1. Hi pfunekisa ku yini hi ku bula ni van’wana hi leswi hi nga wu kumisa xiswona ntiyiso?

 “U WU kumise ku yini ntiyiso?” Swi nga yentxeka va ku yentxe xivutiso lexi hi makhambi ya manyingi. Lexi i xin’we xa swivutiso leswi hi swi yentxaka vamakwerhu loko hi lava ku va tiva ku yampsa. Ha swi rhandza ku twa vamakwerhu va hi byela leswi va nga mu tivisa xiswona Yehovha va tlhela va mu rhandza. Funtshi, na hina ha swi rhandza ku byela vamakwerhu leswi ntiyiso wu vulaka swona ka hina. (Rom. 1:11) Mabulu ya ku fana ni lawa, ma ta hi pfuna ku twisisa lisima leli ntiyiso wu nga na lona. Funtshi leswo swi ta hi pfuna ku tama ‘hi va ka ntiyiso,’ kumbe hi marito man’wana, hi hanya hi ndlela leyi nga ta yentxa swaku Yehovha a hi yamukela. — 3 Yoh. 4.

2. Hi ta djondza hi yini ka nhlokomhaka leyi?

² Ka nhlokomhaka leyi, hi ta djondza hi swilo swin’wana leswi swi hi yentxaka hi rhandza ntiyiso. Hi ta tlhela hi vona leswi nga ta hi pfuna ku kala hi nga tshiki ku wu rhandza. Djondzo leyi, yi ta hi pfuna swaku hi ya hi mu khensa hintamu Yehovha hileswi a nga hi djondzisa ntiyiso. (Yoh. 6:44) Yi ta tlhela yi hi pfuna swaku hi swi navela hintamu ku djondzisa van’wana ntiyiso.

3. Hi mhaka muni hi wu rhandza hintamu ntiyiso?

³ Ku ni minchumu ya yinyingi leyi yi hi yentxaka hi rhandza ntiyiso. Kambe xa lisima hintamu, hileswi hi rhandzaka Yehovha  lweyi a nga hi djondzisa ntiyiso. Yehovha a nga yo tirhisa Bibele swaku a hi byela swaku hi yena a nga yentxa swilo hinkwaswu ntsena, kambe a tlhele a hi byela swaku i Papayi wa hina lweyi a hi rhandzaka funtshi a nga ni mhaka na hina. (1 Ped. 5:7) Ha swi tiva swaku Yehovha i Xikwembu xa ‘timpsalu ni ntwelawusiwana, lexi hlwelaka ku kwata naswona xi nga ni lirhandzu ni ntiyiso.’ (Ekso. 34:6) Yehovha a rhandza wululami. (Esa. 61:8) Swa mu vava ku hi vona hi hlupheka, funtshi a ta helisa swikarhatu hinkwaswu leswi hi kumanaka na swona. (Yer. 29:11) Swi tsakisa ndjhani ku twa leswi! Phela leswo swi hi yentxa hi mu rhandza hintamu Yehovha!

4-5. Hi mhaka muni Pawulo a fanise ntshembo wa hina ni nsimbi leyi vekiwaka ka boti swaku li nga tsekatseki?

⁴ Impsini swin’wana swi hi yentxaka hi rhandza ntiyiso? Ntiyiso lowu nga ka Bibele wa hi pfuna hintamu. Hi xikombiso, ntiyiso lowu wu patsa ntshembo wa leswi nga ta yentxeka ka nkama lowu taka. Loko mupostolo Pawulo a tlhamusela lisima la ku va ni ntshembo, a te: “Hi ni ntshembo lowu, wu fanaka ni nsimbi ya wutomi la hina; wu tiyile naswona wa tshembeka”. (Heb. 6:19) Ku fana ni nsimbi leyi yentxaka swaku boti li tiya li nga tsekatseki, ntshembo wa hina lowu nga ka Bibele wu hi yentxa hi tiya hambiloko hi kumana ni swikarhatu.

⁵ Ka ndzimana leyi, Pawulo a a vulavula hi lava nga ni ntshembo wa ku hanya tilweni. Kambe marito lawa ma tirha ni ka lava nga ni ntshembo wa ku hanya lani misaveni. (Yoh. 3:16) Ku va ni ntshembo swi hi yentxa hi tiva swaku hi hanyela yini.

6-7. Ntiyiso wu mu pfunise ku yini Yvonne?

⁶ Pimisa hi leswi nga yentxekela makwerhu Yvonne. Yena a nga kulelanga ka ntiyiso, naswona nkama na wa ha li mutsongo a a swi chava hintamu ku fa. A a karhateka hi ku pimisa swaku siku lin’wana hinkwerhu hi ta fa. Yena a li: “Loko ni pimisa hi leswo a ni heleliwa hi wurhongo. A ni tivutisa leswi: ‘Kasi ni hanyela yini?’ Phela a ni nga swi lavi ku fa!”

⁷ Hi ku famba ka nkama, Yvonne a sungule ku djondza Bibele ni Timboni ta Yehovha. Yena a li: “Hi kutsongokutsongo ni sungule ku va ni ntshembo wa ku hanya hi masiku ni masiku aparadesini kola misaveni.” Ku djondza ntiyiso swi mu pfunise ku yini makwerhu lweyi? Yena a li: “Swoswi a na ha heleliwi hi wurhongo hi ku chava ku fa.” A hi kanakani swaku ntiyiso i wa lisima ka Yvonne, naswona a tsaka hintamu hi ku bula ni van’wana hi ntshembo lowu a nga na wona. — 1 Tim. 4:16.

8-9. a) I yini leswi wanuna lweyi Yesu a nga vulavula hi yena a nga swi yentxa nkama a nga kuma xuma xa lisima? b) Hi mhaka muni ntiyiso wa Bibele wu li wa lisima ka wena?

⁸ Ntiyiso wa Bibele wu patsa mahungu ya ku tsakisa ya Mfumu wa Xikwembu. Yesu a fananise ntiyiso lowu nga ka Bibele ni xuma xa lisima lexi nga fihliwa. Ka Matewu 13:44, a te: “Mfumu wa matilo wu fana ni xuma lexi nga tumbhetiwa masin’wini, lexi munhu a nga xi kuma a gama a xi tumbheta; naswona hi mhaka ya leswi a nga tsaka, a famba a ya xavisa minchumu hinkwayu leyi a nga na yona se a xava nsimu yoleyo.” Vona swaku wanuna lweyi a a ngo ko xi hlota xuma lexi, kambe nkama a nga xi kuma a yentxe hinkwaswu leswi a nga swi kota swaku a xi xava. Hi mhaka muni? Hikusa a a swi tiva swaku xuma xolexo a xi li xa lisima ku tlula hinkwaswu leswi a a li na swona.

⁹ Ku nga va swaku na wena u titwisa xileswo hi ntiyiso lowu nga ka Bibele? Phela ha swi tiva swaku a ku na nchumu lani misaveni lexi  nga fanisiwaka ni ntsaku lowu hi nga na wona hi ku tirhela Yehovha swoswi, na hi nyimela nkama lowu hi nga ta tikhorisa hi wutomi la ku kala li nga heli. Nkateko lowu hi nga na wona wa ku va vanghanu va Yehovha, i wa lisima hintamu. Leswi hi swi lavaka hintamu, i ku ‘tsakisa Yehovha ka timhaka hinkwatu.’ — Kol. 1:10.

10-11. Hi mhaka muni Michael a a tinyimiselile ku txintxa wutomi la yena?

¹⁰ Vanyingi va hina swi lave hi txintxa wutomi la hina swaku hi ta tsakisa Yehovha. Van’wana va tshike mintirho leyi holelaka male ya yinyingi. Kasi van’wana va tshike ku hlongolisa ku ganya. Naswona van’wana, nkama va nga djondza hi Yehovha va yo vhela va txintxa mahanyelo ya vona. Leswo hi swona leswi Michael a nga swi yentxa. Na a nge se djondza ntiyiso a a djondzela ku lwa. Yena a li: “A ni tibyela hi ku va ni miri wa kahle. Minkama yin’wana a ni titwa ingi ni nge hluliwi hi munhu.” Kambe nkama a nga sungula ku djondza Bibele a swi vonile swaku Yehovha a nga ti rhandzi tinyimpi. (Pis. 11:5) Michael a vula leswi hi vamakwerhu lava va nga djondza na yena Bibele: “A va zanga va ni byela swaku ni fanele ni tshika ku lwa. Kambe va yo tama va ni djondzisa Bibele ntsena.”

¹¹ Nkama Michael a a ya a djondza hi Yehovha, a a ya a mu rhandza hintamu. Ku tiva swaku Yehovha a va twela wusiwana vanhu va yena, swi mu khumbe hintamu. Hi ku famba ka nkama, Michael a swi vonile swaku a a fanele a txintxa mahanyelo ya yena. A li: “A ni swi tiva swaku ku tshika ku lwa a swi ta ni karhatela hintamu. Kambe a ni nga kanakani swaku ku yentxa leswo, a swi ta tsakisa Yehovha. Funtshi a ni swi tiva swaku ku tirhela Yehovha a swi nge fanisiwi ni nchumu.” Michael a a swi tiva swaku ntiyiso i wa lisima hintamu. Hi mhaka leyo, a a tinyimiselile ku txintxa wutomi la yena. — Yak. 1:25.

12-13. Ntiyiso wa Bibele wu mu pfunise ku yini Mayli?

¹² Bibele li kombisa lisima la ntiyiso hi ku wu fananisa ni gezi leli hi voningelaka ka ndhawu ya ku mphuma. (Pis. 119:105; Efe. 5:8) Mayli, wa Azerbaijão a swi vonile leswi Bibele li nga mu pfunisa xiswona. Nkama na wa ha li mutsongo, vapsali va yena a va li ka wukhongeli la ku hambana. Papayi wa yena a a li Muçulmano, kasi mamani wa yena a a li Muyuda. A li: “Hambileswi a ni nga kanakani swaku Xikwembu xi kona, a ni tivutisa leswi: ‘Hi mhaka muni Xikwembu xi yentxe vanhu? Hi mhaka muni xi va tshika va hlupheka xi tlhela hi wugamu xi va hisa ka tihele?’ Leswi vanhu va vanyingi va nge hinkwaswu leswi yentxekaka i ku rhandza ka Xikwembu, a ni tivutisa leswi: ‘Swi li Xikwembu xo tsakisiwa hi ku vona vanhu va hlupheka?’”

¹³ Mayli a tame a lavetela tinhlamulu ta swivutiso swa yena. Naswona hi ku famba ka nkama a sungule ku djondza Bibele a gama a va Mboni ya Yehovha. A li: “Leswi Bibele li swi djondzisaka swa twisiseka naswona swi ni yentxe ni tsaka. Ntiyiso lowu nga ka Bibele wu ni yentxe ni rhula.” Ku fana na Mayli, hinkwerhu hi dzunisa Yehovha ‘lweyi a nga hi vitana hi huma ka munyama hi nghena ka ku voninga ka yena ka ku hlamalisa.’ — 1 Ped. 2:9.

14. U nga yentxa yini swaku u ya u wu rhandza hintamu ntiyiso? (Vona ni kwadru leli nge:  “Swin’wana Leswi Ntiyiso Wa Bibele Wu Fanisiwaka Na Swona.”)

¹⁴ Leswi o va swikombiso swa switsongo leswi hi kombaka lisima la ntiyiso lowu nga ka Bibele. Swi nga yentxeka ku li ni swikombiso swin’wana leswi u swi tivaka. Swi ngo yini ka djondzo ya wena ya Bibele u kambisisa swaku i yini xi ku yentxaka u rhandza ntiyiso?  Nkama hi yaka hi rhandza ntiyiso, hi ta ya hi swi kombisa hi mahanyelo ya hina.

15. Hi nga swi kombisisa ku yini swaku ha wu rhandza ntiyiso?

¹⁵ Hi nga kombisa swaku ha wu rhandza ntiyiso hi ku lerha Bibele nkama ni nkama ni mabuku ya nhlengeletanu. Phela hambiloko se hi ni malembe ya manyingi na hi li ka ntiyiso, hi fanele hi tama hi djondza. Revhixta la ku sungula la Murindzi li vule leswi: “Ka misava leyi, ku tale hi mavunhwa lakakuva swi nga hi karhatela ku tiva ntiyiso. Leswaku u kuma ntiyiso swi lava u rhanga hi ku balha. . . . Phela swi lava u lavetela. U nga tsaki hi ku va ni wutivi la litsongo la ntiyiso. . . . Tama u yengetela wutivi lolelo.” Ku djondza a swi vevuki kambe minzamu leyi u yi yentxaka a hi ya mahala.

16. Wena u li djondzisa ku yini Bibele? (Swivuriso 2:4-6)

¹⁶ A hi hinkwerhu hi swi rhandzaka ku lerha ni ku djondza. Kambe Yehovha a li hi fanele hi ‘tama hi lavetela’ ntiyiso anze hi wu twisisa. (Lerha Swivuriso 2:4-6.) Loko hi yentxa minzamu swaku hi djondza ha pfuneka. Corey a tlhamusela swaku ka djondzo ya yena ya Bibele, a kambisisa kahle ndzimana  yin’wana ni yin’wana. A li: “Ni lerha tintlhamuselo hinkwatu ti nga ka ndzimana yoleyo, ni tlhela ni lerha tindzimana tin’wana leti fambisanaka ni ndzimana yoleyo, naswona ni hamba mapexkiza. . . . Leswo swi ni pfuna ku tiva minchumu ya yinyingi.” Ku nga na mhaka swaku hi djondzisa leswi Corey a djondzisaka xiswona kumbe hi ni madjondzelo man’wana, loko hi heta nkama na hi djondza Bibele hi kombisa swaku ntiyiso i wa lisima ka hina. — Pis. 1:1-3.

17. Swi vula yini ku hanya hi ntiyiso? (Yakobo 1:25)

¹⁷ Ha swi tiva swaku a swi yenelanga ku tiva ntiyiso, kambe hi fanele hi hanya hi leswi hi swi djondzaka. Phela loko hi yentxa leswo, hi ta tsaka. (Lerha Yakobo 1:25.) Se, hi nga swi tivisa ku yini swaku hi hanya hi ntiyiso? Makwerhu mun’wana a vule swaku xin’wana xi nga hi pfunaka nkama lowu hi djondzaka i ku tikambela, hi vona leswi se hi swi yentxaka ni leswi hi faneleke hi yampsisa ka swona. Mupostolo Pawulo a te: “hambi se hi wupfile ku fikela kwini, a hi tameni hi fambisa xileswo.” — Filp. 3:16.

18. Hi mhaka muni hi rhandza ntiyiso?

¹⁸ Pimisa hi leswi ku hanya hi ntiyiso swi hi pfunisaka xiswona. A swo hi yentxa hi va ni wutomi la ku tsakisa ntsena, kambe swi tlhela swi tsakisa Yehovha ni vamakwerhu. (Swi. 27:11; 3 Yoh. 4) Phela leswo hi swona swi hi yentxaka hi rhandza ntiyiso hi tlhela hi hanya hi wona.