NHLOKOMHAKA YA DJONDZO 23
LISIMU 28 Ku va Munghanu wa Yehovha
Yehovha Wa Hi Rhamba Swaku Hi Va Vapfhumba Va Yena
“Tende la mina li ta va xikarhi ka vona, ni ta va Xikwembu xa vona.” — EZE. 37:27.
LESWI HI NGA TA SWI DJONDZA
Ka nhlokomhaka leyi, hi ta vona leswi hi nga swi yendlaka leswaku hi khensa xirhambu lexi Yehovha a hi nyikaka xona, xa leswaku hi va vapfhumba va yena ni ndlela ya lirhandzu leyi Yehovha a hi hlayisaka hi yona.
1-2. Hi xini xirhambu lexi Yehovha a xi yendlaka ka vanhu va yena?
LOKO munhu a wo ku vutisa swaku u mu vonisa ku yini Yehovha, a wu ta ku yini? Kumbexana a wu ta ku ‘i Papayi wa mina, i Xikwembu xa mina kumbe Munghanu wa mina.’ Ku ni tindlela ta ku tala leti hi nga mu vitanaka hi tona Yehovha ni ku tlhamusela leswi a nga tshamisa xiswona. Kambe u tshama u pimisa leswaku Yehovha wa hi yamukela tanihi vapfhumba va yena?
2 Loko Davhida a vulavula hi ku va ni wunghanu na Yehovha a vule leswaku Yehovha a rhamba vanhu va yena leswaku va va vapfhumba va yena. Davhida a vutise leswi: “Yehovha Xikwembu xanga, i mani lweyi a nga vaka mupfhumba ka tende la wena? I mani lweyi a nga tshamaka ka ntshava ya wena ya ku kwetsima?” (Ps. 15:1) Ka ndzimana leyi, hi djondza leswaku hina hi nga swi kota ku va vapfhumba ka tende la Yehovha, ku nga ku va vanghanu va yena. Phela lexi, i xirhambu xa ku hlamalisa hintamu swinene!
YEHOVHA A LAVA LESWAKU HI VA VAPFHUMBA VA YENA
3. I mani a nga va mupfhumba wa ku sungula wa Yehovha, naswona a va titwisa ku yini hi ku va va tshama xikan’we?
3 Na a nga se na maha swilo hinkwaswu, Yehovha a a tshama yexe kambe a game a yendla Yesu. Leswo a swo fana ni loko Yehovha a rhambe Yesu kuva a va mupfhumba wa ku sungula ka tende la yena. Yehovha a tsakile swinene hi leswo. Bibele li vula swaku ‘a a swi rhandza hintamu’ ku tshama na Yesu. Na yena Yesu a a swi tsakela ku tshama na Yehovha. Yena a te: “A ni tsakile phambheni ka yena nkama hinkwawu.” — Swiv. 8:30.
4. I vamani van’wani lava va nga va vapfhumba va Yehovha?
4 Hi ku famba ka nkama Yehovha a game a vumba tintsumi, leti na tona ti nga vapfhumba va yena. Bibele li vula leswaku a tintsumi i “vana va Xikwembu,” funtshi li vula swaku tintsumi ta tsaka swinene hi ku tshama na Yehovha. (Yob. 38:7; Dan. 7:10) Ku ringana malembe ya manyingi, vapfhumba va Yehovha a ku li ntsena lava a va tshama na yena amatilweni, kambe Yehovha a game a yengetela tende la yena leswaku a yamukela ni vanhu lava tshamaka lani misaveni swaku va va vapfhumba va yena. Van’wani lava va nga va vapfhumba va yena ku ve Enoki, Nowa, Abrahamu na Yobo. Bibele li vula leswaku a vanhu volavo a va li vanghanu va Xikwembu hikusa a va xi yingisa va tlhela va famba ni “Xikwembu xa ntiyiso.” — Gen. 5:24; 6:9; Yob. 29:4; Esa. 41:8.
5. Hi djondza yini ka wuprofeta leli nga ka Ezekiyele 37:26, 27?
5 Ku ringana malembe ya manyingi, Yehovha a tama a rhamba vanghanu va yena leswaku va va vapfhumba va yena. (Lerha Ezekiyele 37:26, 27.) Hi xikombiso, ka wuprofeta la Ezekiyele hi djondza leswaku Yehovha wa swi lava leswaku lava va mu gandzelaka va va ni wunghanu la le kusuhi na yena. Yena a tlhela a va tshembisa leswaku a “ta yendla ntwananu wa ku va ni ku rhula na vona.” Wuprofeta leli li tlhela li vulavula hi nkama lowu lava va nga ni ntshembo wa ku ya hanya tilweni ni lava va nga ni ntshembo wa ku hanya lani misaveni va nga ta va vapfhumba ka tende la Yehovha, tanihi “ntlhambi wun’we.” (Yoh. 10:16) Wuprofeta lelo la hetiseka namuntlha.
A KU NA MHAKA SWAKU HI KWINI, YEHOVHA WA HI HLAYISA
6. I mpsini leswi munhu a faneleke a swi yendla swaku a va mupfhumba ka tende la Yehovha, naswona a tende leli li kumeka kwini?
6 Ka minkama ya ku tsaliwa ka Bibele, a tende a ku li ndhawu leyi munhu a a humula ka yona a tlhela a tivhikela ka mumu, xirhami, timpfula, swidzedze ni swin’wani. Phela loko munhu a yamukeliwa ka tende a a tiyiseka leswaku a a ta hlayisiwa kahle. Nkama lowu hi tinyiketelaka ka Yehovha hi va vapfhumba ka tende la Yehovha. (Ps. 61:4) Ka tende leli, hi kuma swilo hinkwaswu leswi swi hi pfunaka leswaku hi tama hi va vanghanu va Yehovha funtshi hi li ni vanhu van’wani lava na vona va nga vapfhumba va Yehovha. A ku na mhaka leswaku hi tshama kwini, hinkwerhu ka hina hi nga va vapfhumba ka tende la Yehovha. Swi nga yendleka u tshame u yendza u ya ka tiko lin’wani leswaku u ya khoma kongresu la ku hlawuleka, naswona u tive vanhu van’wani lava va nga ka tende la Yehovha funtshi va nga tsaka hileswi va nga ka tende lolelo. Phela a tende la Yehovha li ka tindhawu hinkwatu leti ku nga ni vanhu lava va tirhelaka Yehovha. — Nhl. 21:3.
7. Hi mhaka muni hi nga vulaka leswaku vatirheli va Yehovha lava nga fa va ha li vapfhumba ka tende la yena? (Vona mufoto.)
7 Hi nga ku yini hi vatirheli va Yehovha lava se va nga fa? Hi nga vula swaku na vona va ha li vapfhumba ka tende la Yehovha? Ina. Hi nga vula leswo hikusa va ha hanya ka mimpimiso ya Yehovha. Loko a vulavula hi mhaka leyi Yesu a te: “Kambe hambi Moxe a swi kombisile ka mhaka ya xinsinyani xa mintwa swaku lava nga fa va ta pfuxiwa, loko a vula swaku Yehovha i ‘Xikwembu xa Abrahamu, xa Izaki ni xa Yakobe.’ A hi Xikwembu xa lava nga fa, kambe i xa lava hanyaka, hikusa ka xona hinkwavu va hanya.” — Luk. 20:37, 38.
Hambi vanhu va ku tshembeka lava nga fa, na vona va ha tama va va vapfhumba ka tende la Yehovha (Vona paragrafu 7)
MINKATEKO NI LESWI HI FANELEKE HI SWI YENDLA
8. Hi yihi minkateko hi yi kumaka hi ku va vapfhumba va Yehovha?
8 Ku fana ni leswi munhu a humulaka ka tende a tlhela a tivhikela ka swidzedze ni swilo swin’wani, loko hi li vapfhumba ka tende la Yehovha, ha vhikeliwa ka xin’wani ni xin’wani lexi nga wonhaka wunghanu la hina na Yehovha hi tlhela hi va ni ntshembo wa nkama lowu taka. Loko hi li kusuhi hintamu na Yehovha, Sathana a nge hi vavisi. (Ps. 31:23; 1 Yo. 3:8) Ka misava ya nyuwani Yehovha a ta tama a vhikela vanhu va yena ka swilo leswi nga wonhaka wunghanu la vona na yena a tlhela a va vhikela ni ka lifu. — Nhl. 21:4.
9. Yehovha a nyimela leswaku vapfhumba va yena va tikhomisa ku yini?
9 I nkateko wawukulu ku va hi va vapfhumba ka tende la Yehovha, naswona hi tsaka hintamu hi ku va ni wunghanu la le kusuhi na Yehovha, ku nga wunghanu leli nga ta tshama hi masiku ni masiku. Kambe hi fanele hi tikhomisa ku yini ka tende la Yehovha? Loko wo rhambiwa swaku u ya kaya ka munhu, u ta lava ku tiva swaku a munhu yelweyo a lava u tikhomisa ku yini. Hi xikombiso, a n’winyi wa munti a nga ha ku kombela swaku u hlivila swifambu na u nge se nghena. Wena u ta swi yendla leswo. Hilaha ku fanaka, na yena Yehovha ku ni leswi a hi kombelaka swaku hi swi yendla kuva hi tama hi va vapfhumba ka tende la yena. Lirhandzu leli hi nga na lona hi Yehovha la hi pfuna leswaku hi yendla hinkwaswu leswaku hi “mu tsakisa hi ku helela.” (Kol. 1:10) Hambileswi Yehovha i nga Munghanu wa hina, hi fanele hi khumbuka leswaku yena a tlhela a va Papayi ni Xikwembu xa hina. Hi mhaka leyo, hi fanele hi mu hlonipha swinene. (Ps. 25:14) Se a hi fanelanga hi swi rivala leswo, naswona hi fanele hi yendla hinkwaswu leswaku hi mu hlonipha swinene Yehovha. Loko hi pimisa hi leswo, hi ta yendla hinkwaswu hi nga swi kotaka leswaku hi nga mu kwatisi Yehovha. Ha tiyiseka leswaku hinkwerhu ha swi navela ku tama hi “tiveka hansi” ka Yehovha Xikwembu xa hina. — Mik. 6:8.
YEHOVHA A NGA KOMBISANGA XIKHETO KA VAYISRAYELE
10-11. Leswi Yehovha a nga va khomisa xiswona Vayisrayele swi swi kombisa ku yini swaku a nga na xikheto?
10 Yehovha a nga kombisi xikheto ka vapfhumba va yena. (Rom. 2:11) Hi nga swi twisisa kahle leswaku impela Yehovha a nga na xikheto loko hi vona ndlela leyi Yehovha a nga va khoma hi yona Vayisrayele nkama a va li amananga ya Sinayi.
11 Ndzhaku ka loko Yehovha a chunse vanhu va yena ka tiko la Gibita, a nyike vaprista ntirho ka tabernakela, naswona Valevhi va nyikiwe ntirho lowu a wu yendliwa ka ndhawu yoleyo ya ku kwetsima. Ku nga va leswaku lava na va tirha ka tabernakela kumbe lava na va tshama kusuhi na lona, a va hlayisiwa hi ndlela ya ku hlawuleka hi Yehovha? Ihim. Ka Yehovha vanhu hinkwavu va fana. Phela Yehovha a nga na xikheto.
12. Ndlela leyi Yehovha a nga va khoma hi yona Vayisrayele nkama a va li mananga, yi swi kombisisa ku yini swaku ka yena vanhu hinkwavu va fana? (Eksoda 40:38) (Vona mufoto.)
12 Muyisrayele mun’wani ni mun’wani a a ta va munghanu wa Yehovha ku nga na mhaka leswaku a a tirha ka tabernakela kumbe a a nga tirhi kona, ni swaku tende la yena li li kusuhi ni tabernakela kumbe nada. Hi xikombiso, Yehovha a yendle swi koteka leswaku xitshungu hinkwaxu xi vona rhefu ni ndzilu lowu a wu kumeka henhla ka tabernakela. (Lerha Eksoda 40:38.) Loko rhefu li sungula ku famba li kongoma ka ndhawu yin’wani, hambi lava a va tshama kule ni tabernakela a va ta swi kota ku swi vona leswo. Leswo a swi pfuna mindjangu hinkwayu leswaku yi longela minchumu ya yona, yi hahlula matende yi tlhela yi famba ni xitshungu lexin’wani hinkwaxu. (Tin. 9:15-23) Handle ka leswo, loko ku chayiwa timhalamhala timbirhi ta prata leti a ti kombisa leswaku vanhu hinkwavu va fanele va hahlula matende, Vayisrayele hinkwavu a va swi twa. (Tin. 10:2) Leswi swi kombisa leswaku a ku va munhu a tshama kusuhi ni tabernakela, a swi nga vuli swaku a a li munghanu wamukulu hintamu wa Yehovha ku tlula lava a va tshama kule ni tabernakela. Ku hambana ni leswo, Vayisrayele hinkwavu a va ta swi kota ku va va va vapfhumba va Yehovha, va yamukela nkongomiso wa yena va tlhela va vhikeliwa hi yena. Swi hi ku fana ni namuntlha, a swi na mhaka leswaku hi tshama kwini, Yehovha wa hi rhandza hinkwerhu, wa hi hlayisa a tlhela a hi vhikela.
Tabernakela leyi a yi li xikarhi ka matende ya Vayisrayele, i xitiyisekiso xa leswaku Yehovha a nga na xikheto (Vona paragrafu 12)
NINAMUNTLHA YEHOVHA A NGA NA XIKHETO
13. Yehovha a swi kombisisa ku yini swaku a nga na xikheto ka masiku ya hina?
13 Namuntlha ka siku, van’wani lava tirhelaka Yehovha va tshama sede mundial kumbe amabetele funtshi van’wani va tshama kusuhi ni tindhawu toleto naswona va ni nkateko wa ku yendla mintirho yin’wani ka tindhawu toleto funtshi va hanyisana hi kusuhi ni lava va rhangelaka ka nhlengeletanu ya Yehovha. Kasi van’wani va tirha tanihi vadjikelezi kumbe ka ntirho wa nkama hinkwawu wa ku hlawuleka. Kambe loko u nga li kona ka mintirho yoleyo, tiyiseka leswaku Yehovha a rhandza hinkwavu lava va nga vapfhumba ka tende la yena, ku patsa na wena. Yehovha a ta ku nyika hinkwaswu leswi u swi lavaka. (1 Pe. 5:7) Yehovha a nyika hinkwavu lava i nga vapfhumba ka tende la yena hinkwaswu leswi va swi lavaka leswaku va tama va kulisa wunghanu la vona na yena, a va kongomisa a tlhela a va vhikela.
14. Hi xini xikombiso xin’wani lexi kombaka swaku Yehovha a nga na xikheto?
14 Xin’wani lexi kombisaka swaku impela Yehovha a nga na xikheto, hi leswaku a yendle leswaku a Bibele li kumeka ka vanhu hinkwavu amisaveni. A Matsalwa ya Ku Kwetsima, a ku sunguleni a ma tsaliwe hi tirimi tinharhu, ku nga Xiheberu, Xigriki ni Xiaramu. Se, ku nga va leswaku vanhu lava va kotaka ku lerha tirimi toleto, leti Bibele li nga tsaliwa hi tona ku sunguleni i vanghanu vavakulu va Yehovha ku tlula vanhu lava kalaka va nga swi koti ku lerha tirimi toleto ke? Ahihim, a swi vuli swona leswo. — Mat. 11:25.
15. I mpsini swi hi kholwisaka swaku Yehovha a nga na xikheto? (Vona mufoto.)
15 Leswaku hi va vanghanu va Yehovha a swi lavi leswaku hi djondzekile hintamu, kumbe hi tiva Xiaramu, Xigriki kumbe Xiheberu, ku nga tirimi leti Bibele li nga tsaliwa hi tona ku sunguleni. Yehovha a lava swaku vanhu hinkwavu va va vanghanu va yena, a tlhela funtshi a nyika wutivi vanhu hinkwavu amisaveni hinkwayu, naswona a ngo nyika ntsena lava va nga djondzeka hintamu. A Bibele li hundzuluxeliwe hi tirimi ta tinyingi; hi ndlela leyo, vanhu va vanyingi amisaveni swa koteka swaku va yingisa Yehovha va tlhela va va vanghanu va yena. — 2 Tm. 3:16, 17.
Leswi Bibele li nga hundzuluxeliwa hi tirimi ta ku tala, i xitiyisekiso xa leswaku ka Yehovha vanhu hinkwavu va fana (Vona paragrafu 15)
TAMA U VA MUPFHUMBA WA YEHOVHA
16. Hi ku ya hi Mintirho 10:34, 35, hi fanele hi yendla yini leswaku hi tama hi va vapfhumba va Yehovha?
16 I nkateko wawukulu swinene ku rhambiwa hi Yehovha swaku hi va vapfhumba ka tende la yena. Yehovha i munene naswona a hi yamukela hi lirhandzu. Ka Yehovha vanhu hinkwavu va fana. Yena a rhamba hinkwavu, ku nga na mhaka swaku va tshama kwini, va kulisiwe ku yini, va djondze ku fikela kwini, i vakulu kumbe i vatsongo, kumbe i vavanuna kumbe i vavasati. Kambe lava va pfumeleliwaka ku tama va va vapfhumba va Yehovha hi lava va tamaka va mu yingisa. — Lerha Mintirho 10:34, 35.
17. U ta swi kuma kwini swilo leswi vulavulaka hi ku va vapfhumba ka tende la Yehovha?
17 Ka buku ya Tipisalema 15:1, Davhida a vutise leswi: “Yehovha Xikwembu xanga, i mani lweyi a nga vaka mupfhumba ka tende la wena? I mani lweyi a nga tshamaka ka ntshava ya wena ya ku kwetsima?” Yehovha a tirhise Davhida leswaku a hlamula swivutiso leswi hinkwaswu ka Tipisalema ndzima 15. Ka djondzo leyi landzelaka, hi ta vona swilo swa lisima leswi hi faneleke hi swi yendla swaku hi tama hi va vapfhumba ka tende la Yehovha.
LISIMU 32 Nyima na Yehovha!
