi yendlaka. A xikhongelo i xa lisima hintamu, xa hi rhulisa mbilu, xi hi yendla hi pepa moyeni. Kambe a xo tirhela leswo ntsena, xaxikulu ku tlula hinkwaswu xa hi pfuna leswaku hi tiyisa wunghanu la hina na Yehovha. (Ps. 65:2; Yak. 4:8; 1 Yo. 5:14) Hambi hi Yesu Kreste a a swi tiva leswaku xikhongelo i xa lisima hintamu ni leswaku loko a khongela, Papayi wa yena a a mu twa. Hi mhaka leyo, nkama na a li lani misaveni a a  tshamela ku khongela ka Yehovha leswaku a tiyisa wunghanu la yena na Yehovha. (Luk. 5:16) Impela xikhongelo i prezenti lalikulu hintamu leli li hi tshinetaka ka Papayi wa hina Yehovha. Leswo swi za swi koteka hi mhaka ya gandzelo la Yesu Kreste.

MINKATEKO LEYI HI NGA TA YI KUMA KA NKAMA LOWU TAKA

9. Hi yini minkateko leyi vanhu va Yehovha va nga ta yi kuma ka nkama lowu taka?

⁹ Hi yini minkateko leyi vanhu va Yehovha va nga ta yi kuma ka nkama lowu taka hi mhaka ya nkutsulu? Yin’we ya kona i kuva Yehovha a va nyika wutomi la ku kala li nga heli. Phela vanhu va vanyingi va pimisa swaku leswo a swi nge yendleki hikusa se ku hundza malembe ya manyingi na vanhu va fa. Kambe hi fanele hi khumbuka swaku Yehovha a a nga swi lavisanga xiswona leswo. Loko Adamu na Evha a va nga djohanga, a hi ta hanya wutomi la ku kala li nga heli funtshi a swi nga ta hi hlamalisa leswo. Hambileswi swi karhataka ku pimisa hi ku hanya wutomi la ku kala li nga heli, hi nga tiyiseka swaku swi ta koteka hikusa Yehovha a hakele ku dura hi ku nyikela hi N’wana wa yena leswaku leswo swi za swi koteka. — Rom. 8:32.

10. Hi wini ntshembo lowu lava nga totiwa ni lava va tinyempfu tin’wani va nga na wona?

¹⁰ Hambileswi hi nga ta kuma wutomi la ku kala li nga heli ka nkama lowu taka, ku sukela swoswi hi nga tipimisa na Yehovha se a hi nyikile wutomi lolelo. Phela hi swoleswo Yehovha a lavaka swaku hi swi yendla. Lava va nga totiwa va ni ntshembo wa ku ya hanya matilweni va tlhela va fuma na Yesu. (Nhl. 20:6) Lava va tinyempfu tin’wani va ni ntshembo wa ku hanya aparadesini lani misaveni na ku nga ha na ku rila ni ku twa ku vava. (Nhl. 21:3, 4) Indjhe wena u ni ntshembo wa ku kuma wutomi la ku kala li nga heli lani misaveni? Loko u li na wona, u nga wu tekeli hansi, i nkateko wawukulu ku va ni ntshembo wa ku hanya aparadesini hi masiku ni masiku. Funtshi hi swoleswo Yehovha a a swi lava ku sukela ku sunguleni. Tiyiseka leswaku wutomi li ta tsakisa hintamu hi nkama wolowo.

11-12. I yini swin’wani leswi hi nga ta tikhorisa hi swona aparadesini? (Vona mafoto.)

¹¹ A wutomi aparadesi li ta tsakisa swinene. Yehovha a ta hi nyika hinkwaswu leswi hi swi navelaka. Phela aparadesi a ku nga ha ta fiwa, a ku nga ha ta vabyiwa funtshi a hi nga ha ta va ni swikarhatu. (Esa. 25:8; 33:24) Ku ni minchumu leyi swoswi u  navelaka ku yi tiva kambe swi kalaka swi nga koteki? Ku nga va swaku wa swi navela ku djondza swilo swa swinyingi hi swiharhi? Ku djondza ku chaya nchumu xa ku fana ni vhiyola, piyanu kumbe swin’wani? Kumbe ku djondza ku dezenyara? Hinkwaswu leswo u ta swi kota ku swi yendla aparadesi hikusa u ta va ni nkama wa ku yenela naswona u ta swi yendla hi ndlela ya ku hlamalisa ya ku ni ku yi pimisa a wu nge yi pimisi swoswi. Aparadesi ku ta tlhela ku laveka vanhu lava nga ta dezenyara tiyindlo leti nga ta yakiwa, lava nga ta ti yaka, lava nga ta rima masimu, lava nga ta hlayisa majardim, lava nga ta sweka, va hamba materiyali ni mintirho yin’wani ya ku lunghisa swilo leswi nga ta va kona seniyani. (Esa. 35:1; 65:21) Phela ku vula ntiyiso, a wutomi aparadesi li ta nandziha hintamu.

¹² Hi ta hoyozela maxaka ya hina ni vanghanu va hina lava nga fa. (Min. 24:15) Hi ta djondza swilo swa swinyingi hi Yehovha hi ku txuvukisela ntumbuluku. (Ps. 104:24; Esa. 11:9) Funtshi xa ku tsakisa hintamu hileswaku a hi nga ha ta tshamela ku phazama hikusa a hi nga ha ta va ni xidjoho. Hi ta gandzela Yehovha na hi nga biwi hi lipfalu. Indjhe swa twala kuva u luzekeliwa hi swilo hinkwaswu leswi hi mhaka “ku tikhorisa hi xidjoho swa nkamanyana” swoswi? (Heb. 11:25) Tiyiseka swaku a ku na xa ku yampsa lexi misava leyi yi nga ku nyikaka xona ku tlula ku va u tikhorisa hi minkateko leyi Yehovha a hi tshembisaka yona ka nkama lowu taka. Phela namuntlha ho vulavula ntsena hi wutomi la ku kala li nga heli kambe ka nkama lowu taka hi to maha hi ku li hanya kunene. Funtshi hi nga tiyiseka swaku leswo swi ta yendleka hikusa hambi hi N’wana wa yena Yehovha a ze a mu nyikela hileswi a hi rhandzaka.

KHENSA LIRHANDZU LA YEHOVHA

13. Hi nga mu kombisa ku yini Yehovha swaku ha mu khensa hi lirhandzu la yena? (2 Vakorinto 6:1)

¹³ Hi nga swi kombisa ku yini swaku ha mu khensa Yehovha hi ku va a rhumele N’wana wa yena Yesu leswaku a hi fela? Hi nga yendla leswo hi ku va hi rhangisa Yehovha ka wutomi la hina. (Mat. 6:33) Leswo swi yelana ni leswi mupostolo Pawulo a nga swi vula. Yena a te: “[Yesu] a fele hinkwavu leswaku lava hanyaka va nga ha tihanyeli, kambe va hanyela lweyi a nga va fela a tlhela a pfuxiwa.” (2 Ko. 5:15) Leswi Yehovha a nga hi yendlela swilo swa swinyingi swaswinene a tlhela a hi rhwalela swidjoho swa hina, loko hi mu rhangisa ka wutomi la hina swo fana ni loko hi ku: “Khanimambu hi leswi u hi yendlelaka swona.” — Lerha 2 Vakorinto 6:1.

14. Hi nga swi kombisisa ku yini swaku ha swi tshemba leswi Yehovha a hi byelaka swaku hi swi yendla?

¹⁴ Xin’wani hi nga xi yendlaka kuva hi mu komba Yehovha swaku ha mu khensa hi leswi a hi yendlelaka swona i ku mu tshemba ni ku yendla leswi a hi byelaka swona. Hi xikombiso, loko hi lava ku yendla swiboho swa ku fana ni swaku hi ta djondza univhersidadi kumbe nada, hi ta wu yamukela ntirho lowu kumbe a hi nga ta wu yamukela, minkama hinkwayu hi lava ku rhanga hi ku pimisa hi swaku i mpsini leswi Yehovha a lavaka swaku hi swi yendla ka mhaka leyi. (1 Ko. 10:31; 2 Ko. 5:7) Loko hi yendla leswi Yehovha a swi lavaka, wunghanu la hina na yena li ta tiya, lipfumelo la hina li ta tiya naswona ntshembo wa hina na wona wu ta tiya. — Rom. 5:3-5; Yak. 2:21, 22.

15. Hi nga mu kombisa ku yini Yehovha swaku ha mu khensa hi nkama wa Xitsundzuxu?

 ¹⁵ Swin’wani hi nga swi yendlaka leswaku hi khensa lirhandzu la Yehovha, i ku yendla hinkwaswu hi nga swi kotaka hi nkama lowu wa Xitsundzuxu swaku hi kombisa leswaku ha wu khensa nkutsulu. Hi nga tilunghiselela kahle swaku hi va kona ka Xitsundzuxu hi tlhela hi rhamba ni van’wani swaku na vona va va kona. (1 Tm. 2:4) Nkama lowu hi va rhambaka hi nga va tlhamusela swaku Xitsundzuxu xi yendlisiwa ku yini. Hi nga tlhela hi va komba mavhidiyo lawa ma kumekaka ka jw.org lawa ma nga ni nhlokomhaka leyi nge Hayini Yesu A File? ni leli nge Khumbuka Lifu la Yesu. Na wona madoda ma nga londzola nkama lowu swaku ma rhamba vanhu lava se i nga khale na va nga ti mintlhanganwini. Phela ku tsakiwa hintamu atilweni funtshi ni vamakwerhu lani misaveni va tsaka loko munhu lweyi a a holile a tlhela a vuyela abandleni. (Luk. 15:4-7) Se, hi siku la Xitsundzuxu zama ku losa vanhu hinkwavu lava va nga ta va kona, ngopfungopfu vanhu lava va ngo sungula ku ya mintlhanganwini kumbe vanhu lava se a va ni nkama wa wunyingi na va nga yi mintlhanganwini. Yendla swaku hinkwavu va titwa na va yamukelekile! — Rom. 12:13.

16. Hi mhaka muni swi li swinene ku yengesela leswi hi swi yendlaka ka ntirho wa ku chumayela hi nkama wa Xitsundzuxu?

¹⁶ Xin’wani lexi hi nga xi yendlaka hi nkama lowu wa Xitsundzuxu kuva hi komba Yehovha na Yesu leswaku ha va khensa hi hinkwaswu leswi va nga hi yendlela swona, i ku yengesela leswi hi swi yendlaka ka ntirho wa ku chumayela. Loko hi yendla leswo hi ta ya hi mu vona Yehovha loko a hi seketela, se leswo swi ta yendla swaku hi ya hi mu tshemba hintamu. (1 Ko. 3:9) Hi nga tlhela hi lerha tindzimana leti ti fambisanaka ni Xitsundzuxu leti ti nga ka Tsalwa La Siku ni ka xibukwana xa mintlhanganu. Hi nga tlhela hi tirhisa tindzimana toleto leswaku hi yendla djondzo ya hina ya Bibele.

17. I mpsini leswi tsakisaka Yehovha? (Vona ni kwadru leli nge “ U Nga Yendla Yini Swaku U Khensa Lirhandzu La Yehovha?”)

¹⁷ Swi nga yendleka hi mhaka ya swiyimu leswi u kumanaka na swona u nga swi koti ku tirhisa hinkwaswu leswi hi nga djondza hi swona ka nhlokomhaka leyi. Se, u nga titwi nandzu hi mhaka leswo, khumbuka swaku Yehovha a nga fanisi leswi wena u swi yendlaka ni leswi van’wani va swi yendlaka kambe a vona leswi nga ka mbilu ya wena. Yena wa tsaka hi ku vona swaku u yendla leswi nga ka matimba ya wena leswaku u mu komba leswaku wa mu khensa hileswi a nga hi nyika nkutsulu. — 1 Sa. 16:7; Mar. 12:41-44.

18. Hi mhaka muni hi fanele hi khensa Yehovha na Yesu?

¹⁸ Nkutsulu i prezenti la lisima hintamu leli Yehovha a nga hi nyika lona. Phela ko va nkutsulu ntsena lowu wu yendlaka leswaku hi rivaleliwa swidjoho swa hina, hi va ni wunghanu la ku tiya na Yehovha hi tlhela hi va ni ntshembo wa ku kuma wutomi la ku kala li nga heli. Se, a hi yendleni hinkwaswu hi nga swi kotaka leswaku hi komba Yehovha leswaku ha mu khensa hi hinkwaswu leswi a nga hi yendlela swona ni hi lirhandzu leli a nga na lona hi hina. (1 Yo. 4:19) A hi tlheleni hi yendla hinkwaswu leswi hi swi kotaka leswaku hi komba Yesu swaku ha mu khensa hi lirhandzu lalikulu leli a nga hi komba lona a za a nyikela hi wutomi la yena swaku a hi fela! — Yoh. 15:13.