NHLOKOMHAKA YA DJONDZO 17
Yehovha A Ku Rhandza Hintamu!
“Yehovha wa va tsakela vanhu va yena.” — PIS. 149:4.
LISIMU 108 Lirhandzu La Yehovha I Likulu
LESWI HI NGA TA SWI DJONDZA *
Yehovha, Papayi wa hina wa matilweni a “tsakela” mun’wana ni mun’wana wa hina (Vona paragrafu 1)
1. I yini leswi Yehovha a swi vonaka ka vanhu va yena?
YEHOVHA “wa va tsakela vanhu va yena.” (Pis. 149:4) Ku tiva leswo, swi hi yentxa hi tsaka hintamu. Yehovha a vona minchumu ya yinene ka hina naswona a lava swaku hi va vanghanu va yena. Loko hi tama hi tshembeka ka yena, na yena a ta va kusuhi na hina. — Yoh. 6:44.
2. Hi mhaka muni van’wana swi va karhatela ku kholwa swaku Yehovha wa va rhandza?
2 Van’wana va nga ha ku: ‘Na swi tiva swaku Yehovha wa va rhandza vanhu va yena, kambe i yini lexi nga ni kholwisaka swaku wa ni rhandza mina?’ I yini lexi yentxaka vanhu volavo va pimisa hi ndlela leyo? Oksana *, lweyi a nga kula hi ku hlupheka nkama na a ha li mutsongo, a li: “A ni tsake hi ntamu nkama ni nga tsakamisiwa ni tlhela ni va mupfuli wa ndlela. Kambe loko se ku hundze 15 wa malembe ni sungule ku pimisa hi minchumu ya ku biha leyi nga ni yentxekela khale na na ha li mutsongo. Ni game ni tibyela swaku Yehovha a nga ha ni rhandzi funtshi a nga ha swi tsakeli swilo leswi ni mu yentxelaka swona.” Yua, makwerhu wawansati lweyi a nga mupfuli wa ndlela, lweyi na yena a nga kula hi ku hlupheka awutsongwanini, a li: “Leswi a ni lava ku tsakisa Yehovha, ni nyiketele wutomi la mina ka yena, kambe a ni tiyiseka swaku a nge tshuki a ni rhandzile.”
3. Hi swini swivutiso leswi hi nga ta swi hlamula ka nhlokomhaka leyi?
3 Ku fana ni vamakwerhu lava hi nga bula hi vona, na wena u mu rhandza hintamu Yehovha, kambe swi nga yentxeka u sungula ku pimisa swaku a nga ku rhandzi. Hi mhaka muni u fanele u tiyiseka swaku Yehovha hikakunene wa ku rhandza? Naswona i yini xi nga ku pfunaka ku hlula mimpimiso ya leswaku Yehovha a nga ku rhandzi? A hi voneni tinhlamulu ta swivutiso leswo.
SWI NI KHOMBO KU PIMISA SWAKU YEHOVHA A NGA KU RHANDZI
4. Hi mhaka muni swi ni khombo ku pimisa swaku Yehovha a nga hi rhandzi?
4 Loko hi tiyiseka swaku Yehovha wa hi rhandza, hi ta lava ku mu tirhela hi lani hi nga kotaka hi kona hambi hi kumana ni swikarhatu ka wutomi la hina. Kambe loko hi pimisa swaku Yehovha a nga na mhaka na hina, ‘matimba ya hina ma ta va matsongo.’ (Swi. 24:10) Naswona loko hi hela ntamu, hi nga tshembi swaku Yehovha wa hi rhandza, a hi nga ta swi kota ku tshama na hi tshembekile loko Sathana a hi ringa. — Efe. 6:16.
5. I yini leswi nga yentxekela vamakwerhu van’wana lava a va pimisa swaku Yehovha a nga va rhandzi?
5 Van’wana ka vamakwerhu va hina lava nga sungula ku kanakana swaku Yehovha wa va rhandza naswona wa va hlayisa, lipfumelo la vona li pumbekile. Makwerhu James, lweyi a nga doda, a li: “Hambileswi a ni tirha Betele ni tlhela ni pfunisa ka bandla la lirimi lin’wana, a ni tivutisa loko Yehovha a wu tsakela ntirho wa mina. Ku ve ni nkama lowu a ni nga tshembi swaku Yehovha wa swi yingisa swikhongelo swa mina.” Makwerhu Eva, lweyi a nga ka ntirho wa nkama hinkwawu, a li: “Ni tsumbule swaku ku kanakana swaku Yehovha wa ni rhandza swi ni nghozi hikusa swi ta khumba hinkwaswu leswi u mu yentxelaka swona Yehovha, swi tlhela swi hi yentxa hi nga tsaki loko hi mu tirhela.” Makwerhu Michael, lweyi a nga mupfuli wa ndlela wa nkama hinkwawu naswona a nga doda, a li: “Loko u nga kholwi swaku Yehovha wa ku rhandza, u ta va kuli na yena.”
6. Hi fanele hi yentxa yini loko hi sungula ku pimisa swaku Xikwembu a xi hi rhandzi?
6 Leswi nga humelela vamakwerhu lava, swi kombisa swaku lipfumelo la hina li nga pumbeka loko hi sungula ku pimisa swaku Yehovha a nga hi rhandzi. Se hi nga yentxa yini loko hi sungula ku pimisa swaku Yehovha a nga hi rhandzi? Hi fanele hi yi susa hi ku hantlisa mimpimiso yoleyo ka tinhloko ta hina! Hi fanele hi kombela Yehovha kuva a hi pfuna swaku hi txintxa ‘mimpimiso leyi yi hi karhataka’ a hi nyika ‘ku rhula ka yena loku tlulaka mimpimiso hinkwayu, swaku ku vonelela timbilu ta hina.’ (Pis. 139:23; Filp. 4:6, 7) Naswona khumbuka swaku a wu wexe. Ku ni vamakwerhu va vanyingi va ku tshembeka lava lwisanaka ni mimpimiso ya ku fana ni leyo. Hambi vanhu lava a va tirhela Yehovha ka minkama ya khale, a va li na yona mimpimiso ya ku fana ni leyo. Hi xikombiso, vona leswi hi nga swi djondzaka ka mupostolo Pawulo ka mhaka leyi.
HI NGA DJONDZA YINI KA XIKOMBISO XA PAWULO?
7. Hi swini swikarhatu leswi Pawulo a nga kumana na swona?
7 U tshama u titwa na u ni mintirho ya yinyingi lakakuva u pimisa swaku a wu nga ta swi kota ku yi yentxa? Na yena Pawulo a tshame a yentxekeliwa hi leswi fanaka. A tshame a vilela, ku nga li hi bandla lin’we kambe hi “mabandla hinkwawu.” (2 Kor. 11:23-28) U ni mavabyi ya ku karhata lawa ma ku yentxaka u tshama na u nga tsakanga? Na yena Pawulo a tshame a kumana ni xikarhatu lexi a xi mu hlupha hintamu. Swi nga yentxeka a ku li mavabyi ya makulu naswona a a swi lava hintamu swaku ma hundza. (2 Kor. 12:7-10) Ku nga va swaku minkama yin’wana u pfa u hela ntamu hi mhaka swihoxo swa wena? Na yena Pawulo swi mu yentxekelile leswo. Pawulo a ze a ti vula swaku i “n’wambuyangwana,” hi mhaka leswi a a karhateka hi swihoxo swa yena. — Rom. 7:21-24.
8. I yini lexi nga pfuna Pawulo ku tama a tirhela Yehovha hambiloko a kumana ni swikarhatu?
8 Hambileswi Pawulo a nga kumana ni swikarhatu leswi nga mu heta ntamu, a nga tshikanga ku tama a tirhela Yehovha. Kambe i yini lexi nga mu pfuna? Hambileswi Pawulo a a karhateka hi swihoxo swa yena, a a ni lipfumelo la likulu ka lifu la Yesu. Pawulo a a xi tiva kahle xitshembiso xa Yesu lexi nge: “lweyi a pfumelaka ka [Yesu] . . . a kuma wutomi la ku kala li nga heli.” (Yoh. 3:16; Rom. 6:23) Swa tikomba swaku Pawulo a a ni lipfumelo ka lifu la Yesu. A a swi tiva swaku Yehovha a tinyimisele ku rivalela lava tisolaka loko va yentxa swidjoho swa swikulu. — Pis. 86:5.
9. Hi djondza yini ka marito ya Pawulo lawa ma nga ka Vagalatiya 2:20?
9 Pawulo a a tiyiseka swaku Yehovha a mu rhandza hintamu hikusa a rhumele N’wana wa yena Yesu a ta mu fela. (Lerha Vagalatiya 2:20.) Ka marito ya wugamu ya ndzimana leyi, Pawulo a vule leswi: ‘N’wana wa Xikwembu, a ni rhandzile a tlhela a tinyikela hi mhaka ya mina.’ Pawulo a nga zanga a kanakana swaku Yehovha wa mu rhandza hi ku vula leswi: ‘Na swi vona swaku Yehovha wa va rhandza vamakwerhu va mina, kambe mina a nge tshuki a ni rhandzile.’ Kambe Pawulo a khumbuxe Varoma swaku ‘Kreste a hi felile na ha ha li vadjohi.’ (Rom. 5:8) A xi kona lexi nga sivelaka swaku Yehovha a hi rhandza!
10. Hi djondza yini ka Varoma 8:38, 39?
10 Lerha Varoma 8:38, 39. Pawulo a a nga kanakani swaku Yehovha a mu rhandza hintamu. A tsale swaku a xi kona lexi nga ta hi “hambanisa ni lirhandzu leli Xikwembu xi nga na lona hi hina.” Pawulo a a swi tiva swaku Yehovha a a va lehisela mbilu Vayisrayele naswona a a swi khumbuka swilo swa swinene leswi Yehovha a nga mu yentxela swona. Hi marito man’wana, Pawulo a a vula swaku ‘leswi ni swi tivaka swaku Yehovha a rhume N’wana wa yena swaku a ta ni fela, a ni kanakani swaku wa ni rhandza. — Rom. 8:32.
Xa lisima hintamu ka Yehovha, hi leswi hi swi yentxaka swoswi ni leswi hi nga ta swi yentxa nkama lowu taka, ku nga li swihoxo leswi hi nga swi yentxa khale (Vona paragrafu 11) *
11. Buku la 1 Timotiyu 1:12-15, yi vulavula hi swihoxo leswi Pawulo a nga swi yentxa. Hambileswo, i yini xi nga mu tiyisekisa swaku Yehovha wa mu rhandza?
11 Lerha 1 Timotiyu 1:12-15. Swi nga yentxeka Pawulo a a nga titwi kahle loko a khumbuka leswi a nga swi yentxa na a nge se va Mukreste. A swi hi hlamalisi loko Pawulo a tibyele swaku i mudjohi wa “mukulu”. Na a nge se djondza ntiyiso, Pawulo a a hlupha Vakreste, a va peta madjele a tlhela a nyimelela swaku va dlayiwa. (Mint. 26:10, 11) U pimisa swaku Pawulo a a ta titwisa ku yini loko o tshuka a tlhangana ni ntombhi kumbe djaha leli vapsali va lona va nga dlayiwa hi mhaka ya yena? Pawulo a a tisola hintamu hi swidjoho swa yena, kambe a a swi tiva swaku a nge swi txintxi leswi a nga swi yentxa. Funtshi a a kholwa swaku Yesu a mu felile naswona hi ku tiyiseka, a vule marito lawa: “Hi mhaka ya timpsalu ta tikulu ta Xikwembu, ni leswi ni nga swona.” (1 Kor. 15:3, 10) Hi djondza yini ka marito lawa? Hi djondza swaku Yesu a ku felile leswaku a pfula ndlela kuva swi koteka swaku u va munghanu wa mukulu wa Yehovha. (Mint. 3:19) Lexi nga xa lisima hintamu ka Yehovha hi leswi hi swi yentxaka swoswi ni leswi hi nga ta swi yentxa, ku nga li swihoxo leswi hi nga swi yentxa nkama lowu nga hundza, ku nga na mhaka swaku se a hi li Timboni kumbe ihim. — Esa. 1:18.
12. Marito ya 1 Yohani 3:19, 20, ma nga hi pfunisa ku yini loko hi tshuka hi titwa na hi nga pfuni nchumu?
12 Loko u pimisa hi leswi Yesu a nga ku fela swaku u rivaleliwa swidjoho, u nga ha vula marito lawa: ‘A swi ni faneli leswi Yesu a nga ni yentxela swona.’ Kambe i yini lexi nga ku yentxaka u titwisa xileswo? Mbilu ya hina yi nga hi kanganyisa hi ku hi yentxa hi titwa na hi nga pfuni nchumu. (Lerha 1 Yohani 3:19, 20.) Loko hi titwisa xileswo hi fanele hi khumbuka swaku “Xikwembu i xikulu ku tlula timbilu ta hina.” Hambiloko hi pimisa swaku Yehovha a nga hi rhandzi kumbe a nge hi rivaleli loko hi mu hoxela, hi fanele hi tiyiseka swaku Yehovha a hi rhandza hintamu funtshi loko hi mu hoxela a ta hi rivalela. Leswaku hi swi kota leswo, hi fanele hi lerha Bibele siku ni siku, hi khongela nkama ni nkama, hi tlhela hi heta nkama na hi ni vamakwerhu va hina. Hi mhaka muni ku yentxa leswo swi li swa lisima?
KU DJONDZA BIBELE, XIKHONGELO NI VANGHANU VA VANENE SWI NGA KU PFUNISA KU YINI?
13. Ku djondza Rito la Xikwembu swi nga hi pfunisa ku yini? (Vona kwadru leli nge: “ Leswi Rito La Xikwembu Li Nga Va Pfunisa Xiswona.”)
13 Loko u djondza Rito la Xikwembu siku ni siku, swi ta ku pfuna swaku u mu tiva kahle Yehovha. U ta swi vona swaku Yehovha a ku rhandza ku fikela kwini. Loko u pimisa hi Rito la Xikwembu siku ni siku, swi ta ku pfuna ku pimisa hi ndlela ya yinene funtshi swi ta ku pfuna “ku lulamisa” mimpimiso ni mbilu ya wena. (2 Tim. 3:16) Makwerhu Kevin, lweyi a nga doda, lweyi a lwisanaka ni mimpimiso ya ku titwa na a nga pfuni nchumu, a li: “Loko ni lerha Tipisalema 103 ni tlhela ni pimisa hi yona swi ni pfuna ku txintxa mapimiselo ya mina ni ku vona leswi Yehovha a titwisaka xiswona hi mina.” Makwerhu Eva, lweyi hi nga bula hi yena, a li: “Loko li pela ni tolovela ku tinyika nkama wa ku pimisa hi Rito la Xikwembu. Leswo swi ni yentxa ni rhula mbilu swi tlhela swi tiyisa lipfumelo la mina.”
14. Xikhongelo xi nga hi pfunisa ku yini?
14 Khongela minkama hinkwayu. (1 Tes. 5:17) Loko u lava ku va munghanu wa munhu mun’wana, mi fanele mi tinyika nkama wa ku bulisana mi tlhela mi byelana leswi mi titwisaka xiswona. Leswo swi fana ni loko hi lava ku va ni wunghanu la likulu na Yehovha. Loko hi mu byela leswi hi titwisaka xiswona, mimpimiso ya hina, ni swikarhatu swa hina hi xikhongelo, hi kombisa swaku ha mu tshemba funtshi ha kholwa swaku wa hi rhandza. (Pis. 94:17-19; 1 Yoh. 5:14, 15) Makwerhu Yua, lweyi se hi nga bula hi yena, a li: “Loko ni khongela, a ni byeli Yehovha leswi nga ni humelela hi siku lolelo ntsena, kambe ni mu pfulela mbilu ya mina, ni mu byela leswi ni titwisaka xiswona. Loko ni yentxa leswo, ni ya ni vona Yehovha na a nga li mutholi, kambe na a li Papayi lweyi a va rhandzaka hintamu vana va yena.” — Vona kwadru leli nge: “ U Tshama U Swi Lerha Leswi?”
15. Yehovha a swi kombisisa ku yini swaku a ni mhaka na hina?
15 Vanghanu va vanene i nyiko leyi taka hi ka Yehovha. (Yak. 1:17) Yehovha a kombisa swaku a ni mhaka na hina hi ku hi nyika vamakwerhu lava va hi ‘kombaka lirhandzu minkama hinkwayu.’ (Swi. 17:17) Ka karta leli Pawulo a nga li tsalela Vakolosa, na a vulavula hi lava va nga mu pfuna, a vule swaku Vakreste lava va mu “tiyisile hintamu.” (Kol. 4:10, 11) Hambi Yesu, a a tsaka loko a pfuniwa hi vanghanu va yena, ku nga tintsumi ni vanhu. — Luk. 22:28, 43.
16. Vanghanu va vanene va nga hi pfunisa ku yini ku tiyisa wunghanu la hina na Yehovha?
16 Indje wa swi khensa leswi Yehovha a nga ku nyika vanghanu va vanene? Ku bulela vanghanu va wena hi swikarhatu leswi u nga na swona a swi vuli swona swaku lipfumelo la wena a li tiyanga, kambe ku yentxa leswo swi nga ku vhikela. Makwerhu James, lweyi se hi nga bula hi yena, a tlhela a vula leswi: “Vanghanu va vanene lava rhandzaka Yehovha va ni pfune hintamu. Loko ni titwa na ni nga pfuni nchumu, vanghanu volavo, va ni yingisela kahle va tlhela va ni khumbuxa swaku va ni rhandza. Leswo swi ni yentxa ni vona swaku Yehovha wa ni rhandza, funtshi a ni mhaka na mina.” Impela i swa lisima ku va hi tiyisa wunghanu la hina ni vamakwerhu!
TSHAMA KA LIRHANDZU LA YEHOVHA
17-18. Hi mani lweyi u faneleke u mu yingisa, naswona hi mhaka muni?
17 Sathana a nga swi rhandzi ku hi vona na hi yentxa minchumu ya yinene. A lava hi kholwa swaku Yehovha a nga hi rhandzi ni swaku a swi hi faneli ku ponisiwa. Kambe, hi djondze swaku a xi kona lexi nga hi hambanisaka ni ntiyiso.
18 Yehovha wa ku rhandza. Wena u wa lisima ka Yehovha. Se loko u mu yingisa, a ta ‘tama a ku rhandza’ minkama hinkwayu ku fana ni leswi a mu rhandzisaka xiswona Yesu. (Yoh. 15:10) Hi mhaka leyo, u nga mu yingisi Sathana loko a ku yentxa u pimisa swaku Yehovha a nga ku rhandzi. Kambe yingisa Yehovha lweyi a kotaka ku vona minchumu ya yinene leyi mun’wana ni mun’wana wa hina a yi yentxaka. Tiyiseka swaku Yehovha “wa va tsakela vanhu va yena,” ku patsa na wena!
LISIMU 141 Wutomi I Hlori
^ par. 5 Van’wana ka vamakwerhu va hina swa va karhatela ku kholwa swaku Yehovha wa va rhandza. Ka djondzo leyi, hi ta vona swaku i yini xi nga ku kholwisaka swaku Yehovha wa ku rhandza. Hi ta tlhela hi vona swaku i yini lexi nga hi pfunaka ku hlula mimpimiso ya leswaku Yehovha a nga hi rhandzi.
^ par. 2 Mavito man’wana ma txintxiwile.
^ par. 67 NTLHAMUSELO WA MAFOTO: Na a nge se tiva ntiyiso, Pawulo a pete Vakreste va vanyingi djele. Kambe nkama lowu a nga tiva Yesu ni leswi a nga mu yentxela swona, a txintxile a tlhela a pfuna Vakreste van’wana. Swi nga yentxeka van’wana va vona a va li maxaka ya lava a nga tshama a va hlupha.
