KU NGA va swaku swa ku godolisa ku yendla djondzo ya munhu hi yexe vhiki ni vhiki? Loko u titwisa xileswo a wu wexe. Kambe lexi xi nga ku pfunaka i ku pimisa hi swilo swin’wani leswi u swi yendlaka siku ni siku. Hi xikombiso, leswaku u hlamba swi lava nkama ni minzamu, kambe loko se u hlambile u titwa na u pepile. Se swa fana ni ku djondza Bibele; loko se u li djondzile, u ta gama u titwa kahle. (Efe. 5:26) A hi voneni swilo swin’wani leswi swi nga ku pfunaka ku yendla djondzo ya munhu hi yexe vhiki ni vhiki.

• Yendla programa. Ka hina Vakreste i “swa lisima hintamu” ku yendla djondzo ya munhu hi yexe. (Filp. 1:10) Se i mpsini swi nga ku pfunaka leswaku ku nga hundzi vhiki na u nga yendlanga djondzo ya munhu hi yexe? Lexi xi nga ku pfunaka i ku tsala ka xiphephani siku ni nkama lowu u lavaka ku yendla djondzo ya wena, u gama u xi lema ka ndhawu leyi swi nga ta ku vevukela kuva u khumbuka siku ni nkama lowu u nga wu veka leswaku u djondza. Xin’wani lexi xi nga ku pfunaka i ku veka alarmi leli nga ta chaya na ku chota nkama wawutsongo leswaku u sungula ku djondza.

• Titwananisi ni xiyimu xa wena. Tikambeli kahle u vona leswi swi nga ku pfunaka swaku u djondza. Hi xikombiso, loko u vona swaku a wu swi koti ku djondza nkama wa ku leha, u nga ha langa ku djondza nkama wawutsongo, hambi ko va 10 minutu ntsena. U ta vona swaku loko u djondza nkama wawutsongo wa ku fana ni 10 minutu, u ta va u djondzile swilo swa swinyingi hintamu leswi a wu nga ta swi djondza loko a wo tshama u nga djondzi nchumu. Naswona swi nga yendleka ku djondza swilo swaswitsongo swi ku pfuna swaku u navela ku djondza swilo swa swinyingi. — Filp. 2:13.

• Swi langi na ka ha li nkama leswi u nga ta djondza hi swona. Phela loko u tibyela leswaku u ta pimisa hi leswi u nga ta djondza hi swona loko se wu fikile nkama wa ku djondza, u ta va na u nga ‘wu tirhisi kahle nkama wa wena’. (Efe. 5:16) Se leswi u nga swi yendlaka, i kuva u hamba lixta la leswi u nga ta djondza hi swona. Naswona loko u kuma swilo leswi u kalaka u nga swi twisisi kahle nkama lowu u djondzaka, swi tsali swaku u ta djondza hi swona ka makhambi lawa ma landzelaka.

• Txintxa madjondzelo ya wena loko swi laveka. Loko swiyimu swa wena swi tshuka swi txintxa, u nga ha txintxa nkama lowu u wu hetaka na u djondza ni ku tlhela u txintxa leswi u djondzaka hi swona, hikusa a xa lisima a hi leswaku u djondza siku muni, u heta nkama muni na u djondza kumbe u djondza hi yini. Kambe a xa lisima i kuva djondzo ya wena yi famba vhiki ni vhiki.

Impela ku yendla djondzo ya munhu hi yexe vhiki ni vhiki swa hi pfuna hintamu. Phela loko hi yendla leswo hi ta tshinela kusuhi na Yehovha, hi yendla swilo hi wutlharhi hi tlhela hi titwa na hi pepile. — Yox. 1:8.