Hi rivaleliwa swidjoho swa hina hi mhaka ya leswi Yesu Kreste a nga nyikela hi wutomi la yena. (Efe. 1:7) Phela Bibele li vula leswaku “hi ku lehisa mbilu ka xona [Xikwembu] a xi rivalela swidjoho leswi nga yendliwa ka nkama lowu nga hundza,” leswi vulaka leswaku hambi hi swidjoho swa vanhu lava nga hanya na Yesu a nga se ta lani misaveni swaku a nyikela hi wutomi la yena swi rivaleliwile. (Rom. 3:25) Kambe a swi kotise ku yini Yehovha ku rivalela swidjoho swa vanhu na a nga se nyikela hi N’wana wa yena a tlhela a kombisa swaku i Xikwembu xa ku lulama?

Yehovha a tshembise swaku a ku ta va ni “n’wana” lweyi a a ta ponisa vanhu hinkwavu lava va kombisaka lipfumelo ka yena ni ka switshembiso swa yena. Se a nkama Yehovha a nga yendla xitshembiso lexo a swi fana ni loko se a hakelile nkutsulu. (Gen. 3:15; 22:18) Xikwembu a xi tiyiseka swaku hi nkama wa kona a N’wana wa xona Yesu a a ta tinyikela hi ku swi rhandza swaku a hi fela swaku hi rivaleliwa swidjoho swa hina. (Gal. 4:4; Heb. 10:7-10) Hi mhaka leyo, nkama lowu Yesu a a li lani misaveni a a nyikiwe matimba ya ku rivalela swidjoho hikusa a a nyimela Papayi wa yena. Yesu a kote ku yendla leswo hikusa a a swi tiva swaku lifu la yena a li ta yenela swaku ku rivaleliwa swidjoho swa vanhu hinkwavu lava nga ni lipfumelo ka yena. — Mat. 9:2-6.