1-2. Hi yini minkateko leyi munhu a vaka na yona loko a tsakamisiwa?

 PHELA swi tsakisa hintamu ku tsakamisiwa hi va Timboni ta Yehovha. I nkateko wawukulu swinene ka hina ku va vanghanu va Yehovha. Hi pfumelelana na Davhida lweyi a nga te: “Wa tsaka lweyi u mu langaka u tlhela u mu tshuneta ka wena [Yehovha], leswaku a ta tshama ka kintari wa wena.” — Ps. 65:4.

² Yehovha hi yena a langaka vanhu lava va nga ta lumba ndjangu wa yena. Hilani hi nga swi vona hi kona ka nhlokomhaka leyi nga hundza, yena a langa ku tshinela a va kusuhi hintamu ni vanhu lava va swi lavaka ku va ni wunghanu la le kusuhi na yena. (Yak. 4:8) Loko swi ku se u tinyiketelile u tlhela u tsakamisiwa, swi vula swaku u ni wunghanu la ku hlawuleka na Yehovha. Funtshi u nga tiyiseka swaku Yehovha a ta ku ‘chululela minkateko, anze u nga ha pfumali nchumu.’ — Mal. 3:10; Yer. 17:7, 8.

3. Mukreste lweyi a nga tinyiketela a tlhela a tsakamisiwa a fanele a yendla yini? (Ekleziyaxta 5:4, 5)

³ Phela ku tsakamisiwa a hi magamu. U fanele u yendla hinkwaswu leswi u nga swi kotaka leswaku u tama u tshembeka ka Yehovha hambiloko u kumana ni mindzingo. (Lerha Ekleziyaxta 5:4, 5.) Leswi u nga mudjondzisiwa wa Yesu, u fanele u yendla hinkwaswu leswi u nga swi kotaka leswaku u tekelela xikombiso xa yena u tlhela u yingisa minawu ya yena. (Mat. 28:19, 20; 1 Pe. 2:21) A djondzo leyi yi ta ku pfuna leswaku u swi kota ku yendla leswo.

‘TAMA U LANDZELA’ YESU HAMBILOKO U KUMANA NI SWIKARHATU KUMBE MINDZINGO

4. Swi vula yini swaku vadjondzisiwa va Yesu va rhwala a “mhandzi ya nxaniso”? (Luka 9:23)

⁴ Loko se u tsakamisiwile, a swi vuli swona swaku minkama hinkwaswu swilo swi ta ku fambela kahle ka wutomi la wena. Phela  Yesu a swi tlhamusele kahle leswo nkama a nga vula swaku, leswaku vadjondzisiwa va yena va tama va mu landzela a va fanele va rhwala a “mhandzi ya nxaniso.” Naswona a va fanele va yendla leswo “siku ni siku.” (Lerha Luka 9:23.) Hi marito lawa, Yesu a a nga lavi ku vula swona swaku loko hi tsakamisiwa hi to tshamela ku hluphiwa. Kambe a wo swi basisa leswaku loko hi tsakamisiwile a swi vuli swona swaku hi to yamukela minkateko ntsena kambe hi ta kumana ni swikarhatu. Funtshi swikarhatu swoleswo minkama yin’wani swi nga ha karhata ku swi tiyisela. — 2 Tm. 3:12.

5. Hi yini minkateko leyi Yesu a nga yi tshembisa lava va tshikaka hinkwaswu swaku va va valandzeli va yena?

⁵ Leswi u nga Mboni ya Yehovha swi nga yendleka maxaka ya wena ma ku hlupha, kumbe swi nga yendleka u tshike ku lavetela male ni tshomba hileswi u lavaka ku rhangisa Mfumu wa Xikwembu ku sungula. (Mat. 6:33) Tiyiseka leswaku Yehovha wa swi vona hinkwaswu leswi u nga mu yendleka swona. (Heb. 6:10) Phela u swi vonile leswaku marito lawa Yesu a nga ma vula i ntiyiso. A te: “A nga kona lweyi a nga tshika yindlo kumbe vamakwavu va xinuna kumbe vamakwavu va xisati kumbe mamani kumbe papayi kumbe vana kumbe masimu hi mhaka ya mina ni hi mhaka ya mahungu ya ku tsakisa lweyi swoswi a nga ta kala a nga kumi leswi nga phindhiwa ka 100, tiyindlo, vamakwavu va xinuna, vamakwavu va xisati, vamamani, vana, masimu xikan’we ni ku xanisiwa, se ka nkama lowu taka a kuma wutomi la ku kala li nga heli.” (Mar. 10:29, 30) Phela minkateko leyi u nga yi kuma hileswi u nga Mboni ya Yehovha yi tlula minchumu hinkwayu leyi u nga yi tshika swaku u va mulandzeli wa Kreste. — Ps. 37:4.

6. Hi mhaka muni u fanele u tama u lwisana ni “ku navela ka nyama” hambiloko se u tsakamisiwile?

⁶ Hambiloko se u tsakamisiwile wa ha ta tama u lwisana ni “ku navela ka nyama”. (1 Yo. 2:16) Phela leswo swi yendleka hileswi hinkwerhu hi psaliwaka na hi ni xidjoho. Minkama yin’wani u nga ha titwa ku fana na mupostolo Pawulo lweyi a nga tsala leswi: “Phela na wu rhandza nawu wa Xikwembu ka mbilu ya mina, kambe ni tsumbule swaku muzimbha wa mina wu ni nawu wun’wani lowu lwaka ni nawu wa mimpimiso ya mina, lowu ni yendlaka xikarawa xa nawu wa xidjoho lowu nga ka muzimbha wa mina.” (Rom. 7:22, 23) Minkama yin’wani u nga ha hela ntamu hi mhaka ya leswi u pfanaka u phazama. Kambe lexi nga ta ku pfuna i ku pimisa hi xitshembiso lexi u nga xi yendlela Yehovha nkama u nga yendla xikhongelo u tinyiketela ka yena. Phela ku pimisa hi xitshembiso lexo swi nga ku pfuna ku hlula mindzingo hinkwayu leyi u nga ha kumanaka na yona. Hi mhaka muni hi vula leswo?

7. Ku tinyiketela ka wena ka Yehovha ku nga ku pfunisa ku yini swaku u tama u tshembeka ka yena?

⁷ Phela loko u tinyiketela ka Yehovha u fanele u titshika. Leswo swi vula swaku a wu fanelanga u rhangisa ku navela ka wena kumbe maplanu ya wena lawa ma nga ha kalaka ma nga mu tsakisi Yehovha. (Mat. 16:24) Naswona loko u kumana ni mindzingo a wu nga ta tihetela nkama wa wena na wu pimisa swaku u ta yendla yini. U ta va se u tiyendlele xiboho xa leswaku minkama hinkwayu u ta tshama u tshembekile ka Yehovha. Naswona u ta yendla hinkwaswu swaku u mu tsakisa. Ku fana na Yobo, u nga swi kota ku tshama na u tshembekile. Phela hambileswi a nga kumana ni mindzingo ya ku karhata swinene a tshame a tshembekile minkama hinkwayu, naswona a game a vula leswi: “Ni ta za ni ya fa na na ha tshembekile!” — Yob. 27:5.

8. Ku pimisa hi xikhongelo lexi u nga xi yendla nkama u nga tinyiketela swi nga ku pfunisa ku yini swaku u nga weli ka ndzingo?

⁸ Ku pimisa hi xikhongelo lexi u nga xi yendla nkama u nga tinyiketela ka Yehovha u tshembisa ku mu tirhela, swi nga ku nyika ntamu swaku u hlula mindzingo leyi u nga ha kumanaka na yona. Hi xikombiso, ha tshemba swaku a wu  nga ta tlanga hi ku gangisana ni nsati wa vanhu kumbe nuna wa vanhu, hikusa u ta va se u tiyendlele xiboho xa leswi u nga ta swi yendla ka mhaka leyi. Hi mhaka leyo, a wu nga ha ta tinyika nkama wa ku pimisa hi swaku u ta yendla yini ka xiyimu xa ku fana ni lexi hikusa u ta va se u tiyendlele xiboho xa ku kala u nga “fambi ka ndlela ya lava yendlaka swa ku biha.” — Swiv. 4:14, 15.

9. Ku pimisa hi xikhongelo xa ku tinyiketela swi nga ku pfunisa ku yini swaku u rhangisa ku tirhela Yehovha?

⁹ Se u ta ku yini loko u tshuka u kuma ntirho lowu wu nga ta ku sivela ku va kona mintlhanganwini nkama ni nkama? A wu nga ta pimisa kambirhi, hikusa se u ta va u tiyendlele xiboho na ka ha li nkama xa leswaku a wu nga ta pfumela ntirho lowu wu nga ta ku sivela ku tirhela Yehovha. Kutani a wu nga ta rhanga hi ku yamukela ntirho wolowo se u gama u vona leswaku u ta mu tirhelisa ku yini Yehovha. Phela ku pimisa hi xikombiso xa Yesu swi nga hi pfuna swinene. Yena a a tinyimisele ku yendla hinkwaswu leswaku a tsakisa Papayi wa yena. Ku fana na Yesu tinyimiseli ku yendla hinkwaswu leswi u nga swi kotaka leswaku u mu tsakisa. — Mat. 4:10; Yoh. 8:29.

10. Yehovha a ta ku pfunisa ku yini swaku u ‘tama u landzela’ Yesu?

¹⁰ A swikarhatu ni mindzingo leyi u nga ha kumanaka na yona swi ku pfulela ndlela swaku u tama u kombisa leswaku u tinyimisele ku ‘tama u landzela Yesu’. Yehovha a tinyimiselile swaku a ku pfuna kuva u tama u yendla leswo, hikusa Bibele li li: “Xikwembu xa tshembeka, a xi nge mi tshiki mi ringiwa hi ndzingo lowu mi nga ta tsandzeka ku wu tiyisela, kambe loko mi ringiwa xi ta mi nyika ndlela ya ku huma swaku mi kota ku wu tiyisela.” — 1 Ko. 10:13.

U NGA YENDLA YINI SWAKU U TAMA U LANDZELA YESU

11. Hi yini ndlela ya lisima swinene leyi hi nga tamaka hi landzela Yesu hi yona? (Vona mufoto.)

¹¹ Phela Yesu a tirhele Yehovha hi mbilu ya yena hinkwayu, naswona a tame a va kusuhi na Yehovha hi ku khongela ka yena. (Luk. 6:12)  Phela ndlela ya lisima hintamu leyi hi nga tamaka hi landzela Yesu Kreste hi yona loko se hi tsakamisiwile, i ku va hi yendla swilo leswi swi nga ta hi pfuna leswaku hi va kusuhi hintamu na Yehovha. Bibele li li: “Ka leswi se hi nga swi fikelela, a hi tameni hi yendlisa swoleswo.” (Filp. 3:16) Minkama yin’wani, u ta twa swiperiyensiya swa vamakwerhu lava va nga yengetela ntirho wa vona ka Yehovha. Swi nga yendleka va ye ka Xikola xa Vachumayeli va Mfumu kumbe va rhurhile va ya lomu ku nga ni xilaveko. Loko swiyimu swa wena swi ku pfumelela swi nga va kahle swinene ku tivekela mintirho yoleyo. Phela vanhu va Yehovha va swi rhandza hintamu ku yengetela ntirho wa vona wa ku chumayela. (Min. 16:9) Kambe u nga yendla yini loko u nga swi koti ku fikelela mintirho yoleyo? U nga pimisi swaku a wu pfuni nchumu, kambe xa lisima i ku tama u tiyisela. (Mat. 10:22) U nga khohlwi swaku u nga yendla swaku Yehovha a tsaka hi ku yendla hinkwaswu leswi u nga swi kotaka ni leswi xiyimu xa wena xi ku pfumelelaka ku yendla swona. Phela leyo i ndlela ya lisima hintamu leyi u nga tamaka u landzela Yesu Kreste hi yona loko se u tsakamisiwile. — Ps. 26:1.

12-13. U nga yendla yini loko u vona swaku a wa ha wu hisekeli ntirho wa Yehovha ku fana ni khale? (1 Vakorinto 9:16, 17) (Vona kwadru leli nge: “ Tama U Tsutsuma Ka Ndlela Ya Wutomi.”)

¹² Se u ta ku yini loko swi ku minkama yin’wani swikhongelo leswi u swi yendlaka a swi sukeli mbilwini, kumbe u nga ha swi hisekeli ku chumayela? Kumbexana u nga ha swi tsakeli ku lerha Bibele ku fana ni khale? Loko leswo swi tshuka swi ku yendlekela loko se u tsakamisiwile, u nga pimisi leswaku moya wa ku kwetsima a wa ha tirhi ka wena. Phela leswo swi nga ha yendlekela mun’wani ni mun’wani wa hina hikusa a hi hetisekanga naswona ndlela leyi hi titwaka hi yona yi nga ha txintxatxintxa. Naswona loko u li ka xiyimu lexo, pimisa hi xikombiso xa mupostolo Pawulo. Hambileswi a a lwa hi matimba swaku a  tekelela Yesu, minkama yin’wani a a nga swi naveli ku yendla leswi a a fanele a swi yendla. (Lerha 1 Vakorinto 9:16, 17.) Yena a vule leswi: “Hambi ni nga chumayeli hi ku swi rhandza, na ha nyikiwile ntirho lowu.” Hi marito lawa, Pawulo a kombisile swaku a a tinyimiselile ku tama a yendla ntirho wa ku chumayela hambiloko minkama yin’wani a nga swi naveli.

¹³ Se na wena tinyimiseli ku yendla swilo swaswinene hambiloko minkama yin’wani u nga swi naveli ku swi yendla. Phela loko minkama hinkwayu u tinyimisela ku yendla swilo swaswinene hambiloko u nga swi naveli, hi ku famba ka nkama u nga ha txintxa ndlela leyi u titwaka hi yona. Phela a ku djondza Bibele, ku khongela, u nga lovhi mintlhanganwini u tlhela u chumayela mahungu ya ku tsakisa swi nga ku pfuna swaku u tama u landzela Yesu loko se u tsakamisiwile. Funtshi loko u yendla leswo swi ta va tiyisa hintamu vamakwerhu. — 1 Tes. 5:11.

‘TAMA U TIKAMBELA . . . TAMA U TIKOMBISA SWAKU U TSHAMISE KU YINI’

14. Nkama ni nkama hi fanele hi tikambela ka yini naswona hi mhaka muni? (2 Vakorinto 13:5)

¹⁴ Loko se u tsakamisiwile i swa lisima swinene kuva u tikambela hi ku tshembeka nkama ni nkama. (Lerha 2 Vakorinto 13:5.) Minkama yin’wani, kambela swaku wa ha khongela nkama ni nkama, wa ha lerha ni ku djondza Bibele nkama ni nkama u tlhela u va kona mintlhanganwini ni swaku wa ha chumayela nkama ni nkama. Zama ku lavetela tindlela ta ku yendla swilo leswo hi ndlela leyi tsakisaka ni leyi nga ta ku pfuna. Hi xikombiso tivutisi leswi: ‘Na swi kota ku tlhamusela vanhu van’wani leswi Bibele li swi djondzisaka? Ni nga yendla yini swaku ntirho wa mina wa ku chumayela wu tsakisa? Loko ni khongela na mu byela Yehovha hi ku kongoma leswi ni titwisaka xiswona ni tlhela ni kombisa leswaku na mu tshemba hi ku helela? Ku nga va swaku ni va kona ka mintlhanganu ya bandla nkama ni nkama? Ni nga yendla yini swaku ni nga phazamisiwi hi nchumu loko ni li mintlhanganwini ni tlhela ni hlamula ka yona?’

15-16. U djondze yini ka xikombiso xa makwerhu Robert?

¹⁵ I swa lisima nakambe ku tiva lani u tsandzekaka kona. Leswi swi nga humelela makwerhu Robert swi kombisa lisima la ku va u yendla leswo. Yena a li: “Nkama na ni ni kolomu ka 20 wa malembe, a ku ni xintirhwani lexi a ni xi yendla. Siku lin’wani ntirhweni, kolega wa mina wa xisati a ni rhambile swaku hi ya kaya ka yena. A vule swaku a hi to va hina vambirhi ntsena naswona a ‘hi ta tikhorisa swinene.’ A ku sunguleni ni rhange hi ku djikadjika ni tlhela ni tinyimelela, kambe hi wugamu ni game ni mu byela swaku a swi nga ta dara ni swaku hi mhaka muni.” Robert a swi kotile ku hlula ndzingo naswona leswi a nga  swi yendla i swinene. Kambe hi ku famba ka nkama a vule leswaku a a ta va a yampsisile ndlela leyi a nga hlamula hi yona. A li: “A ni tekelanga ku yala xirhambu xa wansati lwiyani ku fana na Yosefa lweyi a nga tekela ku yala xirhambu xa nsati wa Potifaru. (Gen. 39:7-9) Ku vula ntiyiso, na mina swi ni hlamalisile ku va swi ni karhatelile ku yala xirhambu lexiyani. Naswona leswo swi kombise swaku a ni fanele ni kulisa a wunghanu la mina na Yehovha.”

¹⁶ Na wena u nga tekelela xikombiso xa makwerhu Robert hi ku tikambela swaku u tshamise ku yini. Hambiloko u tsumbule swaku u swi kotile ku hlula ndzingo tivutisi leswi: ‘Indjhe ni swi kotile ku hantla ni hlamula?’ Loko u tsumbula swaku swi ku karhatelile, u nga godoli kambe tsaka hileswi xiyimu xolexo xi nga ku pfuna ku vona lomu u faneleke u yampsisa kona, se u gama u khongela ka Yehovha swaku a ku pfuna ku yampsisa u tlhela u yendla swilo leswi nga ta ku pfuna ku tinyimisela ku tama u yingisa minawu ya yena. — Ps. 139:23, 24.

17. Leswi nga yendlekela makwerhu Robert swi li khumbise ku yini vito la Yehovha?

¹⁷ Hi nga djondza swin’wani ka xikombiso xa Robert. Yena a te: “Nkama ni nga yala xirhambu xa kolega wa mina, yena a te: ‘Robert u pasile ka provha!’ Ni mu vutisile swaku a a lava ku vula yini hi leswo. Yena a ni tlhamusele swaku munghanu wa yena lweyi a nga tshama a va Mboni ya Yehovha a vule swaku majovhem hinkwawu lawa ma nga Timboni ta Yehovha ma yendla minchumu ya ku biha a xihundleni loko ma kuma mukhandlu. Se kolega wa mina a mu byele swaku a a ta ni kambela ku vona swaku mina a ni ta ku yini. Ni tsake hintamu ku tiva leswaku leswi ni nga yala ni dzunise vito la Yehovha.”

18. U tinyimisele ku yendla yini? (Vona kwadru leli nge: “ Tinhlokomhaka Timbirhi Leti U Nga Ta Ti Tsakela.”)

¹⁸ Loko u tinyiketela ka Yehovha u tlhela u tsakamisiwa, u va u kombisa swaku u swi lava hintamu ku kwetsimisa vito la yena ku nga na mhaka swaku u ta humeleliwa hi yini awuton’wini. Se tiyiseka swaku Yehovha wa swi tiva swikarhatu leswi u kumanaka na swona ni mindzingo leyi yi ku humelelaka, a tlhela a ku vona nkama lowu u lwaka hi matimba swaku u hlula mindzingo yoleyo. Funtshi a ta yi katekisa minzamu leyi u yi yendlaka leswaku u tama u tshembeka ka yena. Tshemba swaku a ta tirhisa moya wa yena wa ku kwetsima swaku a ku pfuna ni ku ku nyika ntamu swaku u tama u tiyisela. (Luk. 11:11-13) Hi ku pfuniwa hi Yehovha, phela u nga swi kota ku tama u landzela Yesu loko se u tsakamisiwile.