U nga yendla yini leswaku u pfuneka ka djondzo ya munhu hi yexe?

• Langa ndhawu ya kahle. Loko swi koteka, langa ndhawu ya kahle leswaku u djondzela ka yona. U nga ha djondza na u tshamile mezeni, kumbe ka ndhawu yin’wani ya ku tshamiseka ahandle.

• Djondza ka ndhawu ya ku rhula lani u nga ta va wexe. Yesu a a tolovela ku ‘ba mpundzu hintamu’ leswaku a ya khongela ka “ndhawu leyi kalaka yi nga na vanhu.” (Mar. 1:35) Loko swi nga koteki leswaku u djondza ka ndhawu leyi kalaka yi nga na vanhu, byela lava u tshamaka na vona swaku u ta djondza hi nkama muni, u gama u va kombela leswaku va nga ku trapalhari loko u li ku djondzeni.

• U nga pfumeleli nchumu xi ku phazamisa. Loko u tirhisa telefoni kumbe thableti leswaku u djondza, u nga ha swi veka ka silensiyu, kumbe u swi veka ka modo de voo leswaku swi nga ku phazamisi. Loko nkama lowu u djondzaka u khumbuka swaku ku ni nchumu lexi u faneleke u xi yendla, u nga ha tsala ka n’wandhawu leswaku u xi yendla hi nkama wun’wani. Naswona loko u vona leswaku a nhloko ya wena a ya ha li ka leswi u swi djondzaka, u nga ha nyimanyana, kumbe u nga ha famba u ya tigwimba u gama u sungulisa.