Ka swiyimu swa ku fana ni leswo, loko munhu a tlhele a chada, abandla li fanele li vona muchadu wa khale na wu helile naswona li fanele li vona muchadu wa nyuwani na wu li nawini hi ku ya hi mfumu. Leswaku hi twisisa lexi hi yentxaka hi hlaya leswi, a hi kambisiseni leswi Yesu a nga swi vula hi divhorsiyu ni ku va munhu a tlhela a chada ni munhu mun’wana.

Ka Matewu 19:9, Yesu a vule swaku i nchumu xin’we ntsena lexi nga yentxaka vanhu va divhorsiyara. Yena a te: “Lweyi a divhorsiyaraka ni nsati wa yena a chada mun’wana, na ku nga li hi mhaka ya nsila ya swa masangu, o mbuyeta.” Marito lawa ya Yesu ma hi djondzisa swilo swimbirhi 1) hi ku ya hi Bibele, vanhu vambirhi va ngo divhorsiyara ntsena loko mun’we wa vona a yentxe nsila ya swa masangu, 2) loko wanuna o divhorsiyara ni nsati wa yena na ku nga na lexi mu pfumelelaka hi ku ya hi Bibele a gama a chada ni nsati mun’wana, a va na o mbuyeta. *

Kambe ku nga va leswaku marito ya Yesu ma lava ku vula leswaku wanuna lweyi a yentxaka nsila ya swa masangu a gama a divhorsiyara ni nsati wa yena, hi ku ya hi Bibele a chunsekile leswaku a chada ni munhu mun’wana? A swi lavi ku vula swona! Loko wanuna a mbuyeta, nsati wa yena lweyi a kalaka a nga na nandzu, a nga ha boha ku mu rivalela kumbe a nga mu rivaleli nuna wa yena. Loko nsati wa yena a boha ku kala a nga mu rivaleli se va gama va divhorsiyara, hinkwavu va vambirhi va chunsekile swaku va nga tlhela va chada, loko mapapela ya divhorsiyu se ma humile.

Kambe, a hi nge nsati lweyi a kalaka a nga na nandzu a lava ku mu rivalela nuna wa yena, kambe lweyi wanuna a sindzisa ku divhorsiyara. Leswi wansati lweyi a lavaka ku mu rivalela leswaku va tama va tshama xikan’we kambe yena lweyi wanuna a yala, swi kombisa leswaku hi ku ya hi Bibele a nga chunsekanga leswaku a chada ni mun’wanyana. Kambe loko lweyi wanuna a sindzisa ku chada ni wansati mun’wana na a nga chunsekanga hi ku ya hi Bibebe, o mbuyeta, naswona mhaka ya ku fana ni leyi swi lava swaku madoda ma yi yentxela comissão la ku yavanyisa. —  1 Kor. 5:1, 2; 6:9, 10.

Kambe a hi nge wanuna a tlhela a chada na swi nga pfumeleliwi hi ku ya hi Bibele. A bandla li fanele li wu vonisa ku yini muchadu wa yena wa ku sungula ni wa nyuwani? Ku nga va leswaku a muchadu wa khale wa ha tirha hi ku ya hi Bibele? A wansati lwiyani ke wa ku kala a nga na nandzu, ku nga va leswaku a nga ha mu rivalela nuna wa yena kumbe a mu tshika? Ku nga va leswaku a bandla li fanele li vona muchadu wa nyuwani na ku li wumbuye?

Khale a hi twisisa swaku loko wanuna a chada ni wansati mun’wana kuve nsati wa yena wa ku sungula lweyi a nga tshikana na yena wa ha hanya, funtshi a nge se chada ni munhu mun’wana kumbe ku yentxa nsila ya swa masangu, wanuna yelweyo o mbuyeta. Kambe hi fanele hi khumbuka swaku Yesu a nga zanga a vulavula hi wansati lweyi a kalaka a nga na nandzu nkama a nga vulavula hi divhorsiyu ni muchadu wa nyuwani. Kambe a yo vula swaku  wanuna lweyi a divhorsiyaraka ni nsati wa yena na a nga landzi nawu wa Bibele a gama a chada ni mun’wana, o mbuyeta. A divhorsiyu ni muchadu wa nyuwani hi swona swi yentxaka swaku muchadu wa ku sungula wu nga ha tirhi.

Loko wanuna a divhorsiyara ni nsati wa yena a gama a ya chada ni mun’wanyana, a swi nge he koteki swaku nsati wa yena wa khale lwiyani a kalaka a nga na nandzu a yentxa xiboho xa ku mu rivalela kumbe ku mu tshika. Leswi swi vula swaku a nga ha fanelanga a karhateka hi swaku a ta lava ku mu rivalela kumbe a mu tshika nuna wa yena lwiyani wa khale. Naswona ndlela leyi bandla li vonaka hi yona muchadu wa khale a yi fanelanga yi ya hi swaku wansati lweyi a kalaka a nga na nandzu a nge se fa, a nge se chada kumbe a nge se yentxa nsila ya swa masangu. *

Ka xikombiso lexi hi nga xi vona ku sunguleni, wanuna a yentxe wumbuye, leswi nga yentxa swaku a divhorsiyara ni nsati wa yena. Kambe swi nga ku yini loko wanuna lweyi a nga mbuyeta, o divhorsiyara a gama a ya chada ni wansati mun’wana? Naswona swi nga ku yini loko wanuna a nga yentxanga nsila ya swa masangu na a nge se divhorsiyara, kambe a gama a yi yentxa na se a divhorsiyarile, se a ya chada ni wansati mun’wana hambileswi wansati wa ku sungula a nga mu rivalela? Ka swiyimu leswo haswimbirhi, loko a divhorsiyarile a tlhela a chada, swi ta voniwa na ku li wumbuye naswona swi ta yentxa swaku muchadu wa ku sungula wu hela. A muchadu wa nyuwani wa yamukeliwa hi ku ya hi nawu wa mfumu. A Murindzi wa 1 ka Fevereiro wa 1980, pajina 32 (hi Xiputukezi) a tlhamuseli mhaka leyi hi ndlela leyi: “Swoswi leswi se a nga nghenela muchadu wa nyuwani, a nge suketani a wu tshika a gama a tlhelela ka nsati wa yena wa khale. A muchadu wa ku sungula se wu helile hi mhaka divhorsiyu, wumbuye ni muchadu wa nyuwani.”

Akuva hi yampsise matwisiselo ya hina ka mhaka leyi, a swi lavi ku vula swaku Vakreste a va ha fanelanga va vona muchadu na wu li nchumu wa ku hlonipheka kumbe swaku wumbuye a hi xidjoho xa xikulu hintamu. Loko wanuna a divhorsiyara ni nsati wa yena na a nga landzi leswi Bibele li swi vulaka a tlhela a chada ni munhu mun’wanyana, ku fanele ku hambiwa comissão la ku yavanyisa hi madoda swaku va tendera mhaka leyi. (Loko wansati lweyi a nga chada na yena a li Mukreste, na yena a fanele a yentxeliwa comissão la ku yavanyisa hikusa a yentxe wumbuye.) Hambileswi muchadu lowu wu kalaka wu nga li wumbuye, wanuna lweyi, a nga ha tshama na a nga nyikiwi mintirho abandleni, anze nkama lowu vanhu van’wana va nga ta kala va nga ha karhateki hi swilo swa ku biha leswi a nga swi yentxa, kumbe se va mu hlonipha. Naswona, na a nge se nyikiwa mintirho abandleni, madoda ma fanele ma pimisa hi xiyimu lexi nsati ni vana va muchadu wa yena wa ku sungula va nga ka xona hi leswi va nga tshikiwa. —  Mal. 2:14-16.

Vakreste va fanele tekelela Yehovha, hi ku vona muchadu tanihi nchumu wa ku hlonipheka. Ni ku va tlhela va pimisa hi leswi nga yentxekaka loko va divhorsiyara na va nga landzi leswi Bibele li swi hlayaka. —  Ekl. 5:4, 5; Heb. 13:4.