U ti lerhe kahle tinhlokomhaka ta Murindzi wa lembe leli? A wu ta swi hlamulisa ku yini swivutiso leswi landzelaka:

Marito lama nga ka Yakobo 5:11 lawa ma nge: “Yehovha a ni ntwelawusiwana ni timpsalu” ma hi djondzisa yini?

Ha swi tiva swaku Yehovha a hi komba timpsalu ta yena hi ku hi rivalela loko hi djoha. Yakobo 5:11 yi kombisa swaku lirhandzu leli Yehovha a nga na lona hi hina li mu yentxa a hi pfuna. Naswona na hina hi fanele hi mu tekelela. — Murindzi 01/21 paj. 21.

Hi mhaka muni Yehovha a yentxe swaku ku va ni vanhu lava rhangelaka van’wana?

A yentxe leswo hi mhaka wa hi rhandza. Leswo swi yentxa swaku ndjangu wa Yehovha wu tirha kahle wu tlhela wu va ni ku rhula. Loko hi landzela lunghiselelo leli swi ta hi vevukela ku tiva swaku i mani lweyi a faneleke a yentxa swiboho ni leswaku hi vamani va faneleke va yentxa leswi nga bohiwa. — Murindzi 02/21 paj. 3.

Hi mhaka muni hi fanele hi tivonela loko hi tirhisa ma aplicativo ya ku rhumela mamensajem?

Loko hi langa ma aplicativo lawa hi nga ta nghena ka wona hi fanele hi tivonela nkama hi langaka vanghanu lava hi nga ta bula na vona. Leswo swa karhata ku swi yentxa ngopfungopfu loko grupu la kona li li likulu. (1 Tim. 5:13) Naswona swi ni khombo ku rhumela mamensajem lawa hi kalaka hi nga swi tivi swaku ma vulavula ntiyiso, naswona a hi swinene ku tirhisa swilo swa nhlengeletanu swaku hi tendera manegosiyu ya hina. — Murindzi 03/21 paj. 31.

Hi mhaka muni Yehovha a pfumelele swaku Yesu a hluphiwa a tlhela a dlayiwa?

Xa ku sungula, Yesu a hayekiwe ka mhandzi swaku a ponisa Vayuda ka leswi a va rhukiwe hi swona. (Gal. 3:10, 13) Xa wumbirhi, Yehovha a a lunghiselela Yesu swaku a ta kota ku wu yentxa kahle ntirho wa ku va Muprista wa Mukulu. Xa wunharhu, leswaku a kombisa swaku vanhu va nga swi kota ku tshama va tshembekile hambiloko va kumana ni mindzingo ya ku karhata hintamu. (Yobo 1:9-11) — Murindzi 04/21 mapaj. 16-17.

U nga yentxa yini loko swi karhata ku kuma vanhu ka ntirho wa ku chumayela?

Zama ku kuma vanhu hi minkama leyi va tolovelaka ku va kona makaya. Zama ku chumayela hi tindlela ta ku hambana, ta ku fana ni ku tsala makarta. — Murindzi 05/21 mapaj. 15-16.

Mupostolo Pawulo a a lava ku vula yini loko a ku: “Ni file hi mhaka ya Nawu?” (Gal. 2:19)

Nawu wa Moxe a wu pfuna vanhu swaku va rivaleliwa swidjoho ni ku kongomisa Vayisrayele ka Nawu wa Kreste. (Gal. 3:19, 24) Leswo swi yentxe swaku Pawulo a kombisa lipfumelo ka Yesu. Se loko Pawulo a te: “Ni file hi mhaka ya Nawu,” a a lava ku vula swaku se a a chunsiwile ka Nawu wa Moxe. — Murindzi 06/21 paj. 31.

Hi xini xikombiso xa ku tiyisela lexi Yehovha a hi vekelaka xona?

Yehovha a tiyisela ku chimisiwa ka vito la yena, kuva vanhu va yala swaku hi yena a nga ni mfanelo ya ku va fuma, ku kala ku yingisa ka vana va yena, mavunhwa ya Davulosi, ku vona ku hlupheka ka vanhu va yena lava a va rhandzaka, ku feliwa hi vanghanu va yena, vanhu lava hluphaka vanhu van’wana, ni ku vona vanhu lava wonhetelaka swilo leswi a nga swi yentxa. — Murindzi 07/21 mapaj. 9-12.

Hi xini xikombiso xa ku lehisa mbilu lexi Yosefa a nga hi vekela xona?

Yosefa a tiyiselile loko vamakwavu va yena va mu hlupha. Leswo swi mu pfune ku tiyisela nkama va nga mu lumbeta ni nkama a nga heta malembe ya manyingi na a li djele aGibita. — Murindzi 08/21 paj. 12.

I yini leswi buku la Hagayi 2:6-9, 20-22 li nga swi vula hi ku tsekatseka loku a ku ta va kona?

Vanhu van’wana a va nga ta ma tsakela mahungu ya ku tsakisa, kambe vanhu va vanyingi va tama va wu tsakela ntiyiso. Ku tsekatsekisiwa ka wugamu ku ta yentxeka loko Yehovha a ta helisa matiko. — Murindzi 09/21 mapaj. 15-19.

Hi mhaka muni hi nga fanelanga hi tshika ku chumayela?

Yehovha wa yi vona minzamu leyi hi yi yentxaka swaku hi chumayela naswona leswo swa mu tsakisa. Loko hi tama hi chumayela hi ta kuma wutomi la ku kala li nga heli. — Murindzi 10/21 mapaj. 25-26.

Levhitika ndzima 19 yi nga hi pfunisa ku yini ku hanya hi marito lama nge: “Kwetsimani ka mahanyelo ya n’wina”? (1 Ped. 1:15)

Marito lama nga ka 1 Pedru 1:15 ma susiwe ka Levhitika 19:2. Ka Levhitika ndzima 19 ku ni swikombiso leswi hi kombaka ndlela leyi hi nga ma tirhisaka hi yona marito lama nga ka 1 Pedru 1:15 ka wutomi la hina la siku ni siku. — Murindzi 12/21 mapaj. 3-4.