1-2. Hi wini ntshembo wa ku tsakisa lowu vanhu va Yehovha va nga na wona?

KU VA ni ntshembo i swa lisima hintamu. Van’wana va tshemba swaku va ta va ni wukati la kahle, va ta va ni vana lava nga ni wutomi la kahle kumbe swaku va ta hanya ka mavabyi ya vona. Na hina Vakreste hi nga navela leswi fanaka. Kambe ntshembo wa wukulu lowu hi nga na wona i wa ku kuma wutomi la ku kala li nga heli hi tlhela hi hanya ni vanhu lava hi va rhandzaka lava va nga ta pfuxiwa.

² Mupostolo Pawulo a te: ‘Leswi niswilanguteleke ka Xikwembu . . . hi leswaku lavolulama ni lavangalulamangiki vatapfuka kufeni.’ (Mint. 24:15) Pawulo a a nga li wa ku sungula ku vula swaku lava nga fa va ta pfuka. Yobo na yena a vulavule hi ku pfuka ka vafi. Phela a a kholwa swaku Xikwembu xi ta mu pfuxa a kufeni. — Yobo 14:7-10, 12-15.

3. I mpsini leswi buku la 1 Vakorinto ndzima 15 li nga hi pfunaka hi swona?

³ “Kupfuka ka vafi” i yin’we ya ‘tidjondzo letosungula ta Wukreste’. (Hev. 6:1, 2) Leswi Pawulo a nga swi vula hi ku pfuxiwa ka lava nga fa hi swi kuma ka 1 Vakorinto ndzima 15. Leswi a nga swi vula swi nga va swi va tiyisile Vakreste va nkama wa yena. Hambi ku li khali na hi tshemba swaku lava nga fa va ta pfuxiwa, buku la 1 Vakorinto ndzima 15 li nga hi pfuna swaku hi tiyisa ntshembo lowu.

4. I mpsini swi hi yentxaka hi kholwa swaku lava nga fa va ta pfuxiwa?

⁴ Ku pfuxiwa ka Yesu Kreste ku hi yentxa hi kholwa swaku lava nga fa va ta pfuxiwa. Phela leswi a ku li mahungu ya ku tsakisa lawa Pawulo a a chumayela aKorinto. A a byela vanhu swaku Yesu a pfuxiwile. (1 Kor. 15:1, 2) Pawulo a vule swaku Vakreste lava a va nga pfumeli swaku Yesu a pfuxiwile, lipfumelo  la vona a li nga pfuni nchumu. (1 Kor. 15:17) Ku pfuxiwa ka Yesu Kreste ku hi yentxa hi kholwa swaku lava nga fa va ta pfuxiwa.

5-6. Marito lama nga ka 1 Vakorinto 15:3, 4, ma vula yini?

⁵ Ku ni 3 wa minchumu leyi Pawulo a nga vulavula hi yona a nkama a nga tsala hi ku pfuxiwa ka vafi. 1) ‘Yesu afele swidjoho swa hina’. 2) “Alahliwile sirheni”. 3) ‘Ava apfuxiwa kufeni hi siku la wunharhu, hilaha Matsalwa mavulaka hakona’. — Lerha 1 Vakorinto 15:3, 4.

⁶ Swi hi pfuna hi yini ku tiva swaku Yesu a file, a lahliwa a gama a pfuxiwa? Muprofeta Esaya a vule swaku Mesiya a ‘a ta susiwa ka tiku la lava hanyaka’ naswona a “a ta lahliwa ni vanhu va mahanyelo ya kubiha.” Kambe a ka ha ni swin’wana leswi a swi ta yentxeka. Esaya a tlhele a vula swaku Mesiya a a ta rhwala “xidjoho xa vanhu va vanyingi”. Yesu a swi yentxile leswo hi ku hi ponisa hi ku fa ka yena. (Esa. 53:8, 9, 12; Mat. 20:28; Rhom. 5:8) Leswi Yesu a nga fa, a lahliwa a tlhela a pfuxiwa, swi hi yentxa hi kholwa swaku hi ta ponisiwa ka lifu ni xidjoho naswona hi ta tlhela hi vona maxaka ya hina lama nga fa loko ma ta pfuxiwa.

7-8. I yini lexi nga pfuna Vakreste leswaku va kholwa swaku Yesu a pfuxiwile?

⁷ Leswaku hi kholwa swaku lava nga fa va ta pfuxiwa hi fanele hi kholwa swaku Yesu a pfuxiwile. I mpsini swi hi kholwisaka swaku Yehovha a pfuxe Yesu?

⁸ Vanhu vanyingi va mu vonile Yesu nkama a nga pfuxiwa naswona va patsi ni ku byela van’wana. (1 Kor. 15:5-7) Munhu wa ku sungula lweyi Pawulo a nga vulavula hi yena ka lava nga vona Yesu loko se a pfuxiwile hi mupostolo Petro. Hambi hi vadjondzisiwa van’wana va vule swaku Petro a mu vonile Yesu na a pfuxiwile. (Luk. 24:33, 34) Naswona a tlhele a voniwa hi vapostolo va yena va 12. Hi wugamu Yesu “atlhele ahumelela hi nkama wun’we ka vamakwavu” lava tlulaka 500. Leswo swi yentxeke aGalileya hi siku leli ku vulavuliwaka hi lona ka Matewu 28:16-20. Yesu a tlhele ‘ahumelela ka Yakobe’ lweyi a a li makwavu wa yena, lweyi a a nga kholwi swaku hi Mesiya. (Yoh. 7:5) Loko se a vone Yesu na a pfuxiwile Yakobe a kholwile ka yena. Phela kolomuyani ka lembe la 55 ka nkama wa vapostolo, nkama Pawulo a nga tsalela Vakorinto ka ku sungula, vanhu va vanyingi lava nga vona Yesu na a pfuxiwile a va ha hanya. Hinkwavu lava a va kanakana a va ta vutisa ka vona.

9. Hi ku ya hi Mintirho 9:3-5, i mpsini leswi a swi yentxa Pawulo a kholwa swaku Yesu a pfuxiwile?

⁹ Hi ku famba ka nkama Yesu a game a humelela ka Pawulo. (1 Kor. 15:8) Pawulo a a li ndleleni ya ku ya Damaska nkama a nga twa rito la Yesu lweyi a nga pfuxiwa a tlhela a vona ni ku phatima ka yena. (Lerha Mintirho 9:3-5.) Leswi nga yentxekela Pawulo ku ve xikombiso xin’wana xa ku Yesu a pfuxiwile hikakunene. — Mint. 26:12-15.

10. I yini leswi Pawulo a nga swi yentxa hi mhaka leswi a a kholwa swaku Yesu a pfuxiwile?

¹⁰ Leswi Pawulo a nga swi vula hi ku pfuxiwa ka Yesu swa kholwisa hikusa a a hlupha Vakreste nkama Yesu na a nga se humelela ka yena. Leswi Pawulo se a a kholwa swaku Yesu a pfuxiwile, a tirhe hintamu na a lwela ku pfuna van’wana swaku na vona va kholwa. Pawulo a tiyisele ku biwa, ku petiwa djele ni ku tshovekeliwa hi boti a matini hi mhaka leswi a a chumayela swaku Yesu a file a tlhela a pfuxiwa. (1 Kor. 15:9-11; 2 Kor. 11:23-27) Pawulo a a kholwa swaku Yesu a pfuxiwile ku feni  funtshi a a tinyimisele hambi hi ku dlayiwa na a chumayela. Leswi nga vuliwa hi Vakreste va ku sungula swi hi yentxa hi kholwa swaku Yesu a pfuxiwile naswona swi tiyisa ntshembo wa hina wa leswaku lava nga fa va ta pfuxiwa.

11. Hi mhaka muni vanhu van’wana aKorinto a va pimisa swaku lava nga fa a va nge pfuxiwi?

¹¹ Vanhu van’wana ka doropa la Korinto a va li ni mavonelo ya ku kala ma nga li manene hi ku pfuxiwa ka vafi. Naswona a va patsa ni ku vula swaku ‘vafi avangepfuki’. Hi mhaka muni? (1 Kor. 15:12) Hi mhaka a Atena ku nga doropa lin’wana la Grécia, a ku ni vafilozofu lava a va swi vona ku li wuphunta ku kholwa swaku Yesu a pfuxiwile. Mapimiselo wolawu ma nga ha va ma khumbi vanhu van’wana aKorinto. (Mint. 17:18, 31, 32) Van’wana a va nga kholwi swaku vafi va nga pfuxiwa hikakunene. A va pimisa swaku ku va munhu “a file” hi loko a ni swidjoho kambe loko munhu se a hundzukile a va Mukreste swo fana ni loko se “a hanya” hikusa a rivaleliwe swidjoho swa yena. Leswi a swi kombisa swaku a va na lipfumelo. Loko Xikwembu a xi nga mu pfuxanga Yesu a hi nga ta rivaleliwa swidjoho. Hi mhaka leyo, lava kalaka va nga kholwi swaku lava nga fa va ta pfuxiwa a va na ntshembo. — 1 Kor. 15:13-19; Hev. 9:12, 14.

12. Hi ku ya hi 1 Petro 3:18, 22, hi kwini ku hambana ka ku pfuxiwa ka Yesu ni ka lava nga pfuxiwa na a nge se fa?

¹² Pawulo a a swi tiva swaku ‘Kreste apfuxiwile xikarhi ka vafi.’ Ku pfuxiwa ka Yesu a ku hambanile ni ku pfuxiwa ka vanhu lava nga pfuxiwa na a nge se fa hikusa vona va tlhele va fa. Pawulo a vule swaku Yesu a ve wa ku sungula ka lava nga fa. Hi mhaka muni? Hikusa hi yena wa ku sungula ku pfuxiwa a ya hanya matilweni.  — 1 Kor. 15:20; Mint. 26:23; lerha 1 Petro 3:18, 22.

13. Hi kwini ku hambana loku Pawulo a nga ku kombisa ka Adamu na Yesu?

¹³ Ku fa ka munhu mun’we ku va hanyisisa ku yini vanhu va ku tala? Pawulo a nyikela nhlamulu leyi twalaka. A kombise ku hambana ka leswi xidjoho xa Adamu xi nga swi tisela vanhu ni leswi lifu la Yesu li nga swi yentxa. Loko a vulavula hi Adamu, Pawulo a te: ‘Lifu livangiwe hi munhu mun’we’. Xidjoho xa Adamu xi mu tisele lifu, yena ni vana va yena. Na hina ha ku twa ku vava hi mhaka ku kala ku yingisa ka Adamu kambe leswi Xikwembu xi nga pfuxa Yesu hi ta va ni wutomi la ku tsakisa! “Kupfuka ka vafi nakona kutisiwile hi munhu mun’we” ku nga Yesu Kreste. Pawulo a te: ‘Kukotisa leswi hinkwavu vafaka hikolaho ka Adamu, hi ndlela yoleyo, hinkwavu vatatlhela vapfuxiwa hikolaho ka Kreste.’ — 1 Kor. 15:21, 22.

14. Adamu a ta pfuxiwa? Tlhamusela.

¹⁴ Loko Pawulo a ku ‘hinkwavu vafa hikolaho ka Adamu’ a a lava ku vula yini? A a pimisa hi vanhu hinkwavu lava psaliwaka na va ni xidjoho hi mhaka ya Adamu. (Rhom. 5:12) Adamu a nga ta ‘tlhela apfuxiwa’. Lifu la Yesu a li tirhi ka yena hi mhaka nkama a nga djohela Xikwembu a a li munhu wa ku kala a nga na xidjoho. Leswi nga yentxekela Adamu swa fana ni leswi nga ta yentxekela lava Yesu a nga ta va yavanyisa tani hi “timbuti” hikusa va ta helisiwa swa wugamu. — Mat. 25:31-33, 46; Hev. 5:9.

15. Loko ku vulavuliwa hi vanhu “hinkwavu” lava nga ta pfuxiwa hikolaho ka Kreste ku patsiwa na vamani?

¹⁵ Vona swaku Pawulo a te: “Hinkwavu vatatlhela vapfuxiwa hikolaho ka Kriste.” (1 Kor. 15:22) Pawulo a a tsalela Vakreste lava  nga totiwa va Korinto lava a va ta pfuxiwa swaku va ya hanya atilweni. Vakreste volavo a va li “lavavitaniweke kuva vahlawuliwa va Xikwembu hi kubasisiwa ha Kriste Yesu”. Nakambe Pawulo a vulavule hi “lavafeleke ka Kriste”. (1 Kor. 1:2; 15:18; 2 Kor. 5:17) Ka karta lin’wana Pawulo a tsale a ku: ‘Hihlanganisiwile na yena hi kufa hi lifu lelifanaka ni la yena’. Hi ta tlhela “hipfuka kufeni hi kupfuka loku kufanaka ni kupfuka ka yena.” (Rhom. 6:3-5) Yesu a pfuxiwe na a li ntsumi a ya tilweni. Ni Vakreste hinkwavu lava nga totiwa va ta pfuxiwa na va fana ni tintsumi.

16. Loko Pawulo a ku Yesu a a li wa ku sungula a a lava ku vula yini?

¹⁶ Pawulo a vule swaku Yesu Kreste a a tava wa ku sungula ku pfuxiwa ka lava nga fa. Khumbuka swaku ku ni vanhu van’wana lava nga tshama va pfuxiwa swaku va hanya lani misaveni ku fana na Lazaru. Kambe Yesu a a li wa ku sungula ku pfuxiwa a tlhela a nyikiwa wutomi la ku kala li nga heli swaku a ya hanya matilweni. Hi ku hlaya swaku Yesu a a ta va wa ku sungula, Pawulo a a lava ku vula swaku a ku ta va ni van’wana lava va nga ta pfuxeliwa ku ya hanya matilweni. Phela vapostolo ni Vakreste lava totiweke na vona a va ta hanya na Yesu amatilweni.

17. Vatotiwa a va ta pfuxiwa siku muni swaku va ya hanya matilweni?

¹⁷ A nkama Pawulo a nga tsala a karta la Vakorinto, lava a va ta ya hanya matilweni a va nga se sungula ku pfuxiwa. Pawulo a vule swaku leswo a swi ta yentxeka ka nkama lowu taka, a te: ‘Mun’wana ni mun’wana atapfuxiwa hi nkama wa yena: Worhanga i Kreste xinga xo xitshembiso; kutani loko Kreste ata, lava vangava va yena vatalandza.’ (1 Kor. 15:23; 1 Tes. 4:15, 16) Swoswi hi hanya ka nkama wolowo wa ku ta ka Kreste. Vapostolo ni Vakreste lava totiweke lava nga fa, a va fanele va nyimela ku ta ka Yesu swaku va ta kuma hakelo ya vona a matilweni i nga ku pfuka “kufeni hi kupfuka loku kufanaka” ni ka Yesu.

18. a) Hi mhaka muni hi kholwa swaku ku ni van’wana lava nga ta pfuxiwa handle ka lava nga ta hanya matilweni? b) Hi ku ya hi 1 Vakorinto 15:24-26, i mpsini leswi nga ta yentxeka amatilweni?

¹⁸ Se ku ta yentxeka yini hi Vakreste va ku tshembeka lava va kalaka va nga langiwanga swaku va ya hanya na Yesu amatilweni? Na vona va ta pfuxiwa! Bibele li vula swaku Pawulo ni van’wana lava nga ta hanya amatilweni va ta kuma “kupfuxiwa lokorhanga axikarhi ka lava feke.” (Filp. 3:11, NM) Leswo swi  kombisa swaku a hi vatotiwa ntsena lava nga ta pfuxiwa, ku ni vanhu van’wana lava na vona va nga ta pfuxiwa. Leswi swi pfumelelana ni leswi Yobo a nga vula swaku swi ta yentxeka ka nkama lowu taka. (Yobo 14:15) Hi nkama wa ku ta ka Yesu “lava vangava va yena” va ta va na yena matilweni loko a helisa mimfumu hinkwayu ya misava. Naswona ‘nala lweyi wohetelela lweyi angatahelisiwa i lifu’. Phela hinkwavu lava nga ta pfuxiwa swaku va ya hanya matilweni a va nge he tshuki va fa. Kambe ku ta yentxeka yini hi lava va nga ta hanya lani misaveni? — Lerha 1 Vakorinto 15:24-26.

19. Ku ta yentxeka yini hi lava va nga ta hanya lani misaveni?

¹⁹ Ku ta yentxeka yini hi lava va nga ta hanya lani misaveni? Va nga tiyisiwa hi marito ya Pawulo lawa ma nge: ‘Leswi niswilanguteleke ka Xikwembu . . . hi leswaku lavolulama ni lavangalulamangiki vatapfuka kufeni.’ (Mint. 24:15) I ntiyisu swaku a ku na vanhu lava kalaka va nga lulamanga lava va nga ta ya hanya matilweni. Hi mhaka leyo, ndzimana leyi yi vulavula hi vanhu lava nga ta pfuxiwa swaku va ta hanya lani misaveni.

20. I mpsini leswi ku kholwisaka swaku lava nga fa va ta pfuxiwa?

²⁰ Ha kholwa swaku lava nga fa “vatapfuka” naswona va ta kuma wutomi la kukala li nga heli lani misaveni. Tiyiseka swaku swoleswo swi ta yentxeka hikakunene. Swa tsakisa ku tiva swaku vanhu lava hi va rhandzaka kambe va nga fa va ta pfuka. Va ta pfuxiwa nkama vatotiwa va nga ta fuma ‘swin’we na Kreste malembe ya 1.000.’ (Nhla. 20:6) Na wena tiyiseka swaku loko ho tshuka u fa na Mfumu wa Yesu wa 1.000 wa malembe wu nga se sungula, u ta pfuxiwa. Phela “kulangutela [loku] akuhikhomisi tingana”. (Rhom. 5:5) Ku tiva swaku lava va nga fa va ta pfuxiwa swi hi yentxa hi tiya hi tlhela hi tirhela Yehovha na hi tsakile. Kambe ka ha ni swin’wana leswi hi nga swi djondzaka ka 1 Vakorinto ndzima 15, hi lani hi nga ta swi vona ha kona ka nhlokomhaka leyi landzelaka.