Leswaku hi tsakisa Yehovha hi fanele hi va ni lipfumelo; kambe Bibele li vula leswaku a hi vanhu hinkwavu lava nga ni lipfumelo. (2 Tes. 3:2) Nkama mupostolo Pawulo a nga vula a marito lawa, a a vulavula hi vanhu lava a va twisa van’wani ku vava ni vanhu va ku biha, ku nga vanhu lava a va mu hlupha. Kambe leswi mupostolo Pawulo a nga swi vula a swo tirha ka vanhu volavo ntsena. Kambe swi tirha ni ka vanhu van’wani. Vanhu van’wani a va kholwi swaku a Xikwembu hi xona xi nga yendla minchumu hinkwayu. (Rom. 1:20) Kasi van’wani va kholwa swaku ku ni nchumu kumbe munhu lweyi a nga ni matimba hintamu; kambe leswo a swi yeneli swaku munhu a tsakisa Yehovha hikusa leswo a hi lipfumelo la ntiyiso.

Phela swi lava hi kholwa swaku Xikwembu xi kona, funtshi xi hakela lweyi a nga ni lipfumelo la ku tiya ka xona. (Heb. 11:6) Lipfumelo i lin’we la wumunhu la mihandzu ya moya wa ku kwetsima. Leswaku hi kuma a moya lowo wa ku kwetsima, swi lava leswaku hi khongela ka Yehovha leswaku a hi nyika wona. (Luk. 11:9, 10, 13) Xin’wani lexi hi nga xi yendlaka swaku hi kuma a moya wa ku kwetsima, i ku djondza a Rito la yena, ku nga Bibele. Phela i swa lisima kuva hi nyimanyana hi pimisa hi leswi hi nga swi djondza ni ku tlhela hi swi tirhisa ka wutomi la hina. Loko hi yendla leswo, moya wa ku kwetsima wa Yehovha wu ta hi pfuna leswaku hi va ni lipfumelo leli tsakisaka Yehovha.