KU VILELA, hi nga swi fanisa ni nchumu wa ku tika lowu pezaka mbilwini. (Swi. 12:25) U tshama u vilela hintamu ka wutomi la wena, u za u pimisa swaku a wu nge swi koti ku tiyisela? Loko leswo swi tshame swi ku yentxekela, a wu wexe. Ku tala ka hina, hi ni swilo swa swinyingi leswi hi yentxaka hi vilela. Hi xikombiso, van’wana va nga ha vilela hileswi va tenderaka xaka la vona leli vabyaka, van’wana va vilela hileswi va nga feliwa hi munhu lweyi va mu rhandzaka, funtshi van’wana va nga ha vilela hileswi va humeleliwaka hi tinghozi. Se impsini swi nga hi pfunaka swaku hi kota ku hlula ku vilela? *

Hi nga djondza swilo swa swinyingi ka xikombiso xa Hosi Davhida, leswi nga hi pfunaka ku hlula ku vilela. Phela yena a kumane ni swiyimu swa ku karhata ka wutomi la yena, funtshi minkama yin’wana wutomi la yena a li li nghozini. (1 Sam. 17:34, 35; 18:10, 11) Hosi Davhida a swi kotise ku yini ku hlula ku vilela? Naswona hi nga xi tekelelisa ku yini xikombiso xa yena?

Davhida a kumane ni swikarhatu swa ku hambanahambana hi nkama wun’we. Pimisa hi leswi nga yentxeka nkama na a baleka Hosi Sawulo. Nkama lowu yena ni vavanuna va yena na va vuya hi ku lweni aSikilaga, va fike va kuma swaku a va dumeliwe hi valala lava nga yiva swilo swa vona, va hisa tiyindlo ta vona va tlhela va teka mindjangu ya vona. Se Davhida a yentxe yini? Bibele li li: “Se Davhida ni vanhu lava a va li na yena va sungula ku rila hi rito la ku tlakuka, va za va nga ha wu kumi ni ntamu wa ku tama va rila.” Funtshi Davhida a tame a karhateka hintamu, hikusa vavanuna lava a a li na vona “a va lava ku mu ba hi maribye”. (1 Sam. 30:1-6) Davhida a a kumana ni swikarhatu swinharhu hi nkama wun’we: Ndjangu wa yena a wu li nghozini, a a chava swaku masonchwa ya yena a ma ta mu dlaya, funtshi Hosi Sawulo a a mu lavetela swaku a mu dlaya. Phela swilo leswi hinkwaswu, devhi swi yentxe Davhida a vilela hintamu!

Se Davhida a game a yentxa yini? A tekele “ku titiyisa hi Yehovha Xikwembu xa yena.” A swi yentxise ku yini leswo? Ha swi tiva swaku Davhida a a tolovela ku khongela ka Yehovha swaku a kombela ku pfuniwa, a tlhela a pimisa hi swilo swa swinene leswi Yehovha a nga tshama a mu yentxela khale. (1 Sam. 17:37; Pis. 18:2, 6) Davhida a vone swi yampsa ku kombela ku kongomisiwa hi Yehovha. Hi mhaka leyo, a vutise Yehovha swaku a a fanele a yentxa yini. Nkama Davhida a nga nyikiwa nkongomiso hi Yehovha, a yo vhela a yentxa leswi a nga mu byela swona. Leswo swi yentxe swaku Yehovha a katekisa Davhida ni masonchwa ya yena a tlhela a va pfuna swaku va landza mindjangu ya vona ku patsa ni leswi a swi yiviwile. (1 Sam. 30:7-9, 18, 19) U swi vonile swilo swinharhu leswi Davhida a nga swi yentxa? A khongele ka Yehovha a kombela ku pfuniwa, a pimise hi swilo leswi Yehovha a nga mu yentxela swona khale, a tlhela a tekela ku tirhisa leswi Yehovha a nga mu byela swona. Se hi nga mu tekelelisa ku yini Davhida? A hi voneni swilo swinharhu leswi hi nga swi yentxaka swaku hi mu tekelela.

1. Khongela. Loko hi vilela, hi nga khongela ka Yehovha swaku a hi pfuna a tlhela a hi nyika wutlharhi. Funtshi loko hi khongela ka Yehovha hi mu byela hinkwaswu leswi hi titwisaka xiswona, swi nga hi pfuna swaku hi nga ha vileli hintamu. Hambiloko hi nga na minchumu ya swinyingi ya ku swi vula ka xikhongelo, hi nga ha vula marito ya matsongo hi ku ya hi xiyimu lexi hi nga ka xona. Loko minkama hinkwayu hi khongela ka Yehovha hi kombela swaku a  hi pfuna, hi ta ya hi mu tshemba hintamu ku fana na hosi Davhida lweyi a nge te: “Yehovha i ribye la mina ni xivhikelo xa mina, hi yena a ni ponisaka. Xikwembu xa mina i ribye la mina leli ni tumbelaka ka lona”. (Pis. 18:2) Xikhongelo xi nga hi pfunisa ku yini? Vona leswi makwerhu Kalia lweyi i nga mupfuli wa ndlela a nga swi hlaya. Yena a te: “Loko ni khongela ni titwa na ni rhulile mbilwini, naswona xikhongelo xi ni pfuna ku pimisa ku fana na Yehovha ni tlhela ni mu tshemba hintamu.” Impela, xikhongelo i nchumu wa lisima hintamu lowu Yehovha a nga hi nyika wona swaku a hi pfuna ku hlula ku vilela.

2. Pimisa hi leswi Yehovha a nga tshama a ku pfunisa xiswona. Wa khumbuka ndlela leyi Yehovha a nga ku pfuna hi yona ku hlula swikarhatu leswi u nga kumana na swona? Ku pimisa hi leswi Yehovha a nga tshama a hi pfunisa xiswona khale ni leswi a nga va pfunisa xiswona vanhu va yena khale, swi hi nyika matimba swi tlhela swi hi pfuna ku tama hi mu tshemba. (Pis. 18:17-19) Makwerhu Joshua lweyi i nga doda, a te: “Ni hambe lixta la swikhongelo hinkwaswu leswi Yehovha a nga ni hlamula. Leswo swi ni pfuna ku khumbuka leswi Yehovha a nga swi hlamulisa xiswona swikhongelo swa mina leswi ni nga swi yentxa hi ku kongoma.” Ku pimisa hi leswi Yehovha se a nga hi yentxela swona, swi hi nyika ntamu swi tlhela swi hi pfuna ku hlula ku vilela.

3. Tirhisa leswi Yehovha a ku byelaka swona. Na hi nge se yentxa leswi hi swi pimisaka ka xiyimu lexi hi nga ka xona, hi nga tirhisa Bibele swaku hi tiva leswi Yehovha a lavaka hi swi yentxa. (Pis. 19:7, 11) Vanhu va vanyingi va tsumbule swaku loko va wu kambisisa kahle ntlhamuselo wa ndzimana ya Bibele, swa va vevukela ku twisisa leswi yi nga va pfunisaka xiswona. Makwerhu Jarrod lweyi i nga doda a te: “Ku kambisisa swi ni pfuna ku djondza swilo swa swinyingi ka ndzimana yoleyi ya yin’we leyi ni yi lerhaka ni ku twisisa leswi Yehovha a ni byelaka swona.” Loko hi pfumelela swaku Yehovha a hi kongomisa hi ku tirhisa Bibele, hi tlhela hi tirhisa leswi a hi byelaka swona, hi ta rhula mbilwini hi tlhela hi tsaka hambiloko minkama yin’wana hi vilela.

Davhida a a swi tiva swaku, a a fanele a pfuniwa hi Yehovha leswaku a kota ku hlula ku vilela. Davhida a a swi tlangela hinkwaswu leswi Yehovha a nga mu yentxela swona. Hi mhaka leyo, a te: “Hi matimba ya Xikwembu ni nga swi kota ku khwela muru. Xikwembu xa ntiyiso hi xona xi ni nyikaka matimba”. (Pis. 18:29, 32) Minkama yin’wana hi nga ha kumana ni swikarhatu hi za hi pimisa swaku a hi nge swi koti ku swi hlula kumbe ku swi tiyiselela. Kambe hi ku pfuniwa hi Yehovha hi nga swi kota ku tiyisela swikarhatu hambi swo va swikulu ku fikela kwini. Impela, loko hi khongela hi kombela swaku Yehovha a hi pfuna, hi pimisa hi leswi a nga tshama a hi pfunisa xiswona hi tlhela hi tirhisa leswi a hi byelaka swona, hi nga tiyiseka swaku a ta hi nyika ntamu ni wutlharhi leswaku hi hlula ku vilela!