Nkama Yehovha a nga byela vanhu swaku va psalana va tata misava a a kombisa swaku misava hinkwayu yi ta va paradesi. (Gen. 1:28) Phela xilerhiso xolexo xi ta hetiseka ni ka lava nga ni ntshembo wa ku hanya lani misaveni ka nkama lowu taka. Phela misava a yi ngo to tekela ku va paradesi hikusa jardim la Edeni a la ha li kona. Se loko a nyimpi ya Armajedoni yi ta va se yi hundzile, swi ta lava hi tirha swinene swaku hi basisa misava leyi yi nga chimisiwa. Phela ku yendla leswo ku nga ta va matlangwani!

Vayisrayele na vona va ve ka xiyimu xa ku fana. Nkama va nga suka Babilona va tlhelela ka tiko la vona a va ni ntirho wawunyingi wa ku wu yendla hikusa se a ku hundza 70 wa malembe na ku nga tshami munhu ka tiko leliyani. Kambe Esaya a profete swaku hi ku pfuniwa hi Yehovha a va ta swi kota ku tlhela va pfuxeta tiko leliyani va li sasekisa. A te: “Tindhawu leti a ti li makhwati a ta ti ndzuluta ti fana ni Edeni, a ta ti yendla ti xonga ku fana ni jardim la Yehovha.” (Esa. 51:3)  Hi ku pfuniwa hi Yehovha, Vayisrayele va swi kotile ku yendla swaku tiko leliyani li va ndhawu ya ku saseka. Hi ku fana, lava nga ta hanya lani misaveni ka nkama lowu taka, va ta swi kota ku yendla swaku misava leyi yi va ndhawu ya ku xonga hi ku pfuniwa hi Yehovha. Se, hambi hi swoswi u nga swi kombisa swaku wa swi lava ku va kona ka ntirho wa ku pfuxeta misava swaku yi tlhela yi va paradesi.

Ndlela yin’wani ya ku yendla leswo i ku basisa kaya ka wena ni kusuhi ni lani u tshamaka kona, hambiloko vavhizinyu va wena va nga swi yendli leswo. U nga tlhela u pfunisa ka ku basisa ni ku lunghisa Tiyindlo ta Wugandzeli ni tindhawu leti ku khomeliwaka ka tona masembleya. Loko swiyimu swa wena swi ku pfumelela u nga tlhela u tinyikela swaku u ya pfunisa ka tindhawu leti ku nga humelela tinghozi. Loko u yendla leswo, u ta kombisa swaku u tinyimiselile ku pfunisa loko ku li ni xilaveko. Se, tivutisi leswi: ‘Hi yini mintirho yin’wani leyi ni nga yi djondzaka swoswi, leyi ni nga ta yi tirhisa ka nkama lowu taka loko Yehovha o ni pfumelela swaku ni va kona ka misava ya nyuwani?’

Nkama Yesu a nga pfuxa xintombhani xa Jayiro, a game a vula swaku va fanele va xi nyika swakudla hi xihantla. (Marku 5:42, 43) Phela a swi karhatanga ku nyika swakudla xintonbhani lexiyani xa 12 wa malembe. Kambe ka nkama lowu taka ku ta va ni ntirho wawunyingi lowu nga ta yendliwa loko Yesu a hetisisa xitshembiso xa yena lexi nge: “Hinkwavu lava nga masirheni va ta twa rito la yena, se va huma.” (Yoh. 5:28, 29) Hambileswi Bibele li kalaka li nga hi byeli hi ku kongoma swaku swi ta yendlekisa ku yini, swi nga yendleka lava va nga ta pfuxiwa, swi ta lava va pfuniwa swaku va kuma swakudla, ndhawu ya ku tshama ni mpahla. Se, u nga swi kombisisa ku yini ka ha li swoswi swaku wa swi lava ku va pfuna? A hi swi voneni.

Loko ku tivisiwa swaku ku ta mudjikelezi ka bandla la wena, indjhe wa mu rhamba swaku a ta dla kaya ka wena? Loko vamakwerhu lava a va tirha Betele va txintxiwa swaku va ya tirha ka bandla la wena kumbe kusuhi ni lani u tshamaka kona, kumbe loko mudjikelezi a nyimile ntirho wa yena, u nga va pfuna hi ku va lavela ndhawu ya ku tshama ka yona. Loko ku li swaku lani u  tshamaka kona ku ta va ni kongresu la ku hlawuleka, u nga tinyikela swaku u ya tirha na ntlhanganu wu nge se sungula kumbe loko se wu helile naswona u nga tlhela u tinyikela swaku u ya hoyozela vadelegadu.

Mintirho 24:15 yi li ku ta va ni vanhu vavanyingi lava nga ta pfuxiwa. Ku tala ka vanhu volavo va file na va nga djondzanga nchumu hi Yehovha, se hi nkama wolowo va ta nyikiwa mukhandlu wa ku mu tiva a naswona malandza ya ku tshembeka ya Yehovha hi wona ma nga ta va djondzisa. (Esa. 11:9) Makwerhu Charlotte lweyi a nga chumayela Europa, América do Sul ni África a nga wu voni nkama wa ku djondzisa lava nga ta pfuxiwa. Yena a vula leswi hi ku tsaka: “Ni swi nyimelile hintamu ku djondzisa vanhu lava nga ta pfuxiwa. Loko ni lerha hi munhu lweyi a nga hanya khale, ni tolovela ku tivutisa leswi: ‘Loko munhu lweyi a a mu tivile Yehovha, wutomi la yena a li ta va li yampsile.’ Ni swi nyimelile hintamu ku kontarela lava nga ta pfuxiwa hinkwaswu leswi va nga swi luza.”

Hambi hi vanhu va ku tshembeka va Yehovha lava va nga hanya na Yesu a nge se ta lani misaveni, swi ta lava va djondzisiwa. Hi xikombiso, pimisa hi ndlela leyi swi nga ta tsakisa hi yona ku tlhamusela Daniyele hi wuprofeta leli yena a nga li tsala kambe a nga li twisisi. (Dan. 12:8) Pimisa hi nkateko lowu hi nga ta va na wona wa ku tlhamusela Ruti na Nawomi swaku Mesiya a humile hi ka ndjangu wa vona. Impela swi ta tsakisa ku djondzisa vanhu hinkwavu lava, na hi nga ha hanyi ka misava leyi ya ku biha.

U nga yendla yini kuva u kombisa swaku wa swi navela ku ta djondzisa lava nga ta pfuxiwa ka nkama lowu taka? U nga yendla leswo hi ku tama u yampsisa madjondziselo ya wena ni ku tlhela u yengesela nkama lowu u wu hetaka na u chumayela. (Mat. 24:14) Hambiloko se u gugile kumbe u nga ha swi koti ku chumayela hi lani a wu navela hi kona hi mhaka swikarhatu swin’wani, u nga kombisa swaku wa swi lava ku ta djondzisa lava nga ta pfuxiwa ka nkama lowu taka hi ku yendla hinkwaswu leswi u nga swi kotaka ka ntirho lowu.

Pimisa hi swivutiso leswi swa lisima: Indjhe u swi nyimelile ku kuma tshomba la misava? Indjhe u lunghekile ku pfuxeta misava leyi swaku yi va paradesi? Ku pfuna ni ku djondzisa lava nga ta pfuxiwa? U nga kombisa swaku u lunghekile swaku u hanya hi lani ku nga heliki lani misaveni ka nkama lowu taka, hi ku yendla mintirho leyi swi nga ta laveka swaku yi yendliwa ka misava ya nyuwani.