Ni psaliwile aEstados Unidos hi 1954 naswona a kaya ahi khongela a Katolika. Hi psaliwile na hi li 5, mina ni wawumbirhi. A nkama na nili mutsongo ani djondza Katikeza, funtshi ani pfunisa padre akerekeni kambe aninga tivi nchumu hi Bibele. Hambileswi ani kholwa swaku kuni Xikwembu lexi xinga tumbuluxa swilo hinkwaswu kambe aningati tshembi tikereke.

Na naha kusungula kuhamba a kursu la direitu a William Mitchell, ni yendzeliwe hi Timboni ta Yehovha a kaya. Leswi vangani kuma nani hlampsa mpahla niva byele swaku ava ti hi siku lin’wana. A siku vanga ta hi lona niva vutisile swivutiso swimbirhi leswinge: “Hi mhaka muni vanhu vavanene va hlupheka kuve va kubiha swiva fambela kahle?” naswona “Hinga yendla yini swaku hi tsaka?” Vani nyike buku lelinge Ntiyiso Lowu Yisaka Vuton’wini Lebyi Nga Heriki ni Bibele la kusaseka leli alini kapa la verde la Vuhundzuluxeri bya Misaya Leyimpsha naswona ni pfumelile leswaku vani djondzela Bibele. Leswi ningaswi djondza ka Bibele swini pfule matihlo.  Ni tsakisiwile hi kutiva swaku Mfumu wa Xikwembu hi wona wungata fuma vanhu lani misaveni. Ni vone swaku mimfumu ya vanhu ayiswi koti kuhetisisa leswi yiswi tshembisaka naswona hi yona yi yendlaka swaku vanhu va xaniseka.

Hi 1982 ni tinyiketelile ka Yehovha ni tlhela ni tsakamisiwa ka Kongresu leyi ayi ni nhlokomhaka leyinge: “Ntiyiso hi Mfumu wa Xikwembu”, leyinga va kona a centro cívico la Minnesota aEstados Unidos. Ka vhiki lelinga landzela ni tlhele ni ya a centro cívico aMinnesota niya hamba a enzame ya kuva adivhogado. Se hi Outubro ni byeliwile swaku ni pasile ka enzame yolelo funtshi na faneleka kuva adivhogado.

Ka Kongresu leli a li ku: “Ntiyiso hi Mfumu wa Xikwembu” ni tlhangane na Mike Richardson lweyi a atirha aBetele la Brooklyn aNova York. Ani tlhamusele swaku aBetele a kulaveka va adivhogado. Ni tekele kukhumbuka marito ya mutheniwa wa Muyetiyopiya lawa manga tsaliwa ka Mintirho 8:36 ni gama ni tivutisa leswi: ‘I ntxini xini sivelaka kuya tirha aBetele?’ Ni vhele ni prenxera petição la kuya aBetele.

Vapsali va mina ava tsakanga nkama vanga tiva swaku ni Mboni ya Yehovha. Papayi ani vutisile swaku kutirha aBetele switani pfuna hi yini ka ntirho wa mina wawu adivhogado. Nimu tlhamuselile swaku no lava kutinyikela niva vholuntariyu ni tlhela nimu byela swaku vatani nyika 75 dolares hi wheti, kunga male leyi ayi nyikiwa vabetelita hi nkama wolowo.

Aswi kotekanga swaku ni tekela kuya tirha aBetele hikusa ani kusungule kutirha atribunali. Hi mhaka leyo ni sungule kuya tirha aBetele la Brooklyn hi 1984, va vhele vani veka ka departamentu leli ali tirha hi swa minawu. Leswi aswi li kahle hikusa xiperiyensiya lexi ninga xi kuma na ni tirha atribunali axitani pfuna ka ntirho lowu.

Hi Novembro wa 1983 kuxaviwe Salão la Mateyatru la Stanley leli kumekaka ka doropa la New Jersey. Vamakwerhu va kombele kupfumeleliwa kulunghisa mati ni maghezi ka Salão leli. Vaye awuhosini vayava tlhamusela swaku ava lava swaku a Salão leli la Mateyatru liva Salão la Masembleya la Timboni ta Yehovha. Tihosi ati pfumelanga hikusa nawu wa tiko awu tsimbisa swaku kusuhi ni miminti kuva ni tikereke. Xin’wana lexi xingava yendla va yala hi leswaku Salão la Mateyatru ali kumekela doropeni lomu  vanhu ava hamba kona manegosiyu. Vamakwerhu va kombele swaku wuhosi li tlhela li kambisisa mhaka leyi kambe li yalile.

Ka vhiki leli ninga sungula kutirha aBetele, nhlengeletanu yi teke mhaka leyi yiyi yisa atribunali swaku yiya kambisisiwa. Leswi ninga tirha malembe mambirhi ka tribunali la Minnesota aniswi tolovelile kuthetha timhaka ta kufana ni leti. Mun’we wava adivhogado va hina a tlhamusele swaku a Salão leli la Mateyatru ali tirhisiwile ngopfu hi xitshungu swaku va sixtira mafilmi ni kuyendla swipetakulu, se hi mhaka muni swoswi vanga pfumeli swaku Ii tirhiseliwa swa wukhongeli? Tribunali li vule swaku a wuhosi ali yendla xihoxo hi kukala linga hloniphi chunseko wa hina wa wukhongeli. Tribunali li byele wuhosi swaku li fanele lihi pfumelela a kutirhisa a Salão leli. Kolanu ni tekele kuswi vona swaku Yehovha a akatekisa nhlengeletanu ya yena a tlhela a yendla swaku ntirho wa yena wuya mahlweni. Ni tsakile hintamu leswi na mina ninga pfunisa ka ntirho lowu.

Vamakwerhu va vhele va sungula kupfuxeta Salão leli la Mateyatru swaku li va Salão la Masembleya naswona na kunge se hundza lembe hi siku la 8 ka Setembro wa 1985, a turma lawu 79 la Jiliyadi li graduwarile ka Salão leli la Masembleya. Ni tsakile hintamu leswi ninga pfunisa ka ntirho lowu wa Yehovha naswona leswi ninga tsakisa xiswona swi tlula ni nkama lowu ani tirha atribunali. Kambe aningaswi tivi swaku kaha ni minkateko ya yinyingi leyi Yehovha a alava kuni nyika yona.

Hi ma 1980 vadotori avangaxi hloniphi xikombelo xa Timboni ta Yehovha xa kukala tinga cheliwi ngati, ngopfungopfu vavasati lavanga ni tinyimba, a mfumu awunga pfumeli loko va yala kucheliwa ngati. Ava vula swaku loko va yala vanga fa kusala vana.

Hi 29 ka Dezembro wa 1988 makwerhu Denise Nicoleau a luze ngati ya yinyingi nkama na a phuluka. Leswi emoglobina ya yena ayi xikile yiya ka 5, dotori a alava kumu chela ngati kambe makwerhu Denise a yalile. Hi mundzuku wa kona vadotori va ye tribunali swaku vaya kombela mpfumelelo wa leswaku vamu chela ngati, a tribunali li pfumelile swaku vamu chela ngati na vanga zanga va bula na yena kumbe nuna wa yena.

Loko va vuya hi tribunali va fike vamu chela ngati hambileswi nuna wa yena ni maxaka ya yena ava yala. Hi siku lolelo maxaka ya yena ni doda lin’we kumbe mambirhi va khomiwile hileswi ava sima swaku makwerhu Denise anga cheliwi ngati. Hi mundzuku wa kona hi 31 ka Dezembro, ka telejornali, ka radiyu ni ka majornali  a kuvulavuliwa hi vamakwerhu lavanga khomiwa.

Hi Segunda-feira nimixo ni vulavule ni juiz wa tribunali supremu Milton Mollen. Nimu tlhamusele hinkwaswu leswinga humelela nimu byela swaku kuni juiz lweyi anga nyikela nawu wa kucheliwa munhu ngati na anga pfumelanga. Se juiz Mollen ani byele swaku ni ya ninhlikani hita kambisisa nawu lowu vulavulaka hi mhaka leyi. Ni fambe ni superitendente wa departamamentu la hina, makwerhu Philip Brumley. Se juiz Mollen a rhambe ni va adivhogado va xipiritani swaku na vona vava kona. Phela ati vuya hi siku lelo. Minkama yin’wana makwerhu a apfa ani tsalela mensaji a ku: “Tikhominyana nduwena”. Phela leswo swini pfunile hikusa ani sungula kukwata na ni zama kukombisa swaku leswi vangaswi yendla xipiritani aswinga li kahle.

Loko se kuhundze wora, juiz Mollen a vule swaku mhaka leyi akuta va mhaka ya kusungula kubuliwa hi yona mundzuku nimixo. Nkama hi humaka, juiz Mollen a vule swaku mundzuku ka kona “ayi tava tikela mhaka” va adivhogado va xipiritani. Leswo swi vula swaku aswitava karhatela kutlhamusela swaku hi mhaka muni va sindzisile makwerhu Denise swaku a cheliwa ngati. Ni titwe ingaku hiloko Yehovha ohi tiyisekisa swaku ahita hlula ka mhaka leyi. Ni tsakile hintamu hi kuvona swaku Yehovha aahi tirhisa swaku a hetisisa kurhandza ka yena.

Hi tirhile wusiku wusiku nahi lunghisela leswi hingataswi vula mundzuku wa kona nimixo. Leswi atribunali ali li kusuhi ni Betele la Brooklyn, vamakwerhu lava ahi tirha na vona, na vona va yile. Loko va juiz hinkwavu va 4 va twile leswi hingaswi vula, va vule swaku aswinga fanelanga vamu sindzisile makwerhu Denise swaku a cheliwa ngati.

A tribunal supremu la Nova York li vule swaku makwerhu Denise aani direitu la kutenderiwa na anga cheliwi ngati. Ka 4 wa timhaka ta kuyelana ni kucheliwa ngati tinga thethiwa na nili kona leyi ave ya kusungula kuva hiyi hlula. (Vona kwadru lelinge: “ Kuhlula aTribunali Supremu.”) Ni ve kona loko kuthethiwa timhaka ta kuyelana niloko vapsali va lwetana hi n’wana, va divhorsiyara kumbe loko kuthethiwa timhaka ta kuvulavula hi minawu ya swa kuyaka.

Nkama ninga tiva nsati wa mina Dawn a adivhorsiyarile funtshi a ani 3 wa vana, a ali mupfuli wa ndlela funtshi a atirha swaku atihlayisa yena ni vana yena. Ani tsakisiwa hi leswaku a atinyimisele kutirhela Yehovha hambileswi a akumana ni swikarhatu swa swinyingi. Hi 1992 ahi li xikan’we ka Kongresu leli ali ni nhlokomhaka leyinge: “Portadores de Luz” aNova York naswona nimu gangisile. Hi hetile lembe nahi namorara hi gama hi chada. Kuva ni nsati lweyi a rhandzaka kuhlekaa tlhela a rhandza Yehovha i nkateko lowu taka hi ka Yehovha. Mina na Dawn siku ni siku ahi tshama nahi tsakile. — Swi. 31:12.

Ankama hinga chada n’wana wa yena wa kusungula a ani 16, mun’wana a ani 13 kasi mun’wana a ani 11 wa malembe. Leswi ani lava kuva papayi wa munene ka vona ni lerhile ni tlhela ni tirhisa hinkwaswu leswi ningaswi kuma ka mabuku ya hina leswi vulavulaka hi vapadraxtu. Hambileswi hinga va ni swikarhatu, na tsaka hileswi avani tshemba kufana ni munghanu wa vona ni papayi wa vona lweyi ava rhandzaka. A vanghanu va vana va hina avaswi rhandza kuta kaya naswona na hina ahiswi rhandza kuva na vona.

Hi 2013 mina na Dawn hi rhurhile hi ya Wisconsin hiya hlayisa vapsali va hina lava vanga guga. Lexingani hlamalisa avani tshikisanga kutirha Betele. Vani kombele swaku ni pfunisa Betele loko kuthethiwa timhaka.

Hi Setembro wa 2018 ni sungule kuvona swaku nkolo wa mina awunga li bom. Dotori ani kambelile kambe anga kumanga nchumu. Hi Janeiro wa 2019 dotori mun’wana a tsumbule swaku ni ni mavabyi ya kukarhata.

Loko kuhundze masiku manharhu ni tshoveke voko na ni tlanga hi kutsutsuma ka majelo. Hambileswi aniswi tolovelile kutsutsuma ka majelo funtshi aniswi rhandza, aniswi vona swaku hi kutsongo kutsongo aningahaswi koti kahle. Ni hlamalile hi kuvona swaku mavabyi ya mina ama ya ma piyorara, se aswini karhatela kuvulavula, kufamba hambi kuminta swakudla.

Na tsaka hileswi ninga pfunisa a Nhlengeletanu ya Yehovha hi ntirho wa mina wawu adivhogado naswona na tsaka hileswi ninga tsala mabuku ya manyingi lawa ma tirhisiwaka hi vadotori, va adivhogado ni va juiz. Naswona ani nyimelela vamakwerhu amisaveni hinkwayu swaku va ni direitu la kuva va dahiwa na vanga cheliwi ngati. Hambileswi ninga yendla swilo leswi hinkwaswu, ni titwa kufana ni marito ya Luka 17:10 lama nge: ‘Ni nandza lweyi angafaneliwiki kukhensiwa, niyendlile ntsena leswi anifanele niswiyendla.’