NHLOKOMHAKA YA DJONDZO 19
Hi Nga Li Tiyisisa Ku Yini Lipfumelo Ka Ntshembo Wa Misava Ya Nyuwani?
“Loko [Yehovha] a vula nchumu, a nge swi yendli?” — TINHL. 23:19.
LISIMU 142 Ahi Khomeni Swi Tiya ka Ntshembo wa Hina
LESWI HI NGA TA SWI DJONDZA a
1-2. Hi fanele hi yendla yini na misava ya nyuwani yi nge se fika?
SWI tsakisa ndjhani ku tiva swaku Yehovha a tshembisa swaku ku nga li khale a ta helisa misava leyi ya ku biha a tlhela a hi tisela misava ya nyuwani! (2 Ped. 3:13) I ntiyiso swaku a hi swi tivi swaku misava ya nyuwani yi ta fika siku muni, kambe ku ni swilo swa swinyingi leswi hi tiyisekisaka swaku a ku choti nkama wa wunyingi leswaku leswo swi yendleka. — Mat. 24:32-34, 36; Mint. 1:7.
2 Ku nga na mhaka swaku i khale na hi li ka ntiyiso kumbe ihim, i swa lisima swaku hi tama hi tiyisa lipfumelo la hina ka ntshembo wa misava ya nyuwani. Hi mhaka muni? Hikusa hambi hi li ni lipfumelo la ku tiya namuntlha, li nga ha tshuka li hola. Se swa twala ku va mupostolo Pawulo a vule swaku ku pfumala lipfumelo i “xidjoho lexi hi phasaka hi ku vevuka.” (Heb. 12:1) Se, leswaku lipfumelo la hina li nga holi, swi kahle leswaku hi pimisa minkama ya yinyingi hi swilo leswi hi tiyisekisaka swaku a misava ya nyuwani hikakunene yi ta fika. — Heb. 11:1.
3. Hi ta djondza hi yini ka nhlokomhaka leyi?
3 Ka nhlokomhaka leyi, hi ta djondza hi swilo swinharhu leswi hi faneleke hi swi yendla swaku hi tiyisa lipfumelo la hina ka leswaku Yehovha a ta xi hetisisa xitshembiso xa yena xa ku hi nyika misava ya nyuwani: 1) Ku pimisa hi lifu la Yesu, 2) ku pimisa hi matimba ya Yehovha, ni 3) ku yendla swilo kumbe mintirho leyi nga tiyisaka wunghanu la hina na Yehovha. Hi ta gama hi vona swaku rungula leli Yehovha a nga li byela Habakuku li nga li tiyisisa ku yini lipfumelo la hina namuntlha. Kambe a hi rhangeni hi ku vona swaku kuva hi tiyisela swikarhatu namuntlha, hi fanele hi tiyisa lipfumelo la hina ka leswaku misava ya nyuwani yi ta fika.
SWIYIMU LESWI KA SWONA HI FANELEKE HI VA NI LIPFUMELO LA KU TIYA
4. Hi swini swiboho leswi swi lavaka lipfumelo la ku tiya swaku hi swi teka?
4 Siku ni siku swi lava hi teka swiboho, ku nga ha va ku li swiboho swaswitsongo kumbe swaswikulu. Kambe lexi nga hi pfunaka swaku hi teka swiboho swaswinene i lipfumelo la ku tiya. Hi xikombiso, siku ni siku swi lava hi teka swiboho swa ku fambelana ni vanghanu, leswi hi nga ta hungata hi swona, xikola lexi hi nga ta djondzaka xona, wukati, vana kumbe ntirho. Kambe i swinene swaku hi tivutisa swilo swa ku fana ni leswi: ‘Ku nga va swaku swiboho leswi ni swi tekaka swa swi kombisa swaku na kholwa swaku misava leyi yi le kusuhi ni ku helisiwa, ni leswaku misava ya nyuwani yi kola kusuhi? Kumbe ni teka swiboho ku fana ni vanhu lava kalaka va nga kholwi swaku hi ta hanya wutomi la ku kala li nga heli?’ (Mat. 6:19, 20; Luk. 12:16-21) Loko hi kholwa swaku misava ya nyuwani yi kola kusuhi, hi ta teka swiboho swaswinene.
5-6. Hi mhaka muni hi fanele hi va ni lipfumelo la ku tiya loko hi kumana ni swikarhatu? Nyikela xikombiso.
5 Hi fanele hi va ni lipfumelo la ku tiya swaku hi kota ku hlula swikarhatu leswi hi kumanaka na swona. Swi nga yendleka hi hluphiwa hi mhaka lipfumelo la hina, hi va ni mavabyi yamakulu kumbe hi kumana ni xiyimu lexi hi hetaka ntamu. Ku sunguleni hi nga ha pimisa swaku hi ta swi kota ku lwisana ni xikarhatu xolexo, kambe loko xikarhatu xolexo xi teka nkama wa wunyingi, swi lava hi va ni lipfumelo la ku tiya swaku hi kota ku xi tiyisela hi tlhela hi tama hi tirhela Yehovha na hi tsakile. — Rom. 12:12; 1 Ped. 1:6, 7.
6 Loko hi tshuka hi kumana ni xiyimu xa ku karhata, minkama yin’wani hi nga ha pimisa swaku misava ya nyuwani leyi Yehovha a nga yi tshembisa a yi nga ta fika. Kambe leswo, a swi vuli swaku lipfumelo la hina lo kala li nga tiyanga. Pimisa hi xikombiso lexi, loko ku fika wuxika naswona ku va ni xirhami hintamu, hi nga ha tshuka hi pimisa swaku a malanga a ma nge te fika. Kambe ku nga na mhaka swaku ku ni xirhami xa ku tshamisa ku yini, malanga ma ta fika. Hi ndlela leyi fanaka, loko hi hele matimba hi nga ha pimisa swaku misava ya nyuwani a yi nga ta fika. Kambe loko lipfumelo la hina li tiyile, hi ta tiyiseka swaku switshembiso swa Xikwembu swi ta hetiseka minkama hinkwayu. (Pis. 94:3, 14, 15; Heb. 6:17-19) Loko hi kholwa swaku misava ya nyuwani yi ta fika, a ku gandzela Yehovha ku ta va nchumu wa lisima hintamu ka wutomi la hina.
7. I mapimiselo wani lawa hi faneleke hi tivonela ka wona?
7 Swi lava hi tiyisa lipfumelo swaku hi chumayela. Ka vanhu va vanyingi lava hi va chumayelaka mahungu ya ku tsakisa, swi tikomba swi nga twali ku kholwa swaku misava ya nyuwani yi ta fika hikakunene. (Mat. 24:14; Ezek. 33:32) Kambe a hi fanelanga hi pfumelela mapimiselo wolawo ma txintxa mavonelo ya hina. Leswaku leswo swi nga yendleki, hi fanele hi tshamela ku tiyisa lipfumelo la hina. Se swoswi a hi voneni swilo swinharhu leswi nga hi pfunaka ku yendla leswo.
PIMISA HI LIFU LA YESU
8-9. Hi mhaka muni ku pimisa hi lifu la Yesu swi tiyisa lipfumelo la hina?
8 Ndlela yin’wani ya ku tiyisa lipfumelo la hina, i ku pimisa hi lifu la Yesu. A lifu la Yesu i xitiyisekiso xa leswaku Xikwembu xi ta hetisisa hinkwaswu leswi xi nga hi tshembisa swona. Ku pimisa swaku hi mhaka muni Yehovha a nyikele hi N’wana wa yena, ni ndlela leyi swi nga mu karhatela hi yona ku yendla leswo, swi tiyisa lipfumelo la hina ka leswaku xitshembiso xa Xikwembu xa ku hi nyika misava ya Nyuwani xi ta hetiseka. Hi mhaka muni hi vula leswo?
9 Leswaku a hi ponisa, Yehovha a nyikele hi N’wana wa yena lweyi a mu rhandzaka hintamu leswaku a ta psaliwa lani misaveni na a li munhu wa ku hetiseka. Nkama lowu Yesu na a li lani misaveni a kumane ni swikarhatu swa swinyingi hintamu a tlhela a dlayiwa hi ndlela ya mona. Phela Yehovha a hakele ku dura swaku a hi ponisa. Xikwembu xa hina xa lirhandzu a xi nga ta pfumelela swaku N’wana wa xona a hluphekisa xileswo a tlhela a fa leswaku hi hanya malembenyana ntsena. (Yoh. 3:16; 1 Ped. 1:18, 19) Leswi Yehovha a nga nyikela hi N’wana wa yena swaku a hi ponisa, a ta yendla hinkwaswu swaku a hi nyika wutomi la ku kala li nga heli amisaveni ya nyuwani.
PIMISA HI MATIMBA YA XIKWEMBU
10. Hi ku ya hi Vaefeza 3:20, i yini leswi Yehovha a nga ni matimba ya ku swi yendla?
10 Nchumu wa wumbirhi lowu nga hi pfunaka ku tiyisa lipfumelo la hina, i ku pimisa hi matimba ya Yehovha. Hi mhaka matimba lawa a nga na wona, Yehovha a nga hetisisa xitshembiso xin’wani ni xin’wani lexi a nga xi yendlaka. I ntiyiso swaku swi nga ha voneka swi nga kholwisi ka vanhu loko va pimisa hi xitshembiso xa ku hanya lani misaveni na hi nga fi, kambe minkama ya yinyingi Yehovha a tshembisa swilo leswi hina vanhu hi kalaka hi nga swi koti ku swi yendla; hikusa Yena i Xikwembu xa Matimba Hinkwawu. (Yobo 42:2; Marku 10:27) Se leswi Yehovha a nga Xikwembu xa Matimba Hinkwawu, a hi ta nyimela swaku a tshembisa swilo leswi mun’wani ni mun’wani a nga kotaka ku swi hetisisa? — Lerha Vaefeza 3:20.
11. Nyikela xikombiso xa xitshembiso lexi Yehovha a nga xi hetisisa, hambileswi ka vanhu a swi tikomba ingi swi nge koteki. (Vona kwadru leli nge: “ Switshembiso Swin’wani Swa Ku Hlamalisa Leswi Se Swi Nga Hetiseka.”)
11 Swoswi a hi voneni switshembiso swin’wani leswi Yehovha a nga swi yendla ka vanhu va yena ka minkama ya khale, leswi a swi tikomba ingi a swi nge koteki ku swi hetisisa. A tshembise Abrahamu na Sara swaku hambileswi a va gugile a va ta psala n’wana. (Gen. 17:15-17) A tlhele a byela Abrahamu swaku a a ta nyika vatukulu va yena a tiko la Kanana. Xitshembiso lexi a swi tikomba ingi swi nge koteki ku xi hetisisa hikusa Vayisrayele, ku nga vatukulu va Abrahamu va hete malembe ya manyingi na va hlupheka na va li swikarawa aGibita. Kambe xitshembiso lexi xi hetisekile. Hi ku famba ka nkama, Yehovha a vule swaku Elizabeti hambileswi se a a gugile a a ta va ni n’wana. A tlhele a tshembisa Mariya hambileswi a a nge se famba masangu ni wanuna, swaku a a ta va ni nyimba leswaku a psala N’wana wa Xikwembu. Hi ndlela leyo, ku hetiseka xitshembiso lexi Yehovha a a xi yendlile ka malembe ya manyingi lawa a ma hundzile a jardim la Edeni. — Gen. 3:15.
12. Buku la Yoxuwa 23:14 ni Esaya 55:10, 11 ma hi byela yini hi matimba ya Yehovha?
12 Loko hi pimisa hi switshembiso leswi Yehovha se a nga swi hetisisa ka vanhu va nkama lowu nga hundza, hi ya hi tiyiseka swaku xitshembiso lexi a nga hi yendlela xona xa misava ya nyuwani hikakunene xi ta yendleka. (Lerha Yoxuwa 23:14; Esaya 55:10, 11.) Hi ndlela leyo, hi va hi lunghekile ku pfuna vanhu van’wani ku twisisa swaku a xitshembiso lexi a nga hi yendlela xona xa ku hi nyika misava ya nyuwani, xi ta hetiseka hikakunene. Yehovha a vule leswi mayelana ni misava ya nyuwani ni matilo ya nyuwani: “Marito lawa ma tshembeka naswona i ya ntiyiso.” — Nhla. 21:1, 5.
YENDLA MINTIRHO LEYI TIYISAKA WUNGHANU LA WENA NA YEHOVHA
MINTLHANGANU
Ku yendla swilo leswi swi nga li tiyisisa ku yini lipfumelo la wena? (Vona paragrafu 13)
13. Mintlhanganu yi nga li tiyisisa ku yini lipfumelo la hina?
13 Nchumu wa wunharhu lowu nga tiyisaka lipfumelo la wena, i ku yendla mintirho leyi tiyisaka wunghanu la wena na Yehovha. Hi xikombiso, pimisa hi mintlhanganu. Makwerhu mun’wani lweyi a vitaniwaka Anna, lweyi a nga ni malembe na a li ka ntirho wa nkama hinkwawu a li: “Mintlhanganu yi tiyisa lipfumelo la mina ku fana ni nsimbi leyi tiyisaka boti. Hambiloko makwerhu lweyi a vekaka dixkursu a nga hlayi nchumu xa nyuwani, kumbe madixkursu ya yena ma nga hisi, minkama hinkwayu ku ni nchumu lexi xi ni pfunaka ku twisisa kahle Bibele ni ku tiyisa lipfumelo la mina.” b Handle ka leswo, lipfumelo la hina li nga ya li tiya hi tinhlamulu ta vamakwerhu amintlhanganwini. — Rom. 1:11, 12; 10:17.
NTIRHO WA KU CHUMAYELA
Ku yendla swilo leswi swi nga li tiyisisa ku yini lipfumelo la wena? (Vona paragrafu 14)
14. Ntirho wa ku chumayela wu li tiyisisa ku yini lipfumelo la hina?
14 Ku chumayela na swona swi tiyisa lipfumelo la hina. (Heb. 10:23) Makwerhu Barbara, lweyi se a nga ni 70 wa malembe na a tirhela Yehovha a li: “A ntirho wa ku chumayela wu tiyisa lipfumelo la mina. Nkama lowu ni vulavulaka ni vanhu hi switshembiso swa Yehovha, lipfumelo la mina li ya li tiya swinene.”
DJONDZO YA BIBELE
Ku yendla swilo leswi swi nga li tiyisisa ku yini lipfumelo la wena? (Vona paragrafu 15)
15. Djondzo ya Bibele yi nga li tiyisisa ku yini lipfumelo la hina? (Vona mufoto.)
15 Nchumu wun’wani lowu tiyisaka lipfumelo i djondzo ya Bibele. Makwerhu Susan a rhandza ku tiyendlela programa la masiku lawa a nga ta djondza hi wona. Yena a li: “Hi Domingo ni lunghiselela Murindzi wa vhiki leli landzelaka. Se, hi Segunda ni Terça ni lunghiselela mintlhanganu ya xikarhi ka vhiki. Se ka masiku lawa man’wani ni tiyendlela djondzo ya mina ya Bibele.” Leswi Susan a nga ni programa la djondzo ya Bibele, lipfumelo la yena li ya li tiya. Makwerhu Irene lweyi a nga ni malembe na a tirha sede mundial, a vula swaku ku djondza hi wuprofeta la Bibele swi tiyisa lipfumelo la yena. Yena a li: “Swa ni hlamalisa ku vona ndlela leyi wuprofeta la Yehovha li hetisekaka hi yona hambi hi ka minchumu yayitsongoo.” c
“XI TA HETISEKA, A XI NGE TE HLWELA”
16. Ku nga va swaku marito lawa Yehovha a nga ma byela Habakuku ma tirha ni ka hina namuntlha? (Vaheberu 10:36, 37)
16 Vanhu va Yehovha se i khale na va nyimelile swaku misava leyi yi helisiwa. Hi mavonelo ya munhu, hi nga ha pimisa swaku switshembiso swa Xikwembu swa hlwela swaku swi hetiseka, kambe Yehovha wa swi tiva leswi vanhu va yena va titwisaka xiswona. A tshame a vula leswi ka muprofeta Habakuku: “Hikusa xivono xa ha li xa nkama lowu nga vekiwa, naswona xi hantlisela a ku hetisekeni, a xi nge hembi. Hambiloko xo hlwela, tshama na u xi nyimelile! Hikusa xi ta hetiseka, a xi nge te hlwela!” (Hab. 2:3) Ku nga va swaku marito lawa Yehovha a nga ma byela Habakuku ma yo tiyisa yena ntsena, kumbe ma tirha ni le ka hina namuntlha? Mupostolo Pawulo na yena a ma tirhisile marito lawa ka Vakreste lava a va nyimela misava ya nyuwani. (Lerha Vaheberu 10:36, 37.) Se hambiloko ho vona ingi xitshembiso xa Xikwembu xa hlwela ku hetiseka, “xi ta hetiseka, a xi nge te hlwela!”
17. Makwerhu Louise a ma tirhisisa ku yini marito lawa Yehovha a nga ma byela Habakuku?
17 Vamakwerhu va vanyingi se va ni malembe na va tirhisa leswi Yehovha a nga swi vula loko a te hi fanele hi ‘tama hi nyimela’. Hi xikombiso, makwerhu Louise, lweyi a nga sungula ku tirhela Yehovha hi 1939 a te: “Hi nkama wolowo a ni pimisa swaku Armajedoni a yi ta fika na ni nge se heta 12ª classe, kambe a hi swona leswi nga yendleka. Se leswi nga ni pfuna ka malembe lawa hinkwawu i ku lerha hi vanhu lava nga tsaliwa ka Bibele, lava swi nga lava va rindza leswaku Yehovha a hetisisa xitshembiso lexi a nga va yendlela xona, va ku fana na Nowa, Abrahamu, Yosefa ni van’wani. Ku tama ni rindza, swi pfuna mina ni van’wani kuva hi tiyiseka swaku misava ya nyuwani yi kusuhi. Ha tiyiseka swaku vamakwerhu va vanyingi lava se va nga ni malembe na va tirhela Yehovha, va ma twisisa marito lawa!
18. Ku pimisa hi leswi Yehovha a nga swi yendla swi nga li tiyisisa ku yini lipfumelo la hina ka leswaku misava ya nyuwani yi ta fika?
18 I ntiyiso swaku misava ya nyuwani a yi se fika. Kambe pimisa hi swilo swa ku fana ni tinyeleti, minsinya, swiharhi ni vanhu. A nga kona lweyi a nga phikizaka swaku swilo leswi swi kona. Kambe ku ve ni nkama lowu swilo leswi a swi nge se va kona, kambe swi kona namuntlha hileswi Yehovha a nga swi yendla. (Gen. 1:1, 26, 27) Xikwembu hi xona xi nga hi tshembisa swaku misava ya nyuwani yi ta fika, naswona xi ta xi hetisisa xitshembiso lexo. Loko a xi hetisisa, a vanhu va ta hanya wutomi la ku tsakisa na va nga fi. Se, hi nkama lowu Yehovha a nga wu vekisa, misava ya nyuwani yi ta fika. — Esa. 65:17; Nhla. 21:3, 4.
19. U nga li tiyisisa ku yini lipfumelo la wena?
19 Nkama lowu hi nyimelaka misava ya nyuwani, hi fanele hi wu tirhisa kahle nkama wa hina swaku hi tiyisa lipfumelo la hina. Tama u pimisa hi lifu la Yesu, matimba ya Yehovha ni ku tlhela u yendla mintirho leyi tiyisaka wunghanu la hina na Yehovha. Hi ndlela yoleyo, u ta va xikarhi ka “lava dlaka tshomba la switshembiso hi mhaka ya ku pfumela ni ku lehisa mbilu.” — Heb. 6:11, 12; Rom. 5:5.
LISIMU 139 Tivoni Se Na U Hanya Ka Misava Ya Nyuwani
a Vanhu vanyingi namuntlha a va kholwi ka xitshembiso xa Bibele xa misava ya nyuwani. Ka vona swoleswo a swi nge yendleki hikusa swi tikomba swi li norho. Naswona xi tikomba xi li xitshembiso xaxikulu hintamu lakakuva a swi twali ku kholwa ka xona. Kambe hina ha tiyiseka swaku switshembiso hinkwaswu swa Yehovha swi ta hetiseka. Hambileswo, swi lava hi yendla minzamu swaku lipfumelo la hina li tshama li tiyile. Se ka djondzo leyi, hi ta vona swaku hi nga li tiyisisa ku yini lipfumelo la hina ka ntshembo wolowo.
b Mavito man’wani ma txintxiwile.
c U nga kuma tinhlokomhaka tin’wani leti vulavulaka hi wuprofeta la Bibele, loko u nghena lani ku nge: “Vuprofeta” ka Nkongomiso Wa Ku Yendla Pexkiza Wa Timboni Ta Yehovha. Hi xikombiso, vona nhlokomhaka leyi nge: “Tshemba Yehovha — Xikwembu Xa ‘Minkarhi Ni Tinguva’” ka Murindzi wa 15 ka Maio wa 2012 (hi Xitsonga).
