1. Hi kuya hi 3 Yohane 3, 4, i ntxini lexihi tsakisaka?

MUPOSTOLO Yohane a tsake hintamu loko a twa swaku lava angava pfuna swaku va djondza ntiyiso ava tama va tirhela Yehovha hi kutshembeka. Mupostolo Yohane a avona Vakreste lava, na va li vana va yena. Hi mhaka leyo a yendle hinkwaswu leswi angaswi kota akuva a tiyisa lipfumelo la vona hambileswi ava kumana ni swkarhatu. Na hina ha tsaka loko hi vona vana va hina kumbi lava hingava pfuna kutiva ntiyiso, va tinyiketela ka Yehovha va tlhela vamu tirhela hi kutshembeka. — Lerha 3 Yohane 3, 4.

2. Hi mhaka muni Yohane a tsale makarta?

² Swinga yendleka mupostolo Yohane a atshama aEfesa kumbe a kusuhi na kona hi lembe la 98 aminkameni ya vapostolo. Swinga yendleka aye aya tshama kona ankama anga huma djele aPatmosi. Hi nkama wolowo hi kupfuniwa hi moya wa kukwetsima wa Yehovha a tsale 3 wa makarta. Makarta lawa, ama tsaleliwe kupfuna Vakreste swaku va tama va tiyisa lipfumelo la vona ka Yesu ni kutama va tshama ka ntiyiso.

3. Hita kuma tinhlamulu ta swivutiso swini ka djondzo leyi?

³ Yohane hi yena anga gamisa kufa ka vapostolo hinkwavu, naswona a akarhatekile hileswi aku ni vaduki abandleni. * (1 Yoh. 2:18, 19, 26) Vaduki volavo ava tibyela swaku vaxi tiva Xikwembu kambe avangaxi yingisi. Ka nhlokomhaka leyi hita djondza leswi Yohane anga byela Vakreste volavo swaku va tivonela  ka swona. Naswona hita kuma tinhlamulu ta swivutiso swinharhu leswinge: I yini kuhanya hi ntiyiso? I mpsini swingahi tshikisaka ntiyiso? Naswona hingava pfunisa kuyini vamakwerhu swaku vangawu tshiki ntiyiso?

4. Hi kuya hi 1 Yohane 2:3-6 na 2 Yohane 4, 6, hi fanele hi yendla yini akuva hi hanya hi ntiyiso?

⁴ Swaku hi hanya hi ntiyiso hi fanele hi tiva ntiyiso lowunga ka Rito la Xikwembu. Xin’wana lexi hi faneleke hixi yendla i kuyingisa Yehovha. (Lerha 1 Yohane 2:3-6; 2 Yohane 4, 6.) Yesu a ayingisa Yehovha. Na hina hingamu yingisa hi kutekelela xikombiso xa Yesu. — Yoh. 8:29; 1 Pet. 2:21.

5. I ntxini lexi hi faneleke hi tiyiseka hi xona?

⁵ Swaku hi hanya hi ntiyiso hi fanele hi tiyiseka swaku Yehovha i Xikwembu xa ntiyiso naswona hinkwaswu leswi ahi byelaka swona hi kutirhisa Bibele i ntiyiso. Funtshi hi fanele hi pfumela swaku Yesu i Mesiya. Swoswi vanhu va vanyingi va kanakana swaku Yesu i Hosi ya Mfumu wa Xikwembu. Yohane a vule swaku akutava ni “vakanganyisi lavotala” lava avata kanganyisa vanhu lava kalaka vanga tiyanga ka ntiyiso. (2 Yoh. 7-11) Yohane a te: ‘I mani muhembi loko angali yena lweyi ayalaka leswaku Yesu hi yena Kriste?’ (1 Yoh. 2:22) Loko hinga lavi kukanganyisiwa hi fanele hi djondza Bibele. Leswo switahi pfuna kutiva kahle Yehovha na Yesu. (Yoh. 17:3) Naswona hita tiyiseka swaku hi kume ntiyiso.

6. Hi xini xikarhatu lexi Alise anga kumana na xona?

⁶ Vakreste hinkwavu va fanele va tivonela swaku vanga kanganyisiwi hi filozofiya. (1 Yoh. 2:26) Ngopfungopfu majovhem ma fanele ma tivonela ka mhaka leyi. Makwerhu Alise * wa le França lweyi anga ni 25 wa malembe a li: “Axikolweni ani djondza filozofiya ni swaku swilo swiyo tiyendlekela. Leswo swini yendle ni sungula kukanakana ntiyiso naswona ni sungule kuswi rhandza leswi avani djondzisa swona. Kambe, ni vone swi li kahle ni kambela leswi Bibele liswi djondzisaka, ninga kholwi hinkwaswu leswi vani djondzisa swona axikolweni.” Alise a sungule kudjondza buku lelinge: A Vida — Qual a Sua Origem? A Evolução ou a Criação? Naswona hi nkamanyana kukanakana loku a ali na kona kunyamalalile. A li: “Niswi vonile swaku Bibele li  djondzisa ntiyiso ni swaku kuhanya hi minawu ya lona swingani yendla ni tsaka ni tlhela ni va ni kurhula.”

7. Hi fanele hi tivonela ka yini naswona hi mhaka muni?

⁷ Vakreste hinkwavu va fanele va tivonela swaku vanga yendli ingi va tirhela Yehovha kuve va hanya hi swilo swa kubiha. Yohane a vule swaku ahingeswi koti kuhanya hi ntiyiso kuve hi ni mahanyelo ya kubiha. (1 Yoh. 1:6) Loko hi lava kutsakisa Yehovha, hi fanele hi khumbuka swaku minkama hinkwayu a vona swilo leswi hiswi yendlaka. Hambiloko vanhu vangaswi voni leswi hiswi yendlaka axihundleni, kambe Yehovha a vona hinkwaswu. — Hev. 4:13.

8. Hi fanele hi tivonela ka yini?

⁸ Hi fanele hi tivonela ka leswi vanhu vaxi vonisaka xiswona xidjoho. Mupostolo Yohane a te: ‘Loko hiku ahi na xidjoho hatikanganyisa ha hoxe, kutani ntiyiso awu kona ka hina.’ (1 Yoh. 1:8) Ankameni wa Yonane vanhu van’wana lavanga duka ava tibyela swaku vangaswi kota kuhanya hi xidjoho va tlhela va va vanghanu va Xikwembu. Ni namuntlha kuni vanhu lavanga ni mavonelo ya kufana ni ya vona. Vanhu va vanyingi va tibyela swaku va kholwa ka Xikwembu kambe ava pfumelelani ni leswi xiswi vulaka hi xidjoho, ngopfungopfu minawu leyi vulavulaka hi swa masangu. Vanhu va vula swaku munhu angaha hanyisa xileswi aswi lavisaka xiswona, hambi hi leswi Yehovha ange swi bihile.

9. Hi mhaka muni swi li swinene loko majovhem ma hanya hi leswi Bibele liswi djondzisaka?

⁹ Majovhem lamanga Timboni mangaha hlohloteliwa kuva ni mahanyelo ya kubiha axikolweni kumbe antirhweni. Hi swoleswo swinga humelela Alexandre. A li: “Tintombhi tin’wana axikolweni atini kombela swaku ni famba masangu na tona. Ava ku ni geyi hi mhaka leswi ni kalaka ninga namorari.” Leswi swinga humela Alexandre na hina swingahahi humelela. Kambe loko hi hanya hi leswi Bibele liswi djondzisaka hita vhikela lipfalo la  hina, hi tivhikela ka mavabyi naswona hita tama hi va vanghanu va Yehovha. Loko hinga pfumeli kuhluliwa hi ndzingo, switahi vevukela kuyendla swilo swa swinene loko hi tlhela hi kumana ni ndzingo wun’wana. Khumbuka swaku mavonelo ya kubiha lawa vanhu vanga na wona hi swa masangu ma ta hi ka Sathana. Se loko unga pimisi kufana ni vanhu va misava uta va ‘u hlule lweyi wobiha.’ — 1 Yoh. 2:14.

10. Buku la 1 Yohane 1:9, lihi pfunisa kuyini kutirhela Yehovha na hi ni lipfalo la kubasa?

¹⁰ Hi Yehovha lweyi a tivaka swa swinene ni swa kubiha. Se, hina hi fanele hi zama swaku hinga djohi. Kambe loko hi tshuka hi djoha, hi fanele himu byela swidjoho swa hina hinkwaswu hi xikhongelo. (Lerha 1 Yohane 1:9.) Kambe loko hi tshika hi yendla xidjoho xa xikulu, hi fanele hi ya ka madoda ya bandla lawa Yehovha angama veka swaku mahi pfuna. (Yak. 5:14-16) Kambe ahi fanelanga hi titwa nandzu hi mhaka swidjoho leswi hingaswi yendla malembe ndzhaku. Hi mhaka muni? Hikusa Yehovha Papayi wa hina wa lirhandzu a rhumele N’wana wa yena swaku ata fela swidjoho swa hina hita kota kurivaleliwa. Loko hi tisola hikakunene hi mhaka swidjoho swa hina Yehovha wahi rivalela hikusa axi kona lexingahi sivelaka kutirhela Yehovha na hi ni lipfalo la kubasa. — 1 Yoh. 2:1, 2, 12; 3:19, 20.

11. Hinga tivhikelisa kuyini ka mavunhwa lama djondzisiwaka hi vanhu lavanga duka?

¹¹ Hi fanele hi tivonela ka mavunhwa lama djondzisiwaka hi vanhu lavanga duka. Kusukela aminkameni ya vapostolo, Sathana a tirhisa vanhu lavanga duka swaku va yendla vanhu va Xikwembu va kanakana ntiyiso. Hi mhaka leyo, hi fanele hi tiva kuhambanisa ntiyiso ni mavunhwa. * Lava vahi nyenyaka vangaha hangalasa mavunhwa ka interneti kumbe ka ma-redes socias swaku vahi yendla hingahamu tshembi Yehovha ni vamakwerhu. Kambe, ahi  fanelanga hima tshemba mavunhwa wolawo hikusa mata hi ka Sathana. — 1 Yoh. 4:1, 6; Nhla. 12:9.

12. Hi mhaka muni hi fanele hi tiyisa lipfumelo la hina hi kudjondza Bibele?

¹² Leswaku hi tiyisela mindzingo ya Sathana, hi fanele hi tshemba Yesu hi tlhela hi kholwa swaku a tirhisiwa hi Yehovha kuva a yendla kurhandza ka yena. Hi tlhela hi tshemba swaku Yehovha a tirhisa Ntlawa lowu Rhangelaka kuva wu rhangela ntirho amisaveni hinkwayu. (Mat. 24:45-47) Naswona kudjondza Bibele siku ni siku swingahi pfuna kutiyisa lipfumelo la hina. Loko hi yendla leswo lipfumelo la hina lita tiya kufana ni nsinya lowu tiyisiwaka hi timintsu. Pawulo a vulavule hi mhaka leyo loko a tsalela bandla la Kolosa a ku: ‘Leswi miyamukeleke Yesu Kriste kuva Hosi ya n’wina, hanyani hikuva xilo xin’we na yena, na midzimile timintsu ni kuveka masungulu ya n’wina ka yena; tiyani kupfumeleni’. (Kol. 2:6, 7) Loko hi tirha hi matimba swaku hi tiyisa lipfumelo la hina, Sathana ni vanhu va yena avangataswi kota kuhi tshikisa ntiyiso. — 2 Yoh. 8, 9.

13. I mpsini leswinga tshukaka swihi humelela naswona hi mhaka muni?

¹³ Haswi tiva swaku vanhu va misava vahi nyenya. (1 Yoh. 3:13) Yohane a te: “Misava hinkwayu yi ka lweyi wobiha”. (1 Yoh. 5:19) Leswi misava ya Sathana yinga kusuhi ni kuhelisiwa, Sathana a ya a kwata hintamu. (Nhla. 12:12) Sathana anga tirhisi mahanyelo ya kubiha ni mavunhwa ya vanhu lavanga duka ntsena, a tirhisa ni vanhu swaku vahi xanisa va tlhela vahi kaneta. Sathana waswi tiva swaku a saleliwe hi nkama wawutsongo swaku a helisiwa. Hi mhaka leyo, a zama hinkwaswu leswi angaswi kotaka kuva a nyimisa ntirho wa kuchumayela a tlhela ahi tshikisa ntiyiso. Hi mhaka leyo, ahi hlamali loko ka matiko man’wana ntirho wa hina wa kuchumayela wu tsimbisiwa. Kambe lexi tsakisaka, vamakwerhu va tama va tiyisela. Leswo swi kombisa swaku hambiloko Sathana o yendla yini, vanhu va Yehovha vangaswi kota kutshama na va tshembekile.

14. Hingava pfunisa kuyini vamakwerhu swaku vanga tshiki ntiyiso?

¹⁴ Leswaku hi pfuna vamakwerhu vanga tshiki ntiyiso hi fanele hi va ni ntwelawusiwana. (1 Yoh. 3:10, 11, 16-18) Vamakwerhu ahi fanelanga hiva rhandza loko swilo swi famba kahle ntsena. Kambe hi fanele hiva rhandza ni loko va ni swikarhatu. Hi xikombiso, ku ni makwerhu lweyi umu tivaka lweyi anga feliwa a lavaka kutiyisiwa kumbe kupfuniwa? Kumbe ku ni vamakwerhu lava uva tivaka lava vanga lahlekeliwa hi swilo swa vona, vanga hahlukeliwa hi tiyindlo kumbe Tiyindlo ta Wugandzeli hi mhaka xidzedze kumbe ndhambi lava va lavaka kupfuniwa? Vamakwerhu volavo hingava komba swaku hava rhandza kunga li hi marito ntsena kambe hi swiyendlo.

15. Hikuya hi 1 Yohane 4:7, 8, hi fanele hi yendla yini?

¹⁵ Loko hi rhandza vamakwerhu, hi tekelela Yehovha, Papayi wa hina wa le matilweni. (Lerha 1 Yohane 4:7, 8.) Naswona hinga kombisa swaku hava rhandza vamakwerhu hi kuva rivalela loko vahi djohela. Hi xikombiso, loko makwerhu ahi kwatisa a gama a kombela rivalelo, hi fanele hi kombisa swaku hamu rhandza hi kumu rivalela hi tlhela hinga fambi hi vulavula hi swona leswi angahi yendlela swona. (Kol. 3:13) Makwerhu lweyi vange i Aldo, a tshama a kwatisiwa hi makwerhu mun’wana abandleni lweyi aamu hlonipha hintamu. Makwerhu yelweyo a vulavule kubiha hi lixaka la makwerhu Aldo. Makwerhu Aldo a li:  “Ni khongele ka Yehovha ni kombela swaku ani pfuna ninga pimisi swa kubiha hi makwerhu lweyi.” Kambe Aldo anga yendlanga leswo ntsena. A kombele makwerhu lwiyani swaku va famba xikan’we nsin’wini. Loko va li nsin’wini amu tlhamusele swaku leswi anga tshama aswi vula hi lixaka la yena swimu kwatisile. Aldo a li: “A nkama ningamu byela leswi ani titwisa xiswona, a kombele rivalelo. Ni tekele kuswi vona hi mavulavulelo ya yena swaku a atisola hi leswi angaswi vula. Kusukela kolanu hi ve vanghanu vavakulu.”

16-17. Hi fanele hi tinyimisela kuyendla yini?

¹⁶ Mupostolo Yohane aava rhandza hintamu vamakwerhu naswona a alava swaku va va ni lipfumelo la kutiya. Hi mhaka leyo, ava tiyisile hi kuva tsalela makarta lawa ya manharhu. Swa tsakisa kutiva swaku ku ni vavanuna ni vavasati lavanga ni lirhandzu kufana na Yohane lavangata fuma matilweni na Yesu Kreste! — 1 Yoh. 2:27.

¹⁷ Na hina hi fanele hiswi tekela nhlokweni leswi mupostolo Yohane angaswi tsala ka makarta lawa ya manharhu. Hi fanele hi tinyimisela kuhanya hi ntiyiso, hi yingisa Yehovha wutomi la hina hinkwalu naswona hi fanele hi djondza Bibele hi tlhela hi kholwa leswi hiswi djondzaka. Hi fanele hi tshemba Yesu, hinga kholwi filozofiya ni leswi vanhu lava vanga duka vaswi djondzisaka. Hinga tshuki hi yendla ingi hi tirhela Yehovha kuve hi hanya hi swilo swa kubiha. Naswona ahi fanelanga hi pfumela kuxengiwa swaku hi yendla swilo swa kubiha. Ahi hanyeni hi minawu ya Yehovha, hi pfuna vamakwerhu swaku vanga tshiki ntiyiso hi kuva rivalela loko vahi kwatisa hi tlhela hiva pfuna loko va ni swikarhatu. Loko hi yendla leswo, hambiloko hi kumana ni swikarhatu, hita tama hi hanya hi ntiyiso.