NHLOKOMHAKA YA DJONDZO 33
Yehovha A Vonelela Vanhu Va Yena
“Yehovha a txuvuka lava mu chavaka”. — PIS. 33:18.
LISIMU 4 “Yehovha I Murisi wa Mina”
LESWI HI NGA TA SWI DJONDZA *
1. Hi mhaka muni Yesu a kombele Yehovha swaku a vhikela valandzeli va yena?
KA WUSIKU leli Yesu a a ta fa hi lona, a kombele Yehovha swaku a vhikela valandzeli va yena. (Yoh. 17:15, 20) Phela Yehovha wa swi vona leswi yentxekelaka vanhu va yena, wa va vhikela a tlhela a va pfuna. Hambileswo, Yesu a a swi tiva swaku Sathana a a ta tshamela ku hlupha valandzeli va yena. Funtshi a a swi tiva swaku a va ta lava ku pfuniwa hi Yehovha swaku va tiyisela.
2. Hi ku ya hi Tipisalema 33:18-20, hi mhaka muni hi nga fanelanga hi chava loko hi kumana ni swikarhatu?
2 Ka misava leyi fumiwaka hi Sathana hi kumana ni swikarhatu swa swinyingi. Swikarhatu swoleswo swi nga ha hi godolisa swi tlhela swi ringa lipfumelo la hina. Kambe hi lani hi nga ta djondza hi kona ka nhlokomhaka leyi, a hi fanelanga hi chava hikusa Yehovha wa hi vhikela. Wa swi vona leswi hi kumanaka na swona funtshi a tinyimisele ku hi pfuna. Swoswi a hi voneni 2 wa swikombiso swa Bibele leswi kombisaka swaku Yehovha wa va vhikela vanhu va yena. — Lerha Tipisalema 33:18-20.
LOKO HI TITWA HI LI HOXE
3. Impsini swi nga hi yentxaka hi titwa hi li hoxe?
3 Hambileswi hi lumbaka ndjangu wa Yehovha, minkama yin’wana hi nga ha titwa hi li hoxe. Hi xikombiso, majovhem ma nga ha titwa ma li woxe nkama lowu ma zamaka ku chumayela lava ma djondzaka na vona xikola, kumbe loko ma txintxa bandla. Swi nga ha yentxeka van’wani va hina hi nga tsakanga kumbe hi lwisana ni mimpimiso ya ku biha, ngopfungopfu loko hi pimisa swaku a ku na munhu lweyi a nga hi pfunaka. Hi nga ha chava ku byela van’wana leswi hi titwisaka xiswona hi ku pimisa swaku a va nge hi twisisi. Funtshi minkama yin’wana hi nga ha hetelela hi ku pimisa swaku a nga kona lweyi a nga ni mhaka na hina. Phela ku titwa na hi li hoxe swi nga hi yentxa hi tivona hi nga li va nchumu hi tlhela hi karhateka. Kambe Yehovha a nga lavi swaku hi titwisa xileswo. Hi mhaka muni?
4. Hi mhaka muni Eliya a vule swaku a ku yo sala yena?
4 Pimisa hi leswi swi nga yentxekela Eliya. A hete 40 wa masiku na a baleka Yezabele hileswi a a lava ku mu dlaya. (1 Tiho. 19:1-9) Nkama Eliya a nga tumbela, a rilele Yehovha a ku: “Ku yo sala mina.” (1 Tiho. 19:10) Phela a ka ha li ni vaprofeta van’wani lani misaveni. Hi xikombiso, Obadiya a ponise 100 wa vaprofeta swaku va nga dlayiwi hi Yezabele. (1 Tiho. 18:7, 13) Se, hi mhaka muni Eliya a vule swaku a ku yo sala yena? Ku nga va swaku a a ko pimisa swaku vaprofeta hinkwavu lava Obadiya a nga va ponisa se a va file? Ku nga va swaku a a titwa a li yexe hileswi ku kalaka ku nga na munhu lweyi a nga nyima na Yehovha ka lava va nga vona singita leli a nga li yentxa ka Nhava ya Karimeli? Ku nga va hileswi valala va yena a va lava ku mu dlaya, se a pimisa swaku a ku na munhu lweyi a nga ni mhaka na yena? Bibele a li hi byeli hi ku kongoma leswi Eliya a a titwisa xiswona. Kambe ha swi tiva swaku Yehovha a a swi twisisa leswi Eliya a a titwisa xiswona, funtshi a a lava ku mu pfuna.
Hi nga djondza yini ka leswi Yehovha a nga mu pfunisa xiswona Eliya loko hi titwa hi li hoxe? (Vona maparagrafu 5-6)
5. Yehovha a mu kombise ku yini Eliya swaku a a nga li yexe?
5 Yehovha a pfune Eliya hi tindlela ta tinyingi. Yehovha a a lava swaku Eliya a mu byela leswi a titwisaka xiswona. Kambirhi a mu vutisile a ku: “Eliya, u yentxa yini lani?” (1 Tiho. 19:9, 13) Minkama hinkwayu Yehovha a mu yingiselile Eliya loko a mu byela leswi a titwisaka xiswona. Funtshi a mu hlamulile hi ku mu tiyisekisa swaku a a li na yena ni swaku a ni matimba. A tlhele a byela Eliya swaku a ka ha ni Vayisrayele va vanyingi lava a va mu tirhela. (1 Tiho. 19:11, 12, 18) A hi kanakani swaku Eliya a titwe na a pepile nkama a nga chululela Yehovha leswi a swi li mbilwini, a tlhela a twa nhlamulu ya yena. Yehovha a game a nyika Eliya mintirho ya lisima. A mu rhumile kuva a ya tota Hazayele swaku a va hosi ya Asiriya, a tota Yehu swaku a va hosi ya Israyele ni ku tlhela a tota Elixa swaku a va muprofeta. (1 Tiho. 19:15, 16) Mintirho leyi Yehovha a nga yi nyika Eliya, yi mu pfune ku vona swilo hi ndlela ya yinene. Yehovha a tlhele a mu nyika munghanu, ku nga Elixa. Se wena ke, Yehovha a nga ku pfunisa ku yini swaku u nga titwi na u li wexe?
6. U nga khongela hi yini loko u titwa na u li wexe? (Tipisalema 62:8)
6 Yehovha wa ku rhamba swaku u khongela ka yena. Wa swi vona swikarhatu leswi u kumanaka na swona, funtshi a ku tiyisekisa swaku a ta ku yingisa minkama hinkwayu loko u khongela ka yena. (1 Tes. 5:17) Yehovha wa swi rhandza ku yingisela swikhongelo swa vanhu va yena. (Swi. 15:8) U nga khongela hi yini loko u titwa na u li wexe? Ku fana na Eliya, chululela Yehovha leswi nga ka miblu ya wena. (Lerha Tipisalema 62:8.) Mu byeli hinkwaswu leswi ku karhataka ni leswi u titwisaka xiswona. Kombela Yehovha swaku a ku pfuna u lwisana ni ku titwa u li wexe. Hi xikombiso, loko u titwa u li wexe, kumbe u chava nkama lowu u chumayelaka axikola, kombela Yehovha swaku a ku tiyisa. Tlhela u mu kombela swaku a ku nyika wutlharhi la ku swi tlhamusela kahle leswi u kholwaka ka swona. (Luk. 21:14, 15) Loko u hela ntamu, kombela Yehovha swaku a ku pfuna kuva u nga chavi ku bula ni makwerhu lweyi a nga ni xiperiyensiya. Mu kombeli swaku a pfuna makwerhu lweyi u nga mu kombela swaku a ku pfuna, kuva a ku yingisela kahle a tlhela a zama ku ku twisisa. Chulula hinkwaswu swi nga ka mbilu ya wena ka Yehovha, u gama u vona leswi a swi hlamulisaka xiswona swikhongelo swa wena. Loko va lava ku ku pfuna, u nga yali. Leswi swi ta ku pfuna ku kala u nga ha titwi u li wexe.
Zama ku chumayela ni van’wani hi tindlela ta ku hambanahambana (Vona paragrafu 7)
7. Xikombiso xa Mauricio xi ku djondzisa yini?
7 Yehovha a hi nyike ntirho lowu hinkwerhu hi faneleke hi wu yentxa. Ha tiyiseka swaku wa tsaka loko a hi vona hi chumayela hi tlhela hi yentxa mintirho bandleni. (Pis. 110:3) Ku chumayela nkama ni nkama swi nga ku pfunisa ku yini loko u titwa u li wexe? Pimisa hi leswi swi nga yentxekela makwerhu Mauricio lweyi a nga jovhem. * Nkama a nga tsakamisiwa, mun’we wa vanghanu va yena hi kutsongokutsongo a tshike ku tirhela Yehovha. Mauricio a vula leswi: “A ni pimisa swaku a ni nga ha ta swi kota ku tama ni lumba ndjangu wa Yehovha. Ni titwe na ni li noxe, funtshi a ni pimisa swaku a nga kona lweyi a twisisaka leswi ni titwisaka xiswona.” Se impsini swi nga mu pfuna? A tlhela a ku: “Ku heta nkama wa wunyingi na ni chumayela swi ni pfunile ku kala ni nga pimisi hi swikarhatu swa mina ni leswi a ni titwisa xiswona. Phela ku chumayela ni vamakwerhu a swi ni yentxa ni tsaka.” Se, hambiloko swi nga koteki ku chumayela ni vamakwerhu na hi vonana, hi nga tikhorisa hi ku tsala makarta na vona hi tlhela hi chumayela na vona hi telefoni. Impsini swin’wana swi nga pfuna Mauricio? Yena a li: “Ni hete nkama wa wunyingi na ni yentxa mintirho ya le bandleni. Ni tinyike nkama wa ku lunghiselela maparti lawa a ni nyikiwa wona mintlhanganwini. Leswo a swi ni yentxa ni titwa ni li wa lisima ka Yehovha ni ka vamakwerhu.”
LOKO HI KUMANA NI SWIKARHATU
8. Hi titwisa ku yini loko hi kumana ni swikarhatu?
8 Ha swi tiva swaku ka masiku lawa ya wugamu hi ta kumana ni swikarhatu swa swinyingi. (2 Tim. 3:1) Hambileswo, ku ni swikarhatu leswi hi nga kumanaka na swona na hi nga swi nyimelanga. Hi xikombiso, hi nga ha pfumala male ya ku wundla ndjangu, hi vabya, kumbe hi feliwa hi munhu lweyi hi mu rhandzaka. Loko leswo swi yentxeka, hi nga ha karhateka hi tlhela hi hela ntamu, ngopfungopfu loko swikarhatu swa kona swi yentxa hi ku landzelelana, kumbe swi yentxeka hi nkama wun’we. Khumbuka swaku Yehovha wa swi vona leswi swi ku humelelaka funtshi a nga ku pfuna swaku u swi tiyisela.
9. Tlhamusela leswi nga yentxekela Yobo.
9 Pimisa hi leswi Yehovha a nga mu pfunisa xiswona Yobo. Phela Yobo a kumane ni swikarhatu swa swinyingi hi ku landzelelana. Hi siku lin’we swiharhi swa yena swi yiviwile, funtshi swin’wana swi dlayiwile. Naswona vatirhi va yena ni vana va yena va dlayiwile. (Yobo 1:13-19) Funtshi na wa ha rila vana va yena ni vatirhi va yena, a sungule ku huma marhumba ya ku vavisa hintamu. (Yobo 2:7) Hi ku vaviseka Yobo a ze a ku: “Na li nyenya wutomi la mina; a na ha swi lavi ku tama ni hanya.” — Yobo 7:16.
Leswaku Yehovha a tiyisekisa Yobo swaku wa mu rhandza ni swaku a ta mu pfuna, a mu byele hi leswi a swi hlayisisaka xiswona swiharhi ni hinkwaswu leswi a nga swi yentxa (Vona paragrafu 10)
10. Yehovha a mu pfunise ku yini Yobo swaku a tiyisela? (Vona mufoto wa pajina la ku sungula.)
10 Yehovha a a swi vona swikarhatu leswi Yobo a a kumana na swona. Leswi a a mu rhandza, a mu pfunile swaku a tiyisela a tlhela a tama a tshembeka. Yehovha a vulavule na Yobo a mu khumbukisa swaku a ni wutlharhi la likulu ni swaku wa va hlayisa vanhu va yena. A vulavule hi swiharhi swa ku hlamalisa leswi a nga swi yentxa. (Yobo 38:1, 2; 39:9, 13, 19, 27; 40:15; 41:1, 2) A tlhele a tirhisa jovhem leli vitaniwaka Elihu swaku li tiyisa Yobo. Elihu a tiyisekise Yobo swaku Yehovha minkama hinkwayu a tinyimisele ku hakela malandza ya yena lama tiyiselaka. Naswona, hi ku pfuniwa hi Yehovha Elihu a mu layile Yobo, a tlhele a mu pfuna swaku a tshika ku tipimisela, kambe a khumbuka swaku i mutsongo loko a pimanisiwa na Yehovha lweyi a nga yentxa swilo hinkwaswu. (Yobo 37:14) Yehovha a tlhele a nyika Yobo ntirho wa ku khongelela vanghanu va yena va vanharhu lava a va djohile. (Yobo 42:8-10) Se hina ke, Yehovha a hi pfunisa ku yini loko hi kumana ni swikarhatu?
11. Bibele li hi pfunisa ku yini loko hi kumana ni swikarhatu?
11 Namuntlha Yehovha a nga vulavuli na hina hi ku kongoma ku fana ni leswi a nga swi yentxa ka Yobo. Kambe a vulavula na hina hi ku tirhisa Bibele. (Rom. 15:4) Wa hi tiyisa ni ku hi nyika ntshembo wa leswi a nga ta hi yentxela swona ka nkama lowu taka. Pimisa hi tindzimana leti nga hi pfunaka loko hi kumana ni swikarhatu. Ka Bibele Yehovha a hi tiyisekisa swaku a ku na nchumu hambi o va xikarhatu xa xikulu, lexi nga swi kotaka “ku hi hambanisa ni lirhandzu leli Xikwembu xi nga na lona hi hina”. (Rom. 8:38, 39) Li tlhela li hi tiyisekisa swaku “Yehovha a kusuhi ni hinkwavu lava mu vitanaka” hi xikhongelo. (Pis. 145:18) Yehovha a li loko hi mu tshemba hi nga swi kota ku tiyisela swikarhatu hinkwaswu funtshi hi nga swi kota ku tsaka hambiloko hi kumana ni swikarhatu. (1 Kor. 10:13; Yak. 1:2, 12) Bibele li tlhela li hi tiyisekisa swaku swikarhatu leswi hi kumanaka na swona i swa nkamanyana funtshi i switsongo loko swi pimanisiwa ni minkateko leyi hi nga ta yi kuma ku nga li khale. (2 Kor. 4:16-18) Yehovha a hi byela swaku a ta helisa hinkwavu lava hi yentxaka hi hlupheka ku nga Sathana ni lava va nyimaka na yena. (Pis. 37:10) Indje ti kona tindzimana leti u nga ti vekisa ka nhloko leti nga ta ku pfuna ku tiyisela loko u kumana ni swikarhatu ka nkama lowu taka?
12. Yehovha a lava swaku hi yentxa yini kuva hi pfuneka hi Bibele?
12 Yehovha a lava swaku hi tinyika nkama wa ku djondza Bibele nkama ni nkama hi tlhela hi pimisa hi leswi hi swi djondzaka. Loko hi hanya hi leswi hi swi djondzaka, lipfumelo la hina li ta tiya, funtshi hi ta va vanghanu va vakulu va Papayi wa hina Yehovha. Se leswo swi ta hi pfuna ku tiyisela swikarhatu. Phela loko hi tshemba Bibele, Yehovha a ta hi pfuna hi ku tirhisa moya wa yena wa ku kwetsima. Funtshi moya wolowo wa ku kwetsima wu ta hi nyika “matimba ya makulu lama tlulaka hinkwaswu” lama nga ta hi pfuna ku tiyisela swikarhatu. — 2 Kor. 4:7-10.
13. Swilo leswi humesiwaka hi “mutirhi wa ku tshembeka ni wa ku tlhariha” swi hi pfunisa ku yini ku tiyisela?
13 Yehovha a pfuna “mutirhi wa ku tshembeka ni wa ku tlhariha” swaku a humesa mabuku, mavhidiyo ni mamuzika lama hi pfunaka ku tiyisa lipfumelo la hina hi tlhela hi va vanghanu va Xikwembu. (Mat. 24:45) Hi fanele hi tikhorisa hi malulamiselo lawa ya lisima. Makwerhu mun’wana wa wansati lweyi a tshamaka Estados Unidos a vule leswi a titwisaka xiswona hi swilo leswi mutirhi wa ku tshembeka ni wa ku tlhariha a swi humesaka. A te: “Ka 40 wa malembe lawa ni nga na wona na ni tirhela Yehovha, ni ringiwile makhambi ya manyingi.” Phela swikarhatu a swi yo vuya ka makwerhu lweyi. Vhovho wa yena a file ka nghozi ya movha lowu a wu fambisiwa hi munhu wa ku dakwa, vapsali va yena va vabye hintamu va gama va fa, naswona yena a biwe hi cancro makhambi mambirhi. Se, impsini swi nga mu pfuna ku tiyisela? A tlhele a ku: “Minkama hinkwayu Yehovha a a ni pfuna, mabuku ni mavhidiyo lawa mutirhi wa ku tshembeka ni wa ku tlhariha a ma humesaka ma ni pfunile ku tiyisela swikarhatu swa mina. Ku fana na Yobo, na mina ni nga vula swaku a ni nge “tshiki ku tshembeka, anze ni fa!” — Yobo 27:5.
Hi nga va pfunisa ku yini vamakwerhu? (Vona paragrafu 14)
14. Yehovha a va tirhisisa ku yini vamakwerhu swaku va hi pfuna ku tiyisela? (1 Vatesalonika 4:9)
14 Yehovha a djondzisa vanhu va yena swaku va rhandzana va tlhela va tiyisana loko va kumana ni swikarhatu. (2 Kor. 1:3, 4; lerha 1 Vatesalonika 4:9.) Ku fana na Elihu, vamakwerhu va swi lava ku hi pfuna loko hi kumana ni swikarhatu. (Mint. 14:22) Hi xikombiso, Pimisa hi leswi vamakwerhu va nga mu pfunisa xiswona makwerhu Diane nkama lowu yena ni nuna wa yena a va vabya hintamu. Makwerhu Diane a li: “Phela a swi hi karhatela hintamu. Kambe ka tiwheti hinkwatu leti, hi swi vonile swaku Yehovha a a hi pfuna ni swaku wa hi rhandza. Vamakwerhu va hi pfunile, a va hi pfuxela, va hi fonela va tlhela va hi pfuna ku tiyisela. Leswi ni kalaka ni nga fambisi movha, vamakwerhu a va ta va ta ni teka swaku ni ya mintlhanganwini ni tlhela ni ya chumayela.” Phela swi tsakisa ndjhani ku lumba ndjangu lowu wa vamakwerhu lava rhandzanaka!
KHENSA LIRHANDZU LA YEHOVHA
15. Yehovha a hi pfunisa ku yini swaku hi tiyisela swikarhatu?
15 Hinkwerhu hi kumana ni swikarhatu. Kambe, hilani se hi nga djondza hi kona, minkama hinkwayu Yehovha a ta hi pfuna swaku hi tiyisela. Ku fana ni papayi wa lirhandzu, minkama hinkwayu Yehovha wa hi vhikela. A kusuhi na hina naswona a tinyimisele ku hi yingisa loko hi kombela ku pfuniwa. (Esa. 43:2) Hi nga swi kota ku hlula swikarhatu leswi hi kumanaka na swona, hikusa Yehovha a hi nyika hinkwaswu leswi hi swi lavaka swaku hi tiyisela. A hi nyike nyiko ya ku khongela, Bibele, mabuku, mavhidiyo ni vamakwerhu lava hi pfunaka minkama hinkwayu.
16. Hi nga yentxa yini swaku Yehovha a tama a hi vhikela?
16 Hi mu khensa hintamu Papayi wa hina Yehovha hileswi a hi vonelelaka. “Ha tsaka hi mhaka ya yena.” (Pis. 33:21) Ndlela ya yinene ya ku komba Yehovha swaku ha swi khensa leswi a hi nyikaka swona swaku a hi pfuna, i ku tikhorisa hi swona. Loko hi yentxa hinkwaswu leswi hi nga swi kotaka swaku hi yingisa Yehovha hi tlhela hi yentxa ku rhandza ka yena, a ta tama a hi vhikela. — 1 Ped. 3:12.
LISIMU 30 Tatana, Xikwembu ni Munghanu wa Mina