1. I yini leswi vamakwerhu va vanyingi va swi yentxaka swaku va yengesela ntirho wa vona ka Yehovha?

LESWI misava leyi ya Sathana yi nga kusuhi ni ku helisiwa, hi ni ntirho wa wunyingi wa ku wu yentxela Yehovha. (Mat. 24:14; Luk. 10:2; 1 Ped. 5:2) Hinkwerhu hi lava ku tirhela Yehovha hilani hi nga kotaka hi kona. Van’wana va yengesela ntirho wa ku chumayela, kasi van’wana i vapfuli va ndlela naswona van’wana va lava ku pfunisa Betele ni ka ntirho wa ku yaka. Kasi vamakwerhu van’wana va yentxa minzamu swaku va va vapfunisi va bandla kumbe madoda. (1 Tim. 3:1, 8) Yehovha a tsaka hintamu loko a vona vanhu va yena va tinyimisela ku mu tirhela hi lani va nga kotaka hi kona! — Pis. 110:3; Esa. 6:8.

2. Hi nga titwisa ku yini loko hi nga swi koti ku fikelela mintirho leyi a hi lava ku yi yentxela Yehovha?

² Minkama yin’wana loko hi nga swi koti ku fikelela mintirho leyi a hi lava ku yi yentxa ka nhlengeletanu ya Yehovha hi nga ha vaviseka. Hi nga ha tlhela hi karhateka loko swiyimu swa hina kumbe ntanga yi nga hi pfumeleli ku fikelela mintirho leyi a hi lava ku yi yentxela Yehovha. (Swi. 13:12) Phela leswi hi swona swi nga yentxekela makwerhu Melisa. * A a swi lava hintamu ku ya tirha Betele kumbe ku ya ka Xikola xa Vachumayeli va Mfumu. Yena a li: “Hambileswi a ni swi lava hintamu ku yentxa mintirho leyi, se ni mukulu naswona ntanga ya mina a ya ha ni pfumeleli swaku ni yi yentxa. Hi mhaka leyo, ni pfa ni vaviseka.”

3. I yini leswi van’wana va faneleke va swi yentxa leswaku Yehovha a va yengesela mintirho yin’wana?

³ Lava nga majovhem, swi nga ha yentxeka va ni wutivi, va yentxa swilo hi ku kahlula naswona va tiyile swaku va yentxa mintirho. Kambe swi nga ha lava va yampsisa wumunhu la vona, va djondza ku lehisa mbilu ni ku va ni xihloniphu xa ku yenta. Se loko u lwela ku va ni wumunhu la linene, Yehovha a ta ku yengesela mintirho yin’wana  na wu nga swi nyimelanga. A hi voneni xikombiso xa makwerhu Niki. Nkama na a li ni 20 wa malembe, a kwate hintamu hileswi va kalaka va nga mu vekanga swaku a va mupfunisi wa bandla. Yena a li: “A ni pimisa swaku kumbexana a ko va ni nchumu lexi ni kalaka ni nga xi yentxi kahle.” Kambe Niki a nga godolanga, a zame ku yi yentxa kahle mintirho leyi se a a li na yona. Swoswi Niki i makwerhu wa Comissão la Filiyali.

4. Hi swini swivutiso leswi nga ta hlamuliwa ka djondzo leyi?

⁴ Loko ku li swaku u vavisekile hileswi ku nga ni ntirho lowu u kalaka u nga se swi kota ku wu fikelela ka ntirho wa Yehovha, khongela u byela Yehovha leswi u titwisaka xiswona. (Pis. 37:5-7) Tlhela u vutisa vamakwerhu lava i nga khale na va tirhela Yehovha naswona va nga ni wunghanu la linene na yena swaku u nga yentxa yini kuva u yengesela ntirho wa wena ka Yehovha. Loko va ku byela leswi u faneleke u swi yentxa, tekela ku swi tirhisa. Loko u yentxa leswo, u nga ha kuma mintirho leyi u navelaka ku yi yentxela Yehovha. Kambe ku fana na makwerhu Melisa lweyi se hi nga vulavula hi yena, swi nga yentxeka ntirho lowu u wu lavaka swi nga koteki kuva u wu kuma. Se loko ku li leswo, i ntxini xi nga ku pfunaka swaku u tama u tsaka? Leswaku hi hlamula xivutiso lexi, a hi voneni swaku 1) i yini lexi nga hi yentxaka hi tsaka? 2) Hi nga yentxa yini swaku hi tama hi tsaka? 3) Hi yini mintirho leyi hi nga yi fikelelaka swaku hi tama hi tsaka?

5. Hi fanele hi yentxa yini swaku hi tsaka? (Eklesiasta 6:9)

⁵ Buku la Eklesiasta 6:9 li vulavula hi leswi nga hi pfunaka swaku hi tsaka. (Lerha.) Munhu lweyi a tsakaka ‘hi leswi a swi vonaka’ a swi nyika lisima leswi a nga na swona kumbe wa tsaka hi xiyimu lexi a nga ka xona. Kambe munhu lweyi a tshamelaka ku lava swilo leswi a kalaka a nga li na swona a nge tsaki. Se hina hi djondza yini? Leswaku hi tsaka hi fanele hi swi nyika lisima swilo leswi hi nga na swona, hi tlhela hi zama ku fikelela leswi hi nga swi kotaka.

6. Hi xini xikombiso lexi Yesu a nga vulavula hi xona naswona hi ta djondza yini ka xona?

⁶ Ku nga va leswaku swa koteka kuva hi tsaka hi swilo leswi se hi nga na swona? Vanhu va vanyingi va pimisa swaku leswo a swi koteki hikusa hinkwerhu minkama hinkwayu hi lava swilo swa nyuwani. Kambe hilani se hi nga swi vona hi kona, hi nga tsaka hi swilo leswi hi nga na swona, naswona hi nga tsaka ka xiyimu lexi hi nga ka xona. Kambe swi nga kotekisa ku yini leswo? A hi voneni nhlamulu ka xikombiso lexi Yesu a nga vulavula hi xona, lexi kumekaka ka Matewu 25:14-30. Ka xikombiso lexi hi ta vona swaku hi nga swi kotisa ku yini ku tama hi tsaka ndzeni ka swiyimu leswi hi nga ka swona.

7. Tlhamusela leswi Yesu a vulavuleke hi swona ka xikombiso xa titalenta.

⁷ Ka xikombiso xa titalenta, Yesu a vulavule hi wanuna lweyi a a lava ku yendza. Kambe na a nga se famba a vitane vatirhi va yena, a nyika mun’wana ni mun’wana wa vona titalenta leswaku va sala va yentxa manegosiyu. * A a swi tiva swaku vatirhi va yena va yentxa swilo hi ndlela ya ku hambana, hi mhaka leyo a nyike 5 wa titalenta mutirhi wa ku sungula, a gama a nyika timbirhi mutirhi wa wumbirhi, se lweyi wa wunharhu a mu nyika talenta yin’we ntsena. Mutirhi wa ku sungula ni wa wumbirhi va tirhe hi matimba swaku va tsakisa mutholi wa vona, kasi wa wunharhu a nga zanga a yentxa nchumu hi talenta leyi va nga mu nyika yona. Hi mhaka leyo, mutholi wa yena a vhele a mu hlongola.

8. I yini lexi a xi ta yentxa swaku mutirhi wa ku sungula a tsaka?

⁸ Swi nga yentxeka mutirhi wa ku sungula a  tsake hintamu loko a kume 5 wa titalenta swaku a yentxa manegosiyu. Phela male leyo a yi li yinyingi, naswona a swi kombisa swaku mutholi wa yena a a mu tshemba. Se hi nga ku yini hi mutirhi wa wumbirhi? Phela a a ta va a vavisekile hileswi a kalaka a nga kumanga titalenta ta tinyingi ku fana ni mutirhi wa ku sungula. Kambe i yini leswi a nga swi yentxa?

9. I yini leswi Yesu a kalaka a nga swi vulanga hi mutirhi wa wumbirhi? (Matewu 25:22, 23)

⁹ Lerha Matewu 25:22, 23. Yesu a nga vulanga swaku mutirhi wa wumbirhi a kwatile hileswi a nga nyikiwa titalenta timbirhi naswona Yesu a nga vulanga swaku mutirhi lweyi wa wumbirhi a a tshamela ku vula leswi: ‘A ni kholwi swaku mutholi wa mina a yo ni nyika titalenta timbirhi ntsena. Phela ni wu yentxa kahle ntirho ku fana ni mutirhi wa ku sungula lweyi a nga nyikiwa 5 wa titalenta. Se leswi mutholi wa mina a ngo yo ni nyika titalenta leti ta timbirhi, ni leswi a pimisaka swaku a ni mutirhi wa kahle, swa yampsa ni txelela titalenta leti ta timbirhi ni famba ni ya tihanyela wutomi la mina.’

10. Mutirhi wa wumbirhi a yentxe yini hi titalenta leti a a li na tona?

¹⁰ Ku fana ni mutirhi wa ku sungula, mutirhi wa wumbirhi a wu nyike lisima ntirho lowu a nga nyikiwa hi mutholi wa yena naswona a tirhe hi matimba swaku a wu hetisisa. Leswo swi yentxe swaku ka negosiyu leyi a nga yi yentxa a tlhela a kuma titalenta timbirhi, naswona a hakeliwile hi mhaka leswi a nga tikarhata ni ntirho lowu a nga wu yentxa. Phela mutholi wa yena a ngo yo tsaka ntsena hi ntirho lowu a nga wu yentxa, kambe a mu tshembile a tlhela a mu nyika mintirho yin’wana!

11. Hi nga yentxa yini swaku hi tama hi tsaka ka ntirho wa Yehovha

¹¹ Loko hi tirha hi mbilu ya hina hinkwayu ka ntirho wun’wana ni wun’wana lowu hi nga na wona ka nhlengeletanu ya Yehovha, hi ta tsaka.  Se “chumayela rito la Xikwembu hi ku hiseka” u tlhela u tirhisana kahle ni bandla la wena. (Mint. 18:5; Heb. 10:24, 25) Yana mintlhanganwini na u lunghiselelile u tlhela u nyikela tinhlamulu leti nga ta pfuna van’wana. Yi yentxe kahle mintirho kumbe madixkursu lawa u nyikiwaka wona ka mintlhanganu ya xikarhi ka vhiki. Loko madoda ma ku kombela swaku u yentxa mintirho abandleni, yi yentxi hi nkama u tlhela u zama ku yi yentxa kahle. A wu fanelanga u pimisa swaku wo luza nkama loko u yentxa mintirho leyi va ku nyikaka yona, kambe yi tshiki yi ku pfuna swaku u yampsisa wumunhu la wena ni leswi u kotaka ku swi yentxa. (Swi. 22:29) Phela loko u tama u tinyikela swaku Yehovha a ku tirhisa, u ta kulisa wunghanu la wena na yena u tlhela u yi yentxa kahle mintirho leyi a ku nyikaka yona funtshi u ta tsaka. (Gal. 6:4) Naswona a wu nga ta vaviseka loko u vona van’wana va kuma mintirho leyi u swi navelaka hintamu ku va na yona. — Rom. 12:15; Gal. 5:26.

12. I yini leswi Niki na Melisa va nga swi yentxa swaku va tama va tsaka?

¹² Wa ha mu khumbuka makwerhu Melisa lweyi hi nga bula hi yena lweyi a a lava ku tirha Betele a tlhela a ya ka Xikola xa Vachumayeli va Mfumu? Phela a swi kotekanga swaku a fikelela leswi a a swi navela, kambe a li: “Ni zama ku wu yentxa kahle ntirho wa mina wa ku va mupfuli wa ndlela wa nkama hinkwawu naswona ni zama ku tikarhatela ku chumayela hi tindlela ta ku hambana”. Se makwerhu Niki lweyi a a swi lava hintamu ku va mupfunisi wa bandla a vula leswi: “Ni zame ku yi yentxa kahle mintirho leyi se a ni li na yona, ku nga ku chumayela ni ku nyikela tinhlamulu leti a ti ta pfuna van’wana.” Ni tlhele ni prenxera petição swaku ni ya tirha Betele, naswona ni vitaniwile swaku ni ya tirhela Betele ka lembe leli nga landzela.

13. Ku ta yentxeka yini loko u yi yentxa hi mbilu hinkwayu mintirho leyi u nga na yona swoswi? (Eklesiasta 2:24)

¹³ Ku fana na Niki, loko u yi yentxa hi mbilu hinkwayu mintirho leyi u nga na yona swoswi, swi nga ha yentxeka u yengeseliwa mintirho yin’wana ka nkama lowu taka. Kambe loko swiyimu swa wena swi nga ku pfumeleli ku yentxa mintirho yin’wana, ku fana na Melisa u nga tama u tsaka. (Lerha Eklesiasta 2:24.) Naswona lexi nga ta ku tsakisa hintamu, i ku tiva swaku N’winyi wa wena Yesu Kreste a wu nyika lisima ntirho lowu u wu yentxaka.

14. Ku nga va swaku swi bihile ku lava ku mu yentxela mintirho yin’wana Yehovha? Tlhamusela.

¹⁴ Kuva hi mu yentxela kahle Yehovha mintirho leyi hi nga na yona swoswi, a swi vuli swona swaku a hi fanelanga hi tama hi tikarhata swaku hi mu yentxela mintirho yin’wana. Phela hambileswi mintirho leyi hi mu yentxelaka yona Yehovha swoswi yi hi tsakisaka, hi fanele hi zama ku fikelelaka mintirho yin’wana. Loko hi yentxa leswo, hi ta wu yentxa kahle ntirho wa ku chumayela ni wa ku djondzisa naswona hi ta pfuna vamakwerhu va vanyingi. Kambe leswaku hi fikelela leswi hi swi lavaka, hi fanele hi va vanhu va ku tlhariha ni va ku tiveka hansi. Naswona hi fanele hi rhangisa leswi laviwaka hi van’wana ku tlula leswi hina hi swi lavaka. — Swi. 11:2; Mint. 20:35.

15. Hi yini mintirho leyi u nga yi fikelelaka leyi nga ku pfunaka swaku u tama u tsaka?

¹⁵ Hi yini mintirho leyi u nga yi yentxelaka Yehovha? Kombela Yehovha swaku a ku pfuna ku tiva mintirho leyi u nga kotaka ku yi fikelela. (Swi. 16:3; Yak. 1:5) Ku nga va swaku u nga swi kota ku va mupfuli wa ndlela wa ku pfunisa, wa nkama hinkwawu, ku ya tirha Betele kumbe ku ya pfunisa ka mintirho ya ku yaka? Ku nga va swaku u nga swi kota ku yengesela ntirho wa wena wa ku chumayela hi ku djondza lirimi lin’wana kumbe hi ku ya pfunisa ka tiko lin’wana leli nga ni vachumayeli va vatsongo? Leswaku u tiva leswi u nga swi yentxaka swaku u kota ku fikelela mintirho leyi, lerha ndzima 10 ya buku leyi nge:  Nhlengeletanu Leyi Yendlaka Kurhandza ka Yehovha kumbe u kombela ku pfuniwa hi madoda ya bandla la wena. * Nkama u yentxaka minzamu swaku u fikelela mintirho yin’wana u ta va xikombiso ka vanhu van’wana, naswona u ta tsaka.

16. I yini leswi u nga swi yentxaka loko swi nga koteki kuva u fikelela mintirho leyi a wu yi lava?

¹⁶ Se u nga yentxa yini loko u nga swi koti ku fikelela mintirho leyi se hi nga bula hi yona? Pimisa hi mintirho yin’wana leyi u nga kotaka ku yi fikelela, ya ku fana ni leyi hi nga ta bula hi yona swoswi.

17. Hi ku ya hi 1 Timotiyu 4:13, 15, i yini leswi makwerhu a nga swi yentxaka swaku a va mudjondzisi wa munene?

¹⁷ Lerha 1 Timotiyu 4:13, 15. Loko u li makwerhu lweyi se a nga tsakamisiwa, lwela ku ma veka kahle madixkursu ni ku va mudjondzisi wa munene. Hi mhaka muni? Hikusa loko u yampsisa ndlela leyi u lerhaka hi yona, ndlela leyi u vekaka hi yona madixkursu ni ndlela leyi u djondzisaka hi yona, u ta pfuna vanhu va vanyingi lava ku yingiselaka. Tinyimiseli ku djondza u tlhela u tirhisa hinkwaswu leswi nga ka broxura leli nge Tinyiketeli Kulerheni ni le Kudjondziseni. Djondza nhlokomhaka yin’wana ni yin’wana ya broxura leli, u tlhela u yi trenara kahle na u li kaya. Handle ka leswo, loko u ni madixkursu zama ku tirhisa leswi u nga swi djondza ka broxura leli. Kombela ku pfuniwa hi mutsundzuxi wa madoda kumbe u pfuniwa hi madoda man’wana lawa “ma tirhaka hi matimba ku vulavuleni ni le ku djondziseni.” * (1 Tim. 5:17) Xikongomelo xa wena a ku fanelanga ku li ku twisisa ntsena leswi broxura leli li vulavulaka hi swona kambe u fanele u  pfuna lava va ku yingiselaka swaku va tiyisa lipfumelo la vona u tlhela u va pfuna swaku va tirhisa leswi u swi djondzisaka. Loko u yentxa leswo, wena ni lava ku yingiselaka mu ta tsaka.

18. I yini leswi nga ku pfunaka ku yampsisa ndlela leyi u chumayelaka hi yona?

¹⁸ Hinkwerhu hi nyikiwe ntirho wa ku chumayela ni ku yentxa vadjondzisiwa. (Mat. 28:19, 20; Rom. 10:14) Ku nga va swaku wa swi lava ku yampsisa ndlela leyi u wu yentxaka ha yona ntirho lowu wa lisima? Loko ku li leswo, djondza broxura leli nge Tinyiketeli, u tlhela u tirhisa leswi li swi vulaka. Nkama u yentxaka leswo pimisa hi leswi u nga swi yentxaka swaku u fikelela leswi u nga swi djondza. Xibukwana xa mintlhanganu ya Mahanyelo Ni Ntirho Wa Hina Wa Wukreste ni mavhidiyo ya swikombiso swa mabulu lawa ma kombisiwaka ka mintlhanganu ya xikarhi ka vhiki, swi nga ku pfuna swaku u yampsisa machumayelelo ya wena. Zama ku tirhisa leswi ku vulavuliwaka hi swona u tlhela u vona swaku hi swini leswi nga ku pfunaka ka teritoriyu la wena. Loko u yentxa leswo, u ta va mudjondzisi wa munene funtshi u ta tsaka hintamu. — 2 Tim. 4:5.

19. I yini leswi nga ku pfunaka ku va ni wumunhu leli tsakisaka Yehovha?

¹⁹ U nga khohlwi swaku nchumu wa lisima lowu u faneleke u wu fikelela i ku va ni wumunhu leli nga ta tsakisa Yehovha. (Gal. 5:22, 23; Kol. 3:12; 2 Ped. 1:5-8) U nga swi yentxisa ku yini leswo? Hi xikombiso, a hi nge u lava ku tiyisa lipfumelo la wena. U nga ha lerha swilo leswi nga ka mabuku ya hina leswi vulavulaka hi ndlela leyi u nga tiyisaka lipfumelo hi yona. Hi ni mavhidiyo ya manyingi ka JW Broadcasting^® lawa ma vulavulaka hi vamakwerhu lava nga va ni lipfumelo loko va kumana ni swikarhatu. Se loko u sixtira mavhidiyo lawa u tlhela u tekelela xikombiso xa vamakwerhu lava swi ta ku pfuna hintamu.

20. I yini lexi nga ku pfunaka swaku u tama u tsaka u tlhela u nga vaviseki?

²⁰ I ntiyiso swaku hinkwerhu ha swi lava ku mu yentxela mintirho ya yinyingi Yehovha. Phela leswo swi ta koteka ka misava ya nyuwani lani hinkwerhu hi nga ta tirhela Yehovha na hi hetisekile. Kambe ka ha li swoswi, loko u zama ku yentxa hinkwaswu leswi u nga swi kotaka swaku u mu tirhela kahle Yehovha, u ta tsaka naswona a wu nga ta vaviseka. Funtshi xa lisima hintamu u ta dzunisa Yehovha Xikwembu xa hina “xa ku tsaka”. (1 Tim. 1:11) Se hinkwerhu a hi tsakeni hi mintirho leyi hi nga yona swoswi!