1. I yini leswi hinkwerhu hi faneleke hi swi yendla?

 SIKU ni siku swi lava hi yendla swiboho ka wutomi la hina. Swin’wani swaswikulu kasi swin’wani swaswitsongo. Hi xikombiso, swi nga ha lava hi yendla xiboho xa leswaku hi ta dla yini hi siku lolelo kumbe hi ta yetlela nkama muni. Kambe ku ni swiboho swin’wani swaswikulu hintamu leswi hi faneleke hi swi yendla, leswi khumbaka wutomi la hina, ndjangu wa hina ni ndlela leyi hi mu tirhelaka hi yona Yehovha. Ku nga na mhaka swaku hi swini swiboho swa kona, hi lava leswaku swi hi yendla hi tsaka, hina ni ndjangu wa hina. Naswona ku tlula hinkwaswu, hi lava leswaku swi tsakisa Yehovha. — Rom. 12:1, 2.

2. Hi swini swilo swinharhu leswi nga hi pfunaka ku yendla swiboho swaswinene?

² Leswaku u yendla swiboho hi wutlharhi u fanele 1) u tiva mhaka hinkwayu, 2) u tiva swaku Yehovha a xi vonisa ku yini xiyimu xolexo u tlhela 3) u pimisa kahle hi leswi u nga ta swi langa. Se nhlokomhaka leyi, yi ta hi pfuna ku vona swaku hi nga ti fikelelisa ku yini tipontu leti tinharhu ni swaku ku twisisa ni ku pimisa kahle swi nga hi pfunisa ku yini leswaku hi yendla swiboho swaswinene. — Swiv. 2:11.

KAMBELA MHAKA HINKWAYU

3. Hi mhaka muni swi li swinene ku yi kambela kahle mhaka na hi nga se yendla xiboho? Nyikela xikombiso.

³ Leswaku hi yendla swiboho swaswinene ka wutomi la hina, hi fanele hi rhanga hi ku kambela swilo hinkwaswu. Leswo i swa lisima hintamu! Pimisa hi munhu lweyi a vabyaka, a yaka xibelhela leswaku a ya dahiwa mavabyi ya yena. U pimisa swaku dotori a a to tekela ku mu nyika murhi na a nga rhanganga hi ku mu vutisa kahle leswi a swi twaka ni ku kambela mavabyi ya yena? A a nga ta swi yendla leswo! Ku fana ni leswi dotori a rhangaka hi ku kambela kahle mavabyi swaku a tiva murhi wawunene wa ku nyika lweyi a vabyaka, na hina hi fanele hi rhanga hi ku kambela swilo hinkwaswu  na hi nga se yendla xiboho xa lisima ka wutomi la hina. A hi voneni swaku hi nga swi yendlisa ku yini leswo.

4. Hi ku ya hi Swivuriso 18:13, i mpsini leswi nga ku pfunaka ku kambela mhaka hinkwayu? (Vona mufoto.)

⁴ Lexi nga hi pfunaka ku kambela mhaka hinkwayu i ku yendla swivutiso. Hi xikombiso, a hi nge ku ni munhu lweyi a nga hi rhamba swaku hi ya ka fexta. Leswaku hi yendla xiboho xa leswaku hi ta famba kumbe a hi nga ta famba fexteni, ngopfungopfu loko hi nga mu tivi kahle munhu wa kona, swi lava hi mu yendla swivutiso swa ku fana ni leswi: “I vamani van’wani va nga rhambiwa ka fexta lolelo? I mani lweyi a nga ta rhangela? Ku ta va ni vanhu vangani? Li ta yendliwa siku muni kumbe nkama muni? I mpsini leswi nga ta yendliwa? Ku nga va swaku ku ta va ni byala?” Phela ku tiva tinhlamulu ta swivutiso leswi swi nga hi pfuna hintamu ku yendla swiboho swaswinene. — Lerha Swivuriso 18:13.

5. Loko se u tive mhaka hinkwayu, u fanele u yendla yini?

⁵ Loko se u tiva tinhlamulu ta swivutiso leswi hinkwaswu, u nga ha tivutisa u ku: ‘Ku nga va leswaku ka fexta lolelo ku ta va ni vanhu lava kalaka va nga hanyi hi minawu ya Yehovha? Ku ta va ni munhu lweyi a nga ta vonelela swaku ku nga phuziwi byala ku tlula mpimu? Fexta lolelo li ta gamisa ku yini?’ (1 Pe. 4:3) U nga ha tlhela u tivutisa swaku ku ya ka fexta lolelo, a swi nga ta yendla swaku swi ku karhatela ku va kona ka mintlhanganu ya bandla ni ka ntirho wa ku chumayela? Ku pimisa hi swivutiso leswo swi ta ku pfuna leswaku u yendla xiboho xaxinene. Kambe kuva u pimisa hi leswo a swi yenelanga. U fanele  u tlhela u pimisa swaku Yehovha a titwisa ku yini hi xiyimu xolelo. — Swiv. 2:6.

PIMISA HI LESWI NGA TA TSAKISA YEHOVHA

6. Hi ku ya hi Yakobe 1:5, hi mhaka muni hi fanele hi khongela ka Yehovha loko hi lava ku yendla xiboho?

⁶ Leswaku u kota ku yendla swiboho swaswinene, khongela u kombela Yehovha leswaku a ku pfuna ku twisisa leswi yena a xi vonisaka xiswona xiyimu xa wena. Loko u yendla leswo, Yehovha a ta ku nyika wutlharhi leswaku u kota ku yendla xiboho lexi nga ta mu tsakisa, hikusa yena a “nyika [wutlharhi vanhu] hinkwavu hi mbilu ya ku basa.” — Lerha Yakobe 1:5.

7. Loko u lava ku yendla xiboho, u nga swi tivisa ku yini leswi Yehovha a swi pimisaka? Nyikela xikombiso.

⁷ Loko se u khongelile u kombela swaku Yehovha a ku pfuna, zama ku vona swaku hi yini nhlamulu leyi a nga ku nyika yona. Pimisa hi leswi: A hi nge u le ku yendzeni, u gama u lahleka ndlela. I ntiyiso swaku a wu ta kombela ku pfuniwa hi munhu wa ndhawu yoleyo funtshi ha tiyiseka swaku a wu nga ta suka u famba na a nge se ku hlamula, kambe a wu ta nyima u mu yingisela kahle leswaku u swi twisisa leswi a ku byelaka swona. Se swa fana ni loko hi khongelile hi kombela Yehovha swaku a hi nyika wutlharhi; swi kahle kuva hi zama ku vona swaku Yehovha a hi hlamulisa ku yini. Hi nga yendla leswo hi ku lerha Bibele hi tlhela hi kambela swaku hi yini minawu ni matshinya ya minawu lawa ma tirhaka ka xiyimu xa hina. Hi xikombiso, loko va ku rhamba ka fexta, na u nga se yendla xiboho xa leswaku u ta famba kumbe a wu nga ta famba, swi nga va kahle kuva u kambela swaku Bibele li li yini hi mafexta,  vanghanu va ku biha, ni swaku li li yini hi ku rhangisa Mfumu wa Xikwembu ka wutomi la hina ku tlula ku rhangisa leswi hina hi swi lavaka. — Mat. 6:33; Rom. 13:13; 1 Ko. 15:33.

8. U nga yendla yini swaku u tiva leswi Yehovha a swi lavaka ka xiyimu lexi u nga ka xona? (Vona mufoto.)

⁸ Minkama yin’wani, swi nga ha lava u pfuniwa leswaku u twisisa swaku Yehovha a pimisa yini hi xiyimu lexi u nga ka xona. Loko u li ka xiyimu xa ku fana ni lexo, u nga ha kombela makwerhu lweyi a nga ni xiperiyensiya leswaku a ku pfuna. Kambe i swinene kuva u tiyendlela mapexkiza hi wexe. Leswaku u yendla mapexkiza wolawo u nga ha tirhisa buku leli nge Tindzimana Leti Hi Pfunaka Ku Tirhela Yehovha kumbe Nkongomiso Wa Ku Yendla Pexkiza Wa Timboni Ta Yehovha. Minkama hinkwayu, khumbuka leswaku hi lava ku yendla xiboho lexi nga ta tsakisa Yehovha.

9. I yini leswi nga hi pfunaka ku tiva swaku xiboho lexi hi nga ta xi yendla xi ta mu tsakisa Yehovha? (Vaefeza 5:17)

⁹ Hi nga swi tivisa ku yini swaku xiboho lexi hi lavaka ku xi yendla xi ta mu tsakisa hikakunene Yehovha? Hi fanele hi mu tiva kahle! Bibele, ka Swivuriso 9:10 li vula swaku “ku tiva Lweyi Wa Ku Kwetsima Hintamu i ku twisisa.” Leswi nge ku twisisa swi vula ku mu tiva kahle Yehovha, ku tiva wumunhu la yena, leswi a lavaka ku swi yendla, leswi a swi rhandzaka ku patsa ni leswi a swi nyenyaka. Se na u nga se yendla xiboho, tivutisi leswi: ‘Hi ku ya hi leswi ni mu tivisaka xiswona Yehovha, indjhe a ta tsaka loko no yendla xiboho lexi?’ — Lerha Vaefeza 5:17.

10. Hi mhaka muni swi li swa lisima ku tirhisa leswi nga ka Bibele ku tlula leswi laviwaka hi maxaka ya hina?

¹⁰ Swiboho swin’wani leswi hi nga ta swi yendla leswi tsakisaka mbilu ya Yehovha, swi nga ha yendla swaku vanhu van’wani lava hi va hloniphaka va ku fana ni vapsali va hina ni van’wani, va nga tsaki. Hi xikombiso, swi nga ha yendleka vapsali van’wani, hi ku rhandza n’wana wa vona ni ku lava leswaku a hlayiseka, va mu sindzisa swaku a chada ni djaha leli nga ni male ya yinyingi kumbe leli nga tinyimisela ku hakela male ya yinyingi ka lovolo, hambileswi djaha lolelo li kalaka li nga na wunghanu la ku tiya na Yehovha. Loko ntombhi yi li ka xiyimu xa ku fana ni lexo, yi nga ha tivutisa swaku i mani lweyi a nga ta yi pfuna swaku yi tama yi va ni wunghanu la ku tiya na Yehovha. Yi nga ha tlhela yi tivutisa swaku i mpsini leswi Yehovha a swi pimisaka hi xiyimu xa yona. Ka xiyimu xa ku fana ni lexo, ntombhi yi nga ha pfuniwa hi Matewu 6:33, hikusa ndzimana leyi yi li: “Tamani mi lava Mfumu ni ku lulama ka Xikwembu ku sungula.” Hambileswi hi hloniphaka vapsali va hina ni vanhu van’wani, loko hi yendla swiboho hi lava ku tiyiseka swaku ha mu tsakisa Yehovha!

PIMISA HI LESWI U NGA TA SWI LANGA

11. Hi ku ya hi Swivuriso 2:11, i mpsini leswi nga ta ku pfuna ku langa kahle leswi u nga ta swi yendla?

¹¹ Loko se u swi tiva leswi Bibele li swi vulaka hi xiboho lexi u lavaka ku xi yendla, u fanele u “pimisa kahle” hi leswi u nga ta swi langa. (Lerha Swivuriso 2:11) Phela ku pimisa kahle swi ta ku pfuna kuva u vona leswi swi nga ha tshukaka swi yendleka loko se u langile leswi u nga ta swi yendla. Minkama yin’wani swa vevuka ku yendla xiboho, kambe ku ni swiboho leswi swi karhataka ku swi yendla. Se hi lanu swi lavekaka hintamu kuva u pimisa kahle hileswi se u swi tivaka hikusa leswo swi ta ku pfuna ku yendla xiboho xaxinene.

12-13. Ku pimisa kahle swi nga ku pfunisa ku yini swaku u wu langa kahle ntirho?

¹² Pimisa hi leswi: A hi nge u lavetela ntirho swaku u ta hlayisa ndjangu wa wena, se u kuma mintirho yimbirhi leyi kalaka yi nga lwisani ni minawu ya Yehovha. Leswaku u langa ntirho lowu u nga ta wu yendla, u nga ha kambela swaku i ntirho wa ku tshamisa ku yini, u ta heta nkama muni na u yendza u ya ntirhweni ni swaku u ta heta nkama muni na u tirha. Phela leswi mintirho leyo yi kalaka yi nga lwisani ni minawu ya Bibele, swi nga yendleka u langa lowu u wu rhandzaka kumbe lowu wu holelaka male ya yinyingi. Kambe  leswo a swi yenelanga, ku ni swin’wani leswi u faneleke u pimisa hi swona na u nga se yendla xiboho.

¹³ Hi xikombiso, u nga ha tivutisa u ku: ‘Ntirho lowu, a wu nga ta yendla swaku swi ni karhatela ku va kona mintlhanganwini? Ntirho lowu, a wu nga ta yendla swaku ni nga ha wu kumi nkama wa ku yenela wa ku va ni ndjangu wa mina ni ku wu pfuna swaku wu tama wu tiyisa wunghanu la wona na Yehovha?’ Ku pimisa hi swivutiso swa ku fana ni leswi, swi ta hi pfuna swaku hi tiyiseka leswaku hi rhangisa swilo “swa lisima hintamu,” ku nga ku hlayisa wunghanu la hina na Yehovha ni leswi swi laviwaka hi ndjangu wa hina ku tlula ku rhangisa male ni leswi hina hi swi rhandzaka. Loko hi yendla leswo, hi nga tiyiseka swaku Yehovha a ta katekisa xiboho lexi hi nga ta xi yendla.

14. Ku pimisa kahle ni lirhandzu swi nga hi pfunisa ku yini swaku hi nga ‘wisi van’wani?’

¹⁴ A ku pimisa kahle swi ta tlhela swi hi pfuna ku vona swaku swiboho swa hina swi ta va khumbisa  ku yini van’wani hikusa a hi swi lavi ku yendla nchumu lexi ‘xi nga ta wisa van’wani.’ (Filp. 1:10) Phela ku pimisa hi leswo swi nga hi pfuna nkama hi langaka leswi hi nga ta swi yambala kumbe ndlela leyi hi nga ta tisasekisa hi yona. Hi xikombiso, swi nga yendleka ku ni mayambalelo lawa hi ma tsakelaka kumbe ku ni ndlela leyi hi rhandzaka ku tisasekisa hi yona, kambe swi kahle kuva hi tivutisa swaku kasi vanhu van’wani kumbe vamakwerhu abandleni va titwisa ku yini hi leswi ni yambalisaka xiswona kumbe ndlela leyi ni tisasekisaka hi yona. Se ka xiyimu lexo, ku pimisa khale swi ta hi pfuna kuva hi hlonipha mavonelo ya vona ka mhaka leyi hi tlhela hi yambala hi ndlela ya ku hlonipheka. Funtshi loko hi va rhandza van’wani, hi ta rhangisa leswi laviwaka hi vona ku tlula leswi laviwaka hi hina. (1 Ko. 10:23, 24, 32; 1 Tm. 2:9, 10) Ku pimisa hi swilo leswi hinkwaswu, swi ta hi pfuna ku yendla xiboho lexi nga ta kombisa swaku ha va rhandza funtshi ha va hlonipha vanhu van’wani.

15. U fanele u pimisa hi yini na u nga se yendla xiboho xa lisima?

¹⁵ Loko u lava ku yendla xiboho xa lisima hintamu, u fanele u pimisa kahle hi hinkwaswu leswi nga ta laveka ka xiboho lexi u nga ta xi yendla. Hi xikombiso, Yesu a vule leswaku loko munhu a lava ku yaka yindlo a fanele a rhanga hi ‘ku tshama hansi a hamba tikonta.’ (Luk. 14:28) Leswi nge, u fanele u pimisa hi swaku swi ta lava nkama muni, male muni ni swaku swi ta lava u yendla yini leswaku xiboho lexi u nga ta xi yendla xi famba kahle. Minkama yin’wani swi nga ha lava u kombela mavonelo ka ndjangu wa wena hikusa van’wani andjangwini va nga ha va ni mavonelo lawa ma nga ku pfunaka leswaku u yendla xiboho xaxinene. Phela loko u kombela mavonelo ka vandjangu wa wena leswaku u yendla xiboho, swi ta va kahle hikusa swi ta yendla leswaku hinkwenu mi tirhisana kuva swilo swi famba kahle. — Swiv. 15:22.

YENDLA SWIBOHO HI WUTLHARHI

16. I mpsini leswi u nga swi yendlaka kuva u yendla xiboho xaxinene? (Vona kwadru leli nge “ I Mpsini Leswi Nga Ku Pfunaka Ku Yendla Swiboho Swaswinene?”)

¹⁶ Loko se u yendle leswi hi nga djondza hi swona ka nhlokomhaka leyi, ku nga ku kambela swilo hinkwaswu, u vona leswi Yehovha a swi pimisaka hi mhaka ya kona, se u ta va u lunghekile kuva u yendla xiboho xaxinene. Phela lowu se i nkama wawunene wa ku khongela ka Yehovha u mu kombela leswaku a katekisa xiboho xa wena.

17. I yini leswi nga ku pfunaka ku yendla swiboho swaswinene?

¹⁷ Hambiloko se u ni malembe ya manyingi na u yendla swiboho swaswinene ka wutomi la wena, khumbuka swaku o va Yehovha ntsena lweyi a nga ku pfunaka ku yendla swiboho swaswinene, ku nga li wutivi la wena kumbe xiperiyensiya lexi se u nga na xona. Phela i Yehovha ntsena lweyi a nga ku pfunaka swaku u va ni wutivi, ku twisisa u tlhela u pimisa kahle, leswi nga ta ku pfuna ku yendla swiboho hi wutlharhi. (Swiv. 2:1-5) Funtshi loko u mu tshemba, minkama hinkwayu a ta ku pfuna leswaku u yendla xiboho lexi nga ta mu tsakisa. — Ps. 23:2, 3.