1. Vanhu van’wani lava tirhelaka Yehovha va titwisa ku yini?

 SWA tsakisa ku tiva swaku Yehovha wa va “tsakela vanhu va yena” lava mu tirhelaka. (Ps. 149:4) Kambe minkama yin’wani u nga ha kanakana u sungula ku tivutisa swaku ‘indjhe Yehovha wa ni yamukela mina?’ Loko u titwisa xileswo a wu wexe hikusa hambi hi vanhu va Yehovha lava a va mu tirhela nkameni wa khale va tshame va va ni mimpimiso ya ku fana ni leyo. — 1 Sa. 1:6-10; Yob. 29:2, 4; Ps. 51:11.

2. I vamani lava Yehovha a va yamukelaka?

² Bibele li swi kombisa kahle swaku hambileswi hi kalaka hi nga hetisekanga, Yehovha a nga hi yamukela. Swi kotekisa ku yini leswo? Leswaku Yehovha a hi yamukela hi fanele hi kombisa lipfumelo ka Yesu Kreste hi tlhela hi tsakamisiwa. (Yoh. 3:16) Loko hi yendla leswo hi komba van’wani swaku hi tisolile ka swidjoho swa hina ni swaku hi tinyiketelile ka Yehovha hi mu tshembisa ku mu tirhela wutomi la hina hinkwalu. (Min. 2:38; 3:19) Yehovha a tsaka hintamu loko hi yendla leswo swaku hi kulisa wunghanu la hina na yena. Naswona nkama lowu hi yaka hi yendla hinkwaswu leswi hi nga swi kotaka swaku hi tama hi yendla ku rhandza ka yena, Yehovha wa hi yamukela naswona a hi vona hi li vanghanu va yena vavakulu. — Ps. 25:14.

3. Hi ta bula hi yini swoswi?

³ Kambe i ntxini lexi minkama yin’wani xi hi yendlaka hi pimisa swaku Yehovha a nga hi yamukeli? Yehovha a swi kombisisa ku yini swaku wa hi yamukela? Naswona i ntxini lexi nga hi tiyisekisaka swaku Yehovha wa hi yamukela namuntlha?

HI MHAKA MUNI VAN’WANI VA PIMISA SWAKU YEHOVHA A NGE VA YAMUKELI?

4-5. Loko hi titwa na hi nga pfuni nchumu, i yini leswi hi nga tiyisekaka hi swona?

⁴ Vanyingi va hina, ku sukela ha ha li vatsongo hi talisa ku tivona na hi nga li va nchumu. (Ps. 88:15) Hi xikombiso, makwerhu mun’wani lweyi a vitaniwaka Adrián a li: “Minkama ya yinyingi ni tivona na ni nga li wa nchumu. Naswona ku sukela na na ha li mutsongo, hambileswi a ni tivona na ni nga faneleki ku va ka Paradesi a ni talisa ku  khongela ni kombela Yehovha swaku mina ni ndjangu wa mina hi nghena ka Paradesi.” Makwerhu mun’wani lweyi a vitaniwaka Tony lweyi a nga kulisiwa ka ndjangu wa ku a hi Timboni a li: “Vapsali va mina a va se tshama va ni byela leswaku va ni rhandza kumbe ku vula leswaku va tsaka hi leswi ni swi yendlaka. Minkama hinkwayu a va vula leswaku ni fanele ni yampsisa.”

⁵ Loko minkama yin’wani hi pimisa swaku a hi va nchumu, hi fanele hi khumbuka swaku Yehovha hi yena a nga hi koka swaku hi nghena ka nhlengeletanu ya yena. (Yoh. 6:44) Yehovha a vona swilo swaswinene leswi hi swi yendlaka hambiloko hina minkama yin’wani hi nga swi voni, a tlhela a vona leswi hi nga tshamisa xiswona hi le ndzeni. (1 Sa. 16:7; 2 Tik. 6:30) Se hi nga tiyiseka swaku Yehovha wa hi yamukela. — 1 Yo. 3:19, 20.

6. Mupostolo Pawulo a a titwisa ku yini hi swihoxo leswi a a swi yendlile ka nkama lowu nga hundza?

⁶ Na hi nge se djondza ntiyiso swi nga yendleka hi yendle swilo leswi namuntlha swi hi yendlaka hi titwa nandzu hintamu. (1 Pe. 4:3) Phela hambi hi vamakwerhu lava se i nga khale na va tirhela Yehovha, minkama yin’wani va nga tivona na va nga li va lisima hi mhaka ya swidjoho leswi va nga tshama va swi yendla. Se wena ke, ku nga va swaku minkama yin’wani u pimisa swaku Yehovha a nge ku rivaleli hi mhaka ya swidjoho leswi u nga tshama u swi yendla? Loko ku li leswo, ku tiva swaku vanhu va Yehovha va ku tshembeka va khale na vona va tshame va titwa hi ndlela ya ku fana swi nga ku tiyisa. Hi xikombiso, mupostolo Pawulo a tshame a titwa a nga li wa lisima loko a pimisa hi swilo swa ku biha leswi a nga tshama a swi yendla. (Rom. 7:24) I ntiyiso swaku Pawulo a a tisolile ka swidjoho swa yena a gama a tsakamisiwa, hambileswo a tshame a vula swaku hi yena “wamutsongo [wa kona] ka vapostolo”, a tlhela a vula swaku yena i “mudjohi wamukulu wa kona.” — 1 Ko. 15:9; 1 Tm. 1:15.

7. I yini leswi hi faneleke hi swi khumbuka loko ku li swaku hi yendle swihoxo ka nkama lowu nga hundza?

⁷ Yehovha a tshembisa swaku a tinyimisele ku hi rivalela loko hi tisola. (Ps. 86:5) Se loko hi tisolile hi mbilu ya hina hinkwayu ka swidjoho swa hina, hi nga tiyiseka swaku Yehovha se a hi rivalelile hilani Bibele li vulaka hi kona. — Kol. 2:13.

8-9. Hi nga yi hlulisa ku yini mimpimiso ya ku a ku na nchumu lexi hi nga xi yendlaka swaku hi tsakisa Yehovha?

⁸ Hinkwerhu hina lava hi tirhelaka Yehovha hi swi lava hintamu ku yendla hinkwaswu leswi hi nga swi kotaka ka ntirho wa yena. Kambe van’wani va pimisa swaku a ntirho lowu va wu yendlelaka Yehovha a hi wa nchumu va tlhela va pimisa swaku a nge wu yamukeli. Phela hi leswo makwerhu mun’wani lweyi a vitaniwaka Amanda a nga titwisa xiswona. Yena a vule leswi: “Minkama ya yinyingi a ni pimisa swaku kuva Yehovha a yamukela ntirho wa mina, minkama hinkwayu a ni fanele ni yengetela ntirho lowu ni mu yendlelaka wona. Phela a ni tilondza swilo swa ku hambi hi mina a ni nga ta swi kota. Se loko ni tsumbula swaku a na ha swi koti ku mu yendlela swa swinyingi hilani a ni navela hi kona, ni gama ni tivona na ni nga li wa nchumu ni tlhela ni pimisa swaku na yena Yehovha a wu vonisa swoleswo ntirho wa mina.”

⁹ Hi nga yendla yini loko hi pimisa swaku leswi hi mu yendlelaka swona Yehovha a swi yeneli swaku a swi yamukela? Khumbuka swaku Yehovha wa va pimisela vanhu va yena. Yehovha a nge hi londzi ku yendla swilo leswi yena a swi tivaka swaku a hi nge swi koti ku swi yendla. Handle ka leswo, Yehovha a tsaka hintamu loko a hi vona hi yendla hinkwaswu leswi hi nga swi kotaka swaku hi mu tirhela. Pimisa hi swikombiso swa Bibele swa vanhu lava a va tirhela Yehovha hi mbilu ya vona hinkwayu. Hi xikombiso, Pawulo a tirhele Yehovha hi ku hiseka ku ringana malembe ya manyingi. A yendzile a ya ka tindhawu ta kule hintamu a tlhela a tirha hi matimba leswaku ku va ni mabandla ya nyuwani. Kambe nkama swiyimu swa Pawulo swi nga txintxa a nga ha swi koti ku yendla leswi a a swi yendla khale ka ntirho wa ku chumayela, a nga zanga a pimisa swaku Yehovha a nga ha mu yamukeli, kambe yena a tame a yendla leswi a a swi kota ndzeni ka  swiyimu swa yena naswona Yehovha a mu katekisile. (Min. 28:30, 31) Hi ku fana, na hina minkama yin’wani leswi hi kotaka ku mu yendlela swona Yehovha swi nga ha txintxa; kambe xa lisima ka Yehovha hi leswaku hi tama hi mu tirhela hi mbilu ya hina hinkwayu. Swoswi a hi voneni swaku Yehovha a swi kombisisa ku yini swaku wa hi yamukela.

YEHOVHA A SWI KOMBISISA KU YINI SWAKU WA HI YAMUKELA?

10. Hi nga mu twisa ku yini Yehovha na a vula swaku wa hi tsakela? (Yohani 16:27)

¹⁰ Yehovha a tirhisa Bibele swaku a hi byela swaku wa hi tsakela. Yehovha a swi rhandza hintamu ku byela vanhu lava va mu tirhelaka swaku wa wu yamukela ntirho wa vona. Bibele li kombisa makhambi mambirhi lani Yehovha a nga byela Yesu hi rito la ku twala swaku a a mu rhandza funtshi a a mu tsakela. (Mat. 3:17; 17:5) Se wena ke, wa swi navela ku mu twa Yehovha na a ku byela swaku wa ku tsakela? Yehovha a hi byela swaku wa hi tsakela hi ku tirhisa Bibele. Se hi nga mu twa Yehovha na a hi byela swaku wa hi tsakela loko hi tinyika nkama wa ku lerha a mabuku lawa ma vulavulaka hi wutomi la Yesu nkama na a li lani misaveni. (Lerha Yohani 16:27.) Phela Yesu a a tekelela wumunhu la Papayi wa yena hi ku helela. Loko hi lerha Bibele hi ta vona swaku Yesu a a va byela vadjondzisiwa va yena leswaku a a va tsakela hambileswi minkama yin’wani a va phazama. Leswo swi hi pfuna ku twisisa ndlela leyi Yehovha a titwaka hi yona hi hina namuntlha swi tlhela swi hi tiyisekisa swaku wa wu yamukela ntirho wa hina. — Yoh. 15:9, 15.

11. Hi mhaka muni ku va hi kumana ni swikarhatu swi nga kombisi swaku Yehovha a nga hi tsakeli? (Yakobe 1:12)

¹¹ Yehovha a kombisa leswaku wa hi yamukela hi ku hi nyika leswi hi swi lavaka. Yehovha a swi lava hintamu ku hi pfuna, hi mhaka leyo a hi nyika leswi hi swi lavaka. Minkama yin’wani Yehovha wa pfumelela leswaku hi kumana ni swikarhatu ku fana ni leswi nga yendlekela Yobo. (Yob. 1:8-11) Kambe ku va hi kumana ni swikarhatu kumbe mindzingo a swi lavi ku vula swaku yena a nga hi yamukeli, kambe swikarhatu leswi hi kumanaka na swona swi yendla leswaku hi kombisa leswaku ha mu rhandza ni ku va hi yengetela lirhandzu leli hi nga na lona hi Yehovha ni ku va hi mu tshemba. (Lerha Yakobe 1:12.) Naswona loko hi li ka swikarhatu hi ta swi vona swaku Yehovha wa hi rhandza ni leswaku wa hi pfuna ku tiyisela.

12. U djondze yini ka xikombiso xa makwerhu Dmitrii?

¹² Pimisa hi leswi nga yendlekela makwerhu Dmitrii lweyi a tshamaka Ásia. Makwerhu lweyi a luzekeliwe hi ntirho wa yena naswona a nga kumanga ntirho wun’wani ku ringana tiwheti ta tinyingi. Se leswaku a kombisa swaku wa mu tshemba Yehovha, a yengesele ntirho wa yena wa ku chumayela; hambileswo, ku hundze tiwheti ta tinyingi na a nga  wu kumi ntirho. Xa ku vava hileswaku a game a biwa hi mavabyi yamakulu lakakuva ni ku sekeleka ka mubedu swi mu tsandza. Hi mhaka leyo, a sungule ku pimisa swaku a hi papayi wamunene funtshi a hi nuna wa kahle. A tlhela a pimisa swaku swi nga yendleka Yehovha a nga ha wu yamukeli ntirho wa yena. Kambe siku lin’wani niwusiku, xintombhani xa yena xi mu tsalele ka phepha marito ya buku la Esaya 30:15 lawa ma nge: “Mi ta va ni matimba loko mi rhula mi tlhela mi ni tshemba.” Xi gama xi yela papayi wa xona na xi khome phepha leli, xi mu nyika xi ku: “Papayi, loko u karhateka, khumbuka marito ya ndzimana leyi.” Phela makwerhu Dmitrii a khense Yehovha hileswi ndjangu wa yena a wu tama wu va ni swakudla, swa ku yambala ni ka ku yetlela. Makwerhu lweyi a vula leswi: “Lexi a ni fanele ni xi yendla a ku li ku rhula ni tlhela ni tama ni tshemba Yehovha.” Loko na wena u kumana ni xikarhatu xa ku fana ni lexi, tshemba swaku Yehovha a ta ku hlayisa naswona a ta ku pfuna swaku u tama u tiyisela.

13. Hi vamani lava Yehovha a nga va tirhisaka swaku a hi komba swaku wa hi tsakela naswona a nga swi yendlisa ku yini leswo?

¹³ Yehovha a hi tiyisekisa swaku wa hi yamukela hi ku tirhisa vamakwerhu. Phela Yehovha wa swi kombisa swaku wa hi tsakela hi ku tirhisa vamakwerhu loko va bula na hina. Hi xikombiso, a nga ha yendla swaku vamakwerhu va hina va vula marito yamanene hi nkama wawunene swaku va hi tiyisa. Makwerhu mun’wani wa xisati lweyi a tshamaka Ásia a tiyisiwile hi vamakwerhu nkama a nga kumana ni swikarhatu swaswikulu. Yena a heleliwe hi ntirho a tlhela a vabya hintamu. Hi nkama wolowo a nuna wa yena a yendle xidjoho xaxikulu, leswi nga yendla swaku a nyimisiwa ku va doda bandleni. Makwerhu lweyi loko a vula leswi a nga titwisa xiswona a li: “A ni nga swi twisisi swaku hi mhaka muni swilo leswiyani swi ni yendlekela. A ni pimisa swaku ku ni swilo swa ku biha leswi ni nga swi yendla ni swaku Yehovha a a nga ha ni yamukeli.” Makwerhu lweyi a game a khongela a kombela swaku  Yehovha a mu tiyisekisa swaku wa ha mu tsakela. Se Yehovha a swi kombisise ku yini swaku a a mu tsakela makwerhu lweyi? Yena a tlhele a ku: “A madoda abandleni ma bule na mina ma tlhela ma ni tiyisekisa swaku Yehovha wa ni rhandza.” Hi ku famba ka nkama makwerhu lweyi a tlhele a kombela Yehovha swaku a mu pfuna. Yena a game a ku: “Hi siku leliyani ni nga kombela ku pfuniwa, ni yamukele karta leli a li tsaliwe hi vamakwerhu va bandleni swaku va ni tiyisa.” Yena a tlhele a ku: “Loko ni lerhe marito lawayani ni swi vonile swaku Yehovha a a xi twile xikhongelo xa mina funtshi ma ni tiyisile.” Phela leswi nga yendlekela makwerhu lweyi swi swi kombisa kahle swaku Yehovha a nga tirhisa vamakwerhu swaku va hi tiyisa hi marito yamanene hi nkama wawunene. — Ps. 10:17.

14. Hi yini ndlela yin’wani leyi Yehovha a yi tirhisaka swaku a kombisa leswaku wa hi tsakela?

¹⁴ Yehovha a tlhela a kombisa swaku wa hi yamukela hi ku tirhisa vamakwerhu swaku va hi laya loko swi laveka. Hi xikombiso, ka nkama wa vapostolo Yehovha a tirhise mupostolo Pawulo swaku a tsala 14 wa makarta a ma tsalela vamakwerhu. Nkama wun’wani, ka makarta lawa, Pawulo a a laya vamakwerhu hi lirhandzu. Kambe hi mhaka muni Yehovha a tirhise Pawulo swaku a laya vamakwerhu? Yena a yendle leswo hikusa i Papayi wamunene naswona a laya lava “a va rhandzaka.” (Swiv. 3:11, 12) Se loko na hina hi tshuka hi layiwa hi ku tirhisa Bibele, hi fanele hi swi vona swaku hi yona ndlela leyi Yehovha a yi tirhisaka leswaku a hi komba swaku wa hi yamukela, ku nga li ku pimisa leswaku a nga hi yamukeli. (Heb. 12:6) I mpsini swilo swin’wani leswi kombisaka swaku Yehovha wa hi yamukela?

SWILO SWIN’WANI LESWI KOMBISAKA SWAKU YEHOVHA WA HI YAMUKELA

15. I vamani lava Yehovha a va nyikaka moya wa yena wa ku kwetsima naswona va nga tiyiseka hi yini?

¹⁵ Yehovha a va nyika moya wa ku kwetsima hinkwavu lava a va yamukelaka. (Mat. 12:18) Kambe u nga ha tivutisa leswi: ‘Indjhe na yi kombisa mihandzu ya moya wa ku kwetsima ka wutomi la mina?’ Swi nga yendleka swoswi u va lehisela mbilu van’wani ku tlula nkama lowu na wu nge se djondza hi Yehovha. Phela loko u kombisa mihandzu ya moya wa ku kwetsima wa Xikwembu u ta ya u tiyiseka swaku Yehovha wa ku yamukela! — Vona kwadru leli nge “ Mihandzu Ya Moya Wa Ku Kwetsima I . . . ”

16. I vamani lava Yehovha a va tirhisaka swaku va chumayela mahungu ya ku tsakisa naswona leswo swi hi yendla hi titwisa ku yini? (1 Vatesalonika 2:4)

¹⁶ Yehovha wa va tsakela lava chumayelaka mahungu ya ku tsakisa. (Lerha 1 Vatesalonika 2:4.) Vona leswi makwerhu Jocelyn a nga pfunekisa xiswona hi ku chumayela vanhu van’wani mahungu ya ku tsakisa. Siku lin’wani, makwerhu Jocelyn a pfuke na a nga titwi kahle. Yena a li: “A ni hele ntamu  naswona a ni tivona ni nga pfuni nchumu, kambe a ni li mupfuli wa ndlela funtshi a ku li siku la mina la ku ya nsin’wini. Hi mhaka leyo, ni khongelile ni huma ni ya ku chumayeleni.” Hi mixo wolowuyani, makwerhu Jocelyn a tive wansati mun’wani ku nga Mariya, lweyi a nga pfumela ku djondzeliwa Bibele. Loko se ku hundze tiwhetinyana, wansati lweyi a byele makwerhu Jocelyn swaku siku leli a nga ba xipfalu xa kaya ka yena hi lona, a a li ku khongeleni na a kombela swaku Xikwembu xi mu pfuna. Loko makwerhu Jocelyn a pimisa hi leswi nga mu yendlekela a li: “Ni vona ingi Yehovha a a wo ni byela leswi: ‘Na ku tsakela.’” I ntiyiso swaku a hi hinkwerhu hi nga ta chumayela vanhu va swi tsakela leswi hi va chumayelaka swona, kambe hi nga tiyiseka swaku Yehovha wa tsaka loko hi yendla hinkwaswu leswi hi nga swi kotaka swaku hi chumayela mahungu ya ku tsakisa.

17. U djondze yini ka leswi makwerhu Vicky a nga swi vula hi lisima la lifu la Yesu? (Tipisalema 5:12)

¹⁷ Yehovha a kombisa swaku wa hi yamukela hi ku tirhisa lifu la N’wana wa yena Yesu. (1 Tm. 2:5, 6) Kambe swi li yini loko minkama yin’wani hi tshuka hi kanakana swaku Yehovha wa hi yamukela, hambiloko hi kombisa lipfumelo ka lifu la Yesu naswona se hi tsakamisiwile? Hi fanele hi khumbuka swaku minkama yin’wani mbilu ya hina yi nga ha hi kanganyisa, kambe minkama hinkwayu hi nga mu tshemba Yehovha. Phela yena a va vona na va lulamile vanhu lava va nga ni lipfumelo ka lifu la N’wana wa yena Yesu Kreste funtshi a tshembisa swaku a ta va katekisa. (Lerha Tipisalema 5:12; Rom. 3:26) Phela ku pimisa hi leswo swi nga hi pfuna hintamu, hilani swi nga mu pfuna hi kona makwerhu mun’wani lweyi a vitaniwaka Vicky. Siku lin’wani a a pimisa hi lisima la lifu la Yesu. Se a game a tibyela leswi: “Se i khale Yehovha na a ni lehisela mbilu na a zama ku ni komba swaku wa ni rhandza. . . . Kambe mina a swo fana ni loko ni mu byela leswi Yehovha: ‘A swi nge koteki swaku u rhandza munhu wa ku fana na mina, funtshi a lifu la N’wana wa wena Yesu a li yeneli kuva u rivalela swihoxo swa mina.’” Ku tinyika nkama wa ku pimisa hi lifu la Yesu swi mu pfunile makwerhu Vicky swaku a swi vona swaku Yehovha wa mu rhandza. Swi hi ku fana na hina namuntlha, loko hi tinyika nkama wa ku pimisa hi lifu la Yesu hi ta swi vona swaku Yehovha wa hi tsakela.

18. Hi nga tiyiseka hi yini loko hi tama hi rhandza Yehovha?

¹⁸ Nkama lowu u tirhisaka leswi hi nga swi djondza ka nhlokomhaka leyi, swi nga yendleka minkama yin’wani u titwa u nga li wa lisima kumbe u pimisa swaku Yehovha a nga ku yamukeli. Loko leswo swi yendleka, khumbuka swaku Yehovha a yamukela vanhu hinkwavu “lava tamaka va mu rhandza.” (Yak. 1:12) Hi mhaka leyo, tama u tshinela ka Yehovha, naswona zama ku vona tindlela hinkwatu leti a ti tirhisaka swaku a ku komba swaku wa ku yamukela. Naswona u nga khohlwi swaku Yehovha a “nga li kule ni mun’wani ni mun’wani wa hina.” — Min. 17:27.