1. Hi mhaka muni Yesu a fanise wunghanu leli a nga na lona ni valandzeli va yena ni ndlela leyi tinyempfu ti hanyisanaka hi yona ni murisi wa tona?

 YESU a fanise wunghanu leli a nga na lona ni vadjondzisiwa va yena ni leswi tinyempfu ti hanyisaka xiswona ni murisi wa tona. (Yoh. 10:14) Swoleswo swa twala, hikusa tinyempfu ta mu tiva murisi wa tona, ti tlhela ti tiva ni rito la yena. Wanuna mun’wana lweyi a rhandzaka ku yendza a swi vonile swoleswo. Yena a te: “A hi lava ku susa tinyempfu mafoto, kambe a ti tshinelanga kusuhi na hina hikusa a ti nga ma tivi marito ya hina. Kambe nkama lowu ku nga fika djaha la litsongo li ti vitana, a ti hlwenga ku li landzela hikusa ti li tivile rito la lona.”

2-3. a) Valandzeli va Yesu va nga swi kombisisa ku yini swaku va li yingisa rito la yena? b) Hi ta djondza hi yini ka nhlokomhaka leyi ni ka leyi landzelaka?

² Leswi nga yentxekela wanuna lwiyani hi nga vulavula hi yena, swi hi khumbukisa leswi Yesu a nga swi vula hi tinyempfu ta yena kumbe vadjondzisiwa va yena, loko a te: “Ti ta yingisa rito la mina.” (Yoh. 10:16) Kambe leswi Yesu a nga matilweni, hi nga swi kotisa ku yini ku yingisa rito la yena? Ndlela yin’wana ya ku yingisa rito la Yesu i ku hanya hi leswi a hi djondzisaka swona ka wutomi la hina. — Mat. 7:24, 25.

³ Ka djondzo leyi ni leyi landzelaka hi ta djondza hi swilo leswi Yesu a nga vula swaku a hi fanelanga hi swi yentxa ni leswi a nga vula swaku hi fanele hi swi yentxa. Kambe swoswi a hi rhangeni hi ku vona swilo swimbirhi leswi Yesu a nga vula swaku hi fanele hi tshika ku swi yentxa.

4. Hi ku ya hi Luka 12:29, i yini lexi nga hi yentxaka hi “tshamela ku vilela”?

⁴ Lerha Luka 12:29. Yesu a byele valandzeli va yena swaku va fanele va tshika “ku tshamela ku vilela” hi swilo leswi va swi pfumalaka. Hi swi tiva kahle swaku ku yingisa leswi Yesu a nga swi vula i swinene naswona i wutlharhi. Kambe minkama yin’wana swi nga ha hi karhatela. Hi mhaka muni?

5. Hi mhaka muni van’wana va tshamela ku vilela hi swilo swa ku tihlayisa hi swona?

  ⁵ Vanhu van’wana va vilela hintamu hi swilo swa ku tihlayisa hi swona swa ku fana ni swakudla, mpahla ni ndhawu ya ku tshama ka yona. Hikusa van’wana va hanya ka matiko lawa ku nga ni wusiwana hintamu naswona swi karhataka ku kuma mintirho. Se swa va karhatela ku kuma male leyi va yi lavaka leswaku va hlayisa mindjangu ya vona. Kasi van’wana swi nga ha va karhatela ku kuma male ya ku tihlayisa hi yona hileswi va nga feliwa hi munhu lweyi a a tirha swaku a va hlayisa naswona mavabyi ya Coronavirus ma yentxe swaku vanhu va vanyingi va heleliwa hi mintirho. (Ekl. 9:11) Loko ku li swaku na hina hi kumana ni swikarhatu swa ku fana ni leswi, hi nga yentxa yini swaku hi yingisa marito ya Yesu lawa ma nge a hi fanelanga hi tshamela ku vilela?

6. Tlhamusela leswi nga yentxekela mupostolo Pedru.

⁶ Siku lin’wana, mupostolo Pedru ni vapostolo van’wana a va li ka boti ka Lwandle la Galileya. Ku game ku ba moya wa wukulu naswona va vone Yesu na a famba henhla ka mati. Se Pedru a te: “Hosi, loko ku li wena hikakunene, ni byeli swaku ni famba henhla ka mati ni ta ka wena.” Se loko Yesu a vitane Pedru swaku a ta ka yena, mupostolo Pedru a game a huma ka boti “a famba henhla ka mati.” Kambe, vona leswi nga gama swi yentxeka. “Loko a languta xidzedze, a sungula ku chava; loko a sungula ku mbombomela, a ba nyandha a ku: ‘Hosi, ni ponisi!’” Yesu a game a khoma Pedru hi voko, a mu ponisa. Khumbuka swaku nkama Pedru na a languta Yesu a swi kotile ku famba henhla ka mati, kambe nkama Pedru a nga sungula ku languta xidzedze, a chave hintamu a tlhela a kanakana a gama a mbombomela. — Mat. 14:24-31.

7. Hi djondza yini ka leswi nga yentxekela mupostolo Pedru?

⁷ Hi nga djondza minchumu ya lisima ka leswi nga yentxekela mupostolo Pedru. Phela nkama  a nga huma ka boti a famba ka mati, a nga zanga hi ku pimisa swaku a a ta xi chava xidzedze a tlhela a mbombomela. Naswona leswi Pedru a a swi lava a ku li ku famba henhla ka mati anze a ya fika lani Yesu a a li kona. Kambe leswi a kalaka a nga swi kotanga ku tama a languta Yesu, a sungule ku chava xidzedze. Phela namuntlha hi fanele hi va ni lipfumelo la ku tiya swaku hi lwisana ni swikarhatu leswi hi kumanaka na swona, ku fana na Pedru lweyi a a fanele a va ni lipfumelo la ku tiya leswaku a swi kota ku famba henhla ka mati. Loko hi nga ha mu tshembi Yehovha hi tlhela hi nga ha kholwi ka switshembiso leswi a hi tshembisaka swona, lipfumelo la hina li ta sungula ku mbombomela. Ku nga na mhaka swaku hi kumana ni swikarhatu swa ku tshamisa ku yini ka wutomi la hina, hi fanele hi tshemba swaku Yehovha a ta hi pfuna. Kambe hi nga swi yentxisa ku yini leswo?

8. I yini xi nga hi pfunaka ku kala hi nga tshameli ku vilela hi leswi hi nga ta tihlayisa hi swona?

⁸ Ku tshemba Yehovha swi hi pfuna ku kala hi nga tshameli ku vilela. Khumbuka swaku Papayi wa hina Yehovha lweyi a hi rhandzaka hintamu a hi tshembisa swaku a ta hi nyika leswi hi swi lavaka, loko hi rhangisa ku yentxa ku rhandza ka yena ka wutomi la hina. (Mat. 6:32, 33) Phela ku sukela khale Yehovha wa xi hetisisa xitshembiso lexi. (Det. 8:4, 15, 16; Pis. 37:25) Leswi Yehovha a hlayisaka swinyenyana ni maflori, hi nga tiyiseka swaku na hina a ta hi nyika swakudla ni swa ku yambala! (Mat. 6:26-30; Filp. 4:6, 7) Ku fana ni leswi lirhandzu li yentxaka vapsali va hlayisa vana va vona, na yena Yehovha lirhandzu la yena li mu yentxa a hlayisa vanhu va yena hi ku va nyika leswi va swi pfumalaka. Impela, hi nga tiyiseka swaku Yehovha a ta hi hlayisa!

9. U djondze yini ka leswi swi nga yentxekela nuna na nsati lava a va li vapfuli va ndlela va nkama hinkwawu?

⁹ Vona xikombiso lexi hi pfunaka ku vona ndlela leyi Yehovha a hi hlayisaka hi yona hi ku hi nyika leswi hi swi lavaka. Nuna na nsati lava va nga vapfuli va ndlela va nkama hinkwawu va fambe wora lin’we hi movha lowu se a wu karhalile va ya teka vamakwerhu vavasati lava a va tshama ka ndhawu leyi a ku tshama vanhu lava a va baleka nyimpi swaku va famba na vona mintlhanganwini. Se makwerhu wawanuna a game a ku: “Loko mintlhanganu se yi helile, hi game hi rhamba vamakwerhu lava, swaku hi ya dla na vona kambe hi game hi tsumbula swaku a hi nga na swakudla swa ku va nyika.” Kambe ku game ku yentxeka yini? Makwerhu wawanuna a game a vula leswi: “Loko hi fikile kaya, hi kume minkwama yimbirhi ya swakudla ka xipfalu, kambe a hi nga swi tivi swaku i mani a nga veka minkwama yoleyo. Phela Yehovha a hi nyike leswi a hi swi lava.” Hi ku famba ka nkama, movha wa vamakwerhu lava wu wonhekile. Phela a va ta wu lava swaku va wu tirhisa loko va ya chumayela, kambe a va nga na male ya ku wu lunghisa. Makwerhu lweyi a game a teka movha wa yena a wu yisa ka ndhawu leyi ku lunghisiwaka mimovha swaku a tiva swaku a ku ta laveka male muni leswaku a wu lunghisa. Hi nkama wolowo ku humelele wanuna mun’wana a mu vutisa leswi: “I movha wa mani lowu?” Makwerhu a game a mu hlamula a ku i wa yena naswona a lava ku wu lunghisa. Wanuna lwiyani a game a mu byela leswi: “U nga ha karhateki hi ku wu lunghisa, phela nsati wa mina a lava movha wa ku tshamisa xileswi ni wa kori yoleyi. Se u nga ni xavisela hi male muni?” Makwerhu lweyi a xavise movha wolowo a tlhela a kuma male ya ku yenela swaku a xava movha wun’wana. Naswona a game a ku: “Phela hi tsake hintamu hi leswi nga hi yentxekela hi siku lolelo, naswona a hi swi tiva swaku a swo suketana swi tiyentxekela kambe hi Yehovha lweyi a a hi pfuna.”

10. Tipisalema 37:5 yi hi pfunisa ku yini ku kala hi nga vileli hi leswi hi nga ta tihlayisa hi swona?

¹⁰ Loko hi yingisa marito ya Yesu hi tlhela hi nga tshameli ku vilela hi leswi hi nga ta tihlayisa  hi swona, hi nga tiyiseka swaku Yehovha a ta hi nyika hinkwaswu leswi hi swi lavaka. (Lerha Tipisalema 37:5; 1 Ped. 5:7) Pimisa hi swikarhatu leswi hi nga bula hi swona ka  paragrafu 5. Swi nga yentxeka Yehovha a tirhisa nhloko ya ndjangu kumbe mutholi wa wena swaku a ku pfuna hi ku ku nyika leswi u swi lavaka swaku u tihlayisa siku ni siku. Kambe hambiloko nhloko ya ndjangu yi nga ha swi koti ku hlayisa ndjangu wa yona, kumbe loko yi luzekeliwa hi ntirho, hi nga tiyiseka swaku Yehovha a ta tama a hi hlayisa hi tindlela tin’wana. Swoswi a hi voneni nchumu wun’wana lowu mudjondzisi wa munene a hi byelaka swaku a hi fanelelanga hi wu yentxa.

11. Hi ku ya hi Matewu 7:1, 2, Yesu a te hi fanele hi tshika ku yentxa yini, naswona hi mhaka muni minkama yin’wana swi nga karhataka?

¹¹ Lerha Matewu 7:1, 2. Yesu a a swi tiva swaku swi vevukile kuva vanhu lava nga ni xidjoho va tshamela ku vona swihoxo swa vanhu van’wana. Hi mhaka leyo a te: “Tshikani ku yavanyisa van’wana.” Hi nga ha zama hi tindlela hinkwatu ku kala hi nga va yavanyisi vanhu van’wana, kambe minkama ya yinyingi swi nga hi karhatela hi leswi hi nga ni xidjoho. Se hi nga yentxa yini loko hi tsumbula swaku hi tshamela ku yavanyisa van’wana? Hi fanele hi yentxa leswi hi nga swi kotaka swaku hi tirhisa marito lawa Yesu a nga ma vula loko a te: Tshikani ku yavanyisa van’wana.

12-13. Ku pimisa hi leswi Yehovha a a mu vonisa xiswona Davhida, swi nga hi pfunisa ku yini ku kala hi nga va yavanyisi van’wana?

¹² Ku pimisa hi leswi Yehovha a va vonisaka xiswona vanhu swi nga hi pfuna, hikusa Yehovha a vona swa swinene ka vona. Leswo hi swi vona ka wunghanu leli a a li na lona na Hosi Davhida, hambileswi a nga yentxa swihoxo swa swikulu. Yena a mbuyete na Batixeba a tlhela a rhumisa swaku va dlaya nuna wa yena. (2 Sam. 11:2-4, 14, 15, 24) Phela hi mhaka leswi Davhida a nga swi yentxa, yena ni ndjangu wa yena ku patsa ni vasati van’wana va yena va hlupheke hintamu. (2 Sam. 12:10, 11) Siku lin’wana, Davhida a kombise swaku a nga mu tshembi hi ku helela Yehovha hi ku rhuma vanhu swaku va konta vavanuna lava a va li masonchwa ya Israyele. Swi nga yentxeka Davhida a yentxe leswo hi leswi a a tibyela ni leswi a a va tshemba hintamu vavanuna lava a va lwa nyimpi aIsrayele. Kambe ku game ku yentxeka yini? Kolomu ka 70.000 wa Vayisrayele va game va fa hi mhaka ya ntungu lowu nga gama wu va kona! — 2 Sam. 24:1-4, 10-15.

¹³ Loko a wu tshama Israyele hi nkama wolowo a wu ta va u mu vonise ku yini Davhida? A wu ta mu yavanyisa u vula swaku Yehovha a nga fanelanga a mu komba timpsalu? Phela Yehovha a nga swi yentxanga leswo, hikusa a swi vonile swaku Davhida a a tisola naswona ku ni swilo swa swinene leswi a nga swi yentxa ka nkama lowu nga hundza. Hi mhaka leyo, Yehovha a mu rivalelile Davhida hambileswi a nga yentxa swidjoho swa swikulu. Yehovha a a swi tiva swaku Davhida a a mu rhandza hintamu naswona a a swi lava ku yentxa swa swinene. Impela, hi mu khensa hintamu Yehovha hi leswi a vonaka swilo swa swinene leswi hi swi yentxaka. — 1 Tiho. 9:4; 1 Tikro. 29:10, 17.

14. I yini lexi nga hi pfunaka ku kala hi nga yavanyisi vanhu van’wana?

¹⁴ Yehovha wa swi tiva swaku a hi minkama hinkwayu leyi hi nga ta kotaka ku yentxa swilo swa swinene. Na hina a hi fanelanga hi pimisa swaku vanhu van’wana a va nge te phazama, kambe hi fanele hi zama ku vona swilo swa swinene leswi va swi yentxaka. Phela swa vevuka ku vona swidjoho swa vanhu van’wana hi tlhela hi va yavanyisa, kambe lweyi a tekelelaka Yehovha a tirhisana kahle ni van’wana hambiloko a swi tiva swaku va phazama. Diamante leli kalaka li nge se polichiwa li nga ha tikomba na li bihile. Hambileswi li nga biha, munhu wa ku tlhariha a nga  txuvuki ku biha ka lona, kambe a pimisa hi lisima leli diamante lolelo li nga na lona ni leswi li nga ta tshamisa xiswona loko se li ta va li polichiwile. Yehovha na Yesu va fana ni munhu yelweyo wa ku tlhariha, se na hina hi fanele hi va tekelela hi ku zama ku vona swa swinene ka van’wana ku nga li swihoxo leswi va swi yentxaka.

15. Ku pimisa hi swiyimu leswi vanhu va nga ka swona swi nga hi pfunisa ku yini ku kala hi nga va yavanyisi?

¹⁵ I yini swin’wana leswi nga hi pfunaka ku kala hi nga yavanyisi van’wana? Zama ku pimisa hi leswi wutomi la vona li nga tshamisa xiswona. Siku lin’wana Yesu na a li tempeleni, a vone wansati wa xisiwana na a peta 2 wa mamoweda ya lisima la litsongo ka kaxa la minyikelo. Hambileswo, Yesu a nga zanga a tivutisa swaku hi mhaka muni wansati yelweyo a nga petanga male ya ku tlula yoleyo. Kambe handle ka ku pimisa hi male leyi wansati yelweyo a nga nyikela hi yona, a pimise hi leswi nga yentxa wansati yelweyo a nyikela ni xiyimu lexi a a li ka xona a tlhela a mu khensa hi minzamu leyi a nga yi yentxa. — Luk. 21:1-4.

16. U djondza yini ka leswi nga yentxekela makwerhu Veronica?

¹⁶ Leswaku hi vona lisima la ku pimisa hi swiyimu leswi vamakwerhu va nga ka swona a hi kambisiseni xikombiso xa makwerhu Veronica. Ka bandla leli a a li ka lona a vone makwerhu lweyi a a wundla n’wana na a li yexe. Makwerhu Veronica a vula leswi: “A ni vona ingi makwerhu yelweyo ni n’wana wa yena a va nga yentxi swa swinyingi bandleni. Se a ni va vona hi ndlela ya ku biha. Kambe siku leli ni nga huma nsimu ni makwerhu  yelweyo a ni byele hi swikarhatu leswi a a kumana na swona. A ni byele swaku n’wana wa yena a ni mavabyi lawa ma yentxaka swaku nhloko ya yena yi nga tirhi kahle. Ni tsumbule swaku makwerhu yelweyo a yentxa hinkwaswu leswi a nga swi kotaka swaku a hlayisa ndjangu wa yena a tlhela a wu pfuna swaku wu va ni wunghanu la linene na Yehovha. Hi mhaka mavabyi ya n’wana wa yena, minkama yin’wana a famba ka bandla lin’wana swaku a ya khoma kona mintlhanganu.” Makwerhu Veronica a tlhele a ku: “Phela a ni nge se tshama ni pimisa hi swikarhatu leswi makwerhu lwiyani a a kumana na swona. Swoswi ni swi nyika lisima naswona ni swi hlonipha hintamu hinkwaswu leswi makwerhu lwiyani a swi yentxaka swaku a kota ku tirhela Yehovha.”

17. I yini leswi Yakobo 2:8 yi hi byelaka swaku hi swi yentxa, naswona hi nga swi yentxisa ku yini?

¹⁷ Hi nga yentxa yini loko hi tsumbula swaku se hi sungula ku yavanyisa vamakwerhu van’wana? Hi fanele hi khumbuka swaku i swa lisima ku va hi rhandza vamakwerhu van’wana. (Lerha Yakobo 2:8.) Naswona hi fanele hi khongela, hi kombela Yehovha swaku a hi pfuna kuva hi tshika ku yavanyisa van’wana. Loko se hi khongelile, hi fanele hi hanya hi ku ya hi leswi hi nga swi kombela hi tlhela hi ya vulavula ni makwerhu lweyi hi nga mu yavanyisa. Ku yentxa leswo swi ta hi pfuna ku mu tiva kahle makwerhu lweyi hi nga mu yavanyisa. Hi nga mu kombela swaku hi famba na yena ka ntirho wa ku chumayela kumbe hi mu rhamba a ta dla na hina. Loko hi zama ku va tiva ku yampsa vamakwerhu va hina, hi ta va na hi tekelela xikombiso xa Yehovha na Yesu xa ku vona swilo swa swinene ka vanhu van’wana. Loko hi yentxa leswo, hi ta va na hi kombisa swaku ha swi yingisa leswi murisi wa munene a hi byelaka swona loko a ku tshikani ku yavanyisa van’wana.

18. Hi nga swi kombisisa ku yini swaku ha li yingisa rito la murisi wa munene?

¹⁸ Ku fana ni leswi tinyempfu ti yingisaka murisi wa tona, valandzeli va Yesu na vona va yingisa rito la yena. Loko hi tinyimisela ku kala hi nga vileli hintamu hi swilo leswi hi swi pfumalaka ni ku kala hi nga yavanyisi vanhu van’wana, Yehovha na Yesu va ta hi katekisa hintamu. Ku nga na mhaka swaku hi “ntlhambi wa wutsongo” kumbe va “tinyempfu tin’wana,” a hi tameni hi yingisa hi tlhela hi hanya hi leswi murisi wa munene a hi byelaka swona. (Luk. 12:32; Yoh. 10:11, 14, 16) Ka nhlokomhaka leyi landzelaka hi ta djondza hi swilo swimbirhi leswi Yesu a nga byela valandzeli va yena swaku va fanele va swi yentxa.